رسالـــة من جيفــارا إلي أبناء النظــام

الثورة مش ثورة عبيد..
الثورة حلم ساكن بعيد
ثورة ضمير نام ع الكمان..
عزفوا النشيد راح ع اللومان..
ثورة وطن أو عزته..
أحرار فدي حريته
النبض فيهم صوت ميدان..
يا عبيد نظام يا ما مصكم..
ايه بس لونكم ..اصلكم ؟
يطربكوا ليه صوت الهوان ؟
سلمتوا ليهم حلمنا ؟
بعتوا ترابنا ودمنا ؟
وتقولوا هتعيشوا في امان..
عايزين تعيشوا في فهلوة..
ورشاوي ياما ودرمغة..
وتقولوا يلا اخلوا الميدان..
الثورة قطمت وسطكم..
خبت شموسكوا وضلكم..
كافر بيسمع صوت أدان..
طب ادوا صوتكم للشهيد..
مش للعميل ولا مستفيد..
للحلم نفتح البيبان..
كرباج حنينكوا اليه شديد..
صوت رنته في ودانكوا عيد..
تعابين بتنهش في العيدان..
بلياتشو سيرك البنكنوت..
ياكل في قوتكم زي حوت..
وتعيدوا ليه الصولجان..
حلمك عجوز يا ابن الفلول..
حلمك تهيمن او تفوز..
وانا حلمي صارخ في الميدان..
حلمي ان مصر تشدني..
بأنين ووحشة تهزني..
ويعود ترابها الزعفران..
حلمك عجوز يا ابن الهوان..
حلمك أناني في أصله بان..
وانا حلمي مرسوم ع الحيطان..
حلمك يعود المعتقل..
يرمينا فيه اللي قتل..
وانا حلمي شمعة في شمعدان..
حلمك فقير يا ابن العبيد..
وانا حلمي صوته زمان بعيد..
حلمي ان مصر فوق الزمان..
حلمك في رشوة وترقية..
وانا حلمي وردة وامنية..
حلمي الربيع حلمك ديدان..
حلمك ظلام يا ابن العذاب..
يا ابن النظام ابن الهباب..
وانا حلمي هيجلجل يبان..
حلمك تدوس فوق البشر..
يرجع فسادها اللي انتشر..
حلمك زمان الألعوبان..
حلمك فلوسك مال قارون..
وانا حلمي ليه المال يهون..
حريتي أغلي بزمان..
أنا دمي حر ولونه مصر..
أما العبيد يا ما باعوا مصر..
لبلاد كتيرة وامريكان..
يا ابن النظام صوتك لمين ؟
عايز ترجع ليه الجحيم ؟
ليه دم خالد يا ابني هان ؟
ليه وهبت نفسك للفساد ؟
دمك رخيص ليه في المزاد ؟
واللحن فيك من ايد شيطان ..
ليه سبت نفسك للذئاب..
يستأنسوك ليه الكلاب ؟
تبت يداك بإسم الميدان..
مصر اللي راجعة في يوم تقول..
انا حسبي ربي من الفلول..
لعناكوا في الصلاة والادان..
دولة فساد متأصلة..
في قلوبكوا ليه متسرطنة ؟
واللعنة ركباكوا بأمان..
يا ابن النظام عود للنشيد..
خلينا في الحلم المجيد..
واغسل في عارك بالزمان..
وإرجع لبلدك صوت كمان..