انــا حــلم حـب

انا حلم حب
مولود بضعفي وقوته
راشش برائتي بقسوته
وبأعيش احب
واتنفس الدنيا بغرام
واتنفس الحب بسلام
وارحل في فنجانه برضاه
واشرب تفاصيله بهواه
واعيش احب
انا عايز اسرق لحظتي
واعملها فستان للقمر
وامسك رموشها في عزلتي
وادق بيها علي الوتر
اللحن يخرج للنسيم
ويهادي اسراره الوجود
والدمعة تنزل م النسيم
وتبوس بالامها الخلود
انا عايز اخطف رمشها
واطير عليه فوق السحاب
وارحل بدمعي في قلبها
واقفل وراه ميت الف باب
وارحل في شريانها بحصان
ابيض وله يجي ميت جناح
واحضن تفاصيل المكان
واخلق لي جنة ونور صباح
انا حلم حب
مكتوب علي كف الزمان
اني في يوم هادفع تمن
من يوم ما احب
والهجر يرمي بوردتين
علي قبر حبي ودمعتين
وافضل احب
انا حبي مش وقت انقضي
انا حبي طاير في الفضا
مادد جناحه علي الحياة
لكن مشوفتش منتهاه
الا في عيون
الجنة تقرالها السلام
لو بحر موجه من الكلام
يقدر يدوب يوصف رموش
عالم خيالي مشوفتهوش
ودموع بتتجسد بشر
وبيشربوا شهد القمر
ويعودوا نور
وقلبي واقف تحت سور
بينادي ويقول الحياة
السور مانعني من الحياة
لكن يدنه في عزلته
محبوس بأمر من الغرام
جواه صراخ حب انتقام
حب انتقام من وحدته
حب انتقام من كسرته
في مرايته مش هو اللي كان
قول غيره طعم الزمان
هيعود جديد
عاشق جديد
حتي ولو هيعيش وحيد !