الإنترنت المصري ومطالب ما بعد الثورة في قطاع الاتصالات

"ان لم تستح فاصنع ما شئت" هو شعار شركات ومزودي خدمات الانترنت في مصر .
قطاع الاتصالات وخصوصا خدمات الانترنت هي من اكتر القطاعات فسادا وتبجحا في الفساد كمان ! بل يمكن بيتعلموا من كتاب "تعلم الفساد بدون معلم" !
معندوهمش حلول معندهمش خطة تطوير لا يملكون افكارا لارضاء العميل شركات لا تعرف ابجديات الادارة بل يمكن ان اداري ناجح في مسمط يقدر يديهم كورسات في فن الادارة ومعرفة قاعدة ان "العميل دائما علي حق" اللي حولتها شركات الانترنت الفاسدة الي "العميل دائما يكذب ونحن علي حق مطلق" !!


في مجال الانترنت تقريبا دول العالم معظمها سبقتنا والسعودية مثلا دلوقتي عندها ميت ميجا في السرعات وفي دول في اوروبا عندها الحد الادني للانترنت ميجا مافيش حاجة اسمها 256 والكلام الفاضي اللي اكل عليه الدهر من زمن وفي دول تانية الانترنت تبع الكهرباء اما عن اليابان فكانت بتعمل تجارب وشوفته في فيديو مستفز لاي مصري عن تجارب نقل ملفات بسرعات خيالية لنقل جيجات كاملة في اقل وقت ممكن .

العالم رايح فين في قطاعا لانترنت ومصر فين ؟
في مقالة خالد منتصر قال ان ستيف جوبز العبقري جملته الشهيرة "لا تسأل العميل ماذا تريد بل بماذا تحلم" اما عندنا في مصر فالعميل بيتعامل زي العدو وشركات الانترنت المصرية الفاسدة اصبحت بتتعامل باسلوب الجريمة المنظمة او عصابات المافيا !


اعلانات الانترنت كلها كدب زي اعلان تي ايه داتا حقق حلمك علي اساس انهم حققوا حلمهم خلاص وبقوا اسرع شبكة فعلا زي ما بيقولوا ولينك وغيرها من الشركات اللي كل ما تشوف الاعلان بتاعها بيبقي نفسي اكسر التليفزيون لان سرعة التحميل الحقيقي في الشركات دي في محافظات كاملة لا يتعدي 20كيلو حتي لو متعاقد علي عقود بسرعة 4 ميجا !! فضائح بالجملة يكفيك فقط انك تدور علي اسم اي شركة من دول علي الانترنت وشوف كده رأي الناس من كل محافظات مصر ..لو لقيت حاجة غير الشتايم والسباب والهجوم المتواصل والغضب حد يقولي !


الغريبة ان الشركات اللي يظهر انها ناجحة في العلن هي من افشل الشركات في الباطن والثروة ليست مقياس تماما لادارة ناجحة وممكن اقولك ان مصنع الومنيوم ولا بيعمل وناسات ممكن يعمل ملايين في السنة مش معني كده ان الاداري ناجح وفاهم في الادارة او قرأ اصلا في علم الادارة او يعرف اصلا ان في علم اسمه الادارة ولكن لان المنتج مطلوب وهو ده السر الكامن في شركات الانترنت ان حتي لو الخدمة زبالة هتلاقي الناس بالملايين مشتركين لانه بقي شئ اساسي يعني حتي لو الكهربا بترعش او ضعيف مستواها لازم هتركب عداد وهتشترك ده شئ مفروغ منه !


انما بالنسبة للادارة فالغريب ان الشركات اللي المفروض انها محترمة دي معندهاش حتي ابسط المبادئ زي
evaluation

او تقييم تعرف منه الناس رايها ايه في الخدمات زي اللي بيحصل في الجامعات برة كلها لكل دكتور جامعي تقييم كامل لمستواه ومدي ايصاله للمعلومة وكفائته العلمية وميت حاجة وفي الاخر بيجمعوا التقييم ويشوفوا راي الناس اما هنا فحتي قسم الشكوي اللي هو اساسي وبديهي في اي شركة مش موجود اصلا وبيقولك سيب رقم وهنبقي نكلمك !!



كل من لا يقل عن سنه عن 18 سنة في المحاكم الفيدرالية الامريكية له الحق ان يرفع شكوي او قضية ولازم الرد في خلال 21 يوم من الطرف الاخر ..اما عندنا في مصر فالمشتكي بيروح لجهاز اسمه الجهاز القومي للاتصالات لا يملك ناقة ولا جمل امام امبراطورية وفساد طاغوت الانترنت المصري ويقولك هنرد عليك او اتصل وشوف حصل ايه في شكوتك والغريب انه يقولك في الاخر ان مش منصوص في العقد علي موضوع السرعة يعني فقط لو خدت سرعة غير سرعتك ممكن تشتكي انما مثلا لو انت مشترك 2 ميجا وبتحمل علي 50 كيلو يبقي خلاص الخدمة شغالة وكده وضعك زي الفل !!!

ولو فكرت ترفع قضية علي شركة انترنت مش هتتقابل الا بالسخرية والاستهزاء وانه موضوع تافه وفرعي رغم انه بقي شئ اساسي في كل حتة في العالم زي المية والهوا لانه بحر كامل للعلم في كافة المجالات .

يعني برة ممكن اي حد يرفع الشكوي او القضية علي اي شركة متتدلوش حقه انما عندنا لازم يكون موضوع حياة او موت فقط عشان ترفع الشكوي !

وفي حاجة في العقود برة اسمها
Misrepresentation

ان يكون في العقد خطأ في الطبيعة او الجودة للمنتج او الخدمة
regarding the quality or nature of the product

اما عندنا في مصر فتلاقي شركةا لانرتنت لو جيت تشتكي تقولك بس "اقرا عقدك" وكأن العقد مكتوب عشان ينصبوا علي العميل فقط مش عشان يزودوه بالخدمة .


والاعلانت بتاعة شركات الانترنت في مصر هي بتمثب مصطلح اسمه في كل العالم
deceptive advertising

اعلانات كاذبة ومخادعة للحقيقة ودي ياما حصل بسببها قضايا في امريكا ودفعوا الشركات ملايين تعويضات من شركات سجاير بالذات زي ما كانت الشركات دي بتستخدم اوصاف مخادعة للسحايرة وتقول دي خفيفة او قليلة النيكوتين مما يوحي للمستهلك انها اقل ضرر ع الصحة مثلا وفي السنواتا لاخيرة ظهر ان كل ده كلام فاضي وكانت القضايا الكبيرة اللي دفعت فيها الشركات تعويضات ضخمة .
وحتي شركات "الهارد ديسك" اترفعت عليها قضايا كتير عشان بتستعمل وصف غير دقيق في حسابات الميجا زي مثلا انها الف كيلو بايت ولا بيت وحاجات من هذا القيبل كتير جدا في العالم اما عندنا فالشركة دايما هي الصح والعميل مش قاري العقد كويس !



مصطلح هام جدا في علم الادارة يمكن برضه معظم مديرين شركاتا لانترنت في مصر ميعرفوش فكرة عنه اساسا اسمه
TQM
اختصارا ل
total quality management

وان من عناصر الجودة الشاملة دي في اي شركة او المنتج بتاعها ان يكون في حاجتين رئيسيتين هي
infotmation and feedback
وكمان حاجة مهمة
customer involvement

وده من التعريف الرئيسي للمصطلح ده لو بحثت عنه في اي كتاب او علي الانترنت فده التعريف الرئيسي اللي تجهله للاسف شركات الانترنت المصرية اللي اخر حاجة تفكر فيها الجودة ولكن المهم الربح !



وكمان من الكتاب الشهير في علم الادارة ل "جيمس كولينز" اسم الكتاب
Good to Great

وده كتاب شيق جدا وبيشرح بالظبط ليه بعض الشركات بتحقق نجاحات وتبقي بعض الشركات مهمشة وفاشلة وكانه بيتكلم عن شركات الانترنت المصري بالظبط !
والغريبة ان كل عوامل الانتقال من شركة عادية لشركة عظيمة غير موجودة تماما في اي شركة انترنت مصري بل ان كل الشركات دي لا تعرف الا لغة الفشل مع العميل وخسارة العملاء تدريجيا .

نظام الشكوي
complaint system

اصبح شئ رئيسي في كل الشركاتا لامريكية الناجحة وحتي الشركات العادية عشان تبقي شركة ناجحة لازم يكون عنده سيستم كامل للشكوي عشان يعرفوا العميل مش راضي عن ايه بالظبط في الشركة وده عشان يقدروا يطوروا نفسهم دايما للوصول لارضاء العميل ولكن في مصر ممكن تسال شركة الانترنت هو الانترنت هيتصلح امتي هيقولك جملة واحدة ربما تكون جملة تاريخية للفشل "مش عارفين يا فندم احنا مقديمين طلب عشان نركب اجهزة في السنترال ومافيش وقت محدد لحل المشكلة ربنا يسهل " !!!!!!!!


الجملة دي تقريبا في امريكا مش يترفع عليها قضية دي المفروض يبقي فيها اعدام اساسا !! فيه شركة تقول مش عارفين هنصلح امتي ربنا يسهل !! طيب وبالنسبة لفلوس العميل اللي بتتشفط دي مش في اولويات الشركة !! بجد شركاتنا المصرية للانترنت محتاجة ثورة كاملة علي الفساد المعشش جواها اللي هم بيداروه بذكاء باظهار الخدمة باحسن صورة في القاهرة والاسكندرية اما باقي المحافظات لا اهتمام بها علي الاطلاق وكانهم خارج مصر اصلا او مش مشتركين معاهم زي نظام الزيارات الوزارية اما الناس بتحط ورود لحظة وصول الوزير ويشيلوه بسرعة اما يمشي !





طيب دلوقتي ايه المطلوب من وزير الاتصالات كمطالب عاجلة من اجل تحقيق تقدم ملموس في قطاع تكنولوجيا المعلومات ؟



1- فرض عقوبات صارمة علي شركات الانترنت المصرية في حالة التقدم بشكاوي عديدة من اكثر من محافظة من خلال الجهاز القومي لتنظيم الاتصالات

2- فرض نظام كامل داخل كل شركة للشكوي من الخدمة ويكون المسئول عن القسم المخصص للشكوي مستقل او من جهاز تنظيم الاتصالات نفسه وليس من الشركة مثل شركات المحاسبة الكبري التي يتم تعيين فيها "مراجع خارجي" لضمان الحيادية

3- تخفيض اسعار الانترنت المصرية لما يوازي المعدلات العالمية المتعارف عليها في كل مكان في العالم

4- في حالة عدم الاستجابة لمطالب العميل في خلال 21 يوم يتم تحرير قضية بالواقعة من خلال جهاز مختص .

5- تعويض المتضررين من بطئ الخدمة من خلال خفش الفاتورة وخصم الايام المتضرر فيها العميل .

6- يتم فك الربط عن الخط المشترك في خلال يومين فقط متي اراد العميل ذلك ويتم توقيع العقوبات علي الشركات اذا اخلت بهذا الاتفاق .

7- وضع قسم لمراقبة الجودة داخل كل شركة مستقل عن قسم الدعم الفني وعن قسم الشكاوي ويكون وظيفته تقديم تقرير كامل عن جودة الخدمة في كل سنترال من سنترالات مصر .

8- فصل موظف خدمة العملاء وتحويل مدير القسم الي الشئون القانونية اذا ثبت عدم رده علي العميل بكل احترام وتزويده بالمعلومات الكافية والميعاد الدقيق والمحدد لاعادة الخدمة اذا تم قطعها .

9- فصل موظف الدعم الفني اذا لم يقدم الاجابات الوافية لحل المشكلة واكتفي بالحلول التافهة والغير منطقية والتي تنم عن عدم خبرة في مجاله .

10- يحق للعملاء ليس فقط مخاطبة قسم الشكاوي بل زيارته من خلال اقرب فرع ومعه كافة الصور والمرفقات الدالة علي بطئ الخدمة ووجوب حل المشكلة في خلال عشرة ايام من تاريخ عرض المشكلة.

11- تشكيل لجان مدنية مستقلة للاشراف علي السنترالات من فترة لاخري لمعرفة تاريخ اخر تحديث وتطوير قامت به شركة انترنت معينة .

12- تخصيص جهة حكومية للبث في مشاكل الاتصالات تكون رقيبة علي الجهاز القومي للاتصالات .

13- محاسبة وزير الاتصالات عن فترته ومدي تطوير خدمات الانترنت والاتصالات في فترة الوزارة بشكل عملي ورسومات بيانية وارقام فعلية .

14- وضع حد ادني لسرعات الانترنت المصرية بما يعادل 1 ميجا فعلية وليست رقم علي الورق وسرعة غير موجودة علي ارض الواقع !




