الضفــــادع لا تشــــرب الماريجوانا

أسميه ايه ؟ أسميه إيه ؟..بقت حاجة عجيبة قوي اختيار اسم الموضوع اللي بتكتبه..الواحد بيشوف اليومين دول شوية أسامي كتب تخلي اختيار الاسم مشكلة عويصة..

يعني مثلا عندك كتاب بهاء طاهر "لم أعرف أن الطواويس تطير"  ..أو كتاب عمر طاهر "الكلاب لا تأكل الشوكولاتة"..ده حتي في كتاب اسمه "الفئران لا تشرب المارلبورو" !!

قولت اسميه شوية اسامي كده والقارئ هو اللي يختار منها لأني محتار ..إيه رأيكم في الأسامي دي الي هاعرضها عليكم تختاروا منها واحد :

1- الضفادع لا تشرب الماريجوانا
2- أحزان أنثي الأخطبوط
3- سيد قشطة لا يأكل القشطة
4- الهدهد لا يضع المانكير
5-نحلة علي طبق باباظ
6-أحزان ناموسة حامل


يعني هو صحيح العنوان مالوش دعوة بالموضوع اساسا بس هي دي بقت الموضة كتير من الاسامي اليومين دول لمواضيع او كتب مالهاش اي علاقة باللي جوة الكتاب انما بقي المهم الاسم يشد واهو موسم بقي وكل سنة وانتوا طيبين..

انما انا عاجبني بتاع الضفادع فعشان كده هاسميه الضفادع لا تشرب الماريجوانا..عندنا بيسموه "بانجو" بس اسم لوكال قوي ومش ظريف والاجمل منه الماريجوانا..

لكن في مصر الضفادع ممكن فعلا تشرب الماريجوانا لأن عندنا في مصر في حاجات مش موجودة في العالم كله ..عجائب وغرائب مش هتلاقيها الا لما تشرب من نيلها لحد ما تتكرع..
لكن ايه هي العجائب اللي تتميز بيها مصر عن غيرها من دول العالم :


1- تعدي شريط قطر وتبص يمين وشمال وانت بتعدي !!

2- تلاقي المسافة بتاعة الطرق بتزيد مع الوقت مش بتقل لأن اليفط كلها مكتوب عليها اي كلام..يافطة ان فاضل 35 كيلو وبعديها يافطة ان فاضل 36 ..ياللمعجزة..


3- تلاقي مكتوب علي شريط قطر  "احذر مزلقان ذكي"..


4- احنا الدولة الوحيدة اللي عندها اسامي البلاد او المناطق باسامي ستات زي "ام الزين" او علي الطريق الدائري تلاقي يافطة مكتوب عليها "ام بيومي" مع ان برة مافيش بلد اسمها "ام جوليا" مثلا


5- تلاقي محلات مالهاش اسم ولا يافطة ومترخصة..كل اللي مكتوب علي المحل "ما شاء الله"  ..لدرجة ان وانا صغير كنت بقول محل "ما شاء الله" ده في كل حتة في مصر ده فروعه كتير قوي .


6- تقول بتاع النقل انت ماشي في وسط الطريق يا اسطي ..يقولك امال امشي ع الرصيف يعني !!


7- احنا اللي عندنا برنامج اطفال اسمه "ظاظا وجرجير"  مع ان ده اسم مينفعش للأطفال ده ينفع برنامج في دار مسنين


8- احنا اللي عملنا الكباري عشان نلف من تحتها لأن طبعا الكوبري واقف علطول

9- احنا اللي عملنا اشارات المرور عشان نتقابل عندها .."قابلني عند تاني اشارة" مش عشان نقف اما تنور احمر


10- احنا اللي عشان نمنع الاعلانات علي الحيطان نكتب بالبنط العريض "ممنـــــــوع كتــــابة الاعلانـــــــات"  طيب هو بقي في مكان اساسا يا عم الحاج لكتابة الاعلانات ؟ ما انت شوهت ام الحيطة خلاص.


11- احنا اللي بنسمي شوية طفيليات في النيل  "ورد النيل"  حتي اسمه مبهج كده وجميل اهو بنداري بيه ..زي اما واحدة يبقي اسمها انعام وتقولها يا نوني


12-احنا البلد الوحيدة اللي هتلاقي في كل بلد واحد واقف بصندوق ويقولك اتبرع للجامع..والجامع طبعا مبيخلصش ده الراجل بيقعد في الشارع هو واحفاد احفاده طول ما يلاقي سذج يدفعوا لمشروعه الهلامي


13-احنا اللي بنقول "عصعوصي" واجعني..ما تلاقيهاش في اي ترجمة دي كلمة عصعوص..يعني بنخترع مناطق في جسمنا بنفسنا..زي كابتن محمود بكر كده اما يقول "خبط الكورة بقرص دماغه"


14- احنا اللي بنستخدم "الموز" في أي زيارة حتي لو واحد عيان بنجيبله موز..علي كده القرود دايما بصحة ممتازة !!

15- احنا اللي عندنا تكلفة الحاجة مش بنقول عليها "توتال" لا بنقول "شاكب راكب"

16- احنا اللي بنعمل مطبات في الطرق اما تطق في دماغنا وفي اي مكان نحبه

17- احنا اللي بنعمل اغاني وطنية عمال علي بطال اكتر من عدد المواطنين لحد ما اتخنقنا منها..

18-  احنا اللي الدقيقة عندنا بقروش ولسه البعض بيدي رنات..

19- احنا اللي فشخنا الجوجل في افكاره من بحثنا عن حاجات غريبة زي "حباية تحت الإبط" !!!

20- احنا اللي بنشرب شيشة ونقول لازم "المبسم"...المرة الجاية هيطلعوا مخدرات بفلتر صحي وأمن !!!

21- احنا اللي بننتج افلام عشان نعمل عليها "كوميكس" لأن الأفلام معظمها مقاولات..

22- احنا اللي بنروح الأفراح عشان نبص في الساعة كل عشر دقايق..

23- احنا اللي بنقول "اعملي كوباية شاي عشان اخش انام"..الشعب المصري لا يعترف بالكافيين..

24- احنا اللي بنشيل نظام مبلط عشان نجيب نظام يبلط

25- احنا اللي عندنا بلاعات متواربة عشان تشق العربيات

26- احنا اللي عندنا الطريق عبارة عن شجر وشوية دخان كاننا في فيلم رعب ..




يبقي ليها حق ولا لأ الضفادع تشد الماريجوانا ..؟ دي ليها حق تضرب كاسين كمان لو عايزة..
واسمحولي اضيف كمان اسم بالمرة بقي في الاخر زي مثلا  "السحالي لا تعشق الكراميل"..!