Monday, March 17, 2008

شمس وقمر6

كلمات متقاطعة
خيانة
كتبتك أفقي ورأسي
وبعدين كتبت إسمي

كنت بقول تجديد الأمل زي تجديد الدم
وإنتي قولتيها
تجديد الألم أجمل من تجديد الