كلمات الشعب المصري قبل الثورة

ألفاظ كتير قوي لازم تتنسف في مرحلة بعد الثورة..لو ناويين نتغير فعلا يبقي لازم الألفاظ دي تنتهي من حياتنا في مصر تماما..




1- لاغيني :

الموظف في اي مصلحة حكومية دايما يستخدم الكلمة دي اما ييجي يخلص اي مصلحة من حق المواطن اصلا..ممكن يفتحلك الدرج ويقولك "لاغيني" وممكن يغمزلك كمان وعلني قدام الناس عشان تدفعله ويخلصلك الورقة في ثواني



2- دخاني :

الكلمة دي بتستخدم احيانا بشكل عادي مش رشوة ولا حاجة بس كتير في الاوقات بتبقي كلمة لتخليص حاجة مش من حقك برضه
وتحس ان اللي بيقولك "دخاني" دايما حشاش لان اول حاجة فكر فيها من اجره هو السجاير والدخان وكانه هيصرف كل الفلوس علي السجاير بس



3- عبد المأمور :

دي الكلمة اللي من اسباب قيام الثورة في مصر اساسا.هو كل واحد تكلمه يقولك عبد المأمور ؟؟ هو لسه في عبودية يا ولاد ال...
وبعدين هو انت يقولك المامور ده اي حاجة تعملها زي اللطخ وخلاص ؟ مافيش تفكير مافيش مسئولية..يعني لو قالك اقتل نفسك هتقتل !
ودايما الكلمة دي اكثر الاماكن استخداما فيها "الامن المركزي" بتوع "ممنووووووع يا بيه"..



4- هي الدنيا هتطير :

اه هي طارت خلاص ..انت معندكش خبر ؟؟ هي خلاص طارت من كام سنة واحنا لسه بنحبو فياريت نلحق اي حاجة من الدنيا التانية دي
كل ما تدي ورقك لحد في شباك حكومي يقولك "اصبر هي الدنيا هتطير ؟" وكأنه مش حاسس ان كل البلاد طارت لفوق فعلا واحنا لسه ع الارض..
وبعدين طيب سا سعادة الموظف ما تقول لنفسك الكلام ده..هي يعني الدنيا هتطير ع الشاي ده ولا البسكوت اللي في ايدك ده ؟
هو انت بتاخد مرتبك عشان شاي وبسكوت ؟؟ يعني اللي بيسقي الشاي في البسكوت بيدوله فلوس في البلد دي ؟ طيب دي شغلانة حلوة قوي وممكن نجيب صينين يعملوها
ويعملولنا ماكينة كده تسقي الشاي في البسكوت كل يوم !




5- روح لأستاذة ميرفت :

دايما تسمع الكلمة دي في كل مكان ودايما في استاذة ميرفت في كل مصلحة وكأن الاسم ده حكومي !
ودايما بتكون قاعدة في الاوضة اليمين ولابسة نضارة كوباية وتبصلك من تحت النضارة وهي شايلة طاجن ستها
وحتي لو الراجل ده يقدر يخلصلك ورقك من عنده انما لازم تفوت علي كل الاوض اللي جمبه برضه ماهو الرياضة للجميع يعني
واستاذة ميرفت طبعا هتقولك الورق مش كامل وروح فوت ع الاوض تاني كمل ورقك وتعالي لان استاذة ميرفت هي تقفيلة اللعبة الحكومية في اي مصلحة !




6- فوت علينا بكرة :

اشهر جملة في تاريخ مصر ..يا تري هتتكرر بعد الثورة ؟؟
الشعب يريد اسقاط كلمة "فوت علينا بكرة" !
افوت عليك بكرة ليه ؟ ما انا ورقي كله خلصان وممكن تطلعلي الوصل حالا ؟
اصل استاذ مدحت مجاش النهاردة ..ومجاش ليه ؟ اصل عنده ظروف عزاء
مع انه كل اسبوع عنده ظروف عزاء..ده لو عيلة استاذ مدحت الف فرد كان زمانهم خلصوا
وبعدين هو عيلته ماتوا في حادثة طيارة ولا ايه ؟؟ كل اسبوع بيعزي في واحد ؟؟



7- استني ادورلك ع الملف :

