متلازمات مصرية صح الصح

في مصر انواع كتير من المتلازمات اللي بتصيب الواحد مننا وبتجيبله "هسهس" خفيف في الانترلوب و"تشبرق" في دهاليزه الجوانية !
وهنسميها متلازمات مجازا يعني عشان هي امراض يمكن متكونش الا في المجتمع المصري وعايزين يبقي فيه شوية متلازمات اختراع مصري جديد كده بالصلاة ع النبي .
والانواع دي بتصيب الانسان المصري بسبب الحكومة غالبا ونشوف اهم الانواع دي من متلازمات المصري الصح :




الثانوية العامة :

حد محلمش قبل كده بالحلم بتاع الثانوية العامة الشهير ؟ الثانوية العامة كابوس مرعب لكل المصريين حتي اللي مش عايز يجيب مجموع برضه بيفضل بعدها بسنين يحلم الحلم الشهير بتاع الثانوية العامة اللي بيحلم بيه كل المصريين بعد ما يخلصوا الثانوية بسنين ويصحي يقول اعوذ بالله !
المصري بيحلم انه مثلا قدامه ورقة الاجابة ولسه مخلصش والورقة بتتسحب منه بسرعة بل وساعات انه بيجري ورا عربية كبيرة بتكون شايلة ورقة الاجابة عشان يلحق يكتب اي حاجة !!
ملايين المصريين حلموا الحلم الغبي ده وبيصحوا يسبوا للثانوية علي اللي اخترعها وخلاها كابوس مصري ومرض ومتلازمة تفضل معاه ولا كانه خارج من توابع حرب فيتنام !
والكليات كمان ليها احيانا الحلم ده يعين الواحد يصحي من الحلم ويحس كانه لسه مخلصش الجامعة ولسه وراه تيرم مثلا حتي لو مخلص من عشر سنين !
كل ده بسبب رداءة التعليم المصري اللي بيخلي سنين التعليم عذاب في عذاب وخلطة عم حسني للامراض المصرية النفسية .





الخدمات الحكومية :

خلصت الاجراءات بتاعة عداد الكهربا ؟ طيب جيبت الدمغة ؟ طيب جيبت كل حاجة ؟ فاضل ايه بقي ؟ تطلع شهادة وفاة !!!
من كتر الروتين ده واللف ع المكاتب يفضل المصري وهو نايم يحلم ان الراجل طلعله عائق جديد في الورق وهيلف ع المكاتب من جديد عشان يجيب ختم استاذة سميحة اللي مبتجيش اصلا !
وتلاقي الحلك مجسم كده والصوت ثلاثي الابعاد وواحد بيجعر وبيقول " فوت علينا بكرة " وتفضل كلمة "بكرة" ترن في الحلم لحد ما تصحي وتغز نفسك بدبوس عشان تتاكد انك خلصت الورق فعلا وتجري ع المكتب عشان تتاكد ان الورق معاك وان كل ده كان حلم حكومي روتيني سخيف مش اكتر .
وكأن الجهات الحكومية بتديك هدية مع كل ورق تخلصه كابوس تفضل تحلم بيه وتفضل تشوف وش الموظفين اللي بيسيل علي خدودهم الفول والطرشي ومبيعملوش حاجة في الحلم وحتي لو نمت الضهر بتحلم بالكابوس ده برضه لانه مش بس بييجي باليل ده بييجي طول اليوم لحد ما تروح تخلص ورق تاني !




رمضان :


كتير قوي بعد شهر رمضان تحس انك عايز تاكل الفجر ومتاكلش علي اساس انك لسه صايم وانك لسه في رمضان.
رمضان بيسيب توابع بعده بشوية حتي لو جيت تدخل المطبخ تقعد تفكر مع انه فات من فترة والحكاية دي ممكن تستمر لمدة اسبوعين علي ما تتعود .
اكتر ناس ببتاثر بالحكاية دي هم موظفين الحكومة و "الفول افيكت" بيفضل معاهم بتاع السحور ويقعدوا يفكروا الف مرة قبل ما يبعتوا حد يجيب الفطار المتين الصبح علي اساس انهم صايمين.




