بلطجة ع الطريق ؟؟ متتخضش قوي البلطجة في كل حتة يعني مش شرط البلطجي يبقي ملثم مثلا وماسك رشاش فيه بلطجية من اول الانترنت لحد مطاريد الجبل يعني علي كل لون..
شوف اي فيديو ع النت وشوف التعليقات هتلاقي ان "البلطجة كيبورد مش هز كتاف" ..علي الصفحات وع الفيس بوك وفي كل مكان ..
وفي مظاهر كتير للبلطجة ع النت زي مثلا تدخل صفحة تلاقي اعلان كبييير طالع في وشك ولازم تدوس عليه عافية او متلاقيش حتي العلامة اللي بتقفله ساعات لانهم بيصغروها او بيخفوها ع الاخر عشان تدورس غصب عنك ع الاعلان..
او تخش موقع تلاقي ميت رسالة طلعالك "شرفت الموقع" "خش اعمل الاستفتاء" ومليون رسالة والضغط اجباري علي زرار "اوك"
ولو عايز تحمل فيلم هيدخلك علي ميت لينك عشان يكسب من وراك قد كده ..حتي ع الفيديو نفسه هيطلعلك زرار "يلا اشترك في قناتي" او حاجة بالمعني ده ويخليك تدوس عافية بدون اختيار..
وفيه نوعية اعلانات اكتر بلطجة بقي اللي بتكون بتتطلع بطول الصفحة كلها في وشك ولاهتدوس يعني هتدوس.
وفي التليفزيون تحس ان فيه نوع من البلطجة الاعلامية في كل القنوات والخناقات والشتايم كل يوم يترفع فيديو جديد واسلوب فرش الملاية بقي في كل برامج التليفزيون ..وبالذات اما تسمع كلمة "طيب ثانية واحدة معانا مداخلة من الاستاذ فلان عشان يرد عليك" طبعا هو مش هيرد هو هيردح والمذيعة تفرح وتقول لنفسها "هيييه شتايم اخيرا هيطلعلي فيديو ع اليوتيوب زغرطي يا امة".
ومن انواع البلطجة كمان ان القناة متكملش الفقرة يعني مثلا يقولك فريق كذا فاز اربعة صفر ويجيبلك جون كده ويمشي كانه بيقولك كفاية عليك كده انت هتشوف الاربع اجوان ولا ايه يا حبيبي !!
او يقطعوا الفيلم في اخر عشر دقايق وكانه بيقولك قوم نام بقي مش لازم اخر حتة دي يعني .
وفيه بلطجة ع الفيس بوك ان واحد يبعتلك 65 فريند ريكويست وانت بتقول لأ ومافيش فايدة ..65 وكل شوية يشيل ويكرر تاني لدرجة ان عباس الضو لو كان ع الفيس بوك كان هيقوله لااااا.
وبلطجة التليفونات كل شوية حد يتكلم يقول شركة كذا وعايز اقولك عرضنا علي كرت تخفيض اقولها طب كمان شوية وافتكر انها هتزهق تتكلم تاني كمان شوية اقول مش عايز تقول "ليه يا افندم طيب اسمع كل العرض" تقولها "ارغي يا ست الامورة" وبعد ما تخلص تقول "مش عااايز" تقولك "طيب ايه المشكلة في العرض يا افندم" تحس انها حافظة ومعندهاش فكرة عن ان الواحد ممكن يكون معندوش رغبة في الموضوع اساسا انما لازم ترغي لان رغيها بفلوس.
وطبعا بلطجة شركات الانترنت يا عيني عليها بلطجة خدمة عملاء ودعم فني وكل الانواع هتلاقيها في فنون البلطجة "النت فعلا فيه مشكلة يا افندم ومافيش وقت معين لاصلاحه حاليا" !! طيب ما انا كده مش شايف الفرق بينك وبين اي ملثم بيسرق بنك !! ما انت بلطجي في الرد بتاعك اكتر منه يمكن.
