حرامي من عـالم سمسم

يا سلام علي ايام الانفلات الامني واول ايام خالص لهروب المساجين في مصر بانتظام كل يوم يهرب ييجي اربع الاف مسجون وخمس الاف مسجون والمشهد قدام التليفزيون في كل بيت مصري :

الأم : هو ده في كل المحافظات ؟؟ ده في خبر عاجل تحت كمان..
الابن: لا ده هرب كمان عشر الاف في كام سجن تاني خبر عادي يعني


والغريب ان الاشاعات في الايام دي كانت بشكل مبالغ فيه جدا هو صحيح هرب مساجين بشكل رهيب لكن الاشاعات كانت اكبر بكتير من الحدث نفسه وكأن الحرامي راجل عبقري ومنظم نفسه وبيخطط ولا المافيا الحقيقية !!
كنت اكلم واحد صاحبي اقوله هو ايه اصوات الرصاص دي ؟ يقولي حسب ما سمع من اشاعات "دي عصابات بتيجي من بلاد تانية لسرقة ونهب وحرق الاماكن هنا" !!
طبعا الوصف كان مبالغ فيه اوي يا راجل ده هولاكو مكانش بيعمل كده في كل حتة يعني ده حتة يجيله ملل من كتر البلطجة دي ..طيب سرقة ماشي انما ايه حرق دي؟؟ هم هيحرقوا الامكان ليه يعني بعد ما يسرقوها هو شغب وخلاص ؟؟

واحد تاني يقولي في تاني يوم الانفلات الامني ده بيوقفوا الناس ع الصحراوي والدائري ويغتصبوهم كلهم رجالة وستات !!! رجاااااااااالة ؟؟؟؟؟كمان ؟؟لييييه احنا بقينا فين هنا ؟انتوا بتجيبوا الكلام المهبب ده منين تيجي تقوله تعرف حد حصله كده يقولك الكلمة الشهيرة طبعا "سمعت" !

كنت خايف جدا في الايام دي وكل الناس كانت خايفة حتي لو مش خايف علي نفسك اهو خايف علي بيتك وفي وسط الخوف ده كله يجيلك تليفون مهم جدا يزيد الامر اشتعالا وشعللها شعلل :

التليفون : انت في البيت ؟
انا: ايوه في البيت هاروح فين في الاحداث دي يعني ؟
التليفون: انا سمعت ان منطقتكم داخل عليها خمس الاف واحد شايلين شعلات وبيولعوا في البيوت كلها
انا: مين قال كده
التليفون: حد صاحبي شاف الناس دي خارجة ومتجهة ناحيتكم


تليفون زي ده يعمل فيك ايه وانت قاعد تقرا اخبار عاجلة عن هروب مساجين ؟؟ تبول لا ارادي مثلا ؟؟؟ ركبك تقف مكانها متتحركش؟؟ تقريبا جالي شلل رباعي وخماسي وكل الانواع ومقدرتش اتحرك من مكاني وعيني بدأت ترعش في مكانها كده ساعة المكالمة دي اللي كلها اشاعات اكيد ..خمس الاف واحد ؟؟ وبيحرقوا البيوت ؟؟ده محصلش في البوسنة والهرسك يا جدعان !! ويحرقوا البيت ليه ؟؟ ده انا لو قائد الحزب الوطني نفسه مش هيحرقوا بيتي ولكن هيحاكموني ! في نفس الوقت ده اشم ريحة دخان واقول اااه الاشعات بجد لوا ايه ؟؟ دي ريحة حرق البيوت ؟؟ معقول ده بيحصل ؟؟ يطلع واحد بيحرق كيس زبالة في الشارع تحت والريحة هلت علينا .

طيب سامع صوت زعيق جامد قوي وكسر زجاج هل دي صيحات الغضب وطبول الحرب وبدأوا الهجوم التتار ؟؟؟ لا تطلع خناقة عادية جدا في الشارع !
اكلم علي صاحبي اقوله "يا علي هو الناس هجموا ولا لسه يا ابني" يقولي "لا هم مهجموش هم خلوا الميعاد بكرة " !!!
طبعا هتقولي ناس مين اللي هجموا..دي اشاعات كانت طالعة وحتي الميكرفونات ماشية في كل مكان في الشارع تقول احموا منطقتكم في عصابات عايزة تهجم علي البلد تحذير في عصابات عايزة تهجم علي البلد !! اموت واعرف هم عرفوا منين خطة العصابة !! هل العصابة ماشية علي "كاليندر" معينة والنهاردة يوم المدينة دي !!