الجواز :


دي اكبر متلازمة بتصيب الانسان المصري لما للجواز المصري من مخلفات تمتد لنهاية العمر من اول "القايمة" اللي فيها من الابرة للصاروخ لحد "ما تقوم قيامتك" !
الجواز المصري اكتر من متلازمة حروب فيتنام وغيرها لانك بتعيش فيها بالفعل مش بتبقي ماضي وانتهي زي حرب قديمة مثلا !
لا ده انت بتصحي علي اساس ان مراتك كابوس ومتلقيهاش جنبك تقول الحمد لله كنت بحلم وفجأة تلاقيها قدامك جاية من الحمام مثلا وتتصدم وتقول "ده طلع بجد يا نهار الوان" !
الغريبة ان النوع ده بيصيب حتي العازب لانه بيحلم انه اتجوز مثلا ويصحي يقول اعووذ بالله بس حظه حلو مبيلقيش جنبه حد يقرفه ويطلع عين اللي جابوه .

الجواز المصري طرد مفخخ بيجيلك لحد باب البيت كل يوم الصبح وانت بتفتحله بسذاجة ومبتتعلمش الدرس اما يفرقع في وشك .





الاتوبيس المصري :


الاتوبيس اشهر كابوس للي بيجيب عربية جديدة ممكن يفضل يحلم فترة انه لسه بيركب الاتوبيس او السيرفيس لدرجة انه يجري ع الشباك الصبح عشان يتاكد ان العربية تحت وانه فعلا تخلص من الاتوبيس المصري المرعب او بلغة الملاهي "المنخل المصري" .
الحاجة الوحيدة اللي ممكن تفضل من لغة الاتوبيس لو اتجوزت واحدة تخينة قوي تبقي قاعد جنبها كانك في اتوبيس حكومي بالظبط .
وده من الاحلام المتعبة ..في احلام كده تفاعلية تحس انها حقيقية وتصحي منها تعبان فعلا زي حلم الاتوبيس من كتر الزق والخبط اللي في الحلم تصحي تعبان كانه كان فعلا في اتوبيس حقيقي ولسه حاصل حالا .




اكل العزومة :


ساعات تروح عزومة وتطلع اللي عاملة الاكل مش ست بيت دي ست خرابة مثلا .
الافتكاس في طرق الاكل وخصوصا في العزومات ممكن يصيبك بحلم طويل المدي علي ما تخلص منه لازم تروح عزومة تانية حرشة ونغشة كده وكلها اكل لذيذ.
وطريقة الهجوم المصري للست صاحبة العزومة بطريقة اربعة اربعة اتنين تفضل هي ارخم طريقة عزومة بتاعة "ما تاكل..انت مبتاكلش ليه انت مكسوف" !

طريقة الرخامة علي المائدة المصرية في الاكل وكان يعني كل ما اكل اكتر يبقي انا بحب اصحاب البيت قوي وبقيت واحد منهم خلاص مش علي طريقة "عيش وملح" ولكن علي طريقة "عيش وضاني".
ولان غالبا الست اللي بتقعد تقولك كل وتهجم عليك طول العزومة تخينة وسمينة جدا فمتحاولش تكلمها انك عامل رجيم والهجص ده لان ده بالنسبة ليها خيال علمي ..انما نظرا لسمنتها الحادة ممكن تقولها اصل عندي نقرس مثلا او معدتي بايظة اليومين دول مش هاعرف اكل كتير .
وتفضل تحلم فترة بعد العزومة المقرفة بانك صاحي بتقول "يا ستي خلاص مش عايز تاني..يا ستي خلاااص مش قاادر هاطرشق حرااااام" ويستمر الحلم بعد العزومة شهر ع الاقل وقد يطول ويستمر ويتوغل وينتشر .




الخدمة العسكرية :

المصري بيشوف ان الخدمة العسكرية من اكتر الحاجات اللي بتعطل مستقبله وبيشوف ان كلمة اعفاء هي افضل كلمة ممكن يسمعها في حياته .
ومن المتلازمات المصرية هي متلازمة الخدمة العسكرية اللي تفضل معاه وقت طويل وييجي الحلم ان عسكري واقف وبينادي "الدفعة كذا كلها معااااناااا" وتسمع اصوات بتصوت "لاااااااااااااا" .
حلم زي ده بيخليك عايز تغير مكانك او بيتك كله عشان تهرب منه ومافيش فايدة لانه لو استمر معاك هيفضل وقت طويل قوي وتفضل تسمع ناس في الحلم بتقولك "لبست يا دفعة" وتفضل ترن كلمة "لبست" كتير قوي دليل انك فعلا "لبست" صح الصح .
ومش من المصادفة ابدا اختيار كلمة "لبست" كمصطلح دارج في الخدمة ولكن لانها اسم علي مسمي.




وربنا يعافينا من شر الكوابيس دي كلها او لو استمرت وكانت متلازمة طويلة الامد والحكومة الجاية تكون بدون متلازمات مصرية مية في المية .