"أبو لمعــة" السكرة والفشرة المدورة

"الفشر" مش هو نفسه "المعر" و "الجخ" والفشار المصري أو شخصية "أبو لمعة" الشهيرة اللي دايما تبقي لقب علي اي فشار شخصية مشهورة قوي وموجودة في كل مكان .
ومش موجود بس في الشارع زي زمان ده بقي موجود ع الفيس بوك وفي كل صفحات الانترنت الاخبارية والرياضية وكل حتة.

ومع تطور التكنولوجيا اصبحت شخصية ابو لمعة اكثر اتقانا واحترافية طبعا لان الكدب اللي مكانش ليه رجلين بقي ليه ييجي تمن ارجل و16 كمان ويزحف وينتشر ويستمر !
ودايما شخصية الفشار بتقول كتير كلمة في النص بتوحي بالفشر زي كلمة "يلا"
يعني مثلا ايام الثانوي ييجي الشرقاوي يقولنا "امبارح يلا كان في حلقة يلا علي قناة تي في لاند يلا والراجل اللي ع الموتوسيكل يلا عمل.....في البت يلا وكانت حتة حلقة يلا ملهاش حل" والغريبة انه بيبان علي اسلوبه وهو بيلهث كده انه بيفشر والمفاجأة والصدمة اما يكون الاخرين بقي شافوا الحلقة اساسا ومافيهاش اي حاجة
ويقوله "قصدك يا شرقاوي الحلقة اللي بتيجي بليل اللي اسمها...."
الشرقاوي" اه يا جدعان"
يقوله"انت فشار يا شرقاوي والحاجات دي محصلتش وحلقة امبارح الوحيدة اللي كانت محترمة علي حظ امك"
الشرقاوي يقول "يا عم وانت ايش عرفك هو انت مشترك؟"
يقوله" ما هي بتفتح مجانا يا شرقاوي ع المسلسل ده بس..يلا" !!

طبعا كلنا عارفين قناة تي في لاند ومسلسل "باي ووتش" في تكوين وعي الشباب المراهق اثناء الثانوي !!! دي كانت قناة بتفتح يادوب ساعة واحدة مجانا في اليوم بليل وطبعا نظرا لان القناة الاولي والتانية هي اللي كانت عند الناس زمان واخر حلمنا كان السادسة والتالتة فطبعا كله يقعد يبحث علي القناة دي عشان يشوف الساعة المجانية ويشوف اي حاجة غير برنامج "تياترو" او "كنوز مسرحية" او البرامج اللي بتجيب عقم للشباب عموما ومش بس بتقطع الخلف دي ضارة جدا بالصحة زي سجاير كوكو الضعيف كده !!

الشرقاوي قال يدور علي حاجة تانية بعد الفشرة دي راح درس علم النفس
وقال في المجموعة "يا جماعة ابلة ...بتلبس لبس جامد قوي في الحصة ياعم روح خد درس في بيتها بدل المدرس القحف ده" !!
طبعا تاني حصة علي طول كانت مجموعة ابلة...خلية نحل الصلاة ع النبي يعني والاستاذ عصام بينش ويهش ..
وسأل استاذ عصام انا وواحد كمان ثبتوا علي موقفهم "هو في ايه يا جماعة فين العيال؟"
قولت " راحوا عند ابلة...اصل الشرقاوي بيقول انها بتريح"
الاستاذ" اييييه؟؟؟"
قولت" بتظبط يعني "
الاستاذ "ايييييييه؟؟"
قولت "يا عم انا مالي بيقول يعني جيبتها متفصلة بشكل مثالي كما ينبغي للنفسية المستريحة بدل حضرتك يعني وحصتك الناشفة"
قاللي " وانت مروحتش معاهم ليه ؟ والله انت محترم"
قولت "والله يا استاذ اصلي عارف ان الشرقاوي فشار"
قالي "ايييييه؟؟؟"
قولت "قصدي يعني شرح حضرتك ميتعوضش" قالي "بحسب" !!!