ومنين علي عرف ان العصابة أجلت الميعاد وبقي بكرة هم بيبلغوا الناس بالتليفون !! وبعدين كل اصوات الرشاشات دي ولاعصابات لسه هتيجي بكرة امال ده كله تسخين ؟؟ قنابل يديوية ورشاشات وتهريب مساجين في مدينة قدامنا علطول كل ده تسخين ؟؟
قال "لاااا ده مش تسخين الموضوع كله ان مأمور السجن تحالف مع مساجينه لرد عدوان مساجين بلد تانية فانقلبوا عليه المساجين كلهم وتحالفوا مع بعض للهجوم علي المامور والمدينة" !!!
ده ولا اروع فيلم حلمنتيشي من حواري هولندا !! تحالف وهجوم ومؤامرات وكلام زي الفل ..طيب طالما الوضع كده بتقولولي انزل ليه احمي العمارة وانا ماسك سكينة ؟؟ ده البلد كلها صوت قنابل ورشاش..السكينة دي افتح بيها رغيف مش اهجم علي واحد برشاش يا جدعان.

لا واللي يشعلل الوضع اكتر ان واحد كل يوم بليل الساعة تلاتة الفجر يعدي بموتوسيكل منه لله يقول وهو ماشي بالموتوسيكل "اصحواااا يا بشر..البلد بتوللللللع" وبعدين يضحك ضحكة شريرة زي البأف ! اقذر نوع اشتغالة يحسسك ان البلد فيها معارك وحروب اهلية بكلمة "البلد بتولع" وهو بيهزر بسلامته .

طيب اعمل ايه ؟؟ احنا في اعدادي خدنا مادة معفنة كده او كتاب صغير بتاع كيف تقي نفسك من الزلازل ومخدناش حاجة ابدا عن البلطجية وحاملي الرشاش ! أهاجمهم بايه يعني ؟ صاعق كهربائي ؟ مش ممكن طبعا ده تلاقي المسجون ده بيفطر صاعقين ع الصبح في السجن ..ماما قالت نهجم عليه بازازة بايجون وعصاية مقشة كنوع من الوقاية يعني لو الحرامي دخل ! طبعا ده اسلوب وقائي بس لو الحرامي هرب من سجن في عالم سمسم !!

يوم واتنين قعدت اطبق مش عارف انام لحد اليوم التالت خلاص معدتش عرف انام الا اما اسمع صوت رشاشا خفيف كده من بعيد ومعرفش مصدره ولا حد يعرف يفسر ايه حصل امبارح بالظبط !
هل دي كانت شرطة بتهاجم بلطجية ولا بلطجية بيضربوا رصاصا بمدافعهم ولا ايه الحكاية بالظبط ؟ احسن الواحد ميسألش لحد ما الموضوع يفوت.

ناس كتير فكرت في اشاعات من نوع تاني "دول بيقفوا تحت ويهددوا الناس بالميكرفون يا اما تنزل يا هاطلع اولع فيك" ! طيب ساعتها فكرة وقلت لو طلعلي فعلا الحرامي وعايز يسرق كل حاجة ايه الحاجات اللي عايز احافظ عليها بعيد عن عيون الحرامي لقيت اني عايز احتفظ بجد ب "الهارد" بتاعي !!!!
لدرجة اني فكرت اخبيه تحت السرير عشان الحرامي ياخد التليفزيون وكل حاجة ماشي انما مش هتلمس هاردي ابدا وكأني بتكلم عن شقا عمري مثلا .

اقف في البلكونة ناس رايحة جاية بموتوسيكلات اقول "اااه اكيد دول اللي بيخططوا وبيراقبوا المكان كويس للهجوم الليلي الوشيك" كان فاضل اجيب ماكيت كده واحط خطة عسكرية زي صلاح الدين والا اجيب جعبة سهام واضربهم من البلكونة من كتر التفكير التأمري في كل واحد معدي في الشارع لدرجة ان واحد كان بيقرا الجرنان في الشارع شكيت وقعدت أتأكد ان الجرنان مش مقلوب وان ده يكون بيستعبط ولا حاجة .


كل ده طبعا ومكالمات القناة الفضائية المصرية العجيبة شغالة الله ينور كل شوة واحدة تصرخ في التليفون "الحقوووونا احنا في شارع مش عارف مين والبلطجية طالعين ع السلم اهو"
يا شيخة ؟؟؟ طالعين ع السلم ؟ طيب ما تروحي تحضريلهم حاجة ساقعة ولا حتة جاتوه بدل ما تتكلمي في التليفون ؟ يعني بلطجية طالعين ع السلم وانتي ماسكة التليفون بدل ما تجهزي اي حاجة ولا تعملي اي حاجة للمقاومة ؟؟ ولا حبكت تقولي وصيتك الاخيرة للتليفزيون يعني .


ولا واحدة تانية تتصل تقول "فين الجيش ؟؟ انا اللي اتكلمت امبارح وانتوا مبعتولناش حد" ! حاجة غريبة قوي المكالمة دي كمان طيب من امبارح وانتي لسه عايشة وزي الفل اهو امال في مكالمة امبارح كانت البلطجية خلاص بتقرب ازاي ؟ ولا رجعوا في كلامهم وقالولكوا هنيجي بكرة؟؟ اما قناة الفضائية دي فبركة من العالي صحيح .