والبلطجة اللي الناس خايفة منها حاجة مش جديدة عند بعض الناس يعني هو تاخير الورق في الهيئات الحكومية وتطليع عين ام الناس مش بلطجة ؟؟ والرشاوي مش بلطجة ؟؟ طيب امال ايه اللي ظاهرة جديدة يا عم الحاج ده احنا مدعوكين بلطجة بقالنا سنين طويلة بس من غير رشاش يعني ده الفرق .
حتي مجلس الشعب انتخبنا الاعضاء ومحصلش بلطجة اتاري البلطجة جوة يا عم الحاج ..البلطجة جوة المجلس نفسه من خناقات وغيره ونهدي الموضوع بحباية هولز ولا حاجة ولا واحد يقوم يدن احسن ونسيب المجلس خالص.
والبلطجة بتاعة الناس اللي بتمسح الازاز بالعافية واحد منهم يقولك "ما تجيب سيجارة" تقوله مش معايا يقولك "طيب هات جنيه" !! هو عايز يقول هات اي حاجة وخلاص يعني بدل ما اشقك م الاخر..
ده غير السايس بقي وسواق المبكروباصات "مستر اربعات ورا" وبلطجة بعض الستات في الطوابير علي اساس انك لازم توسع "احترس المزة ترجع الي الخلف" !
عايزين كمان بلطجة ؟؟ خد دي
بلطجة الاعمدة في الجرايد اللي بقت كلها شتيمة مش اسلوب مقال اصلا ولا بتيجي ع الواحد بفايدة هي عبارة عن حرب شوارع بس الشوارع بتبقي مكسورة فيها العواميد بس دي بقي حرب عواميد من غير شوارع .
بلطجة الحزب الحاكم السابق وبلطجة المعارضة كمان.
بلطجة واحد عايز يركن في مكانك ويقولك انا شفته قبلك !
بلطجة ع التويتر وشتيمة في ام الناس كلها بلا استثناء واحد..عايز اشوف شخص مبيتشتمش في مصر اتحدي تلاقي واحد بس متشتمش قبل كده !
بلطجة الجرايد الصفرا في عناوينها الكبيرة اللي كلها اي كلام فاضي معقول.
ولو عايز تعرف يعني ايه اختلاف في الرأي عند العرب شوف الاتجاه المعاكس مثلا او اي برنامج فيه طرفين عرب..فضيحة بكل المقاييس ..ميعرفوش اساسيات ادب الحوار اساسا ..كله بيبلطج.
والفرق بين البلطجي وصاحب شركة النت ان البلطجي بيطلب فدية انما بتوع شركات الانترنت بياخدوا منك الفدية بالتقسيط علي صورة اشتراك شهري !
بس المشكلة ازاي الواحد يتفاوض مع عمو البلطجي ؟؟ يعني تقدر تضربه ؟؟ طيب ايه نوع السلاح اللي معاه ؟؟ وازاي تقدر توقفه بابسط اسلوب ؟؟
اقولك الطرق الفعالة للتعامل مع البلطجية بأسلوب عصري :
أولا : سيبك من موضوع العصاية الكهربا والكلام الفاضي ده لانه مبياكلش مع جسم البلطجي اللي نحس خلاص وتلاقيه مضروب 600 رصاصة في جسمه قبل كده اساسا ولا يفرق معاه حبة كهربا ده تلاقيه مقرقش صاعقين كهربا قبل ما يجيلك انما ممكن تفاجئه بمسدس مية مثلا وتصعب عليه ويسيبك لانه هيحس انك "ترولي سيس " !
ثانيا : اوعي تكلم البلطجي عن ظروفه ونشأته الاجتماعية او تقوله "ايه اللي خلاك بلطجي" احنا مش في فيلم رانديفو ..ولا هتعملي برنامج الطريق الصح ع الطريق هيعمل معاك الصح علطول .
ثالثا : متحاولش تكلمه باسلوب محترم يعني مينفعش تقول لبلطجي ماسك شومة مثلا "نايس قوي الشومة دي يا مان " !
رابعا : حاول تتوه البلطجي في الحوار يعني قوله "مسدسك محشي كام طلقة لو قولتلي هاديك كل اللي معايا" او تقوله "شومتك فيها كام مسمار قولي من غير ما تبص" ! علي اساس اننا في فوازير ع الدائري.