دي بعض الاقتراحات اللي ممكن تنهض بالقطاع الغارق والنايم في العسل اللي اسمه قطاع الانترنت وياريت وزارة الاتصالات تفوق فعلا وتعرف اخطبوط الشركات بتاعة الانترنت في مصر ومدي الفساد المعشش فيها من سنين طويلة لدرجة ان شركات كبيرة ممكن تقعد في محافظة او مدينة الانرتنت بايظ فيها وبطئ اربع سنين كاملة مع سيل مع الشكاوي بلا جدوي ودي شوفتها بأم عيني فعلا وحضرتها اربع سنين كاملة تاخد عشر سرعتك ومهما اشتكيت يقولوا لا ده من عندك يا فندم او لسه منعرفش هنطور الاجهزة امتي يافندم !!!


وننتظر المزيد من وزير الاتصالات الجديد لان في عصر بعد الثورة مافيش مكان للفساد في اي قطاع حتي لو كان بيعتبروه ترفيهي ولا اظن ان في حد دلوقتي بيعتبر الانترنت ترفيهي لانه اكبر مصدر للمعلومات والمكتبات العالمية والبيزنس والدراسات وميت الف حاجة تقريبا حياة كاملة موازية فنرجو سرعة التحقيق في الامر من وزارة الاتصالات .

عن الغيرة والرجولة والفيس بوك

اعرف الرجل عندما يغار..واعرف المرأة حينما تتحايل لتغار عليها "


ايه علاقة الفيس بوك بالغيرة ?
وهل الزوجة اللي عندها اصحاب كتير رجالة علي الفيس بوك زوجها يعامل الأمر علي انه عادي ؟؟

انا لا الوم الازواج او المخطوبين اللي بتنتهي علاقتهم بسبب الفيس بوك وان كان البعض شايف ان ده نوع من الجنون بس انا شايفه نوع من التحايل ..يعني اي زوج في بداية الارتباط اكيد بيكون عارف انه حياة جديدة لمراته وان كل اللي قبل كده من مثلا اصحاب بتكلمهم او مثلا شلة النادي والحاجات دي كل ده بيتغير تماما لان مع الجواز المفروض ان اي كلمة علي وزن "أفعل" بتنتهي !
يعني مافيش افضل ولا اجمل ولا اقوي من زوجها وكذلك الزوج بيشوف ان مافيش اجمل من زوجته يعني هنا بداية الحياة الزوجية هي بداية انتهاء المقارنات لو الحياة دي قايمة علي حب حقيقي.
فانا شايف ان الفيس بوك نوع من التحايل علي الزوج لان بدل ما تكلم شلتها القديمة في التليفون وفيهم ولاد بتضيفهم علي الفيس بوك علي اساس ان ده مش تليفون فخلاص بقي ليا الحق اراسلهم واهزر معاهم طول النهار ماهو جوزي مش شايفني وانا مش بجرح مشاعره !!

ده نوع جديد من الخيانة الالكترونية ولازم كل واحدة جوزها مانعها من مكالمة الجنس الاخر لانه بيحبها وبيغير عليها انها تفهم ان الفيس بوك نوع من التحايل علي ده ونوع من اهانة الزوج قدام الناس دي حتي لو هي مش حاسة لانهم بينهم وبين نفسهم بيقولوا "دي معانا طول اليوم ع الفيس بوك ده احنا واخدينها من جوزها " ! وهنا يحس بعض اللي في قلبهم مرض بالانتصار ويدخل في المرحلة التانية احيانا وهي بداية الغزل او محاولات الاستمالة بعد ما عدي مرحلة الانتصار علي الزوج المخدوع .

لان الفيس بوك حياة كاملة وبتتكلم عنه زي ما بتتكلم عن اي حدث في حياتك فساعات تطلع من الزوجة جملة قدام جوزها وهي قاعدة ع الكمبيوتر مثلا زي "اما سعيد ده دمه زي العسل" !!

اي شعور المفروض يشعر بيه الزوج في اللحظة دي ؟؟ اولا الغيرة والحمية ..يعني هو هيغير جدا علي زوجته انها بتتكلم كده علي رجالة تانيين ثانيا لو عنده حمية فعلا علي اهل بيته المفروض بعد جملة زي دي يمنعها اساسا من استخدام الفيس بوك او علي الاقل عدم اضافة الجنس الاخر لو هو فعلا راجل وغيور وبيحبها اما لو العلاقة فاترة بينهم فاكيد مش هيحس باي حاجة بعد جملة زي دي بل ده يمكن كمان يقولها "فعلا معاكي حق سعيد ده عسل قوي" !!!! ودي تبقي نهاية رجولة وحمية زوج .

يعني مافيش زوجة المفروض تقعد تقول لجوزها "يا سلام لو اتجوز واحد زي كاظم الساهر" ! جملة زي دي تخليه يقول "يا سلام لو اتجوز واحدة زي هيفاء وهبي" ! والاتنين واهمين وبيجرحوا مشاعر بعض كان كل منهم ناقم علي الحياة مع التاني طيب ليه بدأتوا حياتكوا مع بعض اساسا !


بعض الستات بتستخدم الاسااليب دي عشان جوزها يحس بالغيرة عليها فعلا يعني حسب كتاب
why men marry bitches
في مبدأ مهم في الكتاب بيقول
Men are intrigued by anything they do not completely control

والرجالة عشان بيحبوا اي حاجة هم مش مالكينها او متحكمين فيها بالكامل فالستات لازم تحسس ازواجها انها مش ملكه بالكامل وعشان كده ساعات الزوجات بتعمل ده عشان تحسس جوزها انه لازم يحتويها اكثر وانها مش تحت سيطرته تماما او هو مش ضاممها بجناحه بشكل كامل ومحتاج جهد اكبر !


اما من الكتاب التاني
why men love bitches
في جملة شهيرة جدا بتقول
Act Like a Prize and You'll Turn Him into a Believer

يعني الست لو تحسس جوزها انها جايزة ثمينة يفوز بيها هو هيصدق وهيبدأ يسعي للوصول اليها من جديد وكأنها فقدت منه ..وكتير من الستات ماشية بالطريقة الذهبية دي فتبدأ تحسسه بالغيرة الشديدة وكأنهم لسه مخطوبين ولكن الازواج اللي عندهم حمية اكثر اكيد مش هيسكتوا ومش هيدوا الفرصة اصلا لان زوجتهم تتكلم عن الجنس الاخر في حضورهم .


وساعات بقي بيكون هروب الزوجة للفيس بوك والكلام مع الجنس الاخر بديلا عن زوجها لان زوجها اصبح زي الزهرة الدبلانة يعني معادش بيقدم حاجة عاطفيا ومعنويا فتبحث عن زهرة جديدة زي النحلة !
وهنا نفس الكتاب بيقول في المبدأ رقم 81

in a relationship of anykind if one person feels the other person isn't bringing anything to the table he or she will begin to disrespect this person

لو مبيقدمش اي حاجة لانجاح العلاقة دي اكيد خلاص ثقتها واحترامها ليه بيقلوا ..يعني مثلا مقلهاش بحبك بقاله تلات سنين اكيد مش هتحس انه جوزها اساسا او الشخض اللي بتحبه .

وعشان نعرف اهمية الغيرة وانها شئ اساسي نشوف المقولة دي عن الغيرة
Love may exist without jealousy, although this is rare; but jealousy may exist without love, and this is common”

وكمان في شاعر زمان في الجاهلية معروف الغيرة الشديدة عنه لدرجة ان واحد بص لزوجته قام طلقها ! فبعد ان لامه اصدقائه قالهم هو ليه عمل كده وقال الشعر ده :

سأترك حبها من غير بغض ولكن لكثرة الشركاء فيه
إذا وقع الذباب على طعام رفعت يدي ونفسي تشتهيه
وتجتنب الأُسُود ورود ماء إذا كان الكلاب وَلَغْنَ فيه



ورغم ان الستات بتسعي لكسب غيرة زوجها عليها فان الدراسات اثبتت ان غيرة الستات اكثر استجابة 9 مرات اكثر من الرجالة ..يعني رغم انها عارفة الغيرة كويس وعارفة انها شئ متعب ومرهق جدا للاعصاب الا انها بتحاول تغذي جوزها بالاحساس الفظيع ده .

والستات ممكن تلاحظ انهم ممكن يستعملوا اسلوب الغيرة ده اللي هو الفيس بوك في اي وقت يعني حتي وهي بتطبخ لان الستات ممكن تعمل اكثر من حاجة في وقت واحد لان الكتاب الشهير
Men are Like Waffles Women are Like Spaghetti

بيقول الحقيقة المشهورة ان الستات بتقدر تقوم بالمهام ال
multi-tasking

اما الرجالة فبيحبوا يقوموا بالمهمة لوحدها وبعدين اي مهمة تانية بعدها مش في وقت واحد وعشان كده شبه الستات ب "الاسباجيتي" !



وبيقولوا ان الغيرة في ال
evolutionary psychology

شئ بيولوجي ورئيسي في حياة كل انسان زي ما بتقول الدراسة انه
biologically based emotion


وكثرة الرجالة في الفيس بوك عند الزوجة ممكن تخلي بعض الانواع من الرجالة يتعاملوا عادي مع وضع ده زي ما تسمع المصطلح الشهير
the mama -ho complex

ان الراجل ممكن يعامل إمرأة زي عاهرته او امه او وسط ما بين الاتنين !! فالتعامل مع الزوجة في حالة ان كل حياتها رجالة غير جوزها ممكن يكون الزوج اتعود وبيتعامل معاها زي العاهرة وان كان ده مش موجود كتير في مجتمعاتنا الحمد لله لان لسه برضه النخوة والرجولة والحمية علي اهل البيت موجودة موصلتش للدرجة دي الا في بعض الشخصيات والمجتمعات .


وطبعا الدين الاسلامي اتكلم كتير عن الغيرة ونخوة وحمية الراجل والغيرة علي اهل البيت حتي ان عمر بن الخطاب كان من اغير الناس لعي الاسلام وعلي اهل بيته وكمان بيقول الغزالي :
"إن من ثمرة الحمية الضعيفة قلة الأنفة من التعرض للحُرَمِ والزوجة... واحتمال الذلِّ من الأخِسَّاء، وصغر النفس... وقد يثمر عدم الغيرة على الحريم، فإذا كان الأمر كذلك اختلطت الأنساب، ولذلك قيل: كل أمة ضعفت الغيرة في رجالها ضعفت الصيانة في نسائها".


وممكن الست تلاقيها بتقول لصاحبتها "وانتي هتكلمي فلان تطلبي منه كذا"
تقول التانية "يا خرابي ده كان جوزي لو عرف يطلقني"
لكن الزوجة ممكن تقول الجملة دي وهي سعيدة ان جوزها بيحبها للدرجة دي زي ام بيقولوا بيغير من الهوا الطاير وكل ما زادت الغيرة تعرف مدي الحب اللي بيحبه الزوج لزوجته لان الغيرة مرتبطة بالحب ارتباط وثيق ويكفي اسهل اختبار ان زوجة تقول لزوجها "انا كلمت محمود امبارح بليل وطلبت منه يخلصلي الورق"
هنا الزوج ممكن ياخد موقفين لاما يقول "وخلصتي الورق ولا لسه" وده يبقي مش مهتم اصلا بيها ولا اي حاجة يا اما يقول "وكلمتيه ليه ان شاء الله من غير ما تقوليلي" وده اللي مهتم بالتفاصيل اكتر في علاقتهم وبيهتم بكل موقف ولو بسيط .
والزوجة من غير "راحة فين وجاية منين" تصبح حريتها الكاملة المطلقة سجن كامل لزوجها ولكن لا يسمح الزوج الغيور بحاجة زي كده ابدا.

والغريبة ان ساعات تلاقي واحد معلق لواحدة تحت صورتها ع الفيس بوك ويقولها "زي القمر" ويدخل جوزها ويقول "فعلا قمر" !!! كارثة بكل المقاييس ان في بشر من النوع الخنزيري ده فعلا .


ومافيش حد بيحترم ابدا الراجل اللي لا يغار علي زوجته بل ان شخصيته بتبدأ في الانهيار التدريجي للوصول الي التحكم الكامل من قبل زوجته علي مدار الوقت وانها تختار من تشاء من اصحابها الرجال بلا نقاش ولا جدال ولا غيرة وكأنهم ليسوا ازوجا علي الاطلاق !

يعني استهتار بعض الناس بالعلاقات علي الفيس بوك انا شايفه مش سليم لانه اول مرحلة اول الخيط لفقدان الشخصية للزوج وكمان تأثير ده علي الاولاد نفسه لان الام اللي بتكلم رجالة سواء تليفونيا او عهلي الفي بوك متقدرش تلوم بناتها او ولادها لو كلموا رجالة او بنات لان ساعتها هيكون "شيمة اهل البيت كلهم الرقص" !
واول جملة هتتقال لو الام عاتبت البنت "ليه يا ماما ما انتي طول السنة بتكلمي في رجالة في التليفون وع الفيس بوك هي جت عليا" !!

