دستــور دمــي المصــري

يا مصر يا نيل مغطيني..
يا اهلي وعمري وسنيني..
تعيشي يا غالية وتحني..
ومهما كنتي هتأني..
ولادك ليكي برضه حياة..
ورفعة راسك انتي نجاة..
وجاي احلف بدستورك..
واحفر عمري في سطورك..
وارفع كفي واحلف اقول..
"ولا راح ابقي فيكي جاسوس..
ولا عنصر خراب مدسوس..
ولا هالعب عليكي قمار..
في طرابيزة عدو غدار..
ولا هاقبض عليكي فلوس..
ولا هاصبر لنخر السوس..
ولا هابقي يا مصر "فلول"..
ولا اسمم بحسني عقول..
ولا اعمل بديني زار..
وهابقي انا سيفك البتار..
علي اللي يحاولوا يحنوكي..
وعلي ولادك يقسوكي..
ولا اعمل في يوم فتنة..
واحاول اطفي نار فتنة..
خلقها الجهل بين ناسك..
وقتلوا يا مصر حراسك..
لكن احلف انا حارسك..
لاخر قطرة انا حاميك..
ولا هابقي يا مصر عميل..
وابيع اهرامي ويا النيل ..
ولا اتاجر بثوراتك..
ولا انافق لحكامك..
ولا اهينك لمصلحتي..
ولا ارميكي عشان راحتي..
ولا احرق بلدي لاجل الحكم..
يا لعنة ذل كرسي الحكم..
وقبل ما اكون ديمقراطي..
هاكون ليكي حبيب راضي..
هاكون نيلك في وقت جفاف..
واكل فيكي لو عيش حاف..
ده حضنك ليا يحمي يصون..
ولا اسيبه ولو مال قارون..
يا مصر حلفت بتاريخك..
حلفت بخوفي وصريخك..
بانك فينا حرية..
ولحظة صدق منسية..
وانك فينا شرع اصيل..
وانك لينا تبقي دليل..
وانك فينا عزوتنا..
ومهما تبقي قسوتنا.."
يا غالية يا مصر سامحينا..
ولكن الغلطة مش فينا..
دي من حكام عذاب وتتار..
وسرقوا القوت وسرقوا الدار..
وخلونا خراب مبثوث..
وحسني بكعب جزمة يدوس..
علي كل الضعيف فيكي..
علي كل اللي مات فيكي..
يا مصر احكيلك ايه اكتر..
لو احكي عنه مش هاقدر..
ده حسني اشتري صوتنا..
وربي عياله من قوتنا..
وسممنا بمحاصيله..
وخان بلده وخان نيله..
يا مصر الغلطة مش فينا..
الغلطة في اصل حكامنا..
ده سرقوا النور في ايامنا..
وخلونا بقايا شعوب..
وحتي النومة بالمقلوب..
مواطن فيكي عشوائي..
يعيش وعلاجه كيميائي..
عشان سرطانه نوعه"رخيص"..
عشان سرطانه اسمه "رئيس"..
وفي الاخر بيخرج ناس..
يلوموا الثورة والثوار..
عشان كانوا من الاحرار..
ورفضوا الذل لو ليلة..
وشالوا لوحدهم شيلة..
وضحوا بعمرهم لسنين..
عشان بلدي ومش حاسين..
يقولوا الثورة قتلتنا..
في كل حياتنا شلتنا..
ونسيوا الحاكم ابن العار..
وكاس الظلم اللي دار..
علي كل البرئ فيكي..
علي كل الضمير فيكي..
انا هاصرخ واقول ثورة ..
علي عقول اتملت بالظلم..
وحفرت شكلها بالظلم..
ويتمنوا يعود "عادلي" !
يقولوا لا يوم من العادلي..
ونسيوا الدبح والكرباج..
ونسيوا الكفر والاجهاض..
لمولود الامل فيكي..
لمولود الحياة فيكي..
ومهما هاقول يا مصر انتي..
تكوني اعلي م الكلمات..
وأية حب م الأيات..
واعيش عمري فدي عيونك..
واموت ليكي وانا بصونك..
تعيشي يا مصر حرية..
ولادك ليكي حرية..
وحبك لينا حرية..