الحكـم حدوتة لأخر فتفوتة..الجزء الثــاني

اعلان عن جمال مبارك كلاكيت تاني مرة :

يدخل ميدو وصديقه الي كافيه وياكل المقرمش

صاحب ميدو: اديني واحدة يا ميدو
ميدو: لأ
صاحب ميدو تطلع فكرة في راسه ويقوم ينفذها يجيبله البطاقة الانتخابية ويقوله رشح واحد غير جمال

وبعدين يقف في الطابور واحد يسأله: هترشح مين يا كابتن ميدو؟
ميدو: انا هارشح عكاشة
ثم ينهال عليه الطابور ضرب لحد ما يقع من ايده كيس المقرمش ويمسكه صديقه ويقول: تاني يا ميدو تاني؟ غاوي احزاب محظورة.




اعلان قرية كنانة عن ترشيح الاخوان :

يظهر استاذ ايمن بسبحة وطاقية وينظر من النافذة ثم يجري مسرعا لخدمة واحد بيصرخ تحت
ثم ينقذ جارته من الموت ثم ينقذ طفل صغير من دهس اتوبيس

ويظهر صوت تخين: انت شهم اوي يا استذ ايمن انت مكانك مش هنا انت مكانك معانا في قرية اخوانك

"قرية اخوانك ..للشهامة علامة "




اعلان عمرو موسي الانتخابي :

مجموعة شباب: النهاردة يا جماعة عايزين نفكر هنرشح مين
سالم: ودي محتاجة انا هارشح جمال
محمد: وانا هارشح عمرو
احمد: هو الهضبة مرشح نفسه؟
محمد: ده عمرو موسي
احمد:ااااااااه
حمادة: يا جماعة يا جماعة طيب مش اما نشوف البرنامج الانتخابي بتاع كل واحد ؟

ثم ينظر الجميع فجأة لحمادة بحدة ويقولون: اخر حاجة تفكر فيها في الانتخابات البرنامج الانتخابي ..استرجل وانتخب عمرو موسي




اعلان لحزب فقير :

يا تري انت شايف الناس كلها كده هتترشح واحنا مش عارفين ناكل رغيف العيش؟
اخوانك في الحزب المصري مش لاقيين ياكلوا بجنيه طعمية مش يجيبوا يافطة او مية
احنا مش هنرشح حد من عندنا بس محتاجين تبرعات وبطاطين وجاموسة حامل ونقل دم لرئيس الحزب وحياة ابوك
اتبرع ولو ببطانية بس تكون ساراتوجا والنبي




اعلان لحسني :

دلوقتي انت جربت كل انظمتنا لكن في الفترة الجديدة لو انتخبت هنديك نظام "صلاحية مدي الحياة"
طول عمرنا كان نظامنا "اتكلم واتحكم" وبعدين غيرنا الدستور وبقي نظامنا "تزوير ومدة اطول"
لكن دلوقتي "صلاحية مدي الحياة " هيديك اللي نفسك فيه "
ملحوظة:تم القبض علي موبي زون لشعارها "غير نظامك " لضمان الديموقراطية والمساواة



اعلان ايمن نور من لينك دي اس ال :

طابور طويل واقف وفجاة يدخل شاب :لو سمحت انا عايز ارشح ايمن
العامل في الطابور: دخلوا هنا اللي عايز ايمن ده
الطابور: كوووووووسة..الصحافة فييييييييين
الشاب: لو سمحت انا عايز ايمن
العامل يخرج سي دي : عايز ايمن خد ايمن

انتخاب ايمن اضمنلك واسرعلك ..عايز ايمن خد ايمن