الحـرق بالجــاز في لــيالي الجــواز..الجــزء الثـامن عشر

ايه اللي حصل في الزمن وغير حال الجواز كده ؟ ليه الامهات معادتش بتهتم قوي بموشوع جواز البنت زي زمان كانت لو اتاخرت عن سن معين تبقي كارثة دلوقتي ممكن تديها براح لحد سن اربعين ما هي البت عايزة تشتغل وتشوف اكل عيشها وملعون ابو العريس اللي هيحكمها وينغص عيشتها بلا داهية لكن في فروقات جوهرية بين الجواز ايام جدي والجواز دلوقتي :



1- كانت الزوجة بتغسله رجله ايام "امينة " وكده ودلوقتي عايزة تجيب رجله !

2- كان اما بيرجع من الشغل بتجر معاه ناعم..دلوقتي "بتجرجره " ع المطبخ ..

3- كان زمان جوزها بطل راجع من المقاومة..دلوقتي جوزها راجع من الكافيه .
.


4- كان زمان يرجع يلاقيها عاملة الغدا..دلوقتي ممكن يلاقيها عاملة شوية خضار ..بس ع "الفارم فايل" !

5- كان زمان اما يستحمي تقوله "حمام الهنا يا سبعي"..دلوقتي تقوله "خلصت الانبوبة يا فالح ؟ "

6- كان زمان تقوله ع الهدية "اي حاجة منك حلوة" دلوقتي تقوله "يا ما جاب الغراب لامه "

7- كان زمان بيحطوا "ناموسية" عشان يناموا من غير زن...دلوقتي مراته هي اللي بتزن..

8- كان زمان تقوله وهو خارج "مش ناسي حاجة؟" ممكن بوسة..دلوقتي تقوله "مش ناسي حاجة؟" قصدها فلوس..

9- كان اسمها "المدام"..دلوقتي اسمها "الحكومة "..

10- كان زمان الست لجوزها وعيالها..دلوقتي الست لجوزها وعيالها واصحابها وصحباتها والفيس بوك وكل الناس..

11- كان زمان تقوله "يا سيدي"..دلوقتي تقوله "اخلص يا سيدي"

12- كان زمان كل يوم "صباحية" ..دلوقتي كل يوم "اصطبحنا وصبح الملك"..

13- كان زمان تقوله بكل حب " مش عايز حاجة تانية؟" دلوقتي تقوله "ايه عايز حاجة تانية ولا ايه ؟ "

14- كان زمان يقولها بثقة "حضريلي الحمام"..دلوقتي يخاف يقولها "افتحيلي السخان"..

15- كان الجواز "اشهار" ..دلوقتي الجواز "تشهير"

16- كان اسمه "عش الزوجية"..دلوقتي سموه "قفص"..

17- كان الحب هو سيد الموقف..دلوقتي الفلوس..

18- كان زمان بعد الجواز "نعم صديقة الزوجة"..دلوقتي بعد الجواز "نعم صديقة الجوزة"..

19- كان الجواز زمان بشروط ثورة يوليو..دلوقتي بشروط ثورة يناير ولازم كل المطالب تجاب..

20- كان الزوج زمان يقول "محلاها الحياة الزوجية"..دلوقتي المتجوز يعمل صفحة ع الفيس بوك ويقول "احنا اسفين يا عزوبية"..

21- كان زمان الجواز "حب وطاعة"..دلوقتي مجرد "زفة وقاعة"..

22- كانت الهدية "شنطة او جزمة"..دلوقتي "يا اما دهب يا مافيش لزمة"

23- كان اسمه "بيت العدل"..بقي "بيت العوق"





ودي اهم الفروقات بين جواز زمان وجواز دلوقتي وربنا يحفظنا