ايوه اللي في الصورة بيكهام في اعلان لجيليت ..هو بيكهام بيحلق دقنه ليه اصلا ؟هو في اي حالة هيفضل مز.
مافيش غير اعلان سنيكرز اللي بيقولك ابني بلدك والباقي كله بيقولك "روح مز او ظبط يا برنس" !
الاعلانات المصرية غريبة جدا في انها كلها تحس انها بتتكلم عن نفس الموضوع وهو التظبيط ..وكأن كل السلع بتدور حول علاقة الراجل بالست فقط لا غير يعني مينفعش احتاج السلعة دي عشان انا عايزها ولكن عشان ابقي كويس قدام المزة او ان المزة تبقي اجمد قدامي .
ولو الاعلان مش عن التظبيط يبقي هيقولك في نهايته رسالة غريبة او قيمة غريبة برضه زي مثلا اعلان "جدع يا خالد" اللي تحس انه بيقولك خد العرض ده وافشر يلا براحتك وهول القصة ع الاخر ..
يجيبوا ناس عمالة تهول في قصة صغيرة ويزودوا التحابيش المصرية كالعادة وفي الاخر يقولك احكي حكايتك وهنديك عرض كذا !
الاعلان التاني بتاع تايجر "اكبر وسيطر" بيدي رسالة للاطفال انهم اول ما يكبروا لازم يتحرروا بقي من تحكم الام والاب ده وميسمعوش كلامهم لدرجة ان طفل بيسأل بعد الاعلان "هو لسه صغير عشان يسمع كلام مامته ؟ " !! يعني هو اعلان لذيذ وكل حاجة بس ساعات الاطفال بتترجم بطريقتها الخاصة .
شوف بقي اعلانات الموبايل كلها يا معلم معمولة فقط للتظبيط وكل العروض بعد الساعة 12 بليل اكيد مش عشان ابويا واحد يقولي عشان الخاطبين يا اخي او المتجوزين ! اقوله المتجوزين ؟؟ لا شكلك فاهم الجواز غلط هو ممكن للمخطوبين بس ليه يعني لازم يتكلموا بعد 12 ما اليوم طويل جدا يعني معرفش مين اللي خلي دايما المخطوبين كل كلامهم بعد 12 الا شركات خطوط الموبايل كلها هي اللي زرعت المبدأ ده لان كل عروضها يقولك من 12 لحد الصبح ..اي عرض حلو هتلاقيه في المواعيد دي بس انما في عز الضهر يقولك لا يا عم ده كلام شغل وبتاع يعني مش اتنين هيمزوا بلاش عروض بقي !
اما قيمة التثبيت بالجيل فدي كترت قوي بقي في كل اعلانات الجيل والكريمات وبقت كل فكرة الاعلان ان واحدة تيجي من وراك عايزة تحسس علي شعرك وكأنها عمرها ما شافت رجالة او انت الراجل الوحيد اللي فاضل علي الكوكب ومهم جدا للحفاظ علي بقاء البشرية ..او يخلي في الاعلان السكرتيرة ترمي الورق فجأة اول ما تشوف شعرك وده "الحب من اول لحسة جيل" .
وكل الاعلانات بدأت تقلد بعض في موضوع الرجولة ده زي بيريل ظهر برضه كريم يقولك "للرجالة بس" مش للفرافير ..مش عارف ازاي الكريم بتاع الشعر للرجالة بس امال الفرافير يحطوا ايه كريم ازالة شعر ؟؟
وبرضه اعلان كريم او جيل يقولك فن التثبيت ! وكأن الشعر فجأة بقي اهم حاجة في الراجل وان كل هدف الراجل من ساعة ما يخرج من بيته مش لقمة العيش ولكن التثبيت ..احنا عايشين عشان نثبت وكل يوم نثبت وكل ساعة نثبت في نظر شركات الكريمات والجيل وكل لحسة كريم بتساعدك علي التثبيت اكتر واكتر زي الاعلانات بتاعة مش مهم البلاط انا جبت التلاجة دلوقتي مش مهم الشقة انا جبت الكريم والجيل .
واعلانات المعجون ..سواء معجون حلاقة او معجون اسنان الاتنين ماشيين علي نفس المبدأ بالظبط ..هتغسل سنانك عشان حاجة واحدة بس ولسبب واحد بس انك اما تبقي في المترو والمترو يتهز جامد وواحدة تقع وانت تلحقها هتشم بقك فتلاقيك غاسل سنانك فيظهر قلب كبير في المترو وهتحبك علطول من نضافة سنانك !! هتحبك عشان نضافة سنانك علي اساس انها ابلة الناظرة وانت عيل في حضانة ناقص بالمرة تفتش علي نضافة ضوافرك في الاعلان اللي بعده !
