عميل رقم 637 يتوجه الي شباك رقم 12 ..
اه ممكن تسمع الجملة دي بعد انتظار طويل في اي بنك في مصر الغريبة ان الارقام دي معمولة عشان النظام وكده بس للاسف البطئ بيخلي الناس تنتظر اكتر من ساعة عشان يعدي خمسين رقم مثلا وياسلام بقي لو قدامك متين رقم قبلك يبقي عيش يابرنس وحاول تتسلي بقي في القعدة الطويلة دي وياحبذا لو خدت معاك حد لانك هتقعد لوحدك كتير قوي تشوف عادات المصريين في الانتظار .
ايوه اكتر مكان ممكن تلاحظ فيه عادات الشعب المصري في انتظار حاجة او طابور مثلا هو البنك او بعض المؤسسات التانية ..بتلاقي كل الانماط حواليك في البنك وكل الانواع من البشر.
هتلاقي الراجل اللي بيراقب من بعيد قوي اما يلاقي رقم بيتنده عليه وما يقومش يقول اما اروح استهبل واخد الدور ده ما هو كده كده صاحبه مش موجود ولكن الراجل يحرجه ويقوله فين الرقم بتاعك يقوله اه ده وقع مني !
طبعا هتزهق جدا من الانتظار وهتقوم تجيب جرنان مثلا او تشوف حاجة ع الموبايل ولكن هنا بتشتغل فقرة "اخترنا لك" علطول اول ما تفتح صفحة الجرنان تلاقي عشرة بيبصوا معاك في نفس الصفحة وكل ما تقلب يبصوا الناحية التانية ! وياسلام بقي لو قلبت علي صفحة الرياضة هتلاقي كل التعليقات حواليك عن الاهلي والزمالك وكأن كل الناس عينها في الصفحة مش عارف ليه ده مجرد جرنان يعني !
وساعات تلاقي الراجل الرخم اللي يقولك ممكن الصفحة الاخيرة ؟ وواحد تاني ياخد صفحة الاقتصاد او يقولك استني اما اشوف الحتة دي متقلبش ثانية واحدة وكأنك جبت الجرنان للشعب كله او دي فقرة تسالي البنك !
موضوع الجرنان ده هتلاقيه في اي حتة في تاكسي في ميكروباص في بنك في هيئة حكومية في اي مكان كل ما تفتح جرنان بتلاقي عيون الناس كلها لزقت فيه علطول وكأنك انت المنقذ بتاع ميلودي يتحدي الملل .
هتلاقي دايما الراجل الغريب في الانتظار برضه حسب تصرفه يعني مثلا اللي يقعد يتأمل في شبشبه طول فترة انتظار دوره او واحد تاني بيشيل طاقية من علي راسه يقعد يبص فيها وتبقي عايز تقوله "بتدور علي ايه يا حاج في الطاقية ؟ هتطلع أرنب وتعمل ساحر ولا ايه ؟ " !!
بس بتاع الشبشب ده غريب جدا يقعد يمد رجله لقدام ويبص لجمال صوابع رجليه تقريبا مش عارف بيبص علي ايه بدقة اوي كده وواحد تاني ممكن فجأة يرفع الجلابية وكأنه هيقوم يجري اهو او حد هيهاجمه وهياخد ديله في سنانه زي ما بيقولوا .
مرة قعدت جنب واحد غريب فعلا في البنك كل ما واحد يدخل بشنطة او صندوق مثلا وشكله باشا كده والشنطة مليانة فلوس يقول "اللله اكبر ياااااا" مش عارف ايه معني كده بس شكل المشهد ده بيعذبه قوي او يمكن كان مليونير زمان وفلس معرفش بس طريقة غريبة وبيقولها بصوت عالي قوي .
والراجل اللي زهقان من الانتظار كل ما يعدي رقم يقول "تؤ تؤ" طيب ليه يا حاج ده رقم عدي يعني دورك بيقرب المفروض تتبسط ! هو شكله عايز يقعد مش عايز دوره يجي اصلا شكله فاضي وعايز يبلط ومستريح علي الكرسي .
واحدة برضه بتصرفات غريبة عمالة تبوس ابنها النونو في بقه وده شئ مفهوم للبيبي في اي مكان بس مش في وسط امة محمد في البنك يعني ييجي شابين يقولوا لبعض "بص يلا دي بتبوسوا في بقه" يقولوا "يا ابن المريضة ده بيبي" ويفضل الحوار شغال والمشهد مسخرة وهي بتفقع كل بوسة وصوتها عالي طول ما انت قاعد سامع "موووواه" محبكتش بوس يعني هنا وده مش مكان عواطف اساسا ده مكان خنيق جدا وكل الناس مستنية وزهقانة .
