رمضانيــــــات

** السنة دي تحس ان أسماء المسلسلات جاية بالمقاس ومناسبة لكل فئة واتجاه :

مسلسلات المجلس العسكري : خطوط حمراء - سيدنا السيد - لسه بدري
مسلسلات الفلول : طرف ثالث-ابن النظام
مسلسلات الاخوان : الصفعة-ويأتي النهار
مسلسلات البلطجية : البلطجي-الهروب-الخفافيش- بفعل فاعل-مع سبق الإصرار !



** منتجات بريل زودتها لدرجة انها ممكن تهرب منها الجنس الناعم تماما باعتبار ان ازازة بريل الواحدة مليانة هرمونات ذكورة !! وصلت لدرجة الرجل المستذئب !
وياريت تبقي كلمة "استرجل" موجهة لكل اللي كل ما يحصل حاجة يقولوا "البلد بتولع" .



** إعلان أيس كريم "ماكسي بون" هو واعلان سمير غانم بتاع فودافون هم افضل اعلانات لحد دلوقتي في رمضان ومعاهم اعلانات يونيفرسال اللي كل سنة بتعتمد علي الالحان الجامدة سواء لحن مصري او مقتبس لكن افكار اعلاناتها وشكل الاعلان نفسه انيق وليه ستايل خاص .


** اظن واضح ان الاجازات اللي خدتها برامج التوك شو خلت المذيعين مرطرطين في الاعلانات والبرامج والمسلسلات ..عمرو اديب بيظهر في مسلسل باب الخلق ومعتز الدمرداش راح يعمل اعلان وشريف مذيع الحياة اليوم في مسلسل فرقة ناجي عطا الله والباقي بيطلع ضيف في برامج منوعات ..هم مذيعين التوك شو ظهورهم فرض يعني اما تاخدوا اجازة يبقي ريحونا منكوا شوية وخلوها فعلا اجازة مش طول السنة يعني .


** اعلان دنيا سمير غانم مستهلك ومكرر بشكل كبير ..تحس ان هي نفس اعلاناتها بتاعة السنة اللي فاتت بس المرة دي لبست بدلة رقص كاملة يعني عشان بيبسي ..يعني ماشية بنظام "ابجني تجدني" او "أبجني أرقصلك بلدي" .الاعلان مافيهوش فكرة ولا روح ولا كلمات ولا اي حاجة بصراحة هو اعلان غير قابل للاستهلاك الادمي !لا والغريبة ترقص وفي اخر الاعلان تلم تبرعات..عجبت لك يا زمن ده الاعمال الخيرية بقي ليها شكل تاني خالص.



** الناس الجعانة قوي تقول ما تفتحلنا اي قناة من اللي هي "بلاس تو" اصلها بتعيد كل حاجة بعدها بساعتين يمكن تعيد ادان المغرب ونديها أكل من جديد !!


** يعني بعد متابعة كام حلقة الاوائل من المسلسلات اظن في راي الشخص ان المسلسلات اللي فعلا تشد وتجذب للمتابعة هي : سيدنا السيد- باب الخلق-فرقة ناجي عطا الله- عمر-نابليون والمحروسة- مع سبق الإصرار- الأخوة أعداء-الخواجة عبد القادر.


** برنامج "سمر والرجال" هو مش برنامج جرئ ولكنه مبتذل وتشعر ان الأسئلة كلها منصبة علي جانب واحد ومش ناقص الا ان يكون في فقرة ستربتيز في البرنامج والمذيعة تسأل الضيف بعدها "كان ايه احساسك كرجل بعد الفقرة دي" !


**كل ما برامج المقالب بتشد اكتر زي برنامج رامز جلال الجديد يكون الاتهام الموجه للبرنامج انه "مسرحية" ! يعني كل ما تزود المقلب الناس تحس ان اكيد بيضحكوا علينا طيب الناس دي ربنا يكون في عونها لو عملوا مقالب خفيفة يقولوا برنامج اهبل ولو عملوا مقالب مفزعة يقولوا برنامج بيضحك علينا طيب يعملوا ايه بقي ؟..بعد رعب رامز جلال في الاسانسير دلوقتي بيعملهم ارهاب علي الطريق عشان يثبت ان "زكية زكريا" كان اخرها "تنفخ البلالين عشان عيد الميلاد " او انها برنامج اطفال  !!



** في رمضان توفيق عكاشة مختفي كده او مش ملعلع يعني زي الأول بسبب كم المسلسلات في كل القنوات ..يمكن يكون في خيمة رمضانية بتقدم "بط وجرجير" ع السحور !



**أفضل مقدمة لمسلسل هو مسلسل "مع سبق الاصرار" بطولة غادة عبد الرازق ..وأخيرا بقت المقدمة هي اللي قوية بدل ما اتعودنا علي ان دايما اعمال غادة عبد الرازق تبقي مركزة علي "المؤخرة" في اعمالها الهلس السابقة زي "زهرة وازواجها الخمسة" !


**أفضل أغنية في مقدمة لمسلسل بالتأكيد لمسلسل " نابليون والمحروسة"  الأغنية العظيمة "مصر يا امة يا بهية" الشهيرة لأحمد فؤاد نجم والشيخ إمام..يعني رغم المنافسة الا ان في اغاني مينفعش تخش المنافسة امام أغاني كتبت تاريخ .


**واحد مدمن مسلسلات تقوله نابليون دخل مصر امتي؟ يقولك في الحلقة التالتة !!.. وواحد تاني يقول هو ازاي عادل امام بيشكوا فيه في مسلسل فرقة ناجي عطا الله يقول اصله كان جمعة الشوان قبل كده !



** المسلسل الواحد ممكن تشوفه في ساعة ونص بسبب كمية الاعلانات الغير طبيعية والمستفزة جدا مع ان حلقة اي مسلسل علي اليوتيوب بدون اعلانات بتكون في حدود 33 دقيقة يعني تلت الوقت علي التليفزيون ..المشكلة ان الاعلانات الكتير بتخلي الواحد يزهق من المسلسل نفسه او يقوم ويسيبه يعني هم بيعودوا بالسلب علي المسلسل والقناة كمان لان اي مشاهد بيروح يدور علي اقل قناة بتجيب اعلانات ويتفرج عليها ..يعني بدل رطرطة القنوات دي كلها ابقوا اعملوا قناة للاعلانات بالمرة طالما عندكوا كمية الاعلانات دي كلها ..المفروض يبقي شعار القنوات "اعلانات حصري علي التليفزيون المصري".



** من البرامج المفضلة لناس كتير هو برنامج "خواطر" للشقيري مازال متألق كالعادة ويقدم مواضيع جديدة ومتميزة دائما وارجو ان يستمر دائما هذا البرنامج الرائد والملئ بالأمل والمعلومات القيمة في مجالات متعددة لانه اصبح من البرامج القليلة التي لها نكهة مميزة جدا .


** برامج الطبخ شغالة طول اليوم في نهار رمضان ياريت يخلوها بعد الفطار احسن لان الناس بتقعد قدام البرنامج وتقعد تقول "اللهم اني صائم" ويبقي هياكل الريموت وهو قاعد من منظر السفرة في التليفزيون اللي غالبا بتكون مش نفس المنظر من ايد مراته اللي بتتعلم فيه الطبخ !


** فيه برنامج اسمه "مراتي في ورطة" البرنامج ده رادار لردود افعال الست المصرية وغيرتها علي جوزها.. لكن أظناسم البرنامج  ده يناسب جدا حالة اغلب الزوجات داخل المطبخ المصري قبل الفطار .