عايز تخس ؟؟ هاقولك كلمة خليها حلقة في كرشك

لما الناس كلها عاملة رجيم امال ايه كمية الكروش اللي مالية البلد دي ؟ رجالة بتتدحرج ع الارصفة وستات بتتأرجح من كميات اللحم الابيض المتوسط !
طول عمرهم يقولوا العقل السليم في الجسم السليم انا لا اؤمن بهذه المقولة اصل هيفاء وهبي مش اذكي من بهاء جاهين مثلا .

اللي بيعمل رجيم بيدور علي الجوجل علي كلمة "حرق" طبعا هيطلعله اول حاجة حرق الدهون قبل حرق الغابات وقبل حرق قش الرز وده دليل علي ان الناس كلها في العالم العربي بتدور علي حرق الدهون
ولو بحثت علي الجوجل علي كلمة "نظام" هيطلعلك نظام رجيم قبل حتي نظام حكاوي بتاع الموبايلات ! يعين الناس مهتمة حتي بالرجيم اكتر من الخطوط والموبايلات ومن كل حاجة .

وتبدأ الاصوات تلعب في دماغك كل يوم اول صوت يقولك "يا عم هتمشي اكلك علي جدول ؟ ده الاكل متعة المتع "  وصوت تاني يقولك "يا عم يعني هتوصل لجسم عمرو دياب ده عنده جيم في البيت " !!
والصوت الاشهر في عالم الرجيم "هتتخن تاني هتتخن تاني فمافيش داعي للحرمان ده كله" والصوت الشهير للي مبيعرفوش يخسوا غالبا هيقولك "وماله الكرش ده عز وفخفخة" !!

احنا الشعب الوحيد ع الارض اللي بيفتخر بالأكل مش عارف ليه ..يعني يقولك الواد ده اكيل الواد ده حوووت يا عم ده في العزومات ناار وكأن ده مصدر فخر الظاهر دي عادة من ايام العرب زمان اما كانوا بيحبوا الست التخينة ويتغزلوا فيها في اشعارهم ..دلوقتي الواد الأكيل دي حاجة حلوة وتيجي تقوله والسعرات يقولك علي راي حلمي "الراجل من غير كرش ميسواش قرش" .

احنا اساسا بنقول للطفل نام وهنجيبلك جوزين حمام ..يعني اكل برضه حتي الطفولة مكافأتها عندنا حمام !! ايه يا عم الفجعنة دي ..وكل ام بتجري ورا اطفالها بالشبشب عشان ياكل والغريب ان فعلا كل الاطفال مش بيحبوا الاكل ولكن اول ما يكبروا تلاقي اللهم صلي ع النبي حوت صغير نازل اكل في الاخضر واليابس وتبدأ الاوزان اللي كانت الام خايفة عليها عشان قليلة تتضاعف وتتضاعف لحد ما الواد ياخد في المدرسة لقب غريب شوية "فشلة" او "تختخ" او "كلبظ" .

واحنا صغيرين تفتح بقك يقولك "اوعي القطر رايح فيييين ؟"  والواد يفتح بقه زي العبيط ..القطر ده بيبقي قطر فعلا اما الواد يكبر والقطر هيروح فين يا ست الحاجة غير في الكرش في الاخر وليه اكل قطر اصلا ؟ اذا كنت طفل بتقولولي القطر رايح فين امال اما اكبر هاكل ايه سفينة فضاء ؟ ايه البغولة دي ؟ ده تمارين ع السمنة يعني ؟
ولا ممكن تلاقي ام تانية تقول لابنها لو كلت الطبق كله هاجيبلك شيكولاتة ..اصل العملية ناقصة يعني مكافأة الاكل أكل !!

والغريبة ان الامهات بيشوفوا حتي ان اكل الاطفال مصدر حسد ! مش عارف ايه اللي يخلي حد يحسد حد عشان بياكل كتير ؟ ده بدل ما يقول اللهم احفظنا من الحوت ده ؟

واول ما يكون في عزومة جامدة تلاقي واحد جاي من بعيد زي الخرتيت والاصوات بتناديه "خش يا وحش" كأنه داخل مصارعة في قفص حديدي من ايام الرومان والناس بيشجعوا برة القفص .
وكله بيوسع للوحش اللي هيقسم الفرخة او الديك الرومي وكأنه فتح عكة وياخد نصه في طبقه ويقعد ياكله زي البغل الاسترالي زي ام بيقولوا مش عارف ليه دايما نشتم نقول بغل استرالي !

