الحـكـم حـدوتة لأخـر فتـفـوتة

عندما ستأتي الانتخابات الرئاسية القادمة ستكون بشكل جديد تماما ونيو لوك يمكن اعلانات جديدة للانتخابات او فكر جديد زي ما بيقولوا ودي حملة اعلانات للرئاسة لبعض المرشحين من اعلانات التليفزيون :




اعلان لمرشح شعبي اسمه عبد الرحيم داخل الانتخابات تحصيل حاصل طبعا :

يظهر فتي الاعانات ويقول "انا محتار ارشح مين يا جماعة ؟ "
اول واحد : حسني يا محمود حسني
تاني واحد:جمال يا محمود جمال
تالت واحد: البرادعي البرادعي

محمود بيشرب اسبرايت وبيقول : اناهانتخب عبد الرحيم ..انا كده ..انا اسبرايت



اعلان حازم امام لعمرو موسي مرشح الرئاسة :

دماغي فيها حاجات كتير
الكورة طبعا ومعظم الاحاجات الهايفة اللي في الدنيا
بلاي استيشن وحريم كمان
لكن انا اخترت
وهارشح عمرو موسي
وهاشيل القشر من راسي بالمرة




اعلان مهند بتاع سيراميكا رويال لجمال مبارك :


يظهر في الاعلان مهند واتنين كمان رجالة
مهند: ايه اللي جابكم هنا ؟؟ فين المزة ؟
الرجالة: مزة ايه ..مش عيب تقعدوا ع السيراميك امال اوضة النوم فين يا عم؟
مهند: انتوا مين وعايزين ايه
الرجالة: من الاخر انت هتقول السطر ده في الاعلان
مهند: احم.. حاضر طالما عايزين يعني
مهند: مافيش في الدنيا اجمل من سيراميكا رويال وانتخاب جمال ..جمال مملكة من الجمال
هاتولي المزززززززززززة
الرجالة: اخرررررس




اعلان لأيمن نور :

يظهر شباب في الاعلان وبيقولوا: ده مين اللي جاي من هناك ده ؟

ويخرج ايمن ووشه جايب دم وماسك في ايده زجاجة مشتعلة ويترنح مثل ابراهيم الابيض وفي ايده خنجر

ايمن: البلد دي مش هيجيب حقها غيري انا من الزرازير ماشي يا حورية مافيش غيررررررررري اناااااااااااا

الشباب: ايه ده؟ ممكن نرشحه ده ؟

يظهر واحد تخين ويقول : النص الاول من معاهدة مكسيكو بيقول انك ممكن ترشح اي حد حتي لو في ايده مطوة.

مكسيكو..مصري..مش عارف ازاي !



اعلان لمرشح الوفد اباظة :

يجلس اباظة علي المكتب وحوالية بنتين
وديع: احم ..احم
اباظة : خش يا وديع
وديع: اباظة باشا
اباظة: فيه ايه يا وديع
وديع : الانتخابات خلاص يا افندم وانا جهزة لحضرتك لوحتين اعلانات وورق يتوزع
اباظة: ايه ده يا وديع ؟؟؟ خد وزع ده
وديع: استااااااذ
في الوقت اللي رفضنا فيه شعار "خش عليه خش عليه حزب الوفد ماددلي اديه "
اخترنا فيها شعار "البعد عنك شحططة والقرب منك زقططة"
"اباظة باشا..حزب الوفد ..ام الاحزاب التانية "


اعلان لحسني شخصيا :


بعد عشرين سنة واكتر من الرئاسة تقولوا ايه ؟
بنت: نقدر نقول الحكم حدوتة لأخر فتفوتة
شاب: لا نقول يا حسني يحكم كمان اربعة يا ناكلها مضلعة
صوت تخين: كلام نظريات وكلام بنات
دلوقتي حسني هيقدملك فترة حكم اتخن وبتقرمش كمان عشان متجزش علي سنانك
كده كده احكامنا مسمعة..اه كده كده وزرائنا مطرقعة
خليك كوول وخد المقرمش


اعلان لمرشح اخواني محظور اصلا :

يظهر شاب بيعطس وبيكح وحالته كرب في الاعلان

صوت تخين: اعراض الانفلونزا دي زي اي انفلونزا تانية
بس لازم تشرب سوائل وتتمتع بتهوية كويسة وفوق كل ده تقوم ترشح مرشح الاخوان وربنا هينصرك باذن الله

ولا تطعيم ولا وقاية..مرشح الاخوان هو الوقاية

"فيه شفاء للناس


وياتري مين هيكسب ؟؟؟