يا راماتي يا مغيرة حالاتي

الاغنية الشعبية في مصر غير برة خالص يمكن شعبي عندهم زي اغاني البوب وهي اختصار لكلمة "بوبيلور" او مشهور ولكن عندنا غالبا بتكون بمعني الاغنية البيئة او الحقيرة في اغلب الاحيان

طبعا مش كل الاغاني الشعبية لان كان في ناس جامدة زمان بيغنوا شعبي
المشكلة ان الاغنية الشعبية عندنا اشبه بالمخدر او الافيون فمتعرفش امتي تشغلها احنا الشعب الوحيد اللي بيرقص علي اغاني حزينة وكان اللي بيرقص ده مش بيكون سامع الكلمات الكئيبة اللي بتتقال والغير مناسبة للفرح تماما

يعني انا شفت مرة فرح شعبي وبيرقصوا كلهم بشكل جماعي علي اغنية بتقول "التار التار التار التار احسن م العار احسن م العار احسن م العار " !!!!!

طيب اقنعني ازاي دي يترقص عليها الا لو كنت سكران او عايز يكون ليك ثقافتك الخاصة ..وانا برجح الفكرة دي الاحياء الشعبية غالبا شايفة احتكار واحتقار من الطبقات التانية فبتحاول تكون دولتها الخاصة جواها
باغانيها وثقافتها وكل حاجة فحتي الفرح مش عايزة تفرحه مع عمرو دياب وتامر وكده ولكن مع مطربينهم الخاصين بكلماتهم الخاصة

لكن برضه احيانا الكلمات متنفعش خالص ولكن انتقل الموضوع ده تدريجيا للناس التانية في الاحياء الراقية ولكن علي سبيل التهييس
يعني الاحياء الشعبية عاجباها الكلمات بجد بينما الاحياء الراقية بترقص ع الاغاني دي في الحنة مثلا وهم بيضحكوا ع الكلمات علي سبيل التهييس بس انما طبعا مش معترفين بالمطرب ولا الكلمات تماما..

وساعات يرقصوا علي اغاني كلها حشيش ومخدرات زي "وبقيت تلعب بوكر وبتشرب جون ووكر " وهي مشكلة الاغاني الشعبية في مصر انا شايف انها تلات حاجات :

المشكلة انهم ساعات عايزين يقدموا قصة بجد لكن في شكل احيانا سطحي جدا وساعات مش سطحي لكن صوت وحش جدا وساعات صوت حلو لكن لحن مكرر وممل جدا ولو اللحن حلو وكل حاجة تماما يبقي الاسلوب مش لذيذ.

طيب ايه اللي بيخلي الاغنية الغير شعبية هي اللي تغلب رغم انها مكررة جدا زي تكرار عامر منيب كده بس الاسلوب شيق واللحن احيانا بيتغير والصوت في الغالب معقول طبعا مش هاتكلم عن العسيلي ومحمد نور وامثالهم عشان دي مش اصوات اصلا.


وانا شايف بصراحة ان الاحياء الراقية فيها كتير جدا من الاحياء الشعبية مثلا :

*في الاحياء الشعبية الحشيش فقدنة ولكن في الراقية الحشيش روشنة
*في الاحياء الشعبية اغاني كلماتها مقرفة بالعربي في الراقية بعضهم بيسمع راب كلماته برضه قذرة بس بالانجليزي
*في الاحياء الشعبية بيحصل مشاكل كتير وقتل بسبب العرض والشرف وفي الاحياء الراقية بيحصل هتك للشرف بس بياخدوه بصدر رحب !
*في الاحياء الشعبية بيهربوا م المدارس عشان يروحوا السيما وفي الاحياء الراقية بيهربوا عشان يفحطوا بالعربية
*في الاحياء الشعبية مشاكل اباء وابناء بسبب الفقر وفي الاحياء الراقية كل المشاكل بسبب لعنة الفلوس
*في الاحياء الشعبية بيكتبوا جمل شعبية ع العربيات وفي الراقية بيلزقوا استيكرز ع العربيات بجمل برضه


يعني تقريبا تقدر تقول ان الحي الشعبي هو حي راقي "مدبـلج" او النسخة العربية !



وعشان كده احنا المفروض نترجم المناطق للراقيين ونترجمها للشعبيين ودي اقتراحات لكده :
اولا : اعادة تسمية حي الوراق الي حي "البيبرز " وهي ترجمة للمناطق الراقية للتعرف علي هذه المناطق


ثانيا: ترجمة معظم المطاعم للمناطق الشعبية زي مثلا "كوك دوور" نسميه "باب الطبخ " للمناطق الشعبية


ثالثا : في المناطق الشعبية بيسموا الشغل "الكار " وفي المناطق الراقية بيسموه "الكاريير " واحنا محتاجين نوحد الموضوع بينهم ونسميه الكار وخلاص


رابعا : الغاء المصطلحات الاجنبية في الحياة اليومية زي مصطلح "يو تيرن" في لفة الشارع ونسميه "انت تلف هنا " عشان نكون واضحيين مع الكل


خامسا : شرايط عبد الباسط وخلافه من الشعبي تنزل بورقة الكلمات مساواة مع الشرايط الاجنبية اللي بتنزل بورقة "الليركس "


سادسا : عمل كمبيوتر شعبي للاحياء الشعبية بنفس الجمل اللي بيكتبوها ع العربيات ويكون مكتوب ع الكمبيوتر "البحر واحد والسمك الوان " او "الحلوة خوخة جت بعد دوخة "
او جمل تانية كمبيوترية زي "الحلو كور تو ديو يا ناس ياهو " "ياراماتي يا مغيرة حالاتي " وكده


سابعا : عمل قناة "ميلودي ملاية لف " لجميع الاغاني اللي تناسب الحي الشعبي وبس للمساواة



وياريت الافتراحات تحل المشاكل بين الحي ده وده ..