يعني الموضوع كمان واصل للتربية والابناء وللاحفاد كمان يعني الموضوع مش هين ولا حاجة وكلام الرجالة للستات علي الفيس بوك هو نفسه الكلام ع التليفون مش هنختلف ع الوسيلة يعني لانه كله بيأدي لكله والعيب كله في الاخر علي الزوج وانا احترم جدا الازواج اللي بيمنعوا زوجاتهم من اضافة رجالة علي الفيس بوك لان دول رجالة بصحيح لم يصيبهم "التخويخ" او لو وصلت لمرحلة اعلي هتكون
"انهيار كامل للشخصية" للأسف !!

كل شرقي غيور دمه حامي فعلا يحمد ربنا لان في نماذج في الدنيا تخلي الواحد يحس قد ايه الغيرة دي نعمة لو استعملها بحكمة .

رمضــانيات 4

* انتقال "سامح حسين" من مسلسل "راجل وست ستات" الي اعمال ياخد دور البطولة فيها زي مسلسل الزناتي مجاهد يخلي الواحد يقول "ما اسخم من سيدي الا ستي" .


* اغرب نوعية اعلانات هي اللي بنشوفها علي قناة القاهرة والناس زي اعلان الشيشة اللي بييجي في الكافيه الرمضاني ودي اول مرة اشوف فيها اعلان شيشة علني كده بدخانها وكمان اعلان زي بتاع "جواز اون لاين" الظاهر الاعلان ده جه بعد مسلسل عايزة اتجوز السنة اللي فاتت .


* في ناس في مصر سهل اوي تقنعهم باي حاجة قدام فستان وحتة طرية ! زي اللي بيطلعوا في اعلان بيبسي وبدل ما يقول هاصوت للخير بيقول هاصوت للفستان البمبي !


* بعد متابعة فترة لمسلسل المواطن اكس سيبت المسلسل بعد الحلقة 15 تقريبا لان المط والتطويل والملل في المسلسل فاق الحد والملل اللي كان في فيلم ايس كريم في جليم !


* احب اقول للمخلوع علي راي المثل "كل برغوت علي قد دمه وكل حاكم علي قد ثورة شعبه"


* المجلة اللي عايزة تبيع فعلا اليومين دول المفروض تعمل ملحق زي بتاع زمان اللي كان اسمه "اين شلبي" وهي لعبة كده لشوارع زحمة وتدور في ملحق عن شلبي ..دلوقتي يعملوا "اين القذافي" ويجيبوا كل شوارع طرابلس وباب العزيزية وعشان تعرف مكان القذافي يكون في فوق الصور علامات حشيش دالة علي مكانه !


* الايام دي بيحصل سرقة ونهب لرموز سياسية علي الطرق وضرب لشخصيات اخري من اول عمرو حمزاوي لحد مستشار حزب الحرية والعدالة اللي اتضرب بشدة طب ليه محدش يبعت لبتوع طرة حد برضه يديهم اللي فيه النصيب ؟ واهي تبقي علي طريقة اضرب المحبوس يخاف السايب .


* اظن ان بعد الثورة ممكن حاجة تتصلح الا حاجتين هم "الانترنت" وفساد قطاع الاتصالات وكمان فساد داخل البورصة وعمليات مشبوهة ولو حد سألك عن وضع الانترنت المصري قوله زي فيلم احمد عيد "ده مش وضع ده كل الاوضاع" !


* مش عارف ازاي الناس اللي بتنادي وتقول "الله ومعمر وليبيا وبس" تجيب كلمة معمر بين كلمة الله وكلمة ليبيا ازاي السفاح يكون كلمة وصل بين شعب ورب !


* السفير الاسرائيلي كان واخد كورسات عند حسني مبارك في فن البجاحة بدون معلم ! وتلاقيه بين كل الثوار اللي عايزين يطردوه بيقول في سره "خليهم يتسلوا" .


* دلوقتي المثل الشعبي هيتغير واي حاكم ظالم ييجي نقوله "قال يا فرعون ايه فرعنك قال ملقيتش تحرير يلمني" .


* اظن ان اللي بيطالبوا بعودة حسني مبارك هم مش مجانين بس ولكن المفروض يخرجوا في الشارع ويقولوا "ملكية ملكية احنا ولاد هبلة وهفية" !


* اظن انا عرفت دلوقتي مكان "بحر البقر" الحقيقي هتلاقوه علي شواطئ مارينا اللي كان بيعوم فيه الوزراء قدام قصورهم .


* مسلسل الهاربة 2 بتاع تيسير فهمي خلاني عايز طاقم العمل بتاع المسلسل يهرب فعلا ومحدش هيلاحقه !


* فيفي عبده بتقول انها "ابو تريكة الدراما" ولكن هي المفروض تكون بركات لانه "ملك الحركات" .


* الفلول هم جماعة "أسفين يا ريس" والثوار هم جماعة "إسفين يا ريس" !


* الفرق بين الاسلاميين والليبراليين هو نفس الفرق بين "المارش" و "المارشميللو" !


* كان كلام الحكام العرب زي قصايد غير مفهومة وملهاش صدي ويقولك في الاخر "المعني في بطن الحاكم" .


* انا بيتهيألي ان اللي ماسكه علاء وجمال في السجن مش مصاحف انما هي جلدة مصحف وجواها ورق ابيض جواها بقية حساباتهم في اوروبا !


* مسكوا لحوم فاسدة في كل السوبر ماركتات الشهيرة في مصر واللي ليها اسم جامد يعني كده في مصر النباتيين يتسرطنوا والعاديين يجيلهم فيروس سي والفقرا في نعمة !

رمضانيات 3

* رمضان شهر الخير ده اكيد ولكن من اكتر اعلانات المستشفيات اللي ممكن يكون اعلانها بطريقة الطف من كده الناس بقت بتحس ان رمضان شهر الامراض والفقر واليتم !


* اظن ان مسلسل الدالي فاضله فقط جزء كمان وممكن دمجه في سلسلة سبايدر مان .


* الكرتون المصري اللي عملناه السنة دي سواء "مات مان" او الكرتون اللي هو تقليد فيلم الانيميشن الشهير "كارز" تثبت تماما ان الافضل اننا نخلينا في انتاج بكار ونسيب الكارتون لاصحابه .


* المفروض يكون فيه قانون علي ان "الست كوم" يكون بعدد محدد من الاجزاء بسبب تباتة رجل وست ستات السنة دي..ومش هاقدر اظلم انعام الجريتلي في المسلسل لكن العيب علي اللي بيختار الفنان للدور

* فكرة التصوير السينمائي فكرة جامدة جدا في المسلسلات ولكن اننا نعمل تصوير سينمائي في البرامج الدينية زي "ثورة علي النفس" بتكون اوفر حبتين لان مافيش حاجة اسمها "شيخ كليب" ومش هينفع نعمل برنامج ديني ثري دي !


* عادل حمودة في برنامج كل رجال الرئيس بحس انه كان في فندق واحد مع رئاسة الجمهورية والنظام بالكامل وكل يوم بياخد معاهم الشاي الصبح وبيحكوله ادق الاسرار لاما يكون بيجخ علينا !


* سبايدر مان المصري اللي طلع فوق السفارة ونزل العلم الاسرائيلي القذر محتاجينه في مهمة تانية انه يطلع غرفة المخلوع في المستشفي ويقومه من ع السرير اللي بيمثل عليه ..ولكن لو طلع الغرفة وبص من الشباك هيلاقي المخلوع بيلعب في الجيم وبينط الحبل كمان !

* كانوا بيعيبوا علي الاجهزة الحكومية انها بتعلق صورة حسني ورا المكتب ..طيب ما هو نفس المبدأ علي الفيس بوك كل حدث تلاقي كام مليون غير الصورة بسرعة للحدث ده..يعني لو رمضان تلاقي كل الناس فانوس رمضان ولو هجوم اسرائيلي تلاقي كل الناس علم محروق ..يبقي خلاص نعتبر ان صورة المخلوع زمان كانت البروفايل بكتشر بتاعة الجهة الحكومية والفكرة انها متنفعش خالص تبقي "جي اي اف" متحركة !


* كل ما اجيب الجرايد اليومين دول الاقي حوالي ستين مقالة عن العلمانية والليبرالية لدرجة اني بفكر البس كاب وانسيال وانا بقرا الجرايد بعد كده وبعدين اخلعهم اما اقرا المقالات المعارضة للعلمانية والمقالات الدينية !


* لو هنعمل فيلم عن المخلوع مافيش احسن من شارلي شابلن اللي كان يعمله بجد لان النظام بيفكرني في حركته وافعاله وقراراته بشارلي شابلن في تمثيله وطريقة حركته بل ان شارلي شابلن عنده شخصية عنه بفارق كبير .


* لان اللي بني مصر كان في الاصل حلواني فكان حسني مبارك بيفكر دايما بطريقة "كل واشكر" او "كل واهبر" !



* علي طريقة اعلان قطونيل : بوكسراتك زي نظامك منهم اللي ريحته فاحت..ومنهم اللي جايبلك تسلخات وبيعذبك..ومنهم اللي مخليك مش علي بعضك ابدا .


* زي ما قال الكبير قوي عن البلاي استيشن نقدر نقول قدام مقر اقامة مبارك "يا حسني يا معلي حسي"


* لو كان واحد من الرؤساء المحتملين حاليا في الرئاسة دلوقتي وحصل موقف سيناء ده كان كل واحد منهم هيعمل كده :
حمدين صباحي "حرب"
حازم صلاح "يلا نقيم الليل وندعي عليهم"
مرتضي منصور " يلا نزعق ونردحلهم في سينا"
العوا "تعالوا نشوف القانون بيقول ايه"
بثينة كامل " تعالوا نعمل نظام امومة وطفولة جديد"
توفيق عكاشة "أسألوهم عن سعر ربطة الجرجير في سينا"



* افضل ممثلين في راي حتي الان هم خالد الصاوي في مسلسل خاتم سليمان وماجد المصري في مسلسل ادم واسوأ اداء هو تامر حسني في ادم وحنان ترك في نونة الماذونة .


* برنامج هكشن اللي بيعمل مقالب في ممثلين يثبت ان بعض الممثلين بيشوفوا التمثيل سبوبة وبيقبلوا اي درو والسلام ولا ورق ولا نيلة بيقروه اصل كل ممثل يقولك المهم الورق..الظاهر قصده خامة الورق !



* علي طريقة نشيد الاهلي دلوقتي الفلول بيحشدوا الحشود قدام كل محاكمة وبيغنوا :
"قوم يا حسني
شوف فلولك والجنود
شوف حبايبك
والمنافقين ليك وجود.
انت دايما انت دايما انت دايما دايما دايما في النظاااام "



* نظرية عالم ايطالي شهير بتقول ان وش حبيب العادلي بيقول انه مجرم بالفطرة !.. وكأن النظرية بتقول "هو بعينه ببلطجيته بغبائه بوشه العكر " !


* بعد كلاب زكريا عزمي اللي سابت علي لجنة الكسب غير المشروع المفروض يغير اسمه الي "زيكس بول دوج" او "مرعي بتاع الكلبة" .

أولاد العـم..التاريخ يقول اننا الحقيقة..من أنتم ؟

أتمني ان اري تلك الصورة في الأعلي علي وجه العدو وهو يتسلم خبر الهزيمة يوما ما ونقول لهم "من الجيش المصري..شكرا لكم ونهنئكم بالهزيمة "


"هم يعرفون جيدا ان الحرب قادمة يوما ما..
ونحن نملك اليقين بأننا سنمحيهم من الوجود ..
وما بين معرفتهم ويقيننا هدنة كاذبة سموها السلام "


لا أعرف لما يتعجب البعض مما يحدث وينسب بعض المصريين الامر للثورة علي انها السبب في الحرب..لا اعرف لماذا لا تيقن الجميع ان الحرب قادمة لا محالة سواء قامت الثورة او لم تقم !
لا اعرف لماذا ينكر البعض حقيقة معركة النهاية وان القضية الفلسطينية محنطة في دواليب الزعماء العرب منذ عقود دون ان يتحرك احد ولن تحل ابدا الا بالحرب القادمة .
عندما قرأت بعض الكتابات للعبقري "عبد الوهاب المسيري" ايقنت تماما بأن الحرب ستحدث يوما ما حتي وان طالت المدة وحتي لو طال الانتظار.

كما قال بن غوريون يوما ما ( الكبار يموتون ، والصغار ينسون ) وكأنه يسخر من واقعنا العربي المرير ويري حقيقة الزعماء العرب الخانعين الاذلاء الذين تقام علي اراضيهم القواعد العسكرية الغربية طوعا وكراهية ولا يملكون حولا ولاقوة .

تحدث الرئيس الأمريكي ريكن عام 1980 في مقابلة تلفزيونية أجريت معه وقال: (إننا قد نكون الجيل الذي سيشهد معركة هرمجدون) ** **"ويكيبديا"
او المعركة الفاصلة الكبري بين الخير والشر وهي معركة يعرفها وينتظرها المسلمين والمسيحيين واليهود كل حسب روايته ولكنها يقين عند كل الديانات .
لن نتحدث عن تفاصيل المعركة التي ظهرت فيها المئات من الكتب والروايات والتي لها اكثر من علامة مميزة ولكن من يقرأ في تفاصيل تلك الملحمة يعرف ان حرب كبيرة ضروس قادمة لا محالة فلماذا نهرب من الحقيقة !