الشرقاوي رجع من جديد وقال يفشر ع المدرسين بقي المرة دي وكان الاستاذ مدحت بيموت غيرة من مدرس تاني اسمه عبد الله لدرجة ان مدحت كان بيقعد يتكلم طول الحصة عن عبد الله وانه مبيفهمش حاجة في الجيولوجيا اساسا والمفروض ميديش دروس ..ولما الشرقاوي يزهق قوي في الحصة وعايز يروح هو عارف التكة دي عند الاستاذ مدحت فيقول "ثانية واحدة يا استاذ"
مدحت يقوله "في ايه يا شرقاوي؟ عايز حاجة"
الشرقاوي " يا استاذ انا كنت بحضر الاول في مجموعة عبد الله وشرح الحتة دي بطريقة تانية خالص مش كده "
يقوم الاستاذ يقول "يخرب بيتك انت بتقول ايييييييه.اخرررررس عبد الله بتاعك ده حيوااااااااان مبيفهمش حااااااااجة وادي مية جنيه ع الطرابيزة قوله اما تروحله طالما ليك علاقة بيه يجاوبلي ع السؤال ده واديله ميت جنيه..وكلكوا برررررررة مافيش حصة النهاردة بررررررررررررة"

طبعا الشرقاوي نجح في الوصول لغرضه بانه نرفز الاستاذ ع الاخر لدرجة ان مراخيره بتغلي زي القطر البخار وشاط في الطلبة كلهم فجأة وروح الشرقاوي مستريح بعد ما وقع الاتنين في بعض مع ان الاستاذ عبد الله اساسا مقالش حاجة خالص ولا شرحله حاجة !!

وطبعا من اساليب الفشر كمان "التزويد" و "التهويل" و"النفخ" في القصص يعني مثلا واحد يقولي قريب سواق رئيس الجمهورية بيقول ان الريس تقريبا بيموت واحد خد المعلومة دي منه وجه قال لواحد تاني جه التاني ده قاللي "سواق رئيس الجمهورية بيقول الريس بيموت " المهم علي وصلت المعلومة لاخر واحد كانت ازاي ؟؟ "قيادي في القصر الجمهوري بيؤكد ان الريس بيموت لانه قريب واحد صاحبي" !!

والفشر بيختلف حسب المرحلة السنية يعني الفشر في ابتدائي واعدادي ممكن يوصل لان واحد عرف ازاي يتحول لسبايدر مان بس مش هيطلع السر دلوقتي !! انما في ثانوي بيكون اكثر منطقية وغالبا بيكون الفشر علي موضوع البنات او قصص بطولية زي مثلا واحد صاحبي كان بيؤكد ان طلع عليه 6 كلاب وهو ماشي في الشارع الفجر قام بصلهم بتحدي لدرجة انهم جريوا بعيد من الرعب !!!!!

او واحد تاني كان بيطلع سطوح العمارة وياخد العيال معاه عشان يقولهم ويقنعهم انه لو مسك ماسورة "طبق الدش " بايديه الناس هيلاقوا التليفزيون بيشوش !! علي اساس ان الماسورة بيصبوا فيها المسلسلات !!!

يمكن يكون ده "ابو العربي" شخصية شهيرة برضه من شخصيات الفشر المصرية..اللي ممكن تحكيله قصة ييجي بعدها باسبوع يقول انها حصلتله !! ودي كانت موجودة في شخصية "الشرقاوي" يقولك "كذا كذا" يقوله واحد "يا شرقاوي ده انا اللي حكيتلك الحكاية دي الاسبوع اللي فات" !!!

ومن اشهر شخصيات الفشر المصرية الراجل اللي طلع اشاعة موبايل "3310" وقال انه بيتكلم ببلاش بس شيل الشريحة واصاب الناس بالهوس ساعتها وكله شال البطارية بسرعة وعايز ياكل حق الشركة ويتكلم ببلاش ساعات وساعات زي ما قال الراجل الفشار اللي طلع الحكاية دي .وبدأ الفشر يزيد ويوصل ان الموبايل ده ثروة ومحدش يبيعه وانه هيتكلم مدي الحياة ببلاش بالحركة دي بتاعة رفع البطارية ولازم كله يحتفظ بيه وبدأوا يتكلموا في اسعار خيالية يمكن اضعاف تمنه في اشهر حركة نصب في مصر !!

وفي كمان "فشر التدبيس" زي مثلا تقوله "العروسة دي حلوة؟" يقولك "دي بدر منور يا ابني مافيش في جمالها اتنين " واول ما العريس يشوفها يقول "منه لله اللي كان السبب" لان التدبيس في جوازة تدبيسة كبيرة تمتد مدي الحياة !