أغرب حاجة في البنوك المصرية ومش ممكن تلاقيها في العالم كله هو انك ساعات تلاقي بياع متسلل جوة البنك ! تلاقي واحد بيبيع فول سوداني في وسط الزحمة ودي شوفتها كتير لانه بيكون دخل في يوم صرف معاش مثلا او كده فبيكون مش باين في الدخول اساسا لان مصر كلها محشورة في البنك فمن اسوأ الحاجات الي ممكن تشوفها انك تكون في مؤسسة مالية وتسمع جملة "سوداني سخن" !!
والاغرب منها انك تسمع واحد بيقوله "خد يا ريس والنبي " !! ولو واحد اعترض علي المشهد طبعا هتبان حنية الشعب المصري وواحد هيقوله "يا اخي سيبه يلقط عيشه دي الحالة ضنك" .
حارس الامن في البنك هو شخص قصير دايما وبكرش كبير وبيكون لابس ازرق وطبعا ولا معاه سلاح ولا نيلة علي اساس ان اما ييجي حرامي هيزعقله ! واقتصر دور الحراسة في البنك علي انه يقول لو سمحت يا اخي ارجع ورا او الحاجات دي انما لو دخل حرامي طبعا هو اول واحد هيجري ويحافظ علي كرشه ده لو قدر يجري طبعا لانه عامل زي حال حكام الكورة المصريين بكروشهم دي .
ساعات تلاقي بقي الشخصية اللي هي عايزة مشاكل وخلاص يعني الموظف علي الشباك يقول "لو سمحت صورلي البطاقة" يقوله الرجل "حرام عليكوا يا ظلمة" !
هو عايز اي حاجة يقول عليها فساد وخلاص يعني سايب الفساد برة البنك وداخل يعيش الجو جوة .
كل ما رقم بيتقال عشان دورك جه مثلا تلاقي تلاتة اربعة قايمين واقفين وبيبصوا لبعض ..الكل عايز يقوم في غير دوره كالعادة ما هو طابور عيش ..كل رقم بيتقال تلاقي اربعة وقفوا وكأن كل الناس واخدة نفس الرقم او كله عايز يتسلل كده بالراحة عشان يخلص من ام اليوم الطويل ده بعد اكل الفول السوداني كاننا في الجبلاية.
وطبعا يكون الانتظار والملل فرصة للحوارات وفتح منتديات جوة البنك بين مجموعة جوة البنك او المقابلات ام صوت عالي اما فجاة تلاقي جنبك صوت جهوري "أهلاااااااااا أستاذ محمود ازيك يا راااااجل انت فييييين ؟ " وطبعا التاني يرد عليه بصوت أفظع وأعلي ويكون جنبك واحد بقي بيتكلم في المحمول بنفس درجة علو الصوت المصري الجهوري واااه لو تسمع المكالمة دي ..كل مكالمة التليفون عابةر عن ان اللي جنبي بيقول بالصوت الحياني "بقولك مافيش شبكة" "بقولك ماااافيش شبكة" "بقولك مااااااافيش شبببببببببببببببكة" ..! تبقي عايز تقوله "طيب ما تقفل ام الموبايل طالما مافيش شبكة وبعدين هو هيسمعك ازاي بروح هالتك ومافيش شبكة يا عم الفتك " .
وطبعا هتلاقي الراجل "ابو العينين" دايما بسميه كده اللي هو يبقي قاعد جنبك وتلاقيه بيبص لكل الوجوه في البنك واحد واحد وكأنه جاي من كوكب زحل ! لسه بيتعرف علي طبيعة البشر تقريبا لحد ما يجي الدور عليك ويقعد يبصلك تقريبا لحد ما يحفظك او يكون بيشبه علي البنك كله يمكن تايه ولا حاجة وده الحل معاه انك تقعد تبصله برخامة وهو هيبطل الحكاية دي.
ولو حظك حلو ومجالكش ابو العينين يبقي هيجيلك "أبو ريحة جنان" وده لو حرك دراعه بس تلاقي "يا روايح الزمن الجميل هفهفي" علطول في كل مكان ..وكأن بتاعة النشرة الجوية هتطلع تقول "الجو معفن شمالا شديد العفونة جنوبا..وفرصة لسقوط الهباب" !
وغالبا هيتف جنبك في منديل كبير زي توفيق عكاشة ويعينه في جيبه يمكن بيعمل تحليل "دي ان ايه" للتفة .