ربما لا يريد البعض الحرب بهذه السرعة ولكن لن يفيد الانتظار في اي شئ طالما القدر سيرسم ملامح تلك المعركة القوية الكبيرة فلابد ان لا نرمي الانهامات وان الثورة قد جعلت النهاية وشيكة لان الكثير من البشر حول العالم تحدثوا عن قرب حدوث حرب عالمية ثالثة وتوقعوا ذلك منذ سنوات حتي ان منهم زعماء سابقين !
واي منطقة خصبة للصراع والحروب ستكون اكثر من منطقة الشرق الاوسط التي تمتلئ بالصراعات من اولها الي اخرها .


ويبدأ التخطيط الاسرائيلي منذ سنوات سواء بما ذكره الكاتب فهمي هويدي عن كتاب اسرائيلي سابق يرصد خطة كبيرة لتقسيم السودان وقد حدث بالفعل مخططهم الي خطط اخري ترسم تفكيك وتخطيط العديد من الدول كما نجحوا ايضا في الفتنة في لبنان ب"اليد الثالثة" التي تضع وتشعل شرارة الفتنة دائما لتفتيت لبنان.

ربما بدأت اسرائيل التي اغتصبناها عام 1973 واذقناها شر هزيمة بخير جنود الارض في التخطيط لبعض الحيل علي ارض سيناء لكي يظهروا امام العالم في مشهد المظلومين الذين يحتاجون لمساعدة العالم اجمع في مواجهة المصريين !
كالعادة تظهر بعض مخططاتهم القذرة وبدأت سفيرتهم تتحدث عن ان منطقة السلام مع مصر في خطر ومن يستطيع ان يضاهيهم في الكذب والخديعة وهم اصحاب خديعة الهولوكست لابتزاز العالم اجمع واصحاب "معاداة السامية" لكسب التعاطف والتأييد من انصارهم الغربيين !



ولكن اسرائيل قد تري مصر في صورة اخري وربما يحتاج بعض الاسرائيلين ان يفهموا جيدا بعض الحقائق علي لسان كل مصري لكي يتعلموا جيدا من التاريخ ودروسه العظيمة ودعوني الان امسك اسرائيلي من قميصة واشده الي واقول له بعض ما يغيب عنه لعله يفقه قولي :

أولا : لا بد ان تعي جيدا ان مصر "احمس" هي نفسها مصر الأن وما بين الفترتين من تاريخ ملئ بالانتصارات التي تأتي بعد الانكسارات ولكن المصريون امثالنا لا يعرفون معني كلمة يأس

ثانيا: لابد ان تعرف ان مصر التي هزمت مبارك ونظامه لأن المصريين كانوا يشعرون ان مبارك يملك رائحتكم من كثرة التعامل الدنئ معكم لكي تقدروا حجم الكره الذي نكنه لكم

ثالثا: لابد ان تعرف بدون شيفونية ان قطرة دم مصري واحد تساوي الف جندي منكم او ما يعادله من المال ان كان يساوي المال بالفعل .

رابعا : التاريخ لا يكذب ولا يتجمل فلتقرأ التاريخ جيدا كي تعرف تاريخي كمصري وتاريخك في دولتك المزعومة .

خامسا : لابد ان تعرف ان اي حرب وشيكة بيننا هي في مصلختنا خصوصا في هذه الايام وابشركة بموت السلبية ولتقرأوا نعيها في اي جريدة ان كنتم تجيدون العربية يا اولاد العم .

سادسا : ابشركم بملايين القنابل الجاهزة للانفجار في وجوهكم وجسدي ان أردتم جاهز تماما ومستعد للبشارة .

سابعا : لابد ان تعرفوا انكم مسروقين موسيقاكم مسروقة والحانكم وسياستكم ووجودكم حتي مسروق انتم بلا رائحة ولا نكهة وجود .

ثامنا : انا لا اتحدث معك بعنصرية فانتم من زرعتم داخلنا الكره والبغض لكم واقسم بالله انكم فعلا باي استفزاز تفعلونه لا تقدرون حجم البغض داخل كل مصري لكيانكم المسروق ووجودكم الكاذب .

تاسعا : لابد ان تعلموا ان كلمة "مصر" تحفزنا في القتال كما كلمة "الله اكبر" في معارك قديمة مع جدودكم الخونة التي هزمتم فيها ورأيتم الذل والعار كعادتكم .

عاشرا : لابد ان تعلم ان تطبيعي هو مع الحق والعدل وليس مع الكذب والخديعة

حادي عشر: يكفيني ثلاثة ايام لمعرفة تاريخك ولا يكفيك عمر كيانك الصهيوني او وجودك الاسرائيلي لمعرفة نصف تاريخي المصري

ثاني عشر : لا تعد ابدا في تقييمك حجم قوتنا العسكرية فأمامكم سنكون كلنا عسكر وكلنا جيش مصر اي احسب في حسابك ثمانين مليون او يزيد .

ثالث عشر : في علمنا المصري نسر راقد منذ فترة ولكنه كان يحفز قدراته وحدة بصره فانتظر النسر القادم بقوة.

رابع عشر : هل تعرف "ناطوري كارتا" الحركة التي ترفض وجود الصهيونية ودولة اسرائيل ووجودها ؟ هذه الحركة لا تعرف اي شئ عن العداء ان كانت ستقيسه بمقياس ما في صدورنا لكم .

خامس عشر : زمن مبارك قد ولي وانتهي فلا تجعلونا نريكم الوجه الذي نخفيه لكم منذ عقود

سادس عشر : انا لا اجلس الأن واكتب فقط اليكم بل انا داخلي الان بركان طالما اقتربتم من نزعتي الوطنية وحبي لمصر الام والحبيبة وانا لست قويا او صلبا او ايجابيا فما بالكم بمن اتحدث عنهم !

سابع عشر : انا لا اشارك في مظاهرات ولم اشارك في اعمال سياسية قوية ولكن امامكم فقط مستعد للتطوع ولو حتي حامل لتراب مصر او رافع للعلم واستشهد علي ارض مصر الطيبة .

ثامن عشر : نصيحتي لكم لا تحاولوا التفكير في الوقوف امام عربي مسلم فنحن نحمل لكم ما لاتحملونه حتي بعد تعليمكم العنصري الذي يحكي الكذب عنا ..نحمل لكم كرها لا تطيقونه ولا تستطيعون الخلاص منه

تاسع عشر : الله اكبر..والمصري اكبر منكم والحق اكبر واضعف من فينا اكبر من اكبر من فيكم .

عشرون : انا الحقيقة.. مصري وافتخر ..عربي وانتصر.. مسلم وسأعيش كذلك ..فقولي لي حقيقتكم ان كنتم تعلمونها .


لا تنتظروا شيئا يسمي الحرب..فنحن لا نعرف كلمة الحرب..مصر فقط تعرف كلمة "الانتصار" ..
مصر لا تعرفكم..مصر فقط تعرف الرأس المرفوعة والشموخ يا أهل الشروخ ..!

ربما كان مقالة حماسية ولكني اشعربكل حرف فيه لأني مؤمن بمصريتي مثل ايماني بالله
رحم الله شهدائنا علي الحدود
أعز الله كل مصري واذل كل عدو لمصر .

انا بحب الثورة اذن انا صربي !!

اليومين دول يومين "صربيا" ! يعني اي واحد كاره الثورة او بيقول "يا بابا مبارك" يقول علي طول علي ابناء الثورة الشرفاء دول بتوع صربيا ودورات صربيا في الانقلاب !!!
المطالبة بالحق "صربيا" ..خلع الفاسد "صربيا" ..شباب سياسي مثقف وواعي "صربيا" ..!
زمان بتوع صربيا دلوقتي مذهولين من كتر ما بنتكلم انهم ملوك خلع الحكام وملوك الثورات في العالم مثلا وبيعلموا العالم كيف تكون الثورة !
يعني حتي صورتنا هننسبها للغرب ونقول "صربية..صربية" !!
يعني هنغني "لو سألتك انت صربي تقولي ايه؟؟؟" !!!
مع ان احنا مصريين وتاريخنا حافل بالثورات يعني احنا اللي نعلم العالم كيف تكون الثورة وكيف تكون المطالبة بالحق وقتل الظلم .
ولو واحد من صربيا اتكلم دلوقتي هيقول :

صرباوي عاشق الانقلاب
واعملي فيه ييجي مية كتاب
شوفني بهز الكرسي ده
واخلع بثورة الكرسي ده..
وادي كمان وجبة كباب !
كورسات في فن "المخلعة"
يا شعوب قديمة مهكعة..
والكورس ايه دام عزكم..
في ديمقراطية تهدكم..
ولا حد يحكم شعره شاب..
ازاي يا مصري تقول كده..
علي ابن بلدك مش كده..
وتقول ده سافر ده عميل..
وكلام وخرف كتير كتير..
تفتحله ورقة وميت حساب..
يعني هاعلم شعب ثار..
من فجر عمره وخد قرار..؟
يعني انا اللي هاقولكم ؟
ازاي هتاخدوا حقكم ؟
الشعب انتخ ولا خاب ؟
ملقوش في ثورة اي عيب..
قالوا دخيلة ومالية جيب..
قالوا دي ثورة من الحدود..
اصل "أريد" كلمة يهود !
ونزلوا خبط في كل باب..
قالوا كمان دي منظمات..
وفلوس وتحت الطرابيزات..
قالوا كمان "تحرير" جبان..
دمر في مصر وزاد كمان..
"توفيق" معاهم كلب ساب..
واللي يقول ثورة عيال..
تخرج مظاهرة مش حلال..
واللي يقول "دي ضيعت"
واللي يقول "دي دمرت"
وكان مصر كانت شباب !
دي بلدكوا كانت مليطة..
وعصابة حاكمة مزقططة..
وناس كتيرة لابسة شيك..
"نظيف" سرق.."صفوت" ي......
نعمله ايه ديل الكلاب !
خليتوا صربيا مفخرة..
والناس هنا متفشخرة..
صرباوي اصلي وافتخر..
ويزيدلي صيتي واشتهر..
اني بدرس للبلاد..!
لا تقولي نمسا ولا مجر..
فيكي يا مصر بشر غجر..
نازلين في سيل الاتهام..
وفلول يقولوا "العم سام"..
هو اللي خطط ..ده انقلاب !
لو كل ثائر خد دروس..
ازاي يوقف نخر سوس..
يبقي ده شئ بيه يفتخر..
مش ينكره او يستتر..
والحق علي في حق عاب..
ده الناس هنا بتقول يا مصر..
يا رمز ثورة في كل عصر ..
وانتوا تقولوا دي "صربيا"..
هي اللي عملت كل ده ..
يحميكوا ربي من الهباب ..
"سلمية" مش طبعي انا..
ده طبع مصري في ميت سنة..
انا حرب عالمية وعذاب..
انا صربيا دم ورماد..
يعني نقول ثورة شباب ..
شبابكوا طاهر مش عميل..
شوفوا ما بينكوا مين دخيل..
يشتم يسب في ثورته..
ويحب مين هان عزته..
والثورة طاهرة من اللي عاب..
ثورتكوا حرة من السويس..
منصورة وصعيد او عريش..
ولا صربي واحد مسها..
"اصله معداش علي صربيا" !
"اصله معداش علي صربيا" !

رمضانيــات 2

* بعد اعلانات رمضان الناس مختلفة مين اللي يستاهل البيبسي ولا مين اللي يستاهل كرسي الحكم ولا مين يستاهل الاعدام من نظام مبارك !


* غسان مطر في اعلان الحلاوة الجديدة بيفكرني بحبيب العادلي وهو بيقول "هاتوهالي" واكيد بيتكلم عن زوجة او ام شاب سياسي عشان التعذيب !


* أظن ان حتي الأن ماجد المصري عامل احسن دور في رمضان من خلال مسلسل ادم ودوره اللي هو ظابط امن دولة يعاني من الكثير من المشاكل اولها العقم واخرها كره زوجته له .


* اعلان المصرية للاتصالات بتاع اسوان بقت اسكندرية والاسماعيلية بقت مطروح رغم انه بيتكلم عن العرض بتاع الاتصالات الا ان الواحد يحس ان اللي عامل الاعلان كان واخد كمية حشيش من خلال الكلمات بتاعته .


* المعلمة كيداهم اللي هي فيفي عبده عاملة زي سوزان مبارك بالظبط فاتحة فرن عيش وهي اصلا تاجرة مخدرات وسوزان فاتحة القراءة للجميع وهي بتتاجر بقوت مصر كلها من وراه .


* برنامج من انتم بتاع بسمة بيجيب كل يوم واحد فلول وواحد ثورجي قدامه بس الملاحظ ان دايما الفلول بيبقي قاعد مبلول عقبال جماعة احنا اسفين ما يحسوا كده برضه .


* محمود بكر اخيرا اكتشف مواهبه انه لازم يبقي موديل في اعلان او يعمل برنامج يومي ويسميه " بكر شو"


* حلقة مرتضي منصور كانت اسخن حلقة في برنامج الشعب يريد ومرتضي فعلا هيفضل مرتضي ويستمر وينتشر ويتوغل !


