الكائنات الفضائية في مصر..اوعي المريخي يعضك

ناس كتير تكلمنا عن الكائنات الفضائية واحنا نقولهم لا يا عم مافيش حاجة اسمها فضائيين ده كلام فاضي !
رغم ان الفضائيين مش لازم يركبوا اطباق فضائية ويكون ليهم قرون يعني عشان يبقوا فضائيين لان اليومين دول في فضائيين في كل مكان ومن غير وشهم ما يكون اخضر ومرعب..
طيب هل في فضائيين في مصر ؟؟
يووه كتيييير وفي كل مكان واديك امثلة اخليك تؤمن بوجود المريخيين علي ارض مصر :


1- ممدوح فرج واعلان شاي سعيد حساسين

2- اللي يتفرج علي برنامج توفيق عكاشة ويقول ده احسن اعلامي في مصر ويشوف برنامج سبايدر كمان

3- اللي بيشتروا منتجات من التليفزيون عشان يتعالجوا ببيض النعام او بيض النمل.

4- الست غالية اللي بتطبخ اكلة "الشلولو"

5- اللي بيدفعوا عشرات الجنيهات عشان يشتركوا في برنامج "عين مين دي"

6- اللي لسه بيبعتوا ايميلات عن ان كلمة كوكاكولا اما تعكسها في المراية تبقي حرام

7- اللي لسه بيتناقشوا هو انتخاب الليبراليين حرام ولا ايه

8- الواد اللي قاللي ان اكلة "كول سلو" المفروض ناكلها ببطئ عشان ناخد فايدتها لان حتي من اسكها "كل سلو" يعني "كل ببطئ" !

9- اللي ينزل العباسية عشان يسمع عمرو مصطفي وياخد منه حكم سياسية

10- اللي لسه بيعملوا شات ع النت علي "الاي سي كيو" ويقولك انا داخل النت اظبط يا عم كاننا في التسعينات

11- اللي مقضي وقته كله ع "البال توك" عشان يعمل مناظرة عن الديانات رغم انه بقاله سنين عارف ان محدش بيقتنع باي حاجة بيقولها الطرفين وبيشتغلوا بعض اساسا

12- اللي تروح للبياع تقوله "حلو علم مصر ده بس يا تري في منه الوان؟" !!

13- اللي يقعد مستني "فيلم ثقافي" علي قناة النيل الثقافية !

14-  اللي يقول ان سامي العدل ارق صوت في مصر

15- اللي لسه بيدي ميسد كول لكل اصحابه

16- اللي بيبعت رسايل "انشرها ولك الاجر" عمال علي بطال عشان العرض ان الرسايل ببلاش

17- اللي يقولك العيب مش في حسني مبارك العيب في الشعب

18- اللي بيتصل بالارقام اللي علي ضهر منتجات اللبن عشان يقولهم عيوب منتجاتهم ايه !

19- اللي يقولك فعلا لازم نحجب التماثيل

20- اللي لسه بيرقص دبكة في الفرح ومستمتع بيها فعلا

21- اللي لسه بيقول مافيش زي صوت الست رغم وجود الوف المطربين حاليا عرب واجانب  بس هو وقف الزمن بيه

22- اللي بيخش ع الجوجل يشوف استراتيجيات للعبة بنك الحظ

23- اللي لسه بيدخل ع اليوتيوب يكتب بالعربي في البحث كلمة "سكس" !

24- الأم اللي تقعد 9 شهور وهي حامل تشتري كتب "اسماء بنات واولاد" وفي الاخر تسميه اسم مدهول

25- اللي تسأله مجتش بدري ليه يقولك "اصلي كنت مطبق قدام قناة فتافيت" !

26- اللي يقعد قدام البحر بالكرافتة والجزمة اللي بتلمع

27- اللي لسه بيدور علي تردد القناة السادسة

28- اللي يقعد يقولك "انا بكلم اجانب ع النت يلا" كأن النت لسه داخل امبارح

29- اللي لسه مهتم عند الحلاق بمدي تناسق "السالف" علي الجانبين

30- كابتن شلبوكة ومعظم المذيعين الرياضيين في الاصل مريخيين

31- بشرا الممثلة والمذيعة والمطربة ومعاها العسيلي

32- ممتاز القط من عطارد اصلا

33- اللي لسه بيتخدع ببتوع "التايم شير" وبيضحكوا عليه لحد دلوقتي.

34- اللي لسه بيشتروا كتاب "كيف تصبح مليونيرا"

35- اللي لسه بيشيل كاسيت كبير علي كتفه ع البحر



ولسه ياما هنشوف فضائيين كتير قوي ..صدقتوا ان في فضائيين كتير في مصر ؟؟