خامسا : متحاولش تكون مستفز يعني مثلا متقولوش "ابعد عني يا عشوائي" او "اوعي تلمسني بايدك الملوثة دي اللي مش عليها ديتول" لانه هيخلي ليلتك مش ديتول دي هتبقي خل كده .
سادسا : متحاولش تتأثر بالأفلام قوي وتقوله "علي فكرة انا من حقي اعمل تليفون" انت فاكر نفسك في قسم !! ناقص تقوله "معاك اذن بلطجة ؟؟" .
سابعا : حاول تتفاوض معاه باسلوب كويس يعني مثلا تقوله "عايز فلوس ولا عربية حضرتك ياريت تسيبلي العربية احنا في حتة مقطوعة وكده هيطلعلي بلطجية" !! علي اساس ان هو ايه قدامك "بشمهندس مثلا !!
ثامنا : لو طلعلك تلاتة بلطجية حال توقعهم في بعض زي الافلام يعني قول لاصغرهم "طبعا الكبير ده اللي هياخد الليلة كلها وانت مجرد مساعد غلبان" !
تاسعا : متحاولش تستعطفه بأسلوب سيس زيادة عن اللزوم يعني مينفعش تبقي واقف شحط كده وتقوله "ايه مالكش اخوات بلاستيك ؟ "
عاشرا : متعملش حركة غبية وتوضح ان المسدس بتاعك لعبة وتقوله بغباء "علي فكرة انا هاضربك بمسدس الصوت ده وهابهدلك" !
حادي عشر : حاول تتكلم معاه باللغة بتاعته يعني قوله مثلا "ان عشت هاذلكم وان مت الله يسهلكم" او "ساعة الغلط بطرطش زلط" او اي حاجة من الهجص ده يمكن يحس انك معفن وابن كار .
ثاني عشر : حاول تتدعي الجنون وقوله "حضرتك بلطجي فعلا؟ ولا دي الكاميرا الخفية ؟ "
ثالث عشر : بص للارض واترعش واعمل نفسك ساحر قوله "علي فكرة لعنتي هتحل عليك لو خدت العربية دي شرررم بررررم "
رابع عشر : لو كانوا كتير اديهم المفتاح واطلع اجري علطول ومتحاولش تضرب الكبير بتاعهم لانهم هيطلعولك كتير بعد كده
خامس عشر : اتحداه في دور لعب زي مثلا بوكر او اي لعبة عصابات وقوله هنلعب ع العربية !
سادس عشر : اعمل زي احمد السقا في فيلم تيتو وقوله "انا هانقذك قبل ما تكبر والوساخة تكبر معاك"
سابع عشر : اعمل نفسك عارفه وقوله "انت اخر واحد كنت متوقع انك تعمل حاجة زي دي "
ثامن عشر : اعمل نفسك شيخ وقوله "انا كنت رايح اصلي تعالي معايا يا ابني للطريق القويم"
تاسع عشر : قوله "انت يا ابني ضحية 30 سنة فساد وعيب تعمل كده بعد الثورة"
عشرون : لو قالك هات المزة اللي معاك قوله "مزة ايه حضرتك دي ابن عمي وعامل عملية تحويل لو عايزه خده" !
حادي وعشرون : اعمل زي الافلام وبصله بثقة وقوله "مش هتلحق تهرب المكان كله متراقب انت متعرفش انا مين "
ثاني وعشرون : قوله "اخيرا لقيت واحد زيك ارجوك علمني البلطجة ارجوك"
ثالث وعشرون : اعمل نفسك زعيم عصابة وقوله "سيبك من العمليات الصغيرة دي انا عندي ليك عملية كبيرة قوي هتخليك فوق"
رابع وعشرون : اما البلطجي يجري بعربيتك متاخدش تاكسي وتقوله "بسرعة يا اسطي ورا البلطجي ده" لان التاكسي هيقولك كلام قبيح
ودي الطريقة السحرية للتعامل مع البلطجية ..والبلطجة أدب مش هز كتاف !
Posts
1 comment:
ههههههه جامد جدااا
Post a Comment