* محاكمة العادلي بيزداد ثقة في كل محاكمة ويزداد بجاحة ..العادلي مرة بعد مرة يقعد يبتسم طول الجلسة والناس تدي بعض بالكف ورا القفص الظاهر انه فاهمين ان كل تاخيرة وفيها خيرة تقريبا .


* بعض البرامج بتاعة الطبخ فعلا تحس ان المكونات في اقرب صيدلية خصوصا اما قال انه هيعمل "رز معمر عليها تعابين البحر" !!


* برامج الكاميرا الخفية السنة دي مزوداها قوي في عملية فزع الناس وتخويفهم الظاهر ان دي كمان عاملة ثورة علي تقليدية وسذاجة "زكية زكريا" زمان .


* شركة بريل بتدي جوايز للناس في اعلان وراحت لواحد في منطقة مقطوعة تماما في النوبة او مكان زي كده وسلمته لاب توب !! ياريت جوايز البرامج تراعي المكان اللي هي راحة ليه لان لازم الشركات دي تعرف ان في ناس لسه عايزة خط تليفون اصلا !


* بعد اعلان دنيا سمير غانم اظن ان فوازير رمضان ممكن ترجع من تاني وتكون هي البطلة فيها لانها اثبتت انها استعراضية ناجحة جدا .


* عشان الاتهامات اللي بين الطرف الديني والطرف العلماني الايام دي تلاقي الناس قاعدة علي مائدة الرحمن بيقولوا "العلمانيين قاعدين علي مائدة العلمانيين وبيفطروا قبل المغرب بنص ساعة لانهم فسروا براحتهم جملة عجلوا بالفطور " !!


* اظن ان دموع بعض الناس علي فساد مبارك هي "دموع في عيون...." اما نظرة العادلي للي جانبه في القفص وهو بيبتسم فكأنه بيقول "يا عزيزي كلنا لصوص" !


* في اعلان يونيفرسال اللي بيتكون من تلات مقاطع جنسية تقريبا بلغة التلميح يعني ..المقطع الاول واحدة بتقول لامها "عيب يا ماما انا عملاله سمك واستاكوزا تربيتك" وصوت بيقول "شغاااال" والمقطع التاني واحد بيقول "حاجتين بس بعملهم بمزاج الأكل وال...." ويطلع الصوت يقول شغااااال..
اظن كده المعني واضح قوي وشغال من يونيفرسال لكن مش هيكون أسوأ من اعلان زبادو الجنسي اللي الراجل فيه بيشرب زبادو وبعدين يدخل الاوضة ويغمز ويقول "ريحها متتعبهاش" معدته يعني !!! " .

نظـرية الفقاعة المفقوعة في بلدنا المحروسة

نظريـة الفقـاعة المفقوعة :
كل ما تكبر الفقاعة يبقي انت بتحتك كتير بالناس يعني العلاقة ما بين الناس وبين الفقاعة طردية مية في المية في مصر !

فقاعة زي اللي تطلع بالظبط في الكاريكتير او القصص المصورة او زي اللي في الصورة اللي فوق دي.. اما تلاقي دواير كده طالعة فوق راسك وفيها علامة لمبة مثلا لو فكرة جديدة او علامة اعصار لو غضبان قوي ..لكن في مصر هتلاقي معظم الوقت الفقاعة كبيرة وفيها علامات مختلطة مع بعض من الغرائب اللي بتسمعها .


ادخل علي محل ملابس واقوله عايز تي شيرت بس نفس الاستايل اللي انا لابسه ده يقولي "ليه ما تغير الاستايل ده وجدد" !! طبعا هنا بتطلع فقاعة انك بتجري وراه باربجيه لحد ما يخرج من الحدود مع اصحاب المحل كلهم !
انما اللذيذ التاني بقي يقول "طلبك عندي" اقوله "ويكون لونه كذا" يغمز ويقول "طلبك عندي" علي اساس اني بتكلم علي مخدرات صنف جديد سوبر لسه نازل مثلا ده فقاعة بتطلعله مخصوص فوق وانا بخنقه لحد ما يقول امين !


واحد يخبط عليا من النجمة يقولي "عارف اوباما انا عايز تفاصيل وافية عنه والنبي" ساعتها طلعت فقاعة فيها علامات تعجب بتتحرك وتطلع العاب نارية كده وصيحة غضب مكتوب فيها "وات ذا ...." !
عايز تفاصيل عنه ؟ علي اساس اني من عيلة محمد اي ايه صاحب كشك السي اي ايه ؟؟ وبعدين هو انت هتعيشلي دور جمعة الشوان ؟ ايه هتأذي اوباما مثلا ؟ هتزعله في حاجة ؟؟ يا عم ارحمونا بقي .


تقول لواحدة "ورأيك ايه فيها بقي" تقولك "انسانة جميلة ومتكلمة" !!
متكلمة ؟؟؟ اهي دي بجد محتاجة فقاعة فوقها هي بقي وعصافير بتدور من ضربة شاكوش علي راسها ! يعني ايه متكلمة ؟؟ هي دي بقت صفة ؟؟ ما هو الانسان حيوان ناطق ايه الجديد ؟ ايه هي الصفة في كده انها بتشم كمان ؟؟ طيب معاها كتالوج لاستخدام حواسها الخمسة ؟؟ ولا في حاجات منها في الضمان او الصيانة ؟؟
او حد يقولك "دي انسانة دمثة قوي" ! علي اساس انها من قبيلة قحافة ولسه الالفاظ دي بتتقال اصلا ..انسانة دمثة الاخلاق عريضة المنكبين !!


كانت اكتر الفقاقيع اللي منتشرة بقي ايام الجامعة زي مثلا بتاعة شئون الطلبة تقولي وانت بتدفع المصاريف ادفع التبرع اقولها اه مش عامل حسابي النهاردة ممكن ادفع بكرة افضل اكون جهزت مبلغ كويس ؟ تقول "ماشي بس بسرعة اصل التبرع اجباري" !!!! هنا بتطلع فقاعة مكتوب فيها "ايييه ده يا بللللد؟؟؟" وواحد بيضرب رصاصة في بقه زي فيلم اعدام ميت كده اما ابو جودة مات !!
تبرع اجباري؟؟ مش ملاحظ ان الكلمتين عكس عكاس يعني ! ازاي تبرع وفي نفس الوقت اجباري ده كلمة تبرع تدل علي الاختيار والمساعدة !!


وبتاع التاكسي البلطجي بقي اما يحب ميكملش المشوار يقولك "معلش هتنزل هنا اصل الكاوتش نام" في حالة سواق التاكسي لازم تلاقي فقاعة كبيرة قوي قد البالون كده "شت ذا فك اب" وواحد ماسك كرباج اسواني وبيلسع السواق علي ضهره في الفقاعة !
الكاوتش يعني طلبت معاه نوم دلوقتي في نص المشوار لكن طبعا مع كل زبون الكاوتش بينام ويصحي يعني لو بنت حلوة راكبة يبقي الكاوتش مية مية ويقول معلش هافوت اجيب طلب عشان يقعد جنبها اكتر فترة ممكنة قال يعني قاعد جنب كاميرون دياز وعايز ياخد صورة لكن بعض السواقين بيوحوا لي ان كل البنات عبارة عن كاميرون دياز او جيسيكا البا !

ولا الحلاق اللي عقدني في عيشتي وكل شوية يجيب واحد تحت التمرين ومطلوب مني ادفع كام بقشيش؟؟ يعني في حواليا ييجي 6 بيتمرنوا علي قفايا اكني في اوضة كشف رخيصة بيتعلم عليا طلبة طب مع استاذهم ! هنا لازم تشوف فقاعة فيها انت ومايك تايسون ايد واحدة ونازلين بوكسات في سنان كل واحد منهم وبتزعق وبتقول "جو تو هيل يو فكن مون هيد كيس ماي .." !!قال يعني الكلمة الاخيرة اللي مش عايز اكملها علي اساس ان اللي قبليها عادي اصل الشتيمة بالانجليزي عادي انما مقدرش اقول الالفاظ دي بالعربي علمنا كده احمد مكي في افلامه واهو بكرة من ده بوشين !
المهم ان واحد يجيب فرشة غريبة بتشوك ويقعد يعمل في قفايا وواحد تاني يكنس تحتي وواحد يبخ عليا مية وواحد يدعك راسي وواحد واقف بس بيتأمل اللي هو المفروض تقوله "اجيبلك كاس ليمون وشمسية وتقعد مع شعري في قعدة رومانسية؟؟" ولا هو بيتأمل معجزة الشعر البشري مثلا علي حظي يعني جاي ينبهر دلوقتي من شعر الانسان مع انه عايش في وسط بركة من الشعر طول النهار !!



ولا اروح اجيب حاجة من حظي من محل شعبي لانها مش موجودة غير هناك الاقي الست واقفة بعلو صوتها اول متشوفني "احضرنا يا ابني"
اقولها "يا حاجة انا...."
تقولي" اسمع بس الراجل ده واخد مني العشرين جنيه واتفقت معاه ودلوقتي جاي يقولي علي خمسة وعشرين"
اقولها "يا حاجة انا...."
يقولي " يا افندي ما هي كل يوم تفاصل وتاخد اللي هي عايزاه "
اقوله "يا سيدي انا....."
تقول الحاجة " ما هو الراجل ميرجعش في كلمته"
يقولها الراجل" قصدك ايه يا ست انتي متحضرنا يا استاذ"

طبعا هنا الفقاعة بتكون مزدوجة الحافر معوجة صدفة الظهر مقوقسة لان كده اوووفر اووووي اللي بيحصل ده انا وقعت في مشهد من فيلم خالتي فرنسا ومش عارف اخرج منه ومش عايزين يدوني فرصة عشان اكمل الجملة واقول "يا حاجة وانا مال امي " !!!! او "يا حاجة متتحرقوا بجاز انتوا الاتنين" !! لكن طبعا كنت هلاقي العصافير فوق راسي بتدور لاني هاخد رصية من الحاجة ماركة المعلم حنتيرة قاسية قوي !


يقعد طفل صغير جنبي اقوله "الراجل ده اللي في الفيلم هيتحول علي فكرة ويبقي "هالك" اخضر كده "
يقعد كل شوية يقولي" هيتحول امتي؟"
اقوله "شوية يا حبيبي وهيتحول اهو"
يقول" هو اتحول ولا لسه"
اقوله "شوية يا حبيبي اصبر"
يقول تاني وتالت " هيتحول ولا لسه؟"
اقوله" شوية بس يا بابا"
يقول" هيتحول امتي ؟"

ساعتها تطلع فقاعة فعلا وانا بعمله "سماك" بتاع الاندر تيكر واقوله "بس يا بابا لو مسكتش حالا انا اللي هاتحول تقريبا عليك وهانفخك" !! انما للصبر حدود يعني اذا كانت الست نفسها قال كده في الاغنية رغم انها صابرة من زمان قوي وقاعدة تفرك في المنديل طول اليوم لكن برضه للصبر حدود يعني !


اما اللي بيستفزني قوي بقي اما تلاقي واحدة هدومها مقطعة وتقولك "ميرسي" او واحدة شيك قوي وهانم وتقول "ربنا يجعله عامر ان شاء الله" !! هو انتوا عملتوا تبادل مع بعض ولا ايه؟ عاملين عملية زي فيلم اللي بالي بالك ؟؟ ماهو من حقها تقول ميرسي ماشي بس اما اشوف العكس في يومين ورا بعض ليا حق استغرب واذبهل اذبهلالا !!


ولا اما ادخل الاسانسير وريحة بارفان حريمي مالية المكان كله واحد يدخل بعدي ويشم هو كمان الريحة الجامدة دي ويقولي "ايه يا عم الريحة دي ؟"
اقوله "مش عارف بس ريحة حلوة واحدة خارجة من الاسانسير ومالية المكان ريحة بارفان"
يقولي" اه بس جامدة قوي"
اقوله "اه فعلا بصراحة"
يقولي" دي ريحة نار يا عم"

عايز ايه ده كمان ؟ يا عم وانا مال امي ريحة نار ولا مش نار اذا كانت الريحة عملت فيك كده وناقص شوية وتتهجم عليا امال لو كانت الست واقفة كنت عملت ايه بروح اهلك !!
ده تلاقيه هيقعد يدوس علي كل الزراير بعد ما امشي او يبات في الاسانسير عشان يكمل التعميرة من الريحة دي ! ايه العالم ال...دي !!



ولا الراجل اللي واقف في حل الموبايل وبيشحن شريحة الداتا ويقول "مش عارف في مشكلة تقريبا انا مش مركز خالص " !
اقوله "عارف مش مركز ليه ؟"
يقولي" ليه؟"
اقوله "عشان انت بتشحن رقم بطاقة الرقم القومي للموبايل مش بتشحن كارت " !!!!
الراجل ماسك البطاقة وياعيني عمال يشحن والست تقول الرقم اللي ادخلته غير صحيح !! المفروض تقول "الرقم الذي ادخلته رقم بطاقة يا عم المسطول" هيشحنلك ايه في الاخر سجل مدني !!



