** من أقوي البرامج السنة دي برنامج معز مسعود "رحلة اليقين" بيتكلم عن بعض الافكار الالحادية لبعض الكتاب الغربيين في اولي حلقاته وكيفية مواجهة الافكار دي بالعقل مش بمنطق "إسكت متسألش هو كده وخلاص" او بالمبدأ القديم قوي "من تمنطق تزندق" بدون اعمال عقل للوصول الي اليقين الكامل.. البرنامج فكرته جديدة وذكية جدا عن اليقين والرد علي الافكار الالحادية وكمان عن الكتاب اللي اتحولوا من الحادهم الي الايمان بعد كده واتحولت افكارهم تماما ..ياريت فعلا نبدأ نهتم بالعقيدة قبل ما نهتم بالاسئلة من نوعية "هو اللي يركب التاكسي لو مش مسلم اوصله ولا لأ" وفتاوي الفضائيات اللي غربت الناس عن الدين الاسلامي السمح العظيم ..
معز مسعود وغيره من الدعاة الشباب هم الأمل لتوصيل تعاليم الاسلام الحقيقي الي جيل كامل من الشباب متعطش لمعرفة المزيد عن دينه .
** لاني بحب المسلسلات المأخوذة عن قصص واقعية بتابع مسلسل الاخوة أعداء المأخوذ عن رواية "لإخوة كارامازوف" للكاتب الروسي العملاق فيودور دوستويفسكي وفيه مجموعة مختارة بعناية فائقة لتجسيد الادوار خصوصا فتحي عبد الوهاب ..بيفكرني ولو من بعيد ب "جاك نيكلسون" ولعبه لادوار الشخص السيكو في عدة افلام زي
the shining
فعلا بحس في فتحي عبد الوهاب من كتر ما بيلعب ادوار شخصية مضطربة نفسيا ان المخرج بييجي في اخر كل عمل يلفوا في ملاية بيضا وياخده علي السراية الصفرا.ممثل بدرجة "مريض جدا" !
وكمان الخواجة عبد القادر طلعت قصة حقيقية زي ما قال مؤلف العمل انها قصة حقيقية لمهندس ألماني كان بيشتغل في سوهاج واعتنق الاسلام .
** شركات المحمول اللي عمالة تعمل في عروض واعلانات بالجملة ياريت بس تبص شوية للشبكة الاول اللي بتقطع وماحدش بيسمع حاجة في المكالمة والتغطية سيئة جدا ..يعني عايز اقولهم زي اعلانهم كده هو فعلا الديكور وقع بس علي المشتركين كلهم !
ولا الاعلان التاني اللي يقولك هتسيب شبكتنا ليه يا افندم..يعني بذمة ابوكوا مش عارفين ليه ده حتي زي ما بيقولوا الاحساس نعمة يا بشر!!
** مشهد السبحة بتاع مصطفي شعبان في اعلان المسلسل بتاعه وهو بيسبح ويقول اسماء ستات مشهد مستفز جدا وكان المفروض يتحذف من الاعلان حتي لو هم مش قاصدين بس علي الاقل يلاحظوا ان المشهد هيثير حفيظة ملايين البشر ..عموما مصطفي شعبان حط نفسه في قالب صعب يخرج منه هو كمان زي محمد سعد كده ما حبس نفسه في دور اللمبي وبوحة والحاجات دي مصطفي شعبان بقي حصر وحبس نفسه في ادوار مختار باشا والراجل حلم الستات كلها والحوار الفكسان ده مش عارف ليه الممثلين بتوعنا بيحبوا الادوار المكررة او يمكن بيستسهلوا زي بعض المنتجين اما يحب يعمل مسلسل سهل يقولك اعمل مسلسل وجوز البطل اربعة وريح نفسك !
** فرقة ناجي عطا الله مسلسل فيه دروس كتير مستفادة منها علي سبيل المثال :
:
اللي مزنوق في قرشين يكون فرقة ويطلع يسرق بنك في اسرائيل والعملية سهلة يعني !
