اوعي تقولي دي ماركة جامدة

كان زمان يقولك "الأصلي يعمر والتقليد يدمر" اما دلوقتي فحتي الأصلي اصلا بيبقي ساعات متدمر !
معادش مقنع ابدا انك تيجي تشتري حاجة واحد يقولك "دي ماركة مضمونة" او "خد دي وحط في بطنك بطيخة صيفي" لأن من الاخر معادش فيه اي ماركة عالمية مضمونة مية في المية زي زمان.
مش عارفين هل السبب هو قسم الجودة في الشركات ؟ ولا التصنيع نفسه فيه خلل؟ ولا التخطيط نفسه للمنتج كان غلط ومكانتش الدراسات بتتم عليه علي اكمل وجه ؟
كانت الكلمة الشائعة عن الماركات العالمية يقولك "مافيشهاش غلطة" دلوقتي كلها عيوب للأسف وماركات مكانش حد يفكر انها هتكون فيها اي عيب.


الفيس بوك نفسه الموقع العالمي ده ملئ بالأخطاء بالجملة من بطئ في احيان كتيرة واخطاء في حسابات المشتركين ومافيش وسائل امان كافية ولو جيت تنزل بياناتك بيسألك علي بعض اصدقائك هل تعرفهم ام لا عشان يتأكد انك صاحب الحساب ويجيبلك احيانا صورة "فانوس" او "عامود" ويقولك مين ده ويكتبلك اسامي في الاختيارات !!!!
فضيحة بصراحة اما تحس انك بتتعامل مع الة غبية مش مع بشر يعني لازم يعرفوا ان ده مش وش بني ادم وانا مش هاعرف كل صور الفريندز اللي عندي واحفظهم عشان تعرف اني صاحب الحساب !!
ده بالاضافة لمسح معظم البيانات القديمة للمشتركين او حاجاتهم اللي فات عليها كذا سنة مثلا وقسم الشكاوي اللي مبيردش اصلا يقولك اصلكوا كتير فهرد علي مشكلتك لاحقا ويقعد شهرين وميردش اصلا في الاخر !
وساعات كتير تكتب كومنت او لايك وبعد شوية تيجي تلاقيه مش موجود ويقولك خطأ ! يعني عيب اوي علي موقع بالحجم ده كمية الاخطاء اللي فيه تهد جبل يعني .


اما ويندوز 7 رغم ان مايكروسوفت عملت فيه مجهود جبار الا انه ملئ بالأخطاء من شاشة زرقا بتحصل عشوائيا الي "كراش" بيحصل للاكسبلورور بدون سبب ولازم تقعد تعمله حركات عشان يتصلح الي الايقونات اللي بتتغير لوحدها احيانا الي حتي خاصية ترتيب الايقونات اللي لغوها بدون سبب وكانت الشكوي الرئيسية لمعظم الناس لان ترتيب الايقونات بقي بكذا طريقة بس مافيش طريقة يدوية ولكن لازم بحاجات معينة بالتاريخ او بالموضوع او بحاجات كتير اوي تانية انما مينفعش ترتب بطريقتك انت ..وطبعا الناس اللي شارية نسخة ويندوز من شركة كبيرة زي مايكروسوفت مش مطلوب منها تقعد تدخل علي المنتديات عشان تشوف حل لكل مشكلة حتي لو حد قاللي "ماهو الحل موجود ع النت" مش مطلوب من العميل انه يشتري الحاجة وبعدين يقعد يدور علي حلول مشاكلها !!


شركة عالمية رهيبة زي "أبل" تقع في اخطاء برضه اما المنبه بتاع الايفون يعلق تماما عند معظم الناس في العالم في اول السنة ويقولولهم هاتوه التوكيلات نظبط العيب ده وفي اليوم ده يقولك ناس كتير اتغيبت عن شغلها لانهم بيظبطوا المنبه بتاع الايفون ومتعودين عليه ولكن الخلل اللي اصاب المنبه خلاهم ميروحوش.
وكمان الايفون اصلا نزل منه كمية معيوبة برضه وكانت بيحصلها حالة "موت" ده غير الاي باد 2 والعيب اللي كان فيه في الاول من ظهور خطين سود كده علي الشاشة في اول استخدام !