وطبعا الوحش ده من جواه نفسه يبقي في جسم اصحابه اللي حواليه اللي بيلبسوا اي مقاس وهو بيدخل محلات الاكس لارج والدبل اكس بس انما ميلاقيش حاجة يلبسها .
واللي يغيظك في موضوع الرجيم اما تلاقي واحدة مثلا وزنها 60 وتكلم برنامج وتقول انا تخنت قوي ولازم اخس ساعتها تحس انك درفيل قاعد ع الكنبة اذا كان هي تخينة امال انا ايه ؟؟

اوعي تفتكر ان بجد في تخين مبسوط بتخنه هو بس بيبوهمك بده انما هو بيغلي من جوة ونفسه يخس لو مش عشان منظره يبقي عشان يعرف يلاقي مقاسه ع الاقل يعني ..سيبك من اللي يقولك وماله التخن يعني مش احسن من الحرمان م الاكل لان هو نفسه اصلا عايز يخس بس مش قادر يبطل اكل عشان الوهم المصري اصل الرجيم هيتعبني وهيضعفني ومش هاعرف اكون مصحصح طول اليوم علي اساس ان الفول هو اللي بيخليك مصحصح مش متيس !!

ويبدأ اللي عامل رجيم في ادمان اي برنامج اكل وكأنه بيشوف فيلم ثقافي ..اهو بيعوض بعينه اللي مش قادر ياكله في ايام الرجيم وياحبذا لو فتح قناة فتافيت صديقة المحرومين من الطعام ..القناة اللي فيها وصفات بيعتبرها البعض خيال علمي عشان المكونات العجيبة في بعض الاحيان والطريقة اصلا اللي بيعملوا بيها بشياكة غريبة والبوتاجازات التاتش والرف اللي بيفتح لوحده ..واصلا اي ست في الدنيا لو عملت اكلة في البيت مبتقعدش تحط المكونات قدامها في اطباق صغيرة بالشياكة دي زي برامج الاكل طبعا عشان متبهدلش اطباق كتير انما الكلام ده في البرامج بس انما مبيحصلش في البيوت غالبا كله بيرمي في الحلة وخلاص .


ويبدأ صاحب الرجيم في كتابة اي برنامج تخسيس وخلاص قدامه ويدور ع المشروبات السحرية اللي هتخسسه زي ما النت بيوهم الناس هي بتخسس اه بس علي مدي بعيد قوي وبكميات كتير انما الناس فاكرة انها تشرب كوباية شاي اخضر تقول انا خسيت بسبب الكلام اللي ع النت في موضوع التخسيس.
وتحس فجاة انك ابن الطبيعة او طرزان كل اكلك خضروات وكل شربك شاي اخضر وزنجبيل وحاجات غريبة حتي الكابتشينو ممنوع ايه الحياة دي يا عم ؟
المفروض حتي برنامج توفيق عكاشة ممنوع لانه بيخلي الواحد ياكل زي البطة طول الحلقة اللي ملهاش اي تلاتين لازمة !

وبمتابعة البرامج بتاعة الرجيم عبر القنوات كلها ودخولك المنتديات البناتي واحساسك انك "سوسن" طول الوقت بتحس باحساس انك هفأ قوي..اما تلاقي في المنتدي اللي انت قاعد تقراه كلام علي واحدة بتخس عشان جوزها ..ومش بعيد تغير اسمك في المنتدي فعلا لسوسن وتبدأ تشتري زهرة الخليج كل اسبوع !

وكل البرامج معظم اللي بيتصلوا بنات وستات وتلاقي نوعيات معينة بتتكلم وانماط معينة في معظم الحلقات وحتي الراجل اللي بيتصل هتلاقي عشان مراته مش عشانه وكأن كل رجالة مصر راضية بالكرش يا اما النوع التاني علي النقيض بتوع الجيم طول الاسبوع والمجانص والترابيس ..اصلا كلمة مجانص وترابيس دي تحسسك انك بتكلم حيطة خايف تلمسه تلاقي صدره بيلعب لوحده .

والدجل بقي يبدأ يكتر ويقولك خد الاسورة دي عشان تصحي تلاقي نفسك خاسس وخد الحباية دي وكل زي الطور عادي جدا وأي كلام بتاع الاعلانات اللي بعض الناس بتمشي وراها عشان متبطلش أكل قال يعني الاسورة هتخسسك وانت نايم لا سحر ولا شعوذة .
طبعا ده غير حزام السونة وحزام العبط وكل الحاجات اللي تقعد حاططها حوالين الكرش بدون اي جدوي واحد قاعد ياكل ولابس حزام ومستني انه يخس بالذمة ده مش عبط مزدوج يعني ؟
والشاي الصيني بقي اللي هيخلي جسمك صيني ويجيبلك في الاعلان واحدة معضمة قال يعني الشاي خلاها كده مش خلقة ربنا هي مولودة عضمة اساسا .



