ربع ثائر ربع خايف ربع عادي ربع عاشق

كل واحد فينا جواه حلم نجاح الثورة ..جواه "ثائر صحيح"..لكن ربع الثائر الصحيح عاشق وربعه عادي وربعه خايف وربعه عاشق..بيحلم بنجاح الثورة ..وبيحلم بمصر جديدة بس يبقي دايما ربعه خايف علي الثورة ودايما خايف علي بلده لسبب او من غير سبب حتي..ودايما تغني في قلبه اشعار نجم وحداد ويعيش جواه الأمل ويفضل يحلم بمصر اللي جاية..تعيشي يا مصر حرية.






بين الهوية وانتمائي والهوي ..
عاشق ترابك بس خايف مني انا..
انا ماشي بحبي خطوتي كل الجسور..
ممكن اخاف ممكن أهيم ممكن أثور..
وعشان اقولك ان انا ثائر صحيح..
واقف غضنفر ضد ظلمهم القبيح..
لازم يكون فيا اربعة ..
شخصيتي بين الأربعة ..
ثورة فصولي الأربعة..
الربع عاشق قلبه ليكي عود بخور..
سكره في حبك كاس غرام دايما يدور..
والربع عادي شايفها حلوة بالمرار..
مهما عصاها يغني ليها ليل نهار..
والربع خايف يتنفض وكأنه زار..
يهرب ويبكي يحس دمعه في كل دار..
والربع ثائر قلبه مولود من ياقوت..
خارج يصحي الحق في كل البيوت..
جايز بكلمة يقولهم يلا ارفضوا..
ده الظلم شين مرة وميت مرة السكوت..
بين الهوية وانتمائي والهوي
عاشقك يا مصر بس قولت لنفسي أنا :
"انا ولا عندي طبع خبيث..
ولا ف سياستي م المهاويس..
ساعات أرضي وأقول عادي..
وأقول اهو خوف علي بلادي..
وساعات تتكسر البراويز..
ساعات بخرج لبرة الدار..
وأخاف من نشرة الاخبار..
ساعات طبعي يكون مجنون..
وأحس اني سيف مسنون..
ساعات فيكي أكون راهب..
ساعات من حبك انا تايب..
ساعات اشبك في حدوة خيل..
يشيل نسرك في وسط السيل..
واضمه لحضن ألوانك..
وأقول نسرك يعليكي..
جناحه يقوم ويحميكي..
لأني كنت أنا سبوعك..
وشبعي وجوعي في ضلوعك..
ورفعة راسي من خيرك..
يا مصر الثورة دي كروان..
تنادي جوانا الإنسان..
يقوم انجيل يقوم قرأن..
وينزل من ميدان لميدان..
يا مصر الثورة دي توبة..
يا ارض طيبة والنوبة..
وصافية زي لون نيلك..
وبتكمل مواويلك..
وبتقول للضباع ترحل..
وبتقول للديابة تعود..
انا المصري ومش هارحل..
والحن موقفي ع العود..
انا مش جثة تنهشها..
ودمي يجري في انيابك..
ولا عضامي تقرقشها..
انا ميدانك انا حسابك..
واقولها الأه واعليها..
وازعق في اللي راميها..
وكل حاميها حراميها..
وااااه يا نظام فاكرها ماخور..
كرامتك عزتك بتخور..
ضميرك جلدة التعبان..
وسمك أنك المأجور..
وااااه يا حامي ثورتنا..
وليه بتهين في عزتنا..
بيادتك ليه علي بدني..
لابس رسمي لابس مدني..
وليه بتقول وما بتوفيش..
دي ثورة ولا ايه شيش بيش ؟
وااااه يا بتوع بابا حسني..
وضربة زفت جوية..
كانه ضربها في قلوبكوا..
وصبحت هي معمية..
كانه ضربها علي بلدي..
فتح مقلب لحرامية ..
واااااه يا محاكمة موقوفة..
وفي سكينة عايزة دليل..
وشوفنا الدم ع المنديل..
وقالوا نتيجة معروفة..
وااااه يا عصابة ولادة..
ولكن مصر ولادة..
مسيرها تلاقي مرة رئيس..
وميكونشي في قصره خسيس..
وميكونش بيعبد غاز..
قراره الحسم والإنجاز..
يكون شرعه في ايد شعبه..
وشعبه الشرع والتشريع..
شراعه لو في يوم هيضيع..
وهيعدي مع بلده..
وااااه يا ثورة مقهورة..
ولعبوا كتير عليها قمار..
وضاعوا شبابها في الصورة..
ركبها الكل م الاوكار..
واااه يا شهيد يضيع دمه..
وايد الحق ملوية..
وهب روحه وكان حلمه..
يشوف النهضة مصرية..
واااه يا "حرارة" الهمة..
عنيه الطاقة والملكوت..
فقد بصره لكن لسه..
هيبقي الحلم عالي صوت..
وااااه يا كرامة معصوبة..
واااه يا ثورة منهوبة..
وااااه يا دولة مقلوبة..
هتبقي يا مصر في دارك..
ويبقي الشعب ثوارك..
تعيشي يا مصر حرية..
وغني يا مصر حرية..
ومهما الربع جوايا..
يخاف منك يخاف ليكي..
هيبقي ربعي انا التاني..
وهابقي اقولها بكياني..
تعيشي يا مصر حرية..
قلوبنا تعيشها أغنية..