** اظن ان موضوع الفنانين اللي مش بيراعوا سنهم في الادوار في التمثيليات لسه شغال الله ينور ..واسم مسلسل يسرا "نكدب لو قولنا ما بنحبش" لا يا يسرا "نكدب لو مقدرناش حقيقة سننا" !
** اللي بيقارن سعاد حسني بايتن عامر في دورها في الزوجة التانية احب اقوله ان سعاد حسني مع اي ممثلة تانية علي رأي المخلوع "دونت ميكس"
** اعلان "كفاية بقر بقي" بتاع لبنيتا اظن انه اسقاط سياسي واضح بس مش علي البقر انما اصحابهم الخرفان ..
** لسه ليلي علوي محتفظة بمكانتها في عالم الدراما وبتختار الادوار الغريبة والغير تقليدية كل سنة بتكون كل التمثيليات في وادي ومسلسل ليلي علوي في وادي تاني خالص واللي يشوفها في فستان الفرح يقول دي بنت العشرينات
** مصطفي شعبان خلاص تقمص دور نور الشريف بتاع فيلم العار ومش راضي يسيبه ..يعني من الاخر طلعلنا لمبي جديد مكرر زي شريط بيسف نفس الحركات بنفس القصة بتاعة المسلسل بنفس البلطجة والقرف مصطفي شعبان بقي ماركة مسجلة زي ما الافلام بيتكتب عليها للكبار فقط هنكتب علي مسلسلات مصطفي شعبان "للحشاشين فقط "
** اجمل اغاني في المسلسلات السنة دي اغنية نهاية مسلسل الداعية وطبعا موسيقي عمر خيرت العبقري..واغنية شيرين في "حكاية حياة" واغنية مقدمة مسلسل "الشك"
** غادة عبد الرازق بقت خلاص نجمة التعقيد كل سنة بتعقد الجمهور بديكور البيت اللي في المسلسلات اللي الناس بتعتبره خيال علمي اساسا مش بيت ..بس المرة دي مش بس التعقيد في البيت لأ في حوار المسلسل نفسه ..في مشهد الواد بيقول لاحمد زاهر : انا عايز فلوس عشان الخروجة
قاله : روح شوفلك تلات الاف جنيه في الجاكيت كده
ومشهد تاني بتقوله مراته : عايزة 400 الف عشان ديكورات الفيلا تحت الحساب
وحورات من النوع ده تخلي الناس متشوفش المسلسل قبل الفطار عشان ماتفطرش عليه !!
** في وسط الاحداث السياسية احمد عز طلع في اعلان وقال انه عايز يتجوز ..اتحولت بروفايلات البنات من كونها بروفايلات "المعددة" علي حال البلد الي "الخاطبة" !!
** عجبني قوي فكرة مسلسل "خلف الله" اللي يعتبر فكرة جديدة ومتميزة علي شاشة رمضان وبيفكرني بالافلام من نوعية
The Exorcism of Emily Rose
تجربة مميزة وجديدة ومغامرة لفنان قدير زي نور الشريف ..
** اجمل مسلسل كوميدي السنة دي هو "مسلسليكو" لمحمد هنيدي اللي هو فوازير ولكن كوميدية جدا وكمان "الكبير قوي" الجزء التالت ..
محمد هنيدي قايم بدور كوميدي للغاية والمسلسل رائع جدا وفيه شغل جرافيك عالي جدا والكبير قوي لسه محتفظ برونقه ودايما الكبير قوي بيفكرني باسلوب حسني مبارك في الادارة كل معاونيه من نوعية فزاع
انما حزلقوم هو "مرسي" نفس التبعية ..لكن للمرشد !!
** فاصل قناة الحياة اللي هو واحد بيصب عرق سوس طول اليوم بيعطش طحن لو بتشوف مسلسل العصر شوفلك قناة غير الحياة !!
** صفوت حجازي بيقول انه هيقعد في رابعة لحد العيد وهيعمل كحك كمان..احب اقوله "ما تنساش تعملنا معاك طبق "كحك بالشرعية" بيبقي خفيف قوي زيك كده !!
** البرنامج الديني المميز بتاع عمرو خالد عن الأندلس هو رحلة متواصلة من المعلومات والدروس وهو ده اسلوب الداعية المحترم اللي ممكن تاخد منه المعلومة مع ابتسامة وتفهمها فعلا يمكن هو وجيل جديد من الدعاة هيكون الخير علي ايديهم زي مصطفي حسني ومعز مسعود انما جيل الارهاب بتاع وجدي غنيم الي مزبلة التاريخ..
** رامز جلال لسه هو اكتر برامج المقالب اثارة عامل زي المقلب اللي عمله السيسي في مرسي خده برضه في اوضة ضلمة ولا يمكن في اوضة الفيران والظاهر ان بتوع رابعة فاكرين انه مقلب وهيخلص ما يعرفوش انه حلقة واحدة !!
** نفسي اسمع عن شخصية من التيار الاسلامي اتبرعت لصندوق دعم مصر بمبلغ كبير انما طبعا فلوسهم بتطلع بس للسكر والزيت انما بناء مصر هيطلعوا فتوي تقول "بناء مصر بدون مرسي حرام"
يدوب فلوسهم تملي كروشهم ويمكن تملي كام اوتوبيس "ع النهضة طالعين وفلوسنا بالملايين" ..
Posts
No comments:
Post a Comment