ولا اللي يقف علي ماكينة البنك وعمال كل شوية يقول "سترك يرب"
اقوله "خير يا حاج"
يقول "مش عارف هتسحب ولا لا اصلي عمري ما سحبت منها انا بسحب من جوة وبخاف من الماكينة دي" !!
طيب وايه اللي سترك يارب في الموضوع دلوقتي !! ايه المصيبة اللي حصلت يعني !! شكلك يا حاج بتخاف من الماكينات عموما ومهزوز شوية !!!
قولتله "هات وانا اسحبلك يا حاج متخافش"
قالي" بس خد بالك يا ابني الله يسترك" والغريبة انه ودي وشه الناحية التانية من كتر الخوف وحسيت اني في عملية الطريق الي ايلات قدام ماكينة البنك وكاني هاعمل عملية حربية !!


هو في ايه بالظبط ؟؟ الناس مالها قلبت كفر المزاريطة كده ؟؟ ايه حكايتكم يا بشر كفاية فقاقيع بقي !!
الدنيا ربيع والجو بديع قفلي علي كل الفقاقيع وحياة ابوك .

اما اكبر فقاعة كانت بتطلعلي ايام خطابات مبارك في الحزب بتاعه في حفلة الكذب السنوية للحزب اما يطلع واحد يقول "العلاوة يا ريس" والريس يضحك مش عارف بيضحك علي ايه وشعبه عايز منه ملاليم ومش لاقي يا كل !! بيطلعلي فقاعة فيها حلبة ملاكمة بيني وبين مبارك وانا بهجم اعض ودانه واطلعها في بقي زي موضوع تايسون كده !

"التويتر" وميدان التحـرير

كتب كتير بدأت تظهر وتتكلم عن الثورة المصرية سواء بالتحليل او السرد والوصف فقط اما الفكرة الجميلة فكانت الكتاب الشهير جدا اللي بيتكلم بالكامل عن التحرير وموقع تويتر.

من ايام استلمت نسخة من كتاب
tweets from tahrir
ل
nadia idle
alex nunns

طبعا كلنا عارفين دور الفيس بوك والتويتر في الثورة المصرية العظيمة وانها كانت من اكبر الادوات المساعدة للقضاء علي النظام الفاسد .

الكتاب توثيق كامل لكل حاجة حصلت في الثورة من حتي ايام ثورة تونس يعني قبل ما تبدأ الثورة المصرية وبدأت فكرة الكتاب زي ما بتقول المقدمة بانهم كانوا بيجمعوا كل حاجة بتتكتب في تويتر من داخل مصر حتي انهم مجمعوش اللي كان بيكتبه المصريين في الخارج لانهم كانوا عايزين من داخل الحدث لدرجة انهم ركزوا اكتر علي الي بيتكتب تحديدا من القاهرة مش من كل المحافظات وركزوا بشكل كامل علي كل الجمل المكتوبة بس باللغة الانجليزية .

الكتاب متقسم لفصول كتير كل يوم في الكتاب تلاقي ليه اسم معين يعني مثلا يوم 25 يناير بيسموه في الكتاب
the day of revolt

وفي كل يوم او كل فصل بيجمعوا "التويتس" او الجمل اللي علي تويتر اللي اتكتبت في اليوم ده وكأنهم بيقيسوا نبض الشارع المصري عن طريق التويتر وبيشوفوا رد فعله وتخطيطه في كل يوم من ايام الثورة المصرية.

الكتاب شيق جدا رغم بساطة فكرته الا ان المقدمة اللي بتتكتب قبل كل فصل مختصرة لكن وافية جدا بالذات للغربيين لانهم لو قروا الكتاب ده هيحسوا انهم كانوا معايشين الثورة المصرية يوم بيوم ويعرفوا كل تفاصيل الثورة المصرية او كل رد فعل للشارع المصري علي كل رد فعل حكومي او قرار في ايام الثورة.


اول فصل من الكتاب اسمه
the spark

ودي الشرارة للثورة وهي انطلاق الثورة التونسية واحساس المصريين بانهم محتاجين نفس الثورة دي علي النظام القمعي المستبد بتاع مبارك.

وقالت جيجي ابراهيم علي تويتير في اليوم ده :
the tunisian revolution is being twitterized.history is being written by the pwople


بعد كده الكتاب سمي يوم 25 يناير
the day of revolt

وهنا كانت بعض التعليقات علي التويتر في اليوم ده حسب ما بيسرد الكتاب :

محمد او ترافلر :
police throw rocks @ demonstrts while we raised our arms we're unarmed they're in full gear we are strong they're weak

3arabawy :
streets are empty police r everywhere

sarahngb:
tahrir square looks scary cordons policemen.fire trucks..cs trucks

3arabawy :
the chant in many of the protesets is "leave" just like tunisia

ghonim :
now in tahrir sitiuation is out of control




اما يوم الاربعاء 26 ينايرفكان اسمه
keeping the streets unsettled

وكانت بعض التعليقات فيه علي التويتر زي ما الكتاب بيقول :

packafy :
after 2 days of protesting tear gas is like fresh air ..rubber bullets are like rain drops..sticks are like thai massage

hosnimubarak :
i blocked twitter and facebook so you could focus on your work not run around the streets shouting

ghonim :
to all egyptain..silence is a crime now




يوم الخميس يناير 27 سموه بإسم :
anticipation

وكان تعليق وائل غنيو وغيره في اليوم ده بيقول :

ghonim :
pray for egypt..very worried as it seems that governement is planning a war crime tommorow against people ..we are all ready to die

sarahcarr:
send your thoughts to suez whose brave people are currently at war with the police for a third day.




الجمعة 28 يناير كان اسمه في الكتاب : جمعة الغضب
the day of rage




امايوم السبت 29 يناير اسمه :
the vanishing state

وهنا بدأ الجميع يتحدث علي التويتر عن الغياب الامني وان احنا بنحكم نفسنا دلوقتي ولازم نتحمل المسئولية ونشد حيلنا ونكمل المشوار :

وبيقول واحد اسمه
sandmonkey:
there's no state at the moment ..we're governing ourselves




ام يوم الاحد : يناير 30 اسمه :
not intimidated

وهنا بتقول نورا شلبي وغيرها علي التويتر :

norashalaby :
egyptain residents sweeping the streets and keeping order..mubarak's strategy not working

monasosh :
i can feel it ..it's so close my heart is racing ..mobarak is going down




يوم الاتنين : يناير 31كان اسمه
he army and the people are one hand

وبعض التويتس قالت :

monasosh:
i feel i haven't said it recently..fuck you mobarak



يوم الثلاثاء : 1 فبراير :كان اسمه
the million man march

وعلي التويتر :

sandmonkey :
today is the big day ..going out soon, heard that girls r getting their mothers to join..people getting friends..everyone is going




يوم الاربعاء 2 فبراير :الاربعاء الدامي :
bloody wednesday

وعلي تويتر قالت مني :
monasosh:
this is a damn war zone and the world is watching us




ويوم الخميس : 3 فبراير :
fortress tahrir

كان علي التويتر شاب اسمه علاء بيقول :

alaa:
there are thousands of heros in the streets of egypt today..i'm humbled to be among them


mossaberizing :
the thugs are actually chanting "we love you daddy"





وبعد عدة فصول في الكتاب نصل ليوم 10 فبراير : اللي كان اسمه :
fury

3arabawy :
people are waving their shoes in tahrir chanting "leave..leave"


وكان دايما واحد بيسخر ومسمي نفسه حيسني مبارك وبيطلع يرد علي الثوار علي التويتر

ومازال مبارك يسخر ويقول:
ha ! gotcha again ! come on you can't be that stupid




اما يوم الجمعة 11 فبراير اللي هو يوم التنحي العظيم اخيرا كان اسمه في الكتاب :
the friday of the martyrs

وكان عدد التعليقات كبير جدا ومنها :

mosaberizing:
it happened ?

cer:
mobarak to step down i'm not able to breathe



وكانت الفرحة كبيرة جدا في كل شوارع مصر واختلطت بالدموع وطلعب رضه اللي اسمه حسني مبارك علي تويتير يسخر ويقول :

hosni mobarak:
you people are hypocrites ! you talk about democracy but you won't let me run for president ? where's the freedom ?




ده اختصار للكتاب لكن طبعا هو مليان احداث وتويتس اكتبر بكتير وفعلا كتاب شيق يستحق القراءة وتحس انك عايش تاني احداث الثورة يوم بيوم من جديد بعد ما عشناها يوم بيوم لحد ما سقط الفساد ورحل المفسدون .

ومن الكتب اللي فكرتها حلوة جدا يمكن البعض يظن انه سهل ايه يعني ان ناس تمع من التويتر وتحط في الكتاب لكن الموضوع مش بالسهولة دي اولا الفكرة مبتكرة جدا ثانيا ان في كل فصل ليه مقدمة ووصف تفصيلي لليوم ده يعني مش بس مجرد تويتس .

الشخصيات المصطنعة وقوالب الغطرسة..تحليل لنشأة مصطنع المكيافيللية

"الاصطناع" مرض العصر انك تكون نسخة مزيفة
fake
تتأثر بشخصيات معينة حواليك وتحاول تقلدها في شكلها وفي حركاتها دون ان تملك اي جزء من فكر الشخصيات دي بالفعل.
الشخصيات المصطنعة او الشخصيات الورقية انتشرت بشكل كبير جدا في مصر سواء لأنهم وجدوها بتجيب نتيجة بالفعل وبتأثر في بعض الناس او انها بتحط الاضواء عليك بالفعل والهالة حواليك بتكبر وبتوسع .
ودايما النقطة الهامة والحساسة في الشخصية دي او السؤال المطروح حواليه : هو مخبي ايه ؟
والغريبة انه لا يخفي اي شئ داخله ولكن اصطناعه وتمرده خلاه يظهر بمظهر الشخص الغامض او الغريب اللي اكيد وراه سر كبير رغم ان السر الوحيد وراه انه "مصطنع" وهو بيكون عارف كده.



ولكن ايه سر ظهور الشخصيات دي بكثرة ؟ :

1- وجود الاهتمام بيه واحساسه لاول مرة فعلا باهتمام من حوله وانه قادر علي جذب الاضواء بشخصية وهمية وقناع جديد
2- الخروج من شخصية مكروهة او كانت يبغضها الناس ومحاولة تغيير جلده بالكامل بالتمرد علي كل شئ حتي علي نفسه فبيكون طبقة جديدة هشة وجدار ما بين الشخصيتين دول
3- محاولة انك تكون ليك وجهة معينة بدل ما انت مشتت مالكش اتجاه واضح او وجهة واضحة للعيان
4- الاضطهاد من قبل بعض الاشخاص اللي انت بتحاول تردلهم نفس الاضطهاد بشخصيتك الجديدة



قد تكون دي بعض الاسباب لكن في اسباب كتير قوي ممكن تكون الشخصية دي جوة كل واحد مننا لكن ايه اللي ممكن يغير الشخصية اصلا انها ترسم القناع ده فجاة ؟
اولا في مقولة هامة قوي عن الشخصية
Personality is and does something . . . It iswhat lies behind specific
acts and within the individual
Gordon Allport


قريت المقولة دي في كتاب بعنوان
Personality What Makes You the Way You Are
ل
Daniel Nettle

والكتاب ده اتكلم علي عدة انماط من الشخصية في شكل مفصل ورائع ومنهم المتحولون في شخصيتهم وكمان المنافقين .
وفي علم النفس يمكن ترجمة المصطلح بتقول ان في حالة من الاعجاب بالشخصية الديكتاتورية او المهيمنة وساعات بتتسمي "التوحد مع الديكتاتور" او "التوحد مع القاتل"
وده سبب ان في بعض الناس بدل ما تبغض الشخصية اللي من النوع الهجومي او المتمرد بالعكس في ناس بتحب الصنف ده جدا وبتمشي وراهم زي ما كل قاتل وسفاح ليه معجبين لحد دلوقتي من القاتلين المتسلسلين المشهورين جدا في الغرب وبعض رموز الديكتاتورية والمرض النفسي زي هتلر.

وظهور الشخصيات دي بكثرة نتيجة التاثر برضه ببعض الاعمال الغربية اللي ظهرت فيها الشخصية دي بوضوح زي مثلا مسلسل "هاوس" وهو مسلسل طبي ولكن عن رجل ذكي ولكن بارد المشاعر و "جلياط" !
ولكن البعض يعجب بالنوع ده ويقول انه "صريح" رغم ان الفرق كبير بين الجليطة والصراحة والبجاحة والوضوح !
نوع من التقليد الاعمي ممكن يظهر حتي في اللاوعي تحس انك بتقلد الراجل ده بشكل تلقائي بسبب التاثر الشديد بيه وانك نفسك تكون كده جتي لو لم تملك المقومات .