وطول ما انت قاعد هتسمع بقي ذوق المصريين في النغمات بتاعتهم يا اما نغمات اسلامية يا اما نغمات "شربت حجرين ع الشيشة" وطبعا كل الناس عاملة الصوت علي اعلي حاجة مع ان اي موبايل فيه درجات بس الشعب المصري مبيعترفش الا باعلي صوت في الموبايلات لا ده ساعات يجيبوا الموبايل الصيني عشان صوته زي الميكروفون بالظبط .
وياسلام بقي علي اول يوم كان بيتطبق فيه في البنك موضوع الارقام..البنك كان دايما ماشي بطريقة الطابور لحد ما جم جددوه وبقي بنظام الشاشة والرقم عشان النظام وكده فواحد يدخل الراجل ع الباب يقوله "ما تاخد رقم " يقوله "ليه في سحب ؟ " !
كل تفكيره ان يمكن ربنا يكرمه ويكسب في مسابقة ولا حاجة لحد ما الراجل يقوله "سحب ايه يا استاذ خد رقم لدورك" .
وهتلاقي علطول واحد بتاع "افطر معانا" وحتي اما تقوم تمشي هتخش لسواق التاكسي مثلا يقولك "ما تتفضل تفطر معانا وفارش علي حجره كمية أكل ولا ابو لهب من ساندويتشات ومخلل وغيره عشان يفوق ع الصبح علي اساس ان كل الكمية دي هتفوقه مش هتنيمه سطيحة.
وتبقي شايف كمية الاكل وعايز تقوله مش "بالهنا والشفا" لا دها ان عايز اقوله "اطفحه لوحدك كفاية الهباب اللي انت فاتحه ع الكاسيت" .
يعني لو هربت من انتظار دورك هيقابلك التاكسي وعمايله وربنا يكون في عون الجميع عشان كده الشعب المصري غاوي صيد سمك وانا مكونتش عارف ليه ولكن ده اكبر تدريب علي الصبر وانتظار اللاشئ لأن طبعا كل الصيادين مبيطلعوش حاجة اصلا في الاخر اللي بيقعدوا ع الكوبري دول لان السمك هربان من ريحة النيل اساسا من اللي بيرموه فيه والراجل اصلا حاطط طعم سمك من ابو نكلة فالسمك بيقرف منه ! يعني روح اصطاد احسن عشان تتدرب علي انتظار دورك في مصر .
اه ممكن تسمع الجملة دي بعد انتظار طويل في اي بنك في مصر الغريبة ان الارقام دي معمولة عشان النظام وكده بس للاسف البطئ بيخلي الناس تنتظر اكتر من ساعة عشان يعدي خمسين رقم مثلا وياسلام بقي لو قدامك متين رقم قبلك يبقي عيش يابرنس وحاول تتسلي بقي في القعدة الطويلة دي وياحبذا لو خدت معاك حد لانك هتقعد لوحدك كتير قوي تشوف عادات المصريين في الانتظار .
ايوه اكتر مكان ممكن تلاحظ فيه عادات الشعب المصري في انتظار حاجة او طابور مثلا هو البنك او بعض المؤسسات التانية ..بتلاقي كل الانماط حواليك في البنك وكل الانواع من البشر.
هتلاقي الراجل اللي بيراقب من بعيد قوي اما يلاقي رقم بيتنده عليه وما يقومش يقول اما اروح استهبل واخد الدور ده ما هو كده كده صاحبه مش موجود ولكن الراجل يحرجه ويقوله فين الرقم بتاعك يقوله اه ده وقع مني !
طبعا هتزهق جدا من الانتظار وهتقوم تجيب جرنان مثلا او تشوف حاجة ع الموبايل ولكن هنا بتشتغل فقرة "اخترنا لك" علطول اول ما تفتح صفحة الجرنان تلاقي عشرة بيبصوا معاك في نفس الصفحة وكل ما تقلب يبصوا الناحية التانية ! وياسلام بقي لو قلبت علي صفحة الرياضة هتلاقي كل التعليقات حواليك عن الاهلي والزمالك وكأن كل الناس عينها في الصفحة مش عارف ليه ده مجرد جرنان يعني !
وساعات تلاقي الراجل الرخم اللي يقولك ممكن الصفحة الاخيرة ؟ وواحد تاني ياخد صفحة الاقتصاد او يقولك استني اما اشوف الحتة دي متقلبش ثانية واحدة وكأنك جبت الجرنان للشعب كله او دي فقرة تسالي البنك !
موضوع الجرنان ده هتلاقيه في اي حتة في تاكسي في ميكروباص في بنك في هيئة حكومية في اي مكان كل ما تفتح جرنان بتلاقي عيون الناس كلها لزقت فيه علطول وكأنك انت المنقذ بتاع ميلودي يتحدي الملل .