اما شركة نوكيا فحدث ولا حرج خصوصا المنتج الجديد "ان 8 " اللي زهقونا اعلانات عنه وكأنه هيجيب الديب من ديله وكأنه حاجة محصلتش في التاريخ والناس تجري علي الاسواق عشان تجيبه عشان تتفاجأ في النهاية بجهاز "بيموت" !
تلات ايام وتلاقي الجهاز "مات" مافيش اي استجابة وتيجي تبحث علي النت تلاقي فعلا شركة نوكيا نفسها اعترفت بالموضوع وقالت فعلا في حالات موت في الجهاز وجاري تخطيها في الاصدارات القادمة ويبدأ اصحاب الحلول في انهم يقولوا الحل للمشكلة وتكون الفضيحة لشركة نوكيا "حط الجهاز في الفريزير كام دقيقة يخرج شغال" !!!
فعلا ده كان الحل لمشكلة موت الجهاز ولكن حل مؤقت لانه هيقع تاني وميحطش منطق تماما..ده اصلا بالاضافة لان الجهاز مكانش بقوة انتظاره ولهفة الناس عليه لانك هتلاقي جهاز عادي في النهاية وليس جهاز خارق يعني ولا حاجة زي الاعلانات مكانت مصورة للناس بل ان مثلا موضوع البطارية اللي مزروعة فيه وصعب جدا فكها دي مشكلة كبيرة لان لو الجهاز هنج وعايز تشيل البطارية ابقي قابلني بقي وهتكون مشكلة عويصة عكس موديلات نوكيا السابقة اللي البطارية بتتشال فيها بسهولة .


شركات السيارات طبعا أصبحت في وضع حرج برضه بعد كم المشاكل اللي عندها في الفترة الاخيرة وكل شوية نسمع عن العربيات اللي بتتسحب من الاسواق لسبب او لأخر وكبري الشركات العالمية بتسحب سياراتها وتقول خلل فني !

شركة تويوتا تسحب سيارات 2010 من السوق الامريكيه والاروربيه وكمان المفاجاة في شركة كبيرة زي مازدا اما تسمع خبر زي ان في عناكب في خزانات مازدا تجبر الشركة على سحب سياراتها من السوق وكمان شركة سيارات "كيا" تسحب نحو 21 ألف سيارة صغيرة لوجود خلل فني فيها

وشركة "بي إم دبليو" العملاقة العريقة كمان تسحب 150 ألف سيارة ومعاها شركة تانية كبيرة جدا ويمكن من اشهر الشركات علي الاطلاق شركة جنرال موتورز ودي بقي سحبت 1.5 مليون سيارة بسبب تسرب في الزيت


وبعيدا عن السيارات ومشاكلها كمان شركة يابانية كبيرة اكثر من2 مليون علبة من النقانق والبيتزا من السوق للاشتباه في امكانية احتوائها مواد كيميائية !
وكمان نشوف شركات اللاب توب والمحمول تاني مثلا عندك اتش بي تسحب 162000 بطارية كمبيوتر محمول لاسباب تتعلق بارتفاع الحرارة وشركة سوني تسحب 440 ألف جهاز محمول من الأسواق
وشركة توشيبا كمان تسحب 41 ألف كمبيوتر محمول "عرضة للاشتعال"


وعالم الصحة والادوية لم يسلم برضه من العيوب الفتاكة دي وطبعا هنا اخطر بكتير لان دي ادوية يعني حتي الدوا اللي المفروض يعالجك لا ده بيزيد امراضك وساعات امراض خطيرة كمان زي الصين
تسحب عقار تخسيس من الأسواق لتسببه زيادة ضغط الدم
وموضوع العقار اللي اسمه ميثوتريكسات لعلاج السرطان سحبوه من السوق لوجود عيوب فادحة فيه .


وطبعا اخر حاجة سمعناها موضوع فضيحة صندوق النقد الدولي وانه كان بيتعرض لاختراق أنظمته المعلوماتية طيلة شهر !! شهر كامل وصندق النقد الدولي بحجمه ده وكم الموظفين اللي فيه والمفروض المسئولين عن تأمينه تماما مكانوش يعرفوا حاجة زي دي ..فعلا فضيحة عالمية بكل المقاييس وتخلي الواحد معدش يثق ثقة كاملة في اي كيان عملاق خلاص

فعلا كلمة "كيان عملاق" دي بقت ع الورق بس انما كمنتجات او اخطاء بنشوفها من الكيان ده بتخلينا نشك في كل منتج ونشوف تجربته الاول وعشان كده شركة عملاقة زي الامازون بتعمل تحت كل منتج "ريفيو" ونشوف اراء الزباين اللي اشترت المنتج ده قبلك عشان تشتريه بناءا علي تجربة الناس مش بناءا علي اسم المنتج نفسه او ماركته وده جزء مهم جدا ان كل واحد بيقول رأيه في المنتج ويدي تقييم ودرجة عشان تعرف عدد الناس اللي قالت عليه حلو
او ممتاز او سئ .


يعني قبل ما تشتري اي حاجة دلوقتي متقولش كلمة "دي ماركة" لا لازم تسأل اللي اشتروها قبلك وتعرف رأي الناس عنها لان كلمة "الأصلي" خلاص انتهت وكل الاصلي بيسحب منتجاته وبيطلع عيوب في الدفعات الاولي لمنتجاته وفعلا "إسأل مجرب ولا تسأل طبيب" ولازم كل اللي هيشتري حاجة يسأل اللي مجربها افضل بكتير من الاعتماد علي اسم المنتج .