معجمك اللذيذ في الثورة

معجم الثورة المصرية :


بعد الثورة عرفنا الفاظ جديدة اول مرة نستخدمها كنا بنسمعها مثلا في برنامج "الاتجاه المعاكس" بس بعد الثورة بقت الناس بتقولها لبعضها وكأن كان طول عمرهم عايزين يقولوها

اصلا .!
كنا نسمع الكلمات دي في البرامج بس مكناش نصدق انها هتكون علي لسان كل شاب في الفترة الاخيرة في كل الشوارع وعلي الفيس بوك ومن الألفاظ اللي انتشرت قوي :




1- مزايدة ومتاجرة :


كان اول مرة اشوف ع الفيس بوك الناس بتقول لبعضها انت بتزايد وانت بتتاجر رغم ان الحوار اصلا علي مستوي "القاعدة" ..بتاعة الحمام طبعا ههههه
ازايد ايه واتاجر ايه يا عم الحاج هو انا قاعد مع فيصل القاسم ؟
وياتري المتاجرة دي بتجيب فلوس يعني ولا ايه نظامها ولا فض مجالس وطق حنك زي ما بيقولوا ؟
طيب ما اتاجر شوية "واذا كان كده مااااشي" !



2- عميل :


عميل؟؟
غريب قوي اللفظ ده طيب العميل ده عميل لمين ؟ وياتري جاب الوظيفة دي ازاي ؟ في الاعلانات المبوبة قسم "العملاء" ؟
بس انا كل اللي اعرفهم عملاء فودافون او اتصالات معرفش انواع تانية من العملاء ده عيب ولا ايه ؟
وده غير العمالة المصرية في البلاد العربية مثلا؟ او القوي العاملة ؟ ولا ده عميل تاني؟
وهل ينفع يبقي عميل مزدوج زي الافلام ؟ زي ماكينة الحلاقة ام شفرتين مثلا ؟ او برت بلس اتنين في واحد ؟

ونسمع اغنية صابرين للاطفال وهي بتقول :

انا الخاين
واحنا العملاء
بتخونوا ليه؟
بنخون بغباء
سقفوا له سقفوا له
هيصوا له هيصوا له
غنوا للعميل وقولوله
نقوله ايه
يا حلاوتك يا عمالتك
رب يخليك لمامتك




3- أجـندة :


انتوا معاكوا اجندة..وانت معاك اجندة..افتح اجندتك ياض..افتح انت الأول يا عم ..انت جايب اجندتك منين ياض ؟..ده جيبتها من بنك هدية يا عم ماليش دعوة افتح انت اجندتك..!
انتشر قوي لفظ الاجندة ده وفي نوعين بقي ..في اجندة لاغراض شخصية وفي اجندة دولية..الاجندة الدولية دي بيبقي مرسوم علي ضهرها علامة كنتاكي وجامبه صورة صاحب

الاجندة عامل قرنين لمستر كنتاكي
انما الاجندة المحلية دي رخيصة ممكن الاستعانة بكراسة رسم 24 ورقة مقيحة بدالها .
بس الاجندة ممكن تعدل فيها مخططاتك كل شوية فالافضل الكتابة بالرصاص وفيها ميزة تانية ان التاريخ مكتوب جاهز فوق ع الصفحة ولهذا انصح باستخدام الاجندات دايما وفكك من

الكراسة .
وبما ان المدارس فتحت فالاساتذة هيضربوا الطلبة اللي جابوا اجندة بدل الكشكول وهيبهدلوهم خصوصا ان الاجندة هتخلي الطلبة ما تجلدش الاجندة بالجلاد الازرق اللي بيطلبه

الاستاذ بدون سبب حتي اختيار الالوان كان التعليم حارمنا منه ..الجلاد يا عالم والتكت بيحددوا لونه ايه ..الله يخربيت التعليم في عهد مبارك.



4- ألي :


ألي ..لا دي طبنجة..ودي قنبلة ولاايه ؟ ..اه تلاقيها عند القسم مش مهم علي الفيلم شوية..!
ده الحوار اللي كان بيدور مع والدتي احيانا بليل كان الاول الواحد مرعوب م الاصوات دي لكن بعد كده بقت الناس خبرة في صوتالالي واختلافه من الطبنجة وازاي صوت القنبلة

يفرق عن الاصوات التانية وازاي تعرف ان اللي تحت البلكونة دي خناقة بلطجية مش بلطجة ودي تفرق جدا
وده بيفكرني بمشهد احمد الفيشاوي وهو بيقول "عارف الفرارجي ؟ اول مرة يقتل بيكون خاي لكن بعد كده بيتعود "
اهو كل الناس اتعودت خلاص علي صوت الرشاشات وبقي صوته حنين وبيطري ع المعدة واليوم اللي مبسمعش فيه صوت عشر طلقات في الهوا ع الاقل بقلق وبطلع البلكونة لقول

خير يا تري؟



5- لجان شعبية :


