مافيش حاجة حصري في الإعلام الحكومي المصري

الإعلام الحكومي في مصر تاخد منه دروس وعبر ..الإعلام اللي اتكلم علي اضطرابات سياسية في لبنان في عز أيام الثورة المصرية ..واللي الكذب عنده هواية وفن وقلب الحقايق فيه واجب ومبدأ ممكن تتعلم منه :

1- إن في عز أيام الثورة المصرية تشوف فيلم عن أهمية "الشادوف" في العصر الفرعوني !

2- إن خبراء المكياج للمذيعات ممكن يكونوا خريجين "السلخانة"

3- إن المذيعة في برامج الأطفال الأطفال بيكونوا أذكي منها غالبا .

4- إن كل خبر بيقول في أوله "لا صحة لما تردد عن" بيكون حقيقي في الأخر .

5- إن كل قطع برنامج عشان اهم الأنباء بتكون عشان الحاكم يقول بيانه .

6- إن الحكومة حلوة وزي الفل والعيب في الشعب .

7- إن مذيعات الطقس مبيعرفوش يقروا عربي .

8- إن حاكم البلاد هو اللي بيكتب النشرة كلها تقريبا أو امن الدولة .

9- إن أحدث فيلم علي القنوات الحكومية بيكون جه بقاله قرن علي القنوات التانية وإن فيلم الطريق الي إيلات من احدث الأفلام !

10- أما تشوف لبس مذيعات القنوات الحكومية تحس ان فعلا زي عمارة يعقوبيان "الموضة كانت بتنزل هنا قبل ما تنزل باريس" بس الظاهر ان الموضة وقفت عندنا عند السبعينات .

11- إن كل اعتراض علي الحكومة بيكون بس من مجموعة مخربين وان الثورة غلط وحرام .

12- ان الثوار اسمهم عناصر مجهولة والشهداء مبيقعوش الا من الجهات الحكومية بس !

13- إن الساعة 3 الفجر ممكن الواحد يشوف فيلم عن حياة الكانجارو الاسترالي !

14- إن قصة شعر المذيع علي التليفزيون المصري لازم تكون شبيهة بقصة نجيب الريحاني عشان نحس بالعراقة .

15- إن كل سبت واتنين واربع مشاريع عملاقة في البلد بس الناس مش حاسة .

16- إن تزوير الانتخابات بيكون من وحي خيال المنظمات الحقوقية انما الانتخابات دايما نزيهة بسم الله ماشاء الله .

17- إن التليفزيون بيعرف الحدث قبل وقوعه وبيحذر الناس من وجود عناصر جاية بالملتوف قبل ما ييجوا..يعني كل البلطجية معاهم نمرة التليفزيون في ماسبيرو بيكلموهم الاول !!

18- إن بعض الفنانين مبيكلموش القنوات الحكومية الا وقت الازمات عشان يشتموا في الثوار بس .

19- إن الاخبار لازم تكون بايتة وقديمة طحن وإتهرست في ميت قناة قبل كده .

20- إن ممكن المذيع يكون مؤهله كلية قطن ويقدم برنامج مهم .

21- إنك ممكن تمسح قنوات الحكومة من علي الدش بدون ما تحس بأي ندم .

22- إن دائما لا شكوي من إمتحانات الثانوية علي قنوات الحكومة .

23- إن القرع العسلي بيطلع كل شهور السنة والكوسة معاها دايما .

24- ان وسائل الاتصال بين المراسل والمذيع ممكن تكون حاجة عتيقة زي الحبر السري او "نوكيا بانانا" !

25- إن الجواسيس بقي ليهم إعلانات وقاعدين معانا دايما علي القهاوي وبيتكلموا عربي مكسر وبيبرقوا دايما بعينيهم !






قنوات تخليك تقفل التليفزيون او تشيلها خالص من عندك ..ومافيش حاجة حصري علي ام التليفزيون الحكومي المصري ..