وشوف بقي انوع الناس اللي بيتصلوا علي برامج الرجيم هيكونوا نوع من دول :



1-البنت اللي بتتصل بدون سبب :


المتصلة : الو
الدكتور : ايوه
المتصلة : دكتور انا جسمي حلو بس..
الدكتور :اوببة وانا تيييييييييييت
المتصلة: انت مش متربي علي فكرة


دي بتكون متصلة بدون سبب معين وكانها بتشمت في التخان يعني او بتغيظهم وبتكون وزنها مثالي بس عايزة برنامج رجيم عشان تنزل نص كيلو كمان يا حرااام وبيكون الدكتور في نفسه عايز يقولها كده فعلا .




2- ابن التخينة :

المتصلة : الو يا دكتور ماما تخينة
الدكتور : ههه يا فشلة يا فشلة
المتصلة : علي فكرة دي كلمة قديمة قوي فشلة دي
الدكتور : طيب ماما فين ؟
المتصلة: ماما بتاكل دلوقتي قدام الحلقة

وده بيتصل غالبا لان مامته لسه قاعدة تاكل حتي قدام برنامج الرجيم مش قادرة تبطل ولو ساعة وطبعا الدكتور اول ما يسمع كلمة ماما تخينة اللي بتتقال كتير في البرامج بيبقي عايز يقوله يا ابن التخينة لان مش معقول دي دخلة مكالمة اساسا من غير سلام حتي .



3- ما تفهمونيش غلط :

المتصل: يا دكتور باكل بليل كتير وتخنت
الدكتور : ويجيلك هيجان ؟
المتصل : ساعات يا دكتور حسب البيت بقي وانت عارف
الدكتور : انا عارف ايه يا عم انا قصدي نهجان  يعني كرشة نفس كده وبتنهج ؟
المتصل: احم ..اه فهمت حاجة تانية اسف يا دكتور اه بيجيلي نهجان انا سمعتها كلمة تانية




4- النوع اللي بيهجم علطول :


المتصل : يا دكتور انا اسف انا مش مقتنع بكلامك ولا برنامج الرجيم
الدكتور: ليه يا عمنا بس ؟
المتصل : يا دكتور حضرتك بكرش انا اسف يعني شوف نفسك في المراية حضرتك عملاق فعلا ومش معقول هتقدر تخسسني وكرشك بالحجم ده
الدكتور: يا سيدي ما دكتور الامراض الصدرية بيدخن عادي
المتصل: معلش يا دكتور بس انت هاجم عليا بكرشك وبتقولي خس مش هاقتنع زي ممدوح فرج ما بيقولي خس
الدكتور: خلاص يا سيدي روح شوفلك مكان تاني تخس منه وسيبك من كرشي



5- مريض بزيادة :

المتصل: انا والدي تعبان يا دكتور
الدكتور: خير عنده ايه؟
المتصل: هو عنده الضغط
الدكتور: ووزنه عامل ايه ؟
المتصل: لا هو وزنه 160
الدكتور: لا بسيطة ان شاء الله
المتصل: لا يا دكتور ما هو عنده القلب كمان والسكر
الدكتور: يا ساتر يارب
المتصل: وكان جاله جلطة من فترة قصيرة ده غير فيروس سي
الدكتور: اقفل يا ابني ده برنامج رجيم مش حانوتي

ههههههه فعلا الدكتور اما يسمع الكلام ده يبقي عايز يقوله الراجل يروح يموت احسن هو عايز يخس ليه اساسا ؟ وده بيحصل في برامج الرجيم انك تلاقي واحد بيشتكي من كل الامراض وتلاقيه عايز يخس يا عم شوف الأولويات وتعالي خس ده انت بتودع اساسا .

اغرب حاجة كمان ان في واحد في احدي القنوات كل ما حد يكلمه يقوله قبل ما اعرف وزنك وطولك انت برج ايه الاول !! يقوله مثلا انا برج الميزان يقوله اااه علشان كده مبتعرفش تخس كويس ولا تمشي علي الرجيم !
ده علي كده برج الحوت مستحيل يخس بقي ! ايه الكلام المريخي ده ؟

يعني الاصعب من الرجيم برامج الرجيم نفسها الفرجة عليها كتير تجيبلك الخفيف والمشكلة ان البرامج الصحية كترت في كل القنوات وبقت مصدر للهري زي الجرايد الصفرا بالظبط .
حاول تخس ولو معرفتش قول لنفسك  يا اخي "الكرش هيبة" برضه وخلاص.