حـــــيـــاتــــك والمــســحـــــوق

من خلال متابعة إعلانات التليفزيون لقيت إن الحياة ممكن تتغير لأسباب عمري ما توقعتها ..
يعني مثلا لو استخدمت أوكسي في البيت لإزالة البقع فكل البيت هيتملي فراشات وجناين وكأني في الجنة..
ومش بعيد ماما وبابا يرقصوا علي أغاني سيلين ديون قدامي..
أما في حالة ازالة بقعة لولبية معقدة مع اريال مثلا فيسود جو ألفة رهيب بين الأم والإبن صاحب المشكلة أو البقعة لدرجة إنها تبوسه عشان شالت البقعة يا سلام علي التضحية حاجة تبكي..

والراجل يقعد يتغزل في مراته ويقولها شعر مش عشان بيحبها ولكن عشان غاسلة وشها بلوكس ..معقول؟

أنا شايف ان المبالغة في الاعلانات ماشي بس في مبالغات غير مقبولة وبتستفزني جدا زي ان بلد كاملة ترقص عشان لقوا حل أكيد للبقع..ده لو كده يبقي الريس يوفر مساحيق ابادة بقع جامد جدا ويريح دماغه والبلد تهتف باسمه..
وواحدة حطت شامبو فجأة بقت سمية الخشاب ..ده ياريت جابوا اختلاف في شعرها ده حتي وشها نور ده شامبو ايه ان شاء الله ما انا بحط شامبو علطول وشعري ميفرقش عن شعر سامي العدل في حاجة..
واعلان تاني للسلطة بيخلي الزوج يموت في مراته عشان السلطة وحياته من غيرها سلطة ..معقول طبق سلطة يعمل كده ؟ايه الحياة السهلة دي؟ طيب ما انا عندي حل لجميع مشكلات الناس..طبق سلطة وشامبو ومسحوق جامد يعملوا احلي وأسعد أسرة..
ومش بعيد إبراهيم الفقي يعمل حلقة للسعادة إسمها "حياتك والمسحوق"..!

وياسلام بقي بجد علي اعلانات التلاجات والبوتاجاز سلملي علي الترماي بجد يعني ريهام عبد الغفور ماشية ترقص في الشقة عشان بوتجازها بيولع حلو ..وواحدة تانية بتبوس التلاجة من بقها "مش بق التلاجة يعني"..
عشان التلاجة بتسقع ..علي فكرة انا اما التلاجة مبتسقعش مش بضربها بالشلوت فعشان كده اما بتسقع حلو مش ببوسها لانها بتأدي وظيفتها ومتقنعنيش ان في عشرة مع الجماد مش معقول امشي في يوم واقول ان انا بوست تلاجتي الصبح ورقصت مع الوتاجاز عشان سخنلي العيش ..
وبعدين لقيت البقع راحت رحت متحزم وراقص ..!
الاعلان الوحيد اللي كان صادق بجد هو اعلان "ناموس عمال يقرص يا اخويا مش عارف انام منه يا اخويا" بتاع كيتو ..لأن دي فعلا مشكلة رخمة والناموس بيضايق وبيرخم ..والراجل اما حل المشكلة نام مبسوط ..هو صحيح بالغ شوية وهو بينام بس مش مشكلة دي..
ده بعد كده روشتات الأطباء النفسيين تبقي غسالة يونيفرسال وبوتاجاز ومسحوق كويس من أجل حياة أفضل..
أما أكتر إعلان مبالغ و"كلب"..أنا أسف علي وصف الإعلان ب"كلب" بس هو مقدرش أقول إنه اعلان رخم مثلا او غبي لأ هو فعلا إعلان "كلب"..هو إعلان الضرايب ..الناس بترقص وفرحانة عشان مصلحة الضرايب بتأخد حقها ..والكلام ده في مصر!..
يا أخي"تييييييييييت"..مقطوعة للرقابة..
وطبعا مننساش إن سر قوة محمد بركات هو جبنة طعمة وسر قوة تريكة هو عصير فاشل كده مش فاكر اسمه ايه اصلا..
ناهيك عن فرحة سعاد نصر الله يرحمها بتحدي السمنة الشهيرة وأكنها هي اللي عملاها ..طيب ايه اللي يرقص في ان السمنة بطعم الفلاحي وإنتي ايه اللي يفرحك في كده مقدرتش أفهم بصراحة..
ولكن من كتر الهبل علي الشيطنة بقي فتح حسن حسني وخيرية أحمد معسكر للزبدة الفلاحي وبيتدربوا فيه مش عارف ده يبقي تدريبه ايه ده تدريب بغال ع الصبح ..ده ممكن ع الصبح يفطروا مخاصي مثلا..
بالاضافة لأن ريد بول بيعطيك جوانح وبيخليك تطير من أي موقف محرج..و"موانتن ديو" بيخلي قلبك جامد لدرجة أنك تسابق قرش وتطير مع اصحابك من فوق برج إيفل..
علي فكرة انا شربت ريد بول ده وفعلا طلعلي جوانح بس وأنا نايم لأني يمكن من كتر النشاط نمت ونمت كتير قوي وكنت مكسل أعمل أي حاجة مع اني قبل ما أشربه كنت نشيط شوية..
اما أكتر مبالغة حصلت فهي اكيد اعلان التكييف اللي كل حاجة طارت فيه ده واعلان جالكسي للشيكولاتة اللي بيطلعلك موسيقي مرعبة وبعدين واحدة عمالة تقبل الشيكولاتة قبلة فرنسية ويقولك بتاكلها والست دي عمالة تدوب في الشيكولاتة لأ أعذرني الست دي دايبة علي نفسها أساسا ..
طيب أنا بقي بأكل الشيكولاتة دي علي بق واحد مش بلحق أدوب ولا أقعد أبوس فيها وبعدين أنا لازم أوفر شفايفي عشان أبوس في التلاجة والبوتاجاز برضه ..ويجعله عامر