مسلسلات رمضان بين الدراما والهجص

الدراما في رمضان اكيد ليها طعم تاني ..طبعا ده حسب المكتوب علي كل قناة يعني زي ما بيقولوا كده ان كل المسلسلات حصري عندهم برضه مع انها مرطرطة اكتر م الهم ع القلب !

الزحام الغريب في مسلسلات رمضان زي كل سنة هو اللي بيخلي معظم الاعمال تسقط بالضربة القاضية لان اما يكون عندك 70 مسلسل حسب ما نشرت جريدة المصري اليوم يبقي لو بقاعدة رياضية حلمنتيشي بسيطة نضرب عدد المسلسلات في "ط نق 2"محيط دائرة مؤخرة المشاهد يطلع ما يمكن تحصيله من المسلسلات للمشاهد في اليوم !!!

مصري ولا تركي ولا سوري هذا هو السؤال ! تضرب مسلسل مصري ولا سوري ولا تركي بعد الفطار ..يعني بيتهيألي الدراما التركية مش وقتها في رمضان لانها طول السنة مخلية الستات بيزيد وزنها اللهم صلي ع النبي من كتر المتابعة علي راي عادل امام "بعيد عنك يا اخويا وررررررمت تاني يوم وررررررمت" .
الغريبة ان السنة اللي فيها التيار الاسلامي هو اللي حاكم وكانت الاشاعات العبيطة تقول دول هيعملوا رقابة صارمة وهيمنعوا المسلسلات اصلا نلاقي مسلسل كيد النسا 2 وكاريوكا وهز يا وز ع الشاشة الصغيرة ولا صغيرة ايه بقي دي الشاشة العملاقة التخينة عشان تكفي السبعين مسلسل يعني بعد ما يعدي اول يوم تزعق زي شوبير من كتر المسلسلات والقنوات وتقول "لييييييه؟ ايه المبرررررر؟" .

يعني في المسلسلات الاجنبي بنلاقي كذا سيزون للمسلسل ويقعدوا يشوقوا الجمهور لانتظار الموسم القادم والموسم مش بيبقي بكمية الحلقات المهولة اللي عندنا احنا او العدد الغير منطقي في الحلقات التركي لكن ساعات الموسم بيكون 15 حلقة او عشرين وساعات اقل في بعض المسلسلات حتي الواحد يهضم المسلسل مش هري وخلاص زي بعض المسلسلات عندنا .

طيب عايزين نعرف ايه افضل المسلسلات زي ما بيعملوا برة وبيدوا جوائز كل سنة للدراما او الانتاج التليفزيوني بشكل عام في جوائز "ايمي" مثلا ..ليه عندنا مافيش حاجة زي كده المشاهد يعرف منها ايه افضل الاعمال وتكون جايزة ثابتة كل سنة مش جوائز مجلات او جوائز قنوات زي كل سنة وتلاقي كل قناة بتقول حاجة شكل وان افضل مسلسل حاجة تانية خالص غير القناة اللي جنبها !

في وسط الهري الدرامي الكبير ده ازاي الناس تختار بين 70 مسلسل وفي نفس الوقت يكون عندها وقت تاكل او تصلي او تعمل اي حاجة ؟ في انواع من الناس في رمضان :

1- مدمن المسلسلات : ده تلاقيه بيجري يفتح مسلسل ع اليوتيوب ويسيبه يحمل في الوقت اللي هو بيشوف مسلسل اصلا ع التليفزيون ويفضل يجري ما بين التليفزيون والكمبيوتر لحد ما يخرج من رمضان وهو عامل زي توفيق عكاشة !

2- الرمضاني: الراجل بقي اللي بيعيش رمضان صح يعني بياكل عادي وبيلاقي وقت يصلي او يقعد في خيمة رمضانية وعنده كل الوقت يعمل كل حاجة ومش مهتم بالمسلسلات اصلا لكن ممكن يشوفله مسلسلين كده مش مشكلة يعني انما موصلش للادمان الدرامي.

3- خليهم يتسلوا : ده بقي المواطن اللي بيشوف رمضان زي اي شهر اصلا وبيفضل يشوف برامج سياسية او توك شو وكأن مافيش حاجة اصلا او ان الشهر مالوش ميزة او شكل مختلف عن غيره من الشهور وساعات بيكون مستني الفطار عشان يضرب السيجارة التمام وده المهم عنده واهم من خمسين مسلسل .



احنا ممكن نقدم في موسوعة جينيس علي اكبر دولة عملت مسلسلات في وعرضتهم في شهر واحد !! مصر فعلا ممكن تفوز بالمركز الاول حتي لو كانت ربع المسلسلات في البطيخ بس العدد غير منطقي ابدا ولازم يكون المنتج اللي بيصرف علي مسلسل متأكد من نجاحه لإما هيتاكل تماما وسط الباقيين ولو ان الناس كلها متاكدة ان مافيش مسلسل بيخسر ده كفاية فلوس عرضه علي القنوات اللي بقت زي الرز وكل قناة بقت بتفتح قناة تانية ويقولك "بلاس تو" عشان تعرض بعد القناة بساعتين نفس الحاجات اللي جابتها ! اديني في الهايف يعني !!



