مــرسي بين "حبيب الله" و "عدو الشعب"

“أفضل الحرية مع الخطر على السلم مع العبودية"

الفيلسوف الفرنسي / جان جاك روسو




اللي بيحصل دلوقتي في مصر تحديدا موقف مش غامض ولا حاجة..اللي بيحصل هو قمة التفنن في الديكتاتورية من نظام مستبد فاشي..هو كل شئ عكس الدين اللي بيتشدقوا بيه ..وكأن اللي عمالين يتكلموا بإسم الدين دول ميعرفوش او مسمعوش عن النهي عن طلب الإمارة..وطبعا مرسي ونظامه هيموتوا علي الكراسي ومش بس حرص علي الإمارة ده تهافت علي المناصب يصل لحد الجنون والشبق..


الرسول عليه الصلاة والسلام كان ليه حديث بيقول: ((يا عبدالرحمن بن سمرة لا تسأل الإمارة، فإن أُعطيتها عن مسألة وُكلتَ إليها، وإن أُعطيتها عن غير مسألة أُعنتَ عليها..))

وفي كتاب الشيخ الغزالي اللي اسمه "الفساد السياسي"  اتكلم كتير عن مسألة الحرص علي الإمارة واهمية مبدأ الشوري في الإسلام وان غياب الشوري هو أول الطريق للديكتاتورية واننا يجب اننا نتخلص من شكل الحكم لأمثلة زي "الحجاج بن يوسف الثقفي" اللي كان دائم السب للي بيحكمهم من اهل العراق وبيكفر الناس باستمرار وكان معروف عنه صفات كتيرة اغلبها سيئة..

الرئيس مرسي بقت الحاشية بتاعته بتديله كل يوم لقب ..ايوه كل يوم لقب ودي علطول تعرف انها اول الطريق لجنون الحكم والتعلق بالكرسي ..من زمان من ايام الخلافة وكانت في عصور الدولة العباسية والفاطمية القاب كتير بتعطي للحاكم وكأنه هو منفذ حكم الله علي الارض ولا يخطئ زي مثلا "الحاكم بأمر الله"  او " المعتضد بالله"  او "المستعصم بالله"  وغيرها من الألقاب اللي ممكن ترهب اصحاب النفوس الضعيفة اللي ممكن يخلطوا بين طاعة الله وطاعة الحاكم..


دلوقتي حاشية مرسي وشيوخ السلطان بقوا بيقولوا عليه "مرسي حبيب الله"  و مش بس كده ده وصل السفة من بعض الشيوخ الفاسدين ان واحد منهم قال بكل فجور وكذب ان واحد حلم وهو نايم ان الرسول ومرسي كانوا قاعدين وجه وقت الصلاة فالرسول قال لمرسي تعالي صلي انت بالناس ..

للدرجة دي ممكن يوصل الكدب من شيخ بيحاول يشوه الاسلام وصورته السمحة الصادقة ..بيعبد ويطيع الحاكم قبل طاعته لله او شايف ان طاعة الحاكم مهمة زي طاعة الله ودي كارثة في حد ذاتها لانها مش بس بتخلق الديكتاتور دي ممكن تخلق سفاح علي كرسي الحكم يبيد شعبه وهو شايف انه ينفذ اوامر الله..


وموضوع القاب الحاكم وجنون العظمة ده قديم جدا من ايام الفراعنة كل حاكم بيحب اسباغ الالقاب عليه وخصوصا الالقاب اللي تديله عظمة وهيبة من ايام كليوباترا زمان اما كانت بتسمي نفسها "ايزيس الجديدة" 
او الحاكم الروماني الطاغية الشهير كاليجولا اللي كانت كلمته الشهيرة  "غريب اني ان لم اقتل اشعر باني وحيدا"

كان الحاكم والرئيس الديكتاتور تشاوشيسكو رئيس رومانيا قديما كان بيسمي نفسه "دانوب الأفكار" نسبة الي نهر الدانوب ..

وكان كمان "عايدي امين" رئيس اوغندا في السبعينات والديكتاتور الشهير ليه عدة القاب بيحب يسمعها عن نفسه زي مثلا "صاحب السعادة"  و "الرئيس مدي الحياة"
والقذافي الديكتاتور من اشهر اللي اعطوا لنفسهم القاب وكان ابرز لقب فيه كثير من الغطرسة هو  "ملك ملوك افريقيا"
كمان حسني مبارك كان بيلبس بدلة عليها اسمه في كل شبر منها كنوع من تعظيم نفسه والتفاخر بديكتاتوريته..

وكان هتلر مثال وقدوة لكل ديكتاتور وقاتل اما كان لا يهتم ابدا بقتل المدنيين اثناء الحرب وكان بيقول ان مش مهم يموت المدنيين في سبيل الهدف الأسمي ..وطبعا عارفين من كتابه الشهير "كفاحي" ازاي عاني طفولة صعبة جدا من تعذيب والده له وده من احد اسباب شخصيته المضطربة المريضة وحلمه المريض وخطته لاخضاع العالم..