وفي عدة مسلسلات اخري زي مثلا شخصية "بيكر" اللي هي المفروض شخصية واضحة وصريحة ومتكبرة والبعض بيحبها وزي كمان رغم ان الشبه ممكن يكون مختلف شخصية "جاك نيكلسون" في معظم افلامه !
ومحاولي الاصطناع او اصحاب القالب المصطنع هتجدهم غالبا ما هيلبسوا توب المتمرد الخارق اللي قدوته هتلر او مكيافيللي وانه شخص جبار وكده يعني عشان الدور يبقي محبوك شوية علي بعض السذج اكيد .

لكن هل دي مرض نفسي ولا اضطراب في الشخصية ؟؟ انك تلبس توب فجأة مش توبك وتحاول تعيش دور المتغطرس ؟
حسب الحالة فبعض علماء علم النفس بيقولوا انه كمان مرض نفسي لمحاولة صنع عالم هو عايز يفرض فيه سطوته بدل العالم اللي هو كان عايش فيه ضعيف في الاول وبيحاول يجمع "الدراويش" بتوعه او المطبلاتية عشان يدوله الثقة بل انه كل ما يفقد واحد من الدايرة المحيطة بيه يحس ان تاثيره بدأ يضعف .

وطبعا احنا مش بنتكلم بشكل خاص عن ال
ego
او نظرية الشخصية الاوميجا و الالفا ولكن بنتكلم عن اصطناع انك تكون الشخصية دي من الاساس !

انتشرت فعلا بشكل كبير الانماط الغريبة من الشخصية المصطنعة في كل مكان واظن اننا فعلا لو اتخلصنا من الشخصيات المصطنعة والشخصيات المغرورة هتكون مصر واي بلد يختفي منها النوعين دول في احسن حال لان اذا كان "الدين المعاملة" فانواع الشخصية دي ولا بتطبق الدين ولا المعاملة وكمان كل العظماء كانوا اكثر الناس تواضعا بصرف النظر عن هتلر وامثاله فانا اتحدث عن جورج واشنطن وامثاله بالطبع .

يعني باختصار لازم الكل يعرف في عصر الانترنت وعصر المكاشفة ده وان كل شئ متاح ومباح مافيش حاجة اسمها شخصية غامضة كان زمان ممكن اما دلوقتي مافيش حاجة اسمها غامض كل انسان واضح ومكشوفة شخصيته سواء من كلامه او من كتاباته او من خلال رؤيته او حاجات كتير فمافيش غموض تماما ولكن ممكن بس يكون الغامض هو "المصطنع" مش اكتر من كده واتمني ان نتخلص من الشخصيات الورقية دي الخالية من اي مضمون لان عشان تكون غامض يبقي في راي لازم تكون موسوعي يعني تكون ليك باع كبير في كل علوم السياسة والفن والرياضة والادب وكل المجالات تقريبا زي الموسوعيين بتوع زمان اللي كانوا في نفس الوقت مش غامضين خالص بل بيثبتوا انهم مميزين يعني العصر ده هو عصر نهاية الشخصية المزيفة.


ومافيش جديد في الانواع دي من الشخصيات فهي مقدمة لصناعة شخصية عنصرية وحتي دي مش جديدة فكل سنة مئات الكتاب العنصريين في اوروبا وغيرها وزي ما نشرت جريدة الاهرام عن كتاب شهير اسمه "لندنستان" بيتكلم عن خطر الاسلام في اوروبا ومؤلفته عاشت في مصر في البداية ثم خرجت تسب الاسلام والعرب طبعا عشان تحقق شهرة لكن طبعا ملايين قابلوا الكتاب بالهجوم والنقد واعتبروها مجرد شخصية عنصرية جديدة وسط الوف يعني مافيش شئ مميز او جديد في اصطناع العنصرية لان في ملايين بالفعل سبقوا في المجال المتخلف ده.

وسفاح اوسلو الاخير ده عينة لشخصية قد تكون مصطنعة وقد تكون فعلا شخصية عنصرية وفي الحالتين اثار استياء العالم كله .
يعني اصطناع التمرد والعنصرية وكره دين معين او جنسية معينة موجود في العالم كله فاللي كده بجد مريض واللي بيصطنع ده هش وضعيف والاتنين في ميزان واحد مع ملايين المرضي اللي يستحقوا فقط مزبلة التاريخ .

ونوعية المجانين من نوعية "انا اسطورة" "انا مش ممكن" انتشرت من الشخصيات دي والعلاقة بينهم جدلية مش عارف مين بدأ التانية هل اصطنع الاول ثم قال انا اسطورة ولا العكس صحيح وهل فعلا في حاجة اسمها اسطورة ؟
العالم الايطالي "لومبروزو" ومدرسته بيقول ان للعبقرية علامات لا تخطئها وهي علامات تتفق او تتناقض ولكنها في جميع حالاتها وصورها نمط من اختلاف التركيب ومباينته للوتيرة العامة بين اصحاب التشابه والمساواة زي ما اتكلم "العقاد" عن مدرسة "لومبروزو"

ومن علامات العبقرية الشعور وفرط الحس وغرابة الاستجابة للطوارئ فيكون فيهم من تفرط سورته كما يكون فيهم من يفرط هدوئه ولهم علي الجملة ولع بعالم الغيب وخفايا الاسرار علي نحو ملحوظ في الفراسة والنظر عن بعد .

يعني دايما هتلاحظ ان العلامات دي هتكون نقيضة تماما للشخصية المصطنعة للعنصرية لان التاني بالعكس تماما عن هذه الصفات بيكون غالبا "صفيق" و "جلياط" ودائم السب والهجاء فقط !!
يعني بعيد تماما عن الشعور وفرط الحس والفراسة .

يعني اذا رأيت المصطنع فقط إسئله الاسئلة دي : ليه العالم أسوأ منك ؟ ماذا تملك ولا يملكونه ؟ وطالما يصطنع فابدأ معه بسؤال صعب زي مثلا ما اخر تلاتين كتاب قرأته ؟
لأن طبعا هو متفوق علي العالم كله يبقي لازم نتكلم في عدد كتب مهول بل يمكن نقول كمان ايه هم اخر مية كتاب قريته !!!


إسأله كمان هو المطلوب مني اني اصدقك ومصدقش سيدنا عمر وسيدنا علي وغيره من القادة العظماء العباقرة اللي اتكلموا كتير جدا عن التواضع وعدم الاعتداد بالذات لدرجة ان سيدنا عمر كان بيخاف علي الناس من استحسانهم لرأيهم لدرجة انه كان بيقول ان كل واحد يسمع التاني ويكون الامر شوري وميحبش رايه فقط بكل غرور ويقول "اخوف ما اخاف عليكم اعجاب المرء برأيه " .
مطلوب مني اصدق الشخصية دي واكذب غاندي وافلاطون وغيره من الشخصيات اللي غيرت العالم دي ؟
إسأله كمان هل تستطيع ان تجمع بين صفات "المهرج الحزين" !! يعني تكون رومانسي حالم وفي نفس الوقت تلعب ادوار اخري تكون مثلا في نفس الوقت اديب وفي نفس الوقت فيلسوف وفي نفس الوقت عالم !!!
اسئلة كتير قوي ممكن تقتل بيها اي شخص مصطنع وممكن في قعدتين تخليه يعترف باصطناعه وتمثيله .


ولكن هل الشخص المصطنع "الاسطوري" دائما بيكون ممثل ؟

لا طبعا في ناس بجد فاكرة نفسها "اسطورة" مش عارف ازاي رغم وجود ناس كتير زي "باولو كويلو" مثلا في العالم والشخص الاسطوري او اللي بيدعي انه اسطوري لازم يحط ميزان بسيط لقياس نفسه من اول عمر طاهر لحد باولو كويلو باعتبار عمر طاهر من العباقرة المصريين وباولو كويلو من عباقرة العالم كله .
والنوع التاني من الاسطوريين بيكون زي ما قلنا بيمثل الاسطورية دي عشان يداري ويبعد عن اسئلة الناس الصعبة اللي ممكن تتوجه ليه في اي مجال فيحس بعجزه فبيحط نفسه في الشرنقة بسرعة عجيبة عشان يحول الدودة التافهة لفراشة مزيفة !

اهم حاجة ان العالم كله يعرف ان مافيش حاجة اسمها "اسطوري" "فذ" "غريب الاطوار" ..فقط في اثباتات علي هذا الكلام زي ما ملايين الكتاب والملحنين والمبدعين بيثبتوا نفسهم يوم بعد يوم مش بيقعدوا في غرفة منعزلة ويقولوا "انا الخارق" بل لازم الاثباتات تقدم وتطرح والموسوعية الكاملة تظهر فعلا .

فكل ايماني هو ان " لا يوجد اسطوريين يعبدون الله ولكن توجد عبقرية الله التي خلقت بعض المميزين "
وايضا "الكل يريد ان يرتدي ثوب الشخصية الاسطورية ولكن هذا الثوب يمنح ولا يفصل " !!

رمضــانيات

* قبل الثورة كان الكلام عن "البوكسر" يادوب جملة خاطفة في اعلان ولكن بعد الثورة زاد قوي الكلام عن البوكسر وفردوله اعلان كامل وتصنيف لانواعه كمان يمكن عشان الشخصيات "البوكسر" اللي ظهرت كتير في الفترة الاخيرة زي "عكاشة باشا" وامثاله من الفلول .


* "عطشان يا صبايا مع اني في بلد النيل" تحس ان الاعلان ده صيحة في وش النظام اللي خلي الملايين عطشانين وممكن كمان يقولوا "جعان مع اني في ارض النعم " .


* من كتر المسلسلات اللي اتعملت عن امن الدولة السنة دي بدات اعتقد انهم طالبوا بحل جهاز امن الدولة مخصوص عشان نفردلهم مساحة براحتنا في الاعمال الفنية بدون رقابة .


* حاجات كتير تخلينا نصدق ان بكرة احلي حسب دراسة كوكاكولا ! منها ان رئيس كان بيلعب بصابعه في الشعب بقي بيلعب بس في مناخيره .


* اظن ان لقطة المخلوع وهو جوة القفص لازم تكون فكرة لاي شركة مراتب ان ده يكون اعلان يعمل دعاية جامدة للمنتج بتاعها ويبقي الشعار "مراتبنا تريحك حتي لو كنت ورا القفص".."نام وافرد ركبك اسبوع ومحلاها نومة المخلوع" .


* الملاحظ ان في رمضان اختفت قوي اعلانات الداخلية بتاعة "اطمن" والظاهر انها بعد جمعة تفريق الشمل هترجع بس هيقولوا "ارجع اقلق تاني"


* من كتر برامج "فرد الغسيل الوسخ" في مجال السياسة هيغيروا اسم السلك الدبلوماسي عشاني بقي الحبل الدبلوماسي وياريت يكفي غسيلهم .


* في برنامج من انتم طلع تامر امين يقول انه كان محايد تماما قبل الثورة وبعدها..واضح انه كان بيتفرج علي "نشرة اخبار الفراخ" كتير الفترة اللي فاتت.


* توفيق عكاشة سأل البرادعي عن سعر دكر الوز وسعر ربطة الجرجير ولسه مسألوش في رمضان عن سعر الياميش ومنتظرين الحلقة دي جدا يا عم عكاشة وياريت كباية سحلب معاك .


* لسه محتار جدا ايه افضل مسلسل في رمضان ولكن اكيد اخترت اسوأ مسلسل وهو "كيد النسا" و "نونة المأذونة" بسبب طاقم العمل اللي مع حنان ترك اللي يجيب الشلل انواع .


* الخلاف السياسي في مصر زي مسلسل الكبير قوي الجبهة الليبرالية "جوني" والجبهة التانية "الكبير قوي" .


* بعض الاعلانات زي اعلان "كونو مختلف" بتخليني اقول "هووووب عشان هوب متخليش الدمعة تفط "


* بدأت بعض البرامج الدينية تفقد شعبيتها لان اما اجي اتفرج عليها احس اني قدام رجل سياسة وليس رجل دين بسبب بعض المشايخ والدعاة اللي اتفرغوا للعمل السياسي فقل مستوي برنامجهم الديني.


* اللي يفطر صائم له الاجر ولكن بعض تصريحات الفنانين تخلي الصائم يفطر بس عليهم .


* بدل الخلاف بين كافة التيارات السياسية ياريت تطلعلنا "اميرة السلام" في ثوبها الابيض وتحل المشاكل كلها..اصل بتوع احنا اسفين يا ريس كانوا بيقولوا علي العقربة مرات المخلوع "اميرة السلام " !


* رغم ان المسلسل لسه في نصه بس اعتقد ان خالد الصاوي السنة دي هيقدم مسلسل من اجمل ما قدم علي الشاشة وهو "خاتم سليمان" وفي انتظار بقية الاحداث .


* للاسف كان مسلسل "مسيو رمضان ابو العلمين" نسخة مكررة وبايتة قوي من الفيلم اللي منجحش النجاح الساحق يعني اللي يخليه يتعمل مسلسل كمان .