وواحدة لازم تخبط فيك فيقع منها حاجة وخلاص وتوطي تجيبوها مع بعض فتشوف سنانك بتبرق وتطلع نجمة كده غريبة فتدوب في هواك ! ايه الهلس ده ؟
انما معجون الحلاقة كله معروف لازم تحلق دقنك وانت خالع تقريبا والافضل يكون ملط مش عارف هو بيحلق ايه بالظبط ده بيحلق دقنه يا عم والست المزة جاية من ورا برضه وتشوف المعجون علي دقنه تقول "يا داهية دقي انا مش قادرة واااو معجووون " مش عارف ايه اللي بيخليها تجري ع المعجون وهي بقميص النوم وسؤال ساذج معلش يا تري الست دي دايما مراته ولا المعجون جابها من الشارع !
طبعا اعلانات البرفان معروف ان كلها او فكرة الاعلان هتكون فقط "السكس" لدرجة ان الواحد بيشك في نفسه وهو داخل يشتري برفان مش اسبراي اذا كان اسبراي خفيف بيخلي كل الحريم يجروا وراك امال البرفان بقي هيعمل ايه ؟ اكيد البعض بيفكر كده وهو داخل المحل ..هو مافيش حاجة ليك وللوطن يعني ؟؟ يعني كل حاجة بشتريها عشان هاظبط او هاثبت ؟؟ طب واللي مالوش في الحريم يعمل ايه ؟ يشتري هابي ميل وياكلها وخلاص ؟ ولا دي كمان هتظبط ؟
ودايما يجيبوا جسم ابن كلب في الاعلان بيترش عليه البرفان ونجم عالمي وتيجي بعد كده تبخه انت علي كرشك تبقي عايز ترمي العبوة في الشارع ولو وقفت علي شعرك زي ما بيقولوا مش هتلاقي واحدة بتجري في الشارع ولا حتي في الميكروباص ده اعلان يا ابني فووووق .
وليا سؤال مهم قوي قوي طالما الحكاية كده فهل الراجل اللي بيسرح بشنطة في الاتوبيسات يقدر يظبط بقوة ؟ اصله معاه في الشنطة كل حاجة بتظبط المعجون والجيل ومعجون الحلاقة وكل حاجة في الاعلانات المصرية وتلاقي معاه اسبراي خفيف كمان اكس ولا حاجة .
واعلانات الصابون بترتبط ارتباط وثيق باعلانات السخانات الاتنين فيهم كمية قلع غير طبيعية وكأن عشان نعرف ايه هو استخدام الصابونة وكأنهم بيقولولنا علي فكرة الصابونة بتستحمي بيها بالطريقة دي ناقص يوزعوا مع الصابون كتالوج..مع ان الصابون ليه استخدامات كتير قوي غير الموضوع ده يعني ..وتخرج واحدة من الحمام تلاقي واحد بيشمها ويخلص الاعلان ..وكان في نهاية الاعلان هيقولولنا "هو نهارنا فل ولا حاجة ؟ " !
والسخان برضه يقولولنا ده الجهاز اللي بتستخدموه لتسخين المية عشان تستحموا وكأننا من زحل تقريبا ويعملوا سخانات بالريموت من كتر الرفاهية يعني ..وتلاقي الراجل في الاعلان بيستحمي دايما قبل ما ينزل شغله مع ان ده شئ عجيب قوي هي الناس دي مش عايشة في مصر ولا ايه ؟
هو الواحد ممكن يستحمي اما يرجع ميت مرة اه انما قبل ما ينزل ليه هو هيصحي الساعة 4 الفجر يستحمي وبعدين ينزل يلم تراب البلد كلها عليه ؟؟ هو ممكن الحكاية دي في باريس ماشي انما هنا مين يقدر يستحمي الصبح ده هيرجع لونه اسود فحمي !
يا راجل ده حتي اعلان الجبنة فيه تظبيط !! وصلت للجبنة ..الواد الطفل يبقي قاعد ياكل جبنة عشان الحتة اللي معاه تاخد حتة وتقعد معاه شوية !
واعلانات السمنة عشان اكلك يطلع الشعاع السحري بتاع الاعلان ويجيب عريس او عشان جوزك يملي الكرش .
واعلانات المشروبات تلاقي واحدة فجاة سابت اللي معاها عشان تروح للي معاه بيبسي مثلا !! ايه الدناوة دي هي جاية منين يعني ؟
هو مافيش عندكم اعلانات للشباب العازب ؟؟ ولا كله للشباب المظبط والشباب المتجوز ؟ يعني اعملوا شعارات كده من غير ما تقولوا "ثبت" او "ظبط" او الحكاية دي..اصل الواحد مش عايز يثبت ولا يظبط مافيش حل تاني عشان اخد المنتج ولا اروح اشتري من حتة تانية ؟
Posts
No comments:
Post a Comment