بتــــاخد فـــيزا؟

المخرج المصري واعي وقدير لأنه مبيفكرش في اعمال تقع علي فاشوش زي تايتانيك والهلس ده انما كان كل همه انه يعمل اعمال مبتتفهمش زي يوسف شاهين عشان يبقي عبقري
او اعمال مفهومة بغباء زي اللي عمل فيلم "شيكامارا"..مافيش حياد..لأما تمشي في سكة يوسف شاهين يا تمشي في سكة شيكامارا والمشاهد واقع في النص

وانا من مكاني هذا علي الكرسي في اوضتي الضيقة الخنيقة وبشرب بريل عشان أسترجل بقول للمخرجين اعملوا ما بدالكم بعد ما شوفت أخر أفلام طارق علام
بقولهم "قفايا اهو" ..انا بقولكم اعملوا ما بدالكم يا جماعة أنا هفق..ومش عارف هفق بتتكتب كده صح ولا لأ..

طارق علام لو مثل في هوليود هيبقي رواية الجرايد الأمريكية والأوروبية كمان..لأنه فلتة
وتقدر تخمن ملامح وشي دلوقتي وانا بقول الكلام ده ..هتعرف اني كداب
المهم انا بقول للسادة المخرجين ياريت بس يبعدوا عن شوية أخطاء بتحصلش في هوليود:
أولا..ياريت اما واحد يرمي كرسي في الكلوب في فرح شعبي "وده مشهد حمضان في كل الأفلام "محدش يضرب اللي جنبه بدون سبب
يعني مش فاهم انا قاعد في فرح فواحد رمي كرسي علي ترابيزة بعيدة عني مثلا اقوم أنا ضارب اللي جنبي وكل الترابيزات تضرب بعض؟؟؟؟

ثانيا..في الأفلام التعبانة اللي العربية بتبوظ فيها الفرامل ياريت يعني بعد اذن السادة المخرجين يوضحوا ان العربية اكيد هتقف بعد شوية
مش هادنها ماشية والراجل اللي سايق بيتشنج ومش عارف يتصرف.ليه يعني الأسفلت بيزحلق مثلا ولا ده في اطار السياق برضه؟

ثالثا..مش لازم كل ما تحط قنبلة في عربية اللي جوة يسمع زمارة قبلهابكل سذاجة عشان يخرج في اخر لحظة ..

رابعا..مش لازم في كل أفلام عادل امام يضرب واحد علي قفاه او علي وشه والراجل ساكت لأن دي أوفر شوية ولو حد حاول يطبقها هيطلع تيت أهله..

خامسا..مش لازم تربط كل الأفلام الكوميدية الهلس بقصة بتزيد من هلسها ..يعني متقوليش اللمبي كان عنده هدف..وبوحة كان عبقري..وعوكلو بيصلح اي عربية لوحده بدون مساعدين
وعايزني اصدقك..معني كده ان كل المصريين مافيش منهم اتنين..

سادسا..عدم الاستعانة بكل من يرد أسمائهم في أفلام مرة تانية...
طارق علام/سعد الصغير/علاء مرسي/محمد نجاتي/محمود عبد المغني/ادوارد/طلعت زين
وغيرهم بس دول علي رأس القايمة..

وبعدين الهند خدت أوسكار لوقتي وعندها رصيد احنا امتي هناخد أوسكار..ولا هو هييجي عندنا برضه وف تاكسي؟؟؟
بقالنا كام سنة في صناعة السينما مش عارفين نعمل فيلم يعجب هوليود؟؟
المشكلة الوحيدة اننا بنعمل فيلم كويس بس بخامة رديئة..نفس الفرق بين "قلبظ" و "لايز" الأمريكي..هي كلها مأكولات اه بس أكيد هتحس بالفرق..

قلبظ حلو فعلا لكن في حاجة غلط متفهمش هو ليه الكراتيه المصري عندنا زي قلبظ والحاجات دي وهريدي وكده كل ما تفتح كيس عايز تضرب التاني
وأحيانا بتلحس صوابعك هما بيحطو فيه ايه؟؟

هو ده الفيلم المصري ..عشان تحس بالاشباع لازم تضرب حداشر فيلم كده ع السريع أو ع السخان زي ماالبسة بيقول..
واحد من اللي ميعرفوش البسة دلوقتي هيقولي البسة مين؟هقوله يا عم انت مالك..انا بكلم نفسي ..
انما الفيلم الأمريكي الواحد يشبعك يوم كامل دراميا وقصة وكل حاجة..
وهو ده الفرق بين التعليم المصري والأمريكي برضه علي فكرة يعني انا بحاول ادرس نظام امريكي مثلا عرفت دلوقتي اني زي ما بيقولوا كلمة "حيزابون" أو ".....لانشون" برضه زي ما سمعتها من البسة..اكيد انت عارف يا بسة انا قصدي ايه..هههههه

يعني لو كنت يا سيادة وزير التعليم من الأول مكنتش قعدتني جنب حيرم كان ممكن انجح في النظام الأمريكي ده..انما انا قعدت جنب حيرم وشميته كمان..
وارجوكم محدش يسألني عن الموضوع ده لأنه بيجبلي احباط..
ومكنتش يا سيادة الوزير أكلتني من التغذية بتاعتك وبالذات المربي القذرة اللي بيتجيبها اللي شركة فيتراك بريئة منها ..
ولو كان عندك فكر يا سيادة الوزير مكنتش ادتني جولوجيا في الثانوي وانا داخل تجارة انجليزي..استفدت ايه بدراسة علم طبقات الأرض؟
ومكنتش خلتني احفظ القصة في الانجليزي يا سيادة الوزير علي فكرة مافيش حد بيحفظ قصة خد في بالك يعني..
وبعدين اتخرج وعايزني اخد زمالة ..علي رأي عادل امام في الحالة دي"الدين بيقول ايه؟؟"
واحد بقي فلحوس هيقولي بس انت شربت من نيلها..هقوله زي ما قال احمد مكي "بتاخد فيزا؟؟"
هو نفس الفرق واللهي حاسس اني اتعلمت تحت ايد السبكي ودلوقتي هأمثل مع كاميرون دياز.طيب ده ينفع..؟
وبعدين هو انا لو كبرت بقي واغتنيت وكده وبقيت زي الدالي هشاور علي صورتي مع حيرم وهأقول "انا ابتديت كده؟؟"
واللهي بداية صعبة جدا اصعب من الدالي كمان هو عمره مقعد مع حيرم حتي..
وبعدين هو مخدش في الثانوية العامة مادة كهربا انا خدتها وكان سؤالي المروحة مبتشتغلش ليه..قولتله الفيشة متشالة قالي صح..
جالي بعدها مرض السخام بعيد عنك..ولساني دلدلت من لاغاليغها لو كنت كاتب الكلمة صح..
كانوا بيخيرونا دايما تاخد كهربا ولا زراعة البنات اقتصاد منزلي عشان كده زي ما انت شايف بناتنا في الطبخ ما شاء الله حاجة...ولا بلاش
اخر كلام انا مرة كنت بكلم واحد امريكي علي نامنا المصري في التعليم وحكيتله علي حيرم كمان وعلي مادة الكهربا..
قالي تلات حروف كده لسه فاهمهم قريب قالي
wtf
المهم فهمتها دلوقتي والحمد لله واللهي عنده حق الراجل..