بتشوف مسلسل تركي ؟ يا صبر أيوووووب

 المسلسل التركي يعتبر بديل مثالي عن الصيد والاتنين بيعلموا الصبر والاتنين فيهم مط منقطع النظير وتطويل مالوش أخر في الصيد تقعد طول النهار عشان تطلع سمكة مش هتاكلها اصلا في النهاية وفي المسسلسل التركي تقعد تشوف 200 حلقة بشغف لحد ما الأبطال يبقوا عشرة عمر معاك ومتقدرش تستغني عنهم في النهاية لكن المسلسل التركي مليان دروس تصدق دي ؟ :



1- ان الواحدة وهي نايمة مش بتاكل رز مع الملايكة لا دي بتحط مكياج وبتصحي بيه كل يوم كامل محدش عارف ازاي .

2- ان في اي مسلسل تركي تاريخي السلطان كل همه انه يعمل خواتم او يشوف اخبار حريمه بس في نص الحلقات وقليل قوي اما يجي مشهد علي شئون البلد !

3- ان التجربة التركية افضل اختيار لمصر لان بسبب المسلسلات بقت مصر وتركيا ايد واحدة لدرجة اني بدات أشك ان عاصمة مصر مش القاهرة انما هي "انقرة"

4- المسلسل التركي بيخف عنك زن الزوجة الرغاية واهي تتلهي في مهند وشعره الناعم بدل صلعتك البهية اهو تغيير برضه والواحد يشم هوا نضيف بدل التأمل في اللوحة المنحدرة للكرش الزوجي طول اليوم الملئ بالمحشي !

5- الناس بقت فاكرة اما تقول "هيام خانو" او "شو هالحكي" انها كده بتتكلم تركي مش سوري !!

6- التعداد السكاني في تركيا مش بيتقاس ب "النسمة" لا اكيد بيتقاس ب "المزة" .

7- الناس في تركيا مش بيشتغلوا هم بيصحوا يحبوا ويشوفوا اخر مشاكلهم العاطفية النهاردة ايه ..يعني ماسكين جدول الامور العاطفية اليوم .

8- الامهات في تركيا بيكونوا مزز اخر حاجة اكتر من بناتهم اساسا وعمرهم ما بيتخنوا زي عندنا في مصر.

9- البيوت ما بتتبهدلش ودايما مترتبة بشكل مبالغ فيه مافيهوش غلطة حتي اما يكون بيت ناس فقيرة .

10- الاطفال في المسلسلات دي بتكون نموذج لجملة "هات عيال تفرح بيها" مش "هات عيال تخنق علي أهلك" .

11- تركيا مافيهاش عربية فيات 128

12- "القمر التركي" احنا نشوفه علي الدش انما التركي يشوفه في كل شارع  !

13- المسلسل التركي بقي بديل للمصارعة علي القهاوي والكلمات المتقاطعة اللي الموظفين بيمثلوا انهم بيحلوها في الشغل !

14- الحاكم التركي بيحكم بالعدل مش بالصاجات !

15- تركيا خدت من التجربة المصرية القديمة الجد والعمل انما خدنا من التجربة التركية المسلسلات وبس .

16- التركي مبيلعبش طول اليوم في الموبايل عمال علي بطال لانه بيلعب في شعره المهفهف بداله .

17- المسلسلات التركية خلي أكل الستات المصرية كلها يشيط علي النار لانها بتتابعه دايما وهي في المطبخ واهي تبقي حجة من الست ليه الاكل شاط تقول اصلي كنت قدام المسلسل قال يعني ده السبب بس .

18- المسلسل التركي بيخليك صبور لدرجة كبيرة بعد متابعة 200 حلقة في المسلسل الواحد تقوم من قدامه متنح زي اللي واكل طبق فول ع الصبح .

19- المسلسل التركي شبطة جديدة للستات اللي كانوا زمان بيحدفوا الدباديب علي كاظم دلوقتي بيقعدوا يقولوا مهند ولسه ياما هيحلموا وبرضه هياخدوا واحد بكرش في الأخر وبرضه الراجل مش هياخد لميس وانما واحدة حجم اكس لارج .

20- المسلسل التركي هو اللي عرفنا ان ليالي الحلمية وغيرها من المسلسلات المصري مكانش فيها مط ولا حاجة ده المط هو الشئ الطبيعي في المسلسلات .

21- كنا زمان بنشوف افلام هندية في العيد "مش عارف اشمعني هندي" دلوقتي هيجيبوا افلام تركي بعد كده وبالمعدل ده هتشوفوا افلام فيتنامي بعد كام سنة .

22- متقولش "ما هو ذنب فاطمة جول"  قول "ما هو ذنبي اني اشوف كل الحلقات دي" !


اوعي تدمن التركي لانك مش هاتعرف تخرج منه وهتقعد تشمه علي مواقع النت وتدور عليه بحماس شديد وتقول "اديني التركي بسرعة ارجوك محتاج الجرعة" !