محاكمة مبارك.."عندما توضأت مصر بالعدالة"

"إذا لم تحترم الدولة قواعد العدالة، فإن العدالة لن تحترم قواعد الدولة"
فرانسيس بيكون



في صباح اليوم الذي بدأت فيه محاكمة مبارك كان أغلبية الشعب المصري سعداء بالعدالة النافذة التي تشق غيم الظلم وتخترق بضيائها الظلمات وبدأ بصيص الأمل ونور الحق يسطع مرة اخري علي السماء المصرية وبدأ الجميع يشعر بمفهوم وقيمة كلمة "العدالة" .

ربما تعاطف بعض المصريين كالعادة مع الرئيس السابق مبارك خصوصا مع ظهوره شيخا مريضا يتحرك بصعوبة وشبه غائب عن الوعي ولكن العدالة شرف وكان الرسول دائما ما يتحدث ان الامة التي لا تقول للظالم انه ظالم امة ضعيفة وخاوية..وكان مفهوم العدالة واهميتها شئ جذريا واصيلا في المجتمع الإسلامي سواء علي الكبير او الصغير وعلي الامير او الفقير .

وكان الرسول من أكثر المطبقين للعدالة في تاريخ الانسانية عندما قال الجملة الشهيرة "لو أن فاطمة بنت محمد سرقت لقطعت يدها" .
وايضا عندما تحدث عباس محمود العقاد عن عبقرية عمر وذكر بعض الامثلة عن عدالته التي تخترق الحجب وترسي قواعد لبناء اصيل رايته الحق وصلبه الفضيلة وقال عن عمر انه من اعدل الناس واكثرهم ميلا للحق .
ويروي عن عمر قصتان هما مثالا يحتذي بهما في الحق وتطبيقه بحكمة وحصافة :

كان عمرو بن العاص واليا لمصر وكان ابنه يجري الخيل في ميدان السباق فنازعه بعض المصريين السبق واختلفا بينهما لمن يكون الفرس السابق وغضب ابن الوالي فضرب المصري وهو يقول : انا ابن الأكرمين فاستدعي عمر الوالي وابنه حين رفع اليه المصري امره ونادي بالمصري في جمع من الناس ان يضرب خصمه قائلا له "اضرب ابن الأكرمين" ثم امره ان يضرب الوالي لأن ابنه لم يجرؤ علي ضرب

الناس إلا بسلطانه وصاح بالوالي مغضبا "بم استعبدتم الناس وقد ولدتهم امهاتهم احرارا؟ " فما نجا من يده الا برضا من صاحب الشكوي واعتذار مقبول.

وايضا يذكر لعمر هذه القصة عن كيفية اختيار امير :

قال لاصحابه : دلوني علي رجل استعمله ؟
فسألوه :ما شرطك فيه؟
قال : "اذا كان في القوم وليس اميرهم كان كأنه اميرهم واذا كان اميرهم كان كأنه رجل منهم "

ومن وصاياه التي قالها لقاضي ذات مرة " اس بين الناس في مجلسك ووجهك حتي لا يطمع شريف في حيفك ولا ييأس ضعيف من عدلك والبينة علي من ادعي واليمين علي من انكر والصلح جائز بين المسلمين الا صلحا حرم حلالا واحل حراما ولا يمنعك قضاء قضيته بالأمس ثم راجعت نفسك فيه نفسك وهديت فيه لرشدك ان ترجع عنه فان الحق قديم ومراجعة الحق خير من التمادي في الباطل"

وكان متواضعا جدا وقال "اخوف ما اخاف عليكم اعجاب المرء برأيه"
ويذكر له ايضا في العدالة قصة المرأة والصبيان التي وجدهما يشكيان فحمل اليهما الدقيق بنفسه كي يطبق العدالة.
اي ان عمر بن الخطاب شخصية لن تتكرر وكان يحب الحق ويحب تطبيقه بصدق ودون مواربة وكان ميزانا لا يميل ميلة ولا يضعف في الحق جولة.

وايضا النداء الذي اعشقه في سيرة الرسول العبقري العظيم والذي اشعر فيه بقيمة الحق عندما وقف علي الصفا وقال "يا صباحاه" فحضر الجميع اليه فانظر ما قاله وكأن كلماته تبقي نبراس للحق والعدل "يا فاطمة بنت محمد ! يا صفية بنت عبد المطلب ! يا بني عبد المطلب ! لا أملك لكم من الله شيئا ، سلوني من مالي ما شئتم "
"كل نفس بما كسبت رهينة" وكل شخص مسئول عن نفسه وعن افعاله ولا يملك لهم شيئا حتي لاقرب اهله وعشيرته .

وربما اذا تحدثنا عن تاريخ اخر وزمان اخر فان كليوباترا كانت ايضا تحاول ان تطبق العدالة بل انها نزلت بنفسها ذات مرة توزع الغلال علي الفقراء وكان الشعب يعشقها في فترة حكمها.
وتحدث الفراعنة دائما عن قيمة اعدالة والحق في كثير مما تركوه لنا من اوراق وكنوز الحكم والاقوال.

والمجتمع الغربي يطبق العدالة في الوقت الذي لا يطبق فيه حاكم من امة محمد اي نوع من انواع العدالة فعندما تدوي فضيحة تنصت علي المكالمات في اعرق الصحف في الخارج ولاشهر رجال الغرب "ماردوخ" فيعلن فورا عن اغلاق الجريدة بل ويستقيل رئيس جهاز الشرطة هناك وتصبح الشغل الشاغل للقضاء والمحققين والصحف وتطال الفضيحة العديد من الصحف الاخري لمالكها لمجرد التنصت علي عدد من الشخصيات بينما يقوم بعض ملوك ورؤساء العرب بالتنصت علي ملايين المواطنين دفعة واحدة دون ان يشعروا بالذنب !

وايضا المحكمة الامريكية في لوس انجلس التي حكم القاضي فيها بتعويض قدره اربعة ونص مليون دولار لاسرة طفل قام الطبيب عن طريق الخطأ بتشويه عضو الطفل اثناء عملية ختان ..بينما يحدث هذا تقريبا الوف المرات في كل قري مصر دون رعاية ولا رجوع للعدالة رغم ما يحدث من تجاوزات واحيانا تشويه بلا اي جهة تستطيع ان تلجأ اليها لتاخذ حقك !

وايضا الحادثة الشهيرة للسيناتور الاسترالية التي كانت مهددة بفقد مقعدها بسبب سرقة برتقالة من سوبر ماركت بالخطأ !
والحادثة الشهيرة ايضا في فرنسا عندما ترشح ابن ساركوزي لاحد المناصب في فرنسا فاعترض الجميع بشدة وتسائلوا هل لانه ابن الرئيس ؟
وعندما تم التحقيق في انجلترا مع احد الوزراء لان في ميزانيته استخدم عشرة جنيهات استرليني زيادة في غرض شخصي !

وايضا عندما تم تبرئة كلينتون من عدة تهم ولكن بقت له تهمة الكذب في جزء من جوانب القضية اي ان الكذب هو من اضاع رئيس جمهورية ..اليست هذه من اكبر واقوي صور العدالة .

وايضا الرئيس الفرنسي السابق شيراك لماذا لم يشفع له تاريخه السياسي في فرنسا ؟ ويتم التحقيق معه حتي ولو في قضايا بسيطة وقضايا حساسة في نفس الوقت ..ولكن لأن قيمة العدالة والحق هي العليا في الغرب وللأسف في عالمنا العربي ضاعت تلك القيم سنوات وسنوات علي يد زعماء العرب .

والغريب اننا لا نأخذ دروسا وعبر من قصص الرسول ومعه سيدنا عمر ولا من قصص الغرب او الفراعنة ولكن يريد البعض تطبيق قواعده الخاصة لمحاكمة مبارك واعوانه بدون العدالة !
يريدون تبرئة ساحة الظالم لمجرد ان له تاريخ مع هذا الوطن حتي ولو كان التاريخ مسموما بالجوع والفقر واغضاب الله واغضاب الشعب !

لماذا يدافع البعض عن مبارك بشراسة واستماتة بل ان البعض مستعد ان يدفع الملايين لتبرئة ساحة شخص ظلم شعب بأسره ..في هذا الشهر الكريم فعلا نسأل سؤال هاما جدا "ماذا لو كان رسول الله يشهد جلسة المحاكمة ؟" "ماذا لو كان عمر يقرأ ملف حسني مبارك ويريد تطبيق العدالة الأن" هل كان مبارك سينجو ؟؟

نرجو ان ندع العدالة تضع سيفها علي الظالم وتضع وسادتها للمظلوم دون مساندة زائفة دون ان نعرف الحقيقة وهول ما فعل نظام مبارك في معظم الأسر المصرية .
واكرر مرة اخري كلمة سيدنا محمد "يا صباحاه" دعوا الحق والعدل ينفذان في طرائقكم.."لو صحت طرائقكم" كما قال الشاعر.
واجعلوا الحق اولا واخيرا فكما قال العرب قديما "الحق دولة والباطل جولة" .

رمضان كمـان وكمـان

رمضانيات :


*مسلسل "كيد النسا" هي لعبة الكراسي الموسيقية بين أوزان فيفي عبده وسمية الخشاب وكأننا بنشوف مصارعة في وزن "الديناصور" ..وفعلا المسلسل ده يعرفك الفرق بين كلمة "إمرأة" و "نسا" خالية من الانوثة !


*برامج الاسانسير كترت قوي زي "رامز قلب الاسد" و"بين السما والارض" و "الاسانسير" مع ان معظم الناس اصلا عندها فوبيا الاسانسير قال يعني العملية ناقصة تخويف والمقالب السنة دي بجد هزار صعيدي قوي .


* الاحياء الشعبية واخدة اهتمام المسلسلات قوي السنة دي مسلسل دوران شبرا ومسلسل شارع عبد العزيز والسنة الي فاتت الحارة لو كانت الحكومة بتهتم بالشوارع دي زي اهتمام المسلسلات ما كانتش الحكومة الفاسدة دي وقعت .


* اختيار الموديلز في الاعلانات بقي غريب قوي زي اعلان الموبايل بتاع محمد شرف ومحمد لطفي وكمان اختيار سمير غانم مع نيلي هو مين اللي بيختار بالظبط ؟؟طيب انا كمان عندي ديوتيو ياريت يعملوه لاعلان زي مثلا "انعام سالوسة" و "تهاني راشد" !


* كل ما اشوف مسلسل "جوز ماما" والحاجات الشبيهة له بقول ان السيت كوم اما دخلت مصر كان يوم مطلعتلوش شمس


* حتي البرامج الرياضية راجعة بطعم مختلف مع رمضان زي "كساء الانوار يا رمضان" و "السحور مع شوبير" عموما هو البرنامج في رمضان عمره ما هيختلف عن الطعم الرمضاني اللي هم بيقدموه علطول لان كل اخبارهم "كنافة" !



* كل مسلسل اضاف حتة كده عشان الثورة اكيد في اواخر حلقاته ولا ليها علاقة بالسيناريو اللي كان مطلوب بس لازم شوية حبشتكنات وتماحيك في الثورة !


* هل السياسة ممكن توصل لرمضان لدرجة ان العلمانيين ميقعدوش علي موائد رحمن عشان طابعها الديني والجبهة الدينية ترفض استخدام فانوس المفتش كرومبو لانه مش مربي دقنه !


* هيثم احمد زكي وتامر حسني فرصتهم لاثبات ذاتهم بعد ما قدم هيثم احمد زكي فيلم البلياتشو اللي لازم بعده يحاول جاهدا يثبت نفسه تاني للجمهور لانه فيلم حلمنتيشي بدرجة بلياتشو الزمن ناتشو !


*مازالت رحلة البحث عن احمد زكي الجديد في المسلسلات اللي اظنه هيكون عمرو سعد في النهاية بتمثيله المتميز جدا .


*غادة عبد الرازق بعد دخولها القايمة السوداء عملت مسلسل سمارة ..بتروح لفترة قديمة من تاريخ مصر الظاهر اتعقدت من الفترة الحالية من ساعة ما دخلت القايمة السوداء او القايمة "السمارة".


*الثورة اثرت علي كل برامج رمضان زي ما اثرت علي كل الاعلانات لدرجة ان في التحرير في بياع بيبيع "بطيخ الثورة" دلوقتي في برنامج "الشعب يريد" وبرنامج "من انتم" وبرنامج "دستور" يعني رمضان والثورة ايد واحدة .


* نحب نهدي لنظام السابق اعلان بريل والحكمة اللي بتقول "الهوب متخليش الدمعة تفط" او اعلان فودافون ونقولهم "شكرا شكرا شكرا" وياريت منشوفكوش تاني .

* برنامج شوية عيال بتاع احمد حلمي افتكرته في الاول اسم برنامج سياسي هيستضيف شخصيات في الحكومة اللي فاتت او النظام كله لانهم "شوية عيال" .

* كتير قوي من البرامج من نوعية المقالب في ناس نفسهم يمثلوا زي "كومبارس ولكن" ولكن للاسف بعضها العملية فيها مش محبوكة خالص والبرنامج باين قوي انه متفبرك بشكل فاضح .

* عادل حمودة عامل برنامج اسمه "كل رجال الرئيس" بس احب اقوله كلامك صح بس في مشكلة صغيرة ..الرئيس مكانش عنده رجال دول شوية .........