الأم المصـرية ما بين زمن "نينا" وزمن "مامي"

الأمهات المصريات ليهم طرق وعقاب بطرق غريبة قوي للاطفال الصغيرين..يعني تلاقي الطفل عنده تلات سنين مثلا وتقوله "انا هامشيك علي عجين متلخبطوش" وهو طبعا بكل براءة يسهل "وازاي امشي علي عجين يا ماما؟"

وفي بعض الاحياء الشعبية ممكن يستعملوا لفظ شعبي "هاضربك علي حنطور عينك" وطبعا الطفل مسكين اول مرة في حياته يسمع الجملة العجيبة دي ويسهر طول الليل يفكر ايه الحنطور اللي في العين ده ؟ وممكن مينامش طول الليل لحد ما يلاقي اجابة لسؤاله..! وكمان جملة "هاجيبك من لغاليغك" او "هاجيبك من صرصور ودنك" !!


امهات الاجيال الجديدة مش زي الامهات زمان ابدا يعني غالبا لو وقفت في اي مكان في ام من بتوع اليومين دول مش هتسمع غير "صريخ" و "زعيق" في الطفل حتي لو مجرد انه غلط غلطة بسيطة قوي

ووقع مية مثلا عليها او حاجة ممكن اي طفل يقع فيها لكن مافيش صبر زي الاجيال القديمة اللي كانت بتتعامل بطرق مختلفة مع اولادها حتي كان زمان كان البعض يقولوا ساعات لمامتهم يا "نينا" مش للجدة بس انما للأم دلوقتي بقي الاكثرية بتقول "مامي" وشخصية "مامي" بتاعة دلوقتي غير شخصية "نينا" بتاعة زمان تماما في حاجات كتير :


1- "نينا" بتاخد الطفل علي قد عقله وتحاول تمشي معاه واحدة واحدة لو سألها "هو انا ممكن العب مع النمل " تجاوبه بكل هدوء اما "مامي" تقوله علطول "اااه تلعب مع النمل وتقعد ع الارض واغسلك هدومك ما انا الخدامة اللي جابهالك ابوك" !!


2- "نينا" كانت زي الافلام العربي كده تجيبلك الساندوتشات وانت طالب بتذاكر وكوباية لبن دافية عشان تركز اما "مامي" تجيب "نسكافيه تلاتة في واحد" وغلاية بتصفر عشان حتي مكسلة تقف جنب المية علي ما تغلي فجابت غلاية بتصفر عشان تصب في الوقت المناسب وتجيبلك النسكافيه بالعافية يعني .


3- "نينا" كانت بتكنس الشقة وتمسحها وممكن الابن يساعدها..دلوقتي "مامي" اكيد بتجيب بنت من الي هم بتلاتين او خمسين جنيه دول يمسحوا وينضفوا الشقة كلها وهي تشرف من بعيد واكيد الطفل مش بيرجع يساعد لكن بيرجع ينام مغناطيسيا قدام البلاي ستيشن.


4- "نينا" كانت عايزة ابناه ينجح عشان تفرح بيه ..اما "مامي" عايزة ابنها ينجح عشان صاحباتها "سوسو وميمي ولولو" عندهم ولاد شطار قوي وفي اغلي اماكن في البلد !


5- "نينا" كانت تعمل "دقية البامية" و"المحشي" دلوقتي "مامي" لا تعرف للمطبخ سبيلا..ونص الحياة "دليفري" !


6- "نينا" كانت تحس بالطفل اول ما يكح حتي في الاوضة التانية..دلوقتي "مامي" لازم تحط كاميرا مراقبة عشان تعرف لو الطفل عيط او صرخ.


7- "نينا" كانت ممكن تحطلك اغاني اطفال لنيلي او صفاء ابو السعود دلوقتي "مامي" ممكن تسمعك نسانسي عجرم او هيفاء وهبي !


8- "نينا" كانت تقول "الواد نام وانا مشبعتش منه" دلوقتي "مامي" تقول "نوم الظالم عبادة "


9- "نينا" كانت تودي الطفل الحضانة عشان يتسلي وتيجي تاخده..دلوقتي "مامي" بتودي الطفل الحضانة عشان يحل عن سماها شوية لو راحة مشاوير وده في كل مصر بيحصل


10- "نينا" كانت تفرح اما تقولها انا قررت اتجوز وتزغرط قبل ما تعرف مين العروسة ..دلوقتي"مامي" تزعل لو اختارت حد غير بنات سوسو او لولو او تيتي لانهم هاي كلاس


11- "نينا" كانت بتتعب وتتهري..دلوقتي "مامي" طول اليوم ع البلاك بيري !


12- "نينا" كانت بتتكلم في التليفون خمس دقايق وخلاص..دلوقتي "مامي" ع الموبايل لحد ما تجيب اخره.


13- "نينا" كانت عارف مواعيد دروس الاطفال من قلبها ..دلوقتي "مامي" بتنظم كل حاجة في "الكاليندر"


14- "نينا" كانت تفرح العيل بفانوس او لعبة بتنور..دلوقتي "مامي" لازم تجيب اسكوتر بينور


15- "نينا" كانت تقولك "صباح الخير" دلوقتي "مامي" تقول "بسررررعة هتتأخروا انجزوا"


16- "نينا" كانت متنامش الا لما كل البيت ينام وتتطمن عليه..دلوقتي "مامي" بتنام قدام "التوك شو" !


17- "نينا" كانت الحياة من غيرها سلطة..دلوقتي "مامي" اقصي حاجة تعملها السلطة


18- "نينا" كان عندها حتة ارض بتصرف منها ع العيال..دلوقتي "مامي" عندها حتة ارض بس في "الفارم فايل"


19- "نينا" كانت بتتعلم الطبيخ من اللي اكبر منها..دلوقتي "مامي" بتتعلم الطبيخ من قناة فتافيت


20- "نينا" كانت تقولك اما تاكل "بالهنا والشفا" دلوقتي "مامي" تقولك "خد طبقك حطه ع الحوض


21- "نينا" كانت شايفة العيال عزوة..دلوقتي "مامي" شايفة العيال أزمة


22- "نينا" كانت تقوم في غز الفجر تشقر ع العيال..دلوقتي "مامي" تقوم في عز الفجر تشقر ع "الوول في الفيس بوك"


23- "نينا" كانت بتسمع وردة ونجاة..دلوقتي "مامي" بتسمع "بلاك تيما"


24- "نينا" كانت حضن يضم.."مامي" بتلعن يوم ما بقت ام


25- "نينا" كانت تشرب شاي في الخمسينة.."مامي" بتشرب ريد بول


26- "نينا" كانت تغسل لجوزها رجله اما يرجع البيت.."مامي" تقوله "عندك الاكل في التلاجة"




يعني زمن كلمة "نينا" الابيض والاسود كان ارحم من زمن "مامي" بتاعة البلاك بيري