اهم حاجة في الموضوع ان الجيش ساب ارقام للاستغاثة وعينك ما تشوف الا النور يا معلم ولا رقم بيرد اصلا وكله خارج نطاق الخدمة ..طيب استغاثة ايه بقي ده خوف زيادة لما اتصل حتي بالجيش وما يردش يعني تحس ان محدش هيساعدك لو عملت ايه .


قالوا لجان شعبية اتطمنت قوي وقولت المنطقة هتتأمن الحكومة فتحت الانترنت ورجعته من هنا واللجان رجعت بيوتها وسابت المناطق من هنا ..يا لجان سييييييس يا ...!
يعني قطع الانترنت هو اللي خلاكوا تحموا المناطق انما اما رجع الانترنت خلاص بقي بخ وكل سنة وانت طيب وكل واحد يحمي نفسه انا رايح اقعد ع الفيس بوك يا عم .
طبيعي يعني وانا هانتظر ايه من لجنة كاملة واقفة بتاكل "كريب" !!

افتح قناة روتانا سنيما وانا سهران خايف من هجوم البلطجية المحتمل الاقي فيلم "المشبوه" اييييييييه كلكوا عليا ولا ايه ؟؟ يا عم التليفزيون مش ناقصة رعب والنبي انت متأمر عليا انت كمان !
تاني يوم القناة تجيب "وش اجرام" خلاص قشطة قوي كده بلاها تليفزيون اسمع الراديو هتلاقي كالعادة واحد بيقول كل ارقام الجيش اللي مبتردش او شوية اغاني وطنية كأننا في فيلم "احنا بتوع الاتوبيس"حتي لو جعت بليل مش هاطلب دليفري..حاسس بذنب لو طلبت بيتزا لاني هاحس اني عفاف شعيب الجديدة ! يعني عفاف شعيب عملت عقدة للناس من كلمة بيتزا وزمان كل مطاعم البيتزا فعلا بتكرهها دلوقتي بسبب العلاقة السلبية بين الناس والبيتزا بعد الثورة .


الغريبة ان في الايام دي تلاحظ ان مكانش حد ابدا بيطمن حد ولكن الشعب المصري كالعادة اشتغل بهوايته المفضلة "التهويل" و"التزويد" يعني واحد اتسرق مثلا علي الطريق وعلي ما القصة تتنقل من واحد لواحد توصلك في الاخر علي انهم "خطفوه ودبحوه وسرقوه" ..عادتنا ولا هنشتريها ! كالعادة الخدمة المصرية "ارعبني شكرا" .

لكن اكتر حاجة تنرفز الناس اللي بتبعت استغاثات علي الانترنت ! بجد شئ مستفز يعني مين اللي هيهتم بشكوي علي الانترنت في وقت زي ده ؟ ومين اصلا فاضي من الشرطة الغايبة ولا الجيش يبص علي شكوتك دلوقتي وانت عمال تحكي قصة حياتك في رسالة طويلة وفي مواقع مجهولة كمان .

وتبدأ تحليلات الاطفال السياسية في الظهور كمان في الايام دي ومثلا طفلة تقول "حسني مبارك ده حرامي" اقولها "اه فعلا بس انتي عرفتي منين؟" تقولي "اصله سرق فلوس مامي" !!!
جريمة روشة قوي لحسني انه سرق فلوس مامي وبابي حسب رأي الاطفال..وطبعا حسني مبارك بالنسبة لهم لا يمثل الا افلام كارتون قصيرة انتشرت ع اليوتيوب وبقوا بيستمتعوا بيه كبطل كارتوني وهم مش عارفين انه حقيقي مش زي "سبونج بوب" يعني !


وتبدأ القصص والتحليلات بتاعة قالقهاوي في الظهور بكثرة زي مثلا "بيقولك خلاص كده الشرطة مش راجعة تاني الا بعد عشر سنين" واحد يقوله " يا راجل انا سمعت ان مش هيبقي في شرطة اصلا وكل واحد يحطكم منطقته" !!
كأنهم بيتكلموا عن مسلسل رمضاني ودي الحلقة الاخيرة مثلا ..معادش في شرطة!! اموت واعرف مين اللي قاله التحليل الجامد ده .



يعني كانت اول ايام الانفلات الامني هي الايام اللي فعلا ظهر فيها كل انواع الشعب المصري من "مهولاتي" و "مطيباتي" للي بيفتي واللي بيهري واللي بيحاول يكون محايد والنوع الشهير قوي بتاع "حكاوي القهاوي" ..لكن الفايدة الوحيدة للايام بتاعةا لانفلات دي ان الناس قلبها قوي قوي حتي الاطفال لو سمعت صوت رشاش بليل معادتش بتخاف يعني جيل جديد هيبقي قلبه جامد جدا ولا حاجة تهزه ..جيل يقرقش الزلط.