ويقعد الموظف يدور ع الملف في الف رف معفن وعليه تراب الدنيا كله
يا جدعان فيه اختراع اسمه "الحاسوب" ..! مش ممكن لحد دلوقتي ماشيين بطريقة افلام نجيب الريحاني "روح يا سبتمبر تعالي يا سبتمبر " !
لسه بتبل صباعك وتقعد تقلب في ورق اصفر قديم عشان تطلع ورقتي ؟؟
امال شركات الكمبيوتر بتبيع لمين بقي ؟ ولا انتوا مسمعتوش عن الاختراع ده ؟
حتي الكمبيوترات في المدارس بيلعبوا عليها جيمز والابلة بتشرف علي فن الاطفال في اللعب بس !



8- هأحولك ع القسم المختص :

يا عم انت القسم المختص..ده انا جايلك من ميت جهة وقالولي انت القسم المختص ازاي هتحولني ؟
قصدك هتطرأني ع القسم المختص..وطبعا لو طلعت عشرين جنيه حالا هتبقي انت القسم المختص بالقوي قوي اكيد



9- صورة البطاقة وتعالي :

عايز ليه صورة البطاقة ؟ ما هي البطاقة ذات نفسها قدامك اهي ؟
عايز تدبسها في الملف؟ هو لسه في كده في الدنيا ؟؟ يا جدعان في كمبيوتر ابوس ايديكم
وبعدين انت مكتب محترم المفروض انت تصورلي البطاقة في ماكينة تصويرك
مش اطلع برة واسيب الطابور ده كله عشان اصور البطاقة وارجع اقف فيه ! حرررام !



10- الأسعار بقت نار :

يا عم ايوه بقت نار بس انا اعملك ايه دلوقتي ؟
تيجي تركب تاكسي يقولك "يا استاذ واللهي الاسعار بقت نار انت عارف البنزين بكام النهاردة ؟ "
يا عم شايفني ببيع جاز وانا مال امي ؟؟ عايزني ازود الاجرة يعني بالكلمتين دول ما تقول م الاخر




11- مطرح ما ترسي دقلها ياعم :

الكلمة دي كانها قاعدة للشعب المصري ..تحس بان كل حاجة ماشية بظروفها
مافيش حاجة متخططلها اصلا ..هي البلد مش ماشية علي خطة هي ماشية علي "مطرح ما ترسي دقلها"



12- حودة فرج :

كابتن ممدوح التخين.ممدوح فرج واعلاناته بتاعة التخسيس واشبه الاعلانات دي
لازم دي اول حاجة تتشال تماما بعد الثورة وياريت يشيلوا كابتن ممدوح نفسه باي ونش



13- سعادة الباشا :

دي كلمة لازم تتلغي برضه في تعاملات الشعب مع الشرطة او مع الشعب وبعضه
بعد الثورة لازم الكلمة دي تتشال تماما من قاموس حياتنا اصلا كل الناس باشا حتي بياع الجاز بيقولوله "باشا" !!
ماشي هو راجل كويس علي عيني وعلي راسي انما كلمة باشا دي واسعة شوية ؟
البشوية دي كان بيدفع فيها الوف دلوقتي بقت لقب مجاني الناس مش طايقاه من كتر ما بقي رخيص


14- إبرز :

إبرز الجنيهات ..قب..خرج..طلع..السبوبة..الأبيب..كلها مصطلحات لتخليص المسائل والمصالح برضه
وبتكون الكلمة لايقة اما يقول "ابرزلي البنكنوت" ..او "اديني كام جندي"
والجندي ده يعني فلوس يعني طبعا



15- المخلصاتي :

وظيفة في كل مكان ..مرور او شهر عقاري او غيره..
تلاقي واحد واقف كده ياخد فلوس اسمه "المخلصاتي" يخلصلك الطوابير في ثانية بالكوسة طبعا
ودي اهم وظيفة لازم تتلغي بعد الثورة وكل واحد يخلص لنفسه في سهولة ويسر
والغريبة ان المخلصاتية دول من تخليص الطوابير في منهم بني عمارات !!




وياريت كل الكلمات دي تتلغي بقي ونتغير تغير كامل والي الامام علي راي الحاج القذافي "لا رجوووع الي الامام الي الامام ثورة ثورة " !