كانوا بيحكوا عنها انها كانت ايام الحروب زمان وكنت مشتاق اعرف ازاي يعني بتتعمل دي بس اتحققت امنيتي وشفت قدام كل بيت لجنة شعبية وبياكلوا بيتزا وكريب كمان في

اللجنة..! لجنة سيس قوي
بس ماسكين شومة وسكينة قدام الطبنجة هو فكر استراتيجي برضه يعني اخوف بتاع الطبنجة بالمطوة ..! تفكير عقلاني برضه
وتحس ان ناس كتير بتعيش في اللجنة دور الظابط ويفتش العربيات بطريقة الظابط وكانه كان عايز يدخل شرطة !
وكل شوية واحد ربنا ياخده يعدي بالموتوسيكل ويرعب الناس في البيوت وهو بيزعق ويقول "اصحوووا البلد بتولللللع يا بششششر "
وبعدين يضحك بصوت عالي بعدها..! ضحكات شريرة متقطعة !


6- القوايم السوداء :


بدأ تصنيف الناس كلها في القوايم ..الناس بقت باكيج يتاخد علي بعضه كده بالجملة والقطاعي ..!
قايمة سودا وقايمة بيضا وقايمة رمادي بس لسه بيدوروا علي واحدة كاروهات او مقلمة بالطول زي قمصان شعبولا !
واول مرة نشوف الحاجات دي ولمجرد رأي للناس مش عشان هم فاسدين او خونة او حرامية مثلا لا عشان قالوا رايهم ..وهي دي الديموقراطية في نظر البعض
حتي لو واحد قال بحب حسني..ليه تحطه في قايمة سودا..ما هو بكرة هتقول بحب البرادعي مثلا بتوع زعيم تاني هيحطوك في قايمة سودا ومش هنخلص قوايم
وكل واحد يعمل قايمته بقي وكل واحد يخلي باله من لغاليغه يا اخواننا .



7- حكومة تكنوقراط :


طبعا في ناس كتير فاهمة الكلمة ومعناها وفي ناس بتقول وراهم .
الكلمة بقت شائعة قوي في كل حارة وكل شارع انتوا عايزين ايه ؟ احنا عايزين تكنوقراط
واحد دلوقتي ممكن يحب يقلش قلشة بايخة ويقولي هو ده مفرد "تكنو فدان " ؟
اقوله "وحياة ابوك مش ناقصة "
وده اكتر الألفاظ شيوعا في المرحلة الجديدة بدل الكلمة الشائعة القديمة بتاعة حسني "احنا بلد مؤسسات يا اخواننا "
باسلوب عادل امام اما كان بيقول "انا الواد سيد الشغال يا اخواننننا" .



8- المتلونين :


مش عارف دول زي ال
incredibles
ولا دول زي ال
fantastic 4
بس شكل الكلمة كده انهم حاجةليها علاقة بالخوارق ويمكن من عند ابو الغضب او رجال الصلصال اللي كانوا في "باور رينجرز " !!
ظهرت فجأة الكلمة دي علي الاعلاميين وكل الناس كل واحد يقولك اقلب يا عمنا القناة ده متلون
ايه يعني هيأثر ع الألوان اللي في الشاشة ؟؟
طيب ولو تليفزيون ابيض واسود ايه النظام ؟ بال وسيكام ؟ ولا بال وسهام ؟
دي كلمة برضه كان نفس الناس تقولها من زمان عشان احساس برنامج الاتجاه المعاكس
يقوم يضرب ع الطرابيزة ويقوله "انت متلللللللون "
والتاني يرد "انت شرررررذمة"
والتاني" انت خررررررردلة"
والتاني "انت فسففففففسة"
والتاني" انت زبللللللللة"
"انت..انت..انت ...حد يقول كلمةاصغر من زبلة..اه اه انت نمنمة "
ويفضل الحوار ماشي كده عشان نعيش جو البرنامج شوية زي ما عيشنا اجواء كتير في الفترة الاخيرة !



9- الثورة المضادة :


ده المصطلح الجديد الطازة اللي لسه طالع قريب وكتر استخدامه في الفضائيات وفي الصحف
زي مصطلح "اخلاق ما بعد الثورة" اللي انا مش فاهم ورغم نجاح الثورة نجاح ساحق الا ان الاخلاق في منها بقي اسوأ ومنها زي ما هو ومنها اتحسن
يعني الوضع الطبيعي هو السائد وثورة الاخلاق دي عايزة ثورة من جوانا مش ثورة التحرير
ثورة التحرير اسقطت النظام ووضعت اسس لحياة ديموقراطية انما الاخلاق مش هتتغير بيها ابدا ده راي الشخصي




10 - الشعب يريد :


اهي دي الكلمة العدلة الوحيدة في كل الكلمات اللي فوق دي واللي انتشرت قوي في فترة الثورة اهم حاجة ان الشعب يريد
بعملائه بخونته ببابا غنوجه ..الشعب يريد واخيرا بيقول كلمته وحق عليهم ان يسمعوا




وياريت المصطلحات دي تختفي كلها ويبقي مصطلح الشعب يريد دائما