شمس وقمر 5

انا لما أكبر هابقي ظابط
أنا لما أكبر هابقي دكتور
وانت ؟
شاورلي وقاللي وسط زمايلي
قولت
انا لما اكبر هاحب بجد

في ناس بتجمل الحقيقة
وناس بتزيف الحقيقة
وناس بتجمل زيف الحقيقة
انتي عارفة انتي مين فيهم

عمرك ما هتعيشي حياة سعيدة
مش عشان انا اللي بفرق السعادة
لكن انا اللي بعرف أخطفها وانا ماشي

فراقنا ما كانش قدر
بس الظاهر ان انتي شوفتي قدرنا هو الفراق

مش هنعيش في سلام
ومش لازم ندخل حرب
اجمل حاجة في حبنا انه دخل مرحلة الهدنة

انا لما احب تاني
ممكن احب قوي بس مش بجد
انما انتي
هتدخلي في دوامة المقارنة
وانتي الخسرانة
محدش هيحبك زي

قالوا السياسة فن الممكن
لكن حبك
فن المستحيل

انا بحمد ربنا علي كل لحظة عيشتها معاكي
بس الملايكة مستغربين

بتحبني مش بتحبني
بتحبني مش بتحبني
قطعت ألف وردة قبل ما اقولك
ودلوقتي بلمهم تاني
سيبهم لحبيبك الجاي

انا اللي اخترعتك
والاختراع انتشر وهرب مني
ودلوقتي كاتب علي باب اوضتي
"المخترع مشغول"

في يوم من الايام
هتمسكي صفحة الوفيات وهتقري اسمي
ساعتها متدمعيش
بس متجوزيش بناتك الا للي بيحبوهم
نصيحة

قلب دهب
زي قلب حجر
الاتنين جامدين بجد

السيرة الذاتية للالم
حطتني في الفهرس
وبعد ما افترقنا
بقيت علي الغلاف

انا أسف
مش متأسف
والفرق كبير