هتلاقي دايما الراجل الغريب في الانتظار برضه حسب تصرفه يعني مثلا اللي يقعد يتأمل في شبشبه طول فترة انتظار دوره او واحد تاني بيشيل طاقية من علي راسه يقعد يبص فيها وتبقي عايز تقوله "بتدور علي ايه يا حاج في الطاقية ؟ هتطلع أرنب وتعمل ساحر ولا ايه ؟ " !!
بس بتاع الشبشب ده غريب جدا يقعد يمد رجله لقدام ويبص لجمال صوابع رجليه تقريبا مش عارف بيبص علي ايه بدقة اوي كده وواحد تاني ممكن فجأة يرفع الجلابية وكأنه هيقوم يجري اهو او حد هيهاجمه وهياخد ديله في سنانه زي ما بيقولوا .
مرة قعدت جنب واحد غريب فعلا في البنك كل ما واحد يدخل بشنطة او صندوق مثلا وشكله باشا كده والشنطة مليانة فلوس يقول "اللله اكبر ياااااا" مش عارف ايه معني كده بس شكل المشهد ده بيعذبه قوي او يمكن كان مليونير زمان وفلس معرفش بس طريقة غريبة وبيقولها بصوت عالي قوي .
والراجل اللي زهقان من الانتظار كل ما يعدي رقم يقول "تؤ تؤ" طيب ليه يا حاج ده رقم عدي يعني دورك بيقرب المفروض تتبسط ! هو شكله عايز يقعد مش عايز دوره يجي اصلا شكله فاضي وعايز يبلط ومستريح علي الكرسي .
واحدة برضه بتصرفات غريبة عمالة تبوس ابنها النونو في بقه وده شئ مفهوم للبيبي في اي مكان بس مش في وسط امة محمد في البنك يعني ييجي شابين يقولوا لبعض "بص يلا دي بتبوسوا في بقه" يقولوا "يا ابن المريضة ده بيبي" ويفضل الحوار شغال والمشهد مسخرة وهي بتفقع كل بوسة وصوتها عالي طول ما انت قاعد سامع "موووواه" محبكتش بوس يعني هنا وده مش مكان عواطف اساسا ده مكان خنيق جدا وكل الناس مستنية وزهقانة .
أغرب حاجة في البنوك المصرية ومش ممكن تلاقيها في العالم كله هو انك ساعات تلاقي بياع متسلل جوة البنك ! تلاقي واحد بيبيع فول سوداني في وسط الزحمة ودي شوفتها كتير لانه بيكون دخل في يوم صرف معاش مثلا او كده فبيكون مش باين في الدخول اساسا لان مصر كلها محشورة في البنك فمن اسوأ الحاجات الي ممكن تشوفها انك تكون في مؤسسة مالية وتسمع جملة "سوداني سخن" !!
والاغرب منها انك تسمع واحد بيقوله "خد يا ريس والنبي " !! ولو واحد اعترض علي المشهد طبعا هتبان حنية الشعب المصري وواحد هيقوله "يا اخي سيبه يلقط عيشه دي الحالة ضنك" .
حارس الامن في البنك هو شخص قصير دايما وبكرش كبير وبيكون لابس ازرق وطبعا ولا معاه سلاح ولا نيلة علي اساس ان اما ييجي حرامي هيزعقله ! واقتصر دور الحراسة في البنك علي انه يقول لو سمحت يا اخي ارجع ورا او الحاجات دي انما لو دخل حرامي طبعا هو اول واحد هيجري ويحافظ علي كرشه ده لو قدر يجري طبعا لانه عامل زي حال حكام الكورة المصريين بكروشهم دي .
ساعات تلاقي بقي الشخصية اللي هي عايزة مشاكل وخلاص يعني الموظف علي الشباك يقول "لو سمحت صورلي البطاقة" يقوله الرجل "حرام عليكوا يا ظلمة" !
هو عايز اي حاجة يقول عليها فساد وخلاص يعني سايب الفساد برة البنك وداخل يعيش الجو جوة .
كل ما رقم بيتقال عشان دورك جه مثلا تلاقي تلاتة اربعة قايمين واقفين وبيبصوا لبعض ..الكل عايز يقوم في غير دوره كالعادة ما هو طابور عيش ..كل رقم بيتقال تلاقي اربعة وقفوا وكأن كل الناس واخدة نفس الرقم او كله عايز يتسلل كده بالراحة عشان يخلص من ام اليوم الطويل ده بعد اكل الفول السوداني كاننا في الجبلاية.