في كمان الفشرة الشهيرة بتاعة "الليزر" كان المصريين من فترة طويلة مهووسين بقلم ليزر صيني حقير التجار اقنعوا الناس انه بيحرق الحاجات لو ركزت عليها بالقلم فترة طويلة !! قال يعني شعاع ليزر بجد والناس جريت واشترته بمتين جنيه وهو واقف علي التاجر بعشرين جنيه لانه ردئ جدااااا..واستفاد التجار وكسبوا الملايين من اقلام الليزر عشان الاشاعات السخيفة دي !


وايام المدارس طبعا العملية سداح مداح وكل واحد يقولك الاسئلة المتوقعة ويقول "خدوا الامتحان اهو يا جدعان" ويطلع ولا سؤال منه والعيال تنفخه بعد الامتحان .

ومن ساعة ما الانترنت ظهر والفشر زاد جداااا وكل ما تسأل حد عرفت الحكاية دي منين يقولك من ع النت لدرجة ان برنامج "ارجوك ما تفتيش" بيسأل ناس في الشارع "عرفتوا ان خط الاستواء مسحوه" قاله "اه عرفنا من ع النت" !! يعني دي بقت اسهل جملة دلوقتي ومتعرفش تكذبها الا لما تدور انت كمان ع المعلومة دي .

يعني كدبة ابريل تحس انها ممتدة شهور طويلة في بعض الاحيان لبعض الشخصيات..
واشهر انواع الفشارين بين اوساط الشباب هو "الحرمجي الفشار" يعني اللي قعد يحكي عن مغامراته النسائية طول النهار وعمل ايه وسوي ايه وكأنه بيحكي عن شئ يعني يفخر بيه مثلا او شئ مهم اصلا ويمتد الفشر ويقولك اول ما رحت بقي انبهروا بيا برة يلا وكانوا كلهم بيحلموا بيا وبتاع ..علي اساس ان الغرب كله مستني الفرعون المصري كالعادة زي المسلسلات العربية !!! او زي مسلسلات "اوكرانيا" كده اما واحد مصري يسافر برة يبقي رئيس منظمة دولية للمخدرات او رئيس المافيا !!! وابو بلاش كتر منه هو حد شايف حاجة "جخ" "جخ" واديها يا معلم والسميعة ما اكترهم..!


والمبالغ نوع من انواع الشخصية الفشارة او ابو لمعة بس بشكل تاني كل حاجة يقولك "ده كان اجمد يوم في حياتي" اااه "الفيلم ده اجمد فيلم شوفته في حياتي" ..وهتلاقي ان كل حاجة في حياته هي الاجمد والاحلي والاقوي دايما زي شعار برنامج "صدي الملاعب" !

و "الفشار المقنع" زي مثلا بتاع البطيخ يقعد ماسك البطيخة يخبط عليها ويطبل ويقولك دي اجمد واحدة يا بيه وتروح البيت تلاقيها معفنة اساسا ولا ليها طعم قال يعني كان بيخبط بجد وواحد رد عليه قاله حالة البطيخة من جوة او ده علم جديد من جامعة البطيخ في كاليفورنيا هو دارسه مثلا ..علم التخبيط ..

واشهر فشرة كانت قريب جدا اما قالوا الناس نازلة التحرير من فترة وبدأت رسايل تيجي علي الموبايلات وتقول "اوعوا تنزلوا التحرير اصل هيحصل احتكاك وبعدين يخش عناصر تضرب في اللي جوة فتدخل القوات تضرب فيدخل ناس تستعين بحماية دولية ويبدأ الضرب بالقنابل" وشوية حبشتكنات في الرسالة تحس انها حرب عالمية جديدة وكل الحكاية ان واحد قعد يفشر وصدق فشرته !

وبعد مصطلحات المبالغة للفشار هتلاقيها مثلا جملة "حتة دين كذا" او "بتاعة بلادها يا معلم" او "من الابرة للصاروخ" او معدي الفلنكات" او بعض مصطلحات المبالغة التانية..


واكيد كان اكبر فشار في مصر كلها هو حسني بتقاريره بتاعة كل سنة بتاعة الحكومة وان الناس كلها اغنياء وكده وحاسس ان كل مصر بتلعب جولف يا عيني لانه موفر الملاعب بمساحات كبيرة قوي سعادته وشايف ان الجولف للجميع !