بــــاكيت لـــيست مـــصرية

كلنا يسمع عن" الباكت ليست " اللي كل واحد بيكتب فيها امنياته واحلامه قبل سن معين وهي منتشرة قوي برة وكله بيعملها وفي معظم الافلام بنشوفها طيب لو مواطن مصري عايز يعملها تفتكر تكون شكلها ازاي علي مر العصور ؟





اشياء افعلها قبل الخمسين "العصر البدائي"...قائمة "مو مو مو " :



1-اخلص من عش الديناصورات اللي في سقف الكهف ده

2- اخدي لي كهف جديد محندق كده

3- اسحبلي كام مزة ع الكهف الجديد

4- اصطاد جاموس بري مع اصحابي واحنا بنصيع يوم الخميس

5- احاول اترقي وابقي "ديناصور مان " قد الدنيا وصياد كبير

6- احلق شعري..يارب يخترعوا مقص بقي..




اشياء افعلها قبل الخمسين "الاسرة الخامسة " ...قائمة "امحتاب " :


1-امتلاك مسلة جديدة

2- امتلاك عجلة حربية زيرو فول اوبشن

3- ان "مزة رع " تحبني وتموت فيا

4- اي حاجة من سفينة "حتشبسوت " للتجميل ان شا الله فير اند لفلي بس

5- الخروج في سفاري جمال في الصحرا مع اني طالعين عين امي من الصحرا اصلا




اشياء افعلها قبل الخمسين...قائمة "شجرة الدر"... :

1- ننتصر في كل المعارك

2- يتجوزني ايبك ولا اي حد قبل ما اتضرب بالقبقاب

3- متضربش بالقبقاب بقي

4- اخلص من صوت ام الطاووس اللي في القصر ده

5- امتلك جاكوزي عربي اصيل




اشياء افعلها قبل الخمسين.."عهد الاحتلال البريطاني" ..قائمة "مواطن مصري" :

1- الاحتلال يخلص

2- ادخل كلية الحقوق وابقي عضو في جماعة البلاغة المصرية

3- ابقي فرد من حركة "كلنا ثوار" وحركة "ضد الاحتلال" وابقي موزعاتي منشورات قد الدنيا

4- احب واحدة بنقاب في مظاهرة قديمة كيك

5- يشيلوني في مظاهرة علي كتافهم عشان ابقي ظاهر كده




اشياء افعلها قبل الخمسين .."عهد مبارك"..قائمة" مواطن مصري غني"..


1- ميبقاش الفيس بوك بفلوس

2- اجيب اي فون

3- يفتح مول تاني زي سيتي ستارز

4- امز كل يوم بس بلاش جواز خالص

5-مصر توصل كاس العالم بقي

6- اكسب علي مزيكا زووم واعرف عين مين دي

7- اسمع الاعمال الكاملة لنانسي عجرم


اشياء افعلها قبل الخمسين .."عهد مبارك"..قائمة" مواطن مصري فقير ":

1- الاقي رغيف العيش

2- اعرف اعلم العيال ان شا الله لحد ابتدائي

3- المياه تبقي مافيهاش مجاري

4- يعالجوني في التأمين الصحي مرة لوجه الله

5- اعرف اتجوز اصلا قبل الخمسين واكون نفسي




اشياء افعلها قبل الخمسين .."عصر احفاد مبارك"..قائمة "مواطن مصري متقدم" :


1- املك روبوت جديد

2- اركب النيتروجين في العربية عشان اعرف اطير

3- اجيب سرعة نت تانية غير ال 6 جيجا البطيئة دي

4- اتجوز 8 زي اصحابي "تتفشي العنوسة بجنون "

5- اجيب جهاز جديد للانتقال الاني بدل اللي باظ