وطبعا يكون الانتظار والملل فرصة للحوارات وفتح منتديات جوة البنك بين مجموعة جوة البنك او المقابلات ام صوت عالي اما فجاة تلاقي جنبك صوت جهوري "أهلاااااااااا أستاذ محمود ازيك يا راااااجل انت فييييين ؟ " وطبعا التاني يرد عليه بصوت أفظع وأعلي ويكون جنبك واحد بقي بيتكلم في المحمول بنفس درجة علو الصوت المصري الجهوري واااه لو تسمع المكالمة دي ..كل مكالمة التليفون عابةر عن ان اللي جنبي بيقول بالصوت الحياني "بقولك مافيش شبكة" "بقولك ماااافيش شبكة" "بقولك مااااااافيش شبببببببببببببببكة" ..! تبقي عايز تقوله "طيب ما تقفل ام الموبايل طالما مافيش شبكة وبعدين هو هيسمعك ازاي بروح هالتك ومافيش شبكة يا عم الفتك " .
وطبعا هتلاقي الراجل "ابو العينين" دايما بسميه كده اللي هو يبقي قاعد جنبك وتلاقيه بيبص لكل الوجوه في البنك واحد واحد وكأنه جاي من كوكب زحل ! لسه بيتعرف علي طبيعة البشر تقريبا لحد ما يجي الدور عليك ويقعد يبصلك تقريبا لحد ما يحفظك او يكون بيشبه علي البنك كله يمكن تايه ولا حاجة وده الحل معاه انك تقعد تبصله برخامة وهو هيبطل الحكاية دي.
ولو حظك حلو ومجالكش ابو العينين يبقي هيجيلك "أبو ريحة جنان" وده لو حرك دراعه بس تلاقي "يا روايح الزمن الجميل هفهفي" علطول في كل مكان ..وكأن بتاعة النشرة الجوية هتطلع تقول "الجو معفن شمالا شديد العفونة جنوبا..وفرصة لسقوط الهباب" !
وغالبا هيتف جنبك في منديل كبير زي توفيق عكاشة ويعينه في جيبه يمكن بيعمل تحليل "دي ان ايه" للتفة .
وطول ما انت قاعد هتسمع بقي ذوق المصريين في النغمات بتاعتهم يا اما نغمات اسلامية يا اما نغمات "شربت حجرين ع الشيشة" وطبعا كل الناس عاملة الصوت علي اعلي حاجة مع ان اي موبايل فيه درجات بس الشعب المصري مبيعترفش الا باعلي صوت في الموبايلات لا ده ساعات يجيبوا الموبايل الصيني عشان صوته زي الميكروفون بالظبط .
وياسلام بقي علي اول يوم كان بيتطبق فيه في البنك موضوع الارقام..البنك كان دايما ماشي بطريقة الطابور لحد ما جم جددوه وبقي بنظام الشاشة والرقم عشان النظام وكده فواحد يدخل الراجل ع الباب يقوله "ما تاخد رقم " يقوله "ليه في سحب ؟ " !
كل تفكيره ان يمكن ربنا يكرمه ويكسب في مسابقة ولا حاجة لحد ما الراجل يقوله "سحب ايه يا استاذ خد رقم لدورك" .
وهتلاقي علطول واحد بتاع "افطر معانا" وحتي اما تقوم تمشي هتخش لسواق التاكسي مثلا يقولك "ما تتفضل تفطر معانا وفارش علي حجره كمية أكل ولا ابو لهب من ساندويتشات ومخلل وغيره عشان يفوق ع الصبح علي اساس ان كل الكمية دي هتفوقه مش هتنيمه سطيحة.
وتبقي شايف كمية الاكل وعايز تقوله مش "بالهنا والشفا" لا دها ان عايز اقوله "اطفحه لوحدك كفاية الهباب اللي انت فاتحه ع الكاسيت" .
يعني لو هربت من انتظار دورك هيقابلك التاكسي وعمايله وربنا يكون في عون الجميع عشان كده الشعب المصري غاوي صيد سمك وانا مكونتش عارف ليه ولكن ده اكبر تدريب علي الصبر وانتظار اللاشئ لأن طبعا كل الصيادين مبيطلعوش حاجة اصلا في الاخر اللي بيقعدوا ع الكوبري دول لان السمك هربان من ريحة النيل اساسا من اللي بيرموه فيه والراجل اصلا حاطط طعم سمك من ابو نكلة فالسمك بيقرف منه ! يعني روح اصطاد احسن عشان تتدرب علي انتظار دورك في مصر .
Posts
No comments:
Post a Comment