متــــــأسفين يا صـــــلاح

المشهد الشهير في فيلم خالد يوسف الاخير كلمني شكرا اما نزل عمرو عبد الجليل ع اللارض وقال

"احنا متأسفين يا صلاح " بيفكرني بحاجات كتير قوي في البلد دي

والمشهد كان عبارة عن واحد بيفشر ويقول انه عمل كذا وكذا في واحد ولكن الحقيقة انه بياخد علي قفاه وبيترعش منه

ومن اشهر الحاجات اللي ممكن تفتكر بيها المشهد ده فعلا هي :

1- احزاب المعارضة والحكومة :

وطبعا كلنا عارفين جعجعة الاحزاب المصرية اللي اخرها تعمل ساندوتشين طعمية

وتيجي قدام الحكومة وهي الحقيقة بالنسبة ليها وتقعد ع الارض وتقول "احنا متاسفين يا صلاح"

2- الجهاز القومي للاتصالات وشركات الانترنت:

ودي من اشهر صور المشهد ده وقمة الخنوع اللي ممكن تشوفه لجهاز المفروض تشتكيه قدام شركة هي اللي بتتحكم فيه اصلا بدل ما ده اللي يشتكيه او يقدم فيه شكوي ودي من اكبر فضايح اجهزة الدولة بتاعتنا اللي هو نظام يقولولك

"النت بطئ طيب مش مشكلة مش الغسالة شغالة يبقي انت في البيس ! "

3- برامج التوك شو والحكومة :

وطبعا الحكومة بتسيبهم يقولوا اللي هو عايزينه الا في المناطق الحمرا وانا مش عارف ايه المناطق الحمرا دي اصلا غير "الطاحونة " يعني انما بيسيبوهم يقولوا اللي هم عايزينه وفي الاخر ايه اللي بيحصل "التيتة في الننة والننة في التيتا " علي رأي عادل امام

4- الاخوان والحزب الوطني :

وطبعا اللي عاملين نفسهم الجرأة والتجرأ هم في غالب الامر بيكشوا جدا من الحزب الوطني وبيحققوا مصالح معروفة معاه وكلها لعبة ودنيا بنعيشوها علي قفانا والمشكلة ان كل الشعب عارف ده بس مغلوب علي امره بقي وفي النهاية يوطي ويقوله "احنا متاسفين يا صلااااااح"

5- جهاز حماية المستهلك والتجار:

ودي كلنا دايقينها وحاسينها طبعا ولا حياة لمن تنادي طبعا لأن الجهاز ده زي غيرها صوتها لونها علي راي الحاج ايساف ولا بيهش ولا بينش ويقولك اشتكي ع السلعة يقولك انت الغلطان وانت ازاي تجيب السلعة الرديئة دي هههههه يعني في النهاية برضه نظام صلاح مع التجار

6- مجلس الشعب والزعيم :

ودي اكبر متاسفين يا صلاح فيهم وممكن تقولها بعلو صوتك وتزعق

متاسفين قوي يا صلاح

ممكن تسميه مجلس الجعجعة او طق الحنك زي ما بيقولوا في بعض الدول

سلملي ع المجلس

7- المدرسين في المدارس الحكومية والطلبة:

المدرس يقول للناظر انا هاربي الواد ده بس سيبني عليه واول ما يشوف الطالب وبلطجته في الثانوي المدرس بيترعش اساسا

8- مدراء الشركات والوسايط :

المدير يقولك كله هنا نزاهة وعدل ومافيش واسطة ويجيله تليفون واحد يا عيني

يقع ع الارض ويسلم نمر ويعين الواد وامه وابوه كمان

يعني فعلا المشهد ده شامل حياتنا كلها مش مجرد مشهد فيلم ..