كان مكتوب في الجريدة بعض تكلفة المسلسلات السنة دي ونشوف اكبر امسلسلات المصرية المتكلفة السنة دي ارقام فلكية زي :

1-فرقة ناجي عطا الله : 70 مليون
2- خطوط حمراء : 42 مليون
3-باب الخلق : 40 مليون
4- الخواجة عبد القادر : 40 مليون
5- زي الورد: 38 مليون
6- عرفة البحر : 35 مليون
7- نابليون والمحروسة : 35 مليون


دول من اكتر المسلسلات المتكلفة السنة دي في الدراما الرمضانية لكن المشاهد ازاي يحط الخريطة ويبدأ الهجوم علي المسلسلات في حالة انه بيحب المسلسلات اصلا ؟
في توقعي من خلال قراءة قصص بعض المسلسلات وشوفت التريلر بتاعها اقدر اقول ان ممكن يكون السنة دي اقوي المسلسلات هي :

1- نايليون والمحروسة
2- عمر
3-باب الخلق
4- الخواجة عبد القادر
5- فرتيجو
6- الأخت تريز
7-الإخوة الأعداء
8 زي الورد
9- الصفعة
10-عرفة البحر
11- الإمام الغزالي


المسلسلات كتير لدرجة ان محمد سعد واخد بطولة في مسلسل ..هو ظلم نفسه في ادوار اللمبي وبوحة والحاجات دي لدرجة ان الواحد مش متخيله في دور حقيقي او مسلسل درامي ..الممثل الكوميدي لازم ينوع زي حلمي ومكي وغيره من الممثلين في العالم مينفعش يحط نفسه في قالب واحد لكن اظن محمد سعد اتاخر قوي ولازم يبدأ في جرعة درامية قوية وادوار مهمة بقي يلحق بيها سمعته كفنان حقيقي مش مجرد "لمبي" .

المسلسلات من نوع "الزوجة الرابعة" و"كيد النسا" والقصص الحمضانة دي كترت قوي وبوخت قوي زيادة عن اللزوم خلاص كانت فكرة اتعملت وجبرت خلاص مش لازم يقعدوا يقرفونا بموضوع الاربع زوجات وتصوير الستات كانهم عبيد للرجال بافكار متخلفة ورجعية زي مسلسلاتهم دي ويقولك في عرض المسلسل "طبيعة الرجل الشرقي" اي رجل شرقي ده ؟؟ ده كان زمان المفروض اننا في زمن جديد يعني نسبة اللي بيعملوا التصرفات المتخلفة دي مش زي الاول حتي لو كانوا موجودين بالفعل لكن ياريت ميقولوش ويقولوا الشرقي لانها بتمثل اهانة للرجل الشرقي والست الشرقية كمان .


ياريت كمان منشوفش بقي راجل وست ستات في جزء جديد لانها برضه من المسلسلات اللي انتهت صلاحيتها خالص وبدات حلقاتها في اواخر مواسمها كانها نسخة كربونية من بعض يعني ياريت يرحمونا شوية من المسلسل ده بقي ولو سنة حتي اجازة.

من اللي بيجددوا في برامجهم باستمرار وافكار برامجه مختلفة ومطرقعة هو رامز جلال كل سنة بيجي بشكل جديد وبرنامج غريب ولذيذ حتي لو كانت برامجه متعجبش الكل لكن بصراحة هو فعلا مختلف عن الاشكال التقليدية للبرامج التانية .


بيكون في قنوات كتير قوي تقول احنا الاصل والكلام ده لكن انا شايف ان افضل قنوات بتكون في رمضان هي شبكة الحياة وقناة القاهرة والناس باقي القنوات مجرد عرض مسلسلات انما دول بيقدموا حاجات ومنوعات مختلقة عن الباقيين فعلا.
عندنا عدم تعود علي برامج المقالب في عالمنا العربي وكل سنة يطلع صحفي يقول ايه الانحطاط في المقالب ده مع ان برامج الدنيا كلها في المقالب اصعب وفيها حاجات اقوي من كده بمراحل وعادي بتيجي كل سنة يعني عندنا لو واحد خض واحد قوي في المقلب يقولوا بعض الصحفيين "ده انحطاط" مع ان في برامج مرعبة في المقالب لدرجة الموت زي
Scare Tactics
و
pranked
و
punk'd
وعشرات البرامج بالشكل ده ومحدش بيتكلم او بيعلق عليها لانها مجرد مقالب انما عندنا بنبالغ قوي ونشتم ونسب في اللي بيعمل المقلب كانه عمل جريمة وكانه مش برنامج كوميدي !


برامج التوك شو بقي المفروض تندثر تماما في رمضان لاننا شبعنا سياسة واتخنقنا فمش هيبقي في رمضان كمان يعني ..انما ممكن يفضل عكاشة اهو يسلي صيامنا برضه ولو ان بعض الناس هيقولوا هيخلينا نفطر عليه .


كل سنة والجميع بخير ورمضان كريم علي مصر كلها .