وفي ايام الفراعنة كان في حاكم مستبد برضه اسمه "بيبي الثاني" بيقولوا حكم مصر 90 سنة وكانت من اسوأ عصور الاسر الفرعونية ومن اكثرها فقرا رغم ان كان في اكثر من عصر للاضمحلال في تاريخ الاسر الفرعونية .


بينوشيه في تشيلي كان واحد من اشهر القيادات الديكتاتورية اللي اغتصب السلطة من الرئيس السابق الليندي بارادة امريكا اللي كانت شايفة ان الليندي ضد مصالحها فقالت الحل في خلق ديكتاتور زي بينوشيه..كان بيستعمل كل اساليب التعذيب والقمع للمعارضين في تشيلي لحد ما رحل عن الحكم لدرجة ان التقارير قالت ان في عهده كان في 28 الف حالة تعذيب.

الرئيس الروسي "يلتسين" كان من أسوأ الرؤساء في تاريخ روسيا وفي عهده تمت الحادثة الشهيرة لقصف البرلمان الروسي بعد نزاع بين السلطة التنفيذية والتشريعية اللي صدر في النهاية مرسوم من الديكتاتور الفاشل اقتصاديا يلتسين بحل البرلمان ..


من امثلة الديكتاتورية كمان في روسيا يبقي لازم نتكلم عن "ستالين" اللي كان من اكبر من استخدموا اسلوب التصفيات الجسدية لاي واحد معارض بيحاول يعارض الشيوعية او بيعارض افكار ستالين وكان ضحاياه بالألاف من العمال وحتي صديقه السابق تروتسكي اغتاله كمان مع كل ضحاياه وكانت المعتقلات مكتظة واحكام الاعدام كانت باستمرار في المحاكمات اللي بيسميها ستالين محاكمات عادلة.


بشار في سوريا هو من النماذج الديكتاتورية القوية الايام دي ومش هنتكلم فقط عن عدد ضحاياه اللي هم بالألاف ولكن ايضا لسحله رموز فنية زي ما قطع بلطجيته حنجرة مطرب الثورة وقطعوا اصابع رسام كاريكاتير شهير في سوريا عشان كان بيحاول يتكلم ضد النظام ..يعني سفاح وديكتاتور بدرجة مجرم حرب..


وكان في كتاب شهير لعبد الرحمن الكواكبي وهو من اكبر المصادر للحديث عن موضوع الديكتاتورية والطغاة واسم الكتاب "طباع الاستبداد ومصارع الاستعباد"  وكان بيقول في احد فصوله :

"الاستبداد لو كان رجلا وأراد أن يحتسب وينتسب لقال أنا الشر، وأبى الظلم، وأمى الإساءة، وأخى الغدر، وأختى المسكنة، وعمى الضر، وخالى الذل، وابنى الفقر، وبنتى البطالة، وعشيرتى الجهالة، ووطنى الخراب، أما دينى وشرفى وحياتى فالمال، المال، المال"


نماذج كتير بنشوفها للطغاة حول العالم وكتير منهم بتبدأ حكايته بانه يشوف نفسه اله مش حاكم زي ما بيعمل بالظبط شيوخ السلطان دلوقتي حوالين مرسي والمطبلاتية بتوعه اللي بيحاولوا يوصلوا للناس ان ارادة مرسي هي ارادة الله وحاشا لله ان يكون ده كلام حقيقي وبأس ما يدعون..

مافيش حاجة اسمها المشروع الاسلامي لان الاسلام دين عظيم ومش هيتلخص في كلمة مشروع زي ما حاشية مرسي بيحاولوا يخدعوا الناس بإسم الدين وهم مش بس تجار دين دول تحولوا لزبانية وعابدي السلطة والسلطان..محدش هيخدعنا باسم الدين لان الدين في قلوبنا حقيقة وفي قلوبهم شهوة وصول للكرسي..
الدين في قلوبنا يقين وفي قلوبهم وسيلة للدنيا..

وسيسقط كل نظام فاشي وفاسد سواء بإسم اللي بيرهب معارضيه بكلمة قلب النظام زي مبارك او اللي بيرهب الناس باسم الدين زي مرسي كل الارهاب هيسقط زي ما سقط الخوف في ثورة يناير وهيسقط دلوقتي استكمالا لاهداف الثورة الخالدة وباذن الله تتحرر مصر من كل طاغية ..فان اصبح الطاغية في مزبلة التاريخ اصبحنا قادرين علي صناعة المستقبل..


والله اني لا اجد قبحا اشد من "تبادل الزوجات" الا تبادل الكراسي بين رجال الدين ورجال السلطة .

النصر لمصر..الحرية لمصر..النصر للثورة