وان اي عملية في اسرائيل استشهادية وخلاص حتي لو سرقة بنك علي حسب كلام المسلسل يعني .
وان الراجل الحرمجي او الدور اللي قايم بيه ابن عادل امام بيكون ليه ادوار مهمة قوي في عملية اقتحام البنك.
مسلسل كله عبر يعني بس محدش يقولي ده فيلم هندي ما هو توم كروز برضه كان رايح يقتحم الكرملين واحب اقول للاتنين "عندها" !
**أدوار كتير السنة دي للممثلين عملوا موضوع "التأتأة في الكلام" زي احمد رزق في مسلسل "الأخوة أعداء" وابن غادة عبد الرازق في مسلسل "مع سبق الاصرار" وكمان في مسلسل "رقم مجهول"
مش عارف دي مقصودة يعني ولا ده يا حبة عيني من كتر المسلسلات السنة دي الممثلين بتهنج !
** بحب قوي الكلمات في مقدمة المسلسل كل سنة تلاقي شوية كلمات مسخرة السنة اللي فاتت مثلا فيها كلمات في مسلسل شارع عبد العزيز رغم حلاوة الاغنية وكلماتها الا ان كان فيها جملة بتقول
"كفك يا دنيا علم ع الجتة وع القفا
أشوف حالك أبلم وأتشحتف شحتفة
ليه تمشي معايا سلبا وتحلبيني حلبا
إمتي أدوقك يا ملبن ع الفزدق اتبرم "
السنة دي في مقدمة مسلسل "باب الخلق" بتقول الكلمات "اعمل عبيط خليك حويط" وأظن الجملة دي بالذات مناسبة لبعض الاحزاب السياسية وجملة هامة قوي في السياسة المصرية !
** الرئيس محمد مرسي ليه برنامج في الراديو بيكلم فيه المواطنين ويرد علي اسئلتهم اسمه "الشعب يسأل والرئيس يجيب"..كويس ان الزمن جري بينا وشوفنا الرئيس بيكلم شعبه كل يوم والظاهر ان في مصر في ارتباط بين السياسة والمواهب يعني المخلوع كان بيمثل كومبارس في فيلم قبل كده واحمد عز كان طبال وفاروق حسني بيرسم يعني الظاهر وحمدين صباحي مثل في فيلم "الاخر" الظاهر ان كل اللي بيلعب سياسة في مصر بعد كده يكون خريج ستار اكاديمي !
** دنيا سمير غانم في اعلان بيبسي بتقول "رمضان كريم قوي قوي علطول" ودي بتفكرني بجملة حمادة هلال الشهيرة "شهداء خمسة وعشرين يناير ماتوا في احداث يناير" او جملة شفيق "ساجعل عاصمة مصر هي القاهرة" اضافة جيدة يا ست دنيا نورتي المحكمة .
**رغم ان اعلانات التبرعات تقطع القلب فعلا الا ان بعض الناس شايفة وانا منهم ان اعلان زويل هو اللي يقطع القلب اكتر ..يعني رغم ان دي حالات انسانية ولازم تتعالج الا ان اعلان العالم المصري زويل جاي علي الوتر فعلا للشعب المصري كله وانه لازم يتحرك خصوصا اما بيقول الجملة بتاعة البحث العلمي في اسرائيل فعلا حاجة تفقع تخلي الشعب كله عايز يدعي دعوة موحدة زي ساعة الفطار علي المخلوع اللي ضيع مصر وقيمة العلم والعلماء فيها بسبب الفساد والاهمال والتسيب وكل الصفات الوسخة اللي كانت في حاشيته ..لكن لسه الامل موجود وياريت الكل يتبرع لمدينة زويل العلمية ونرجع لمصر هيبتها ومجدها .
Posts
1 comment:
شكرا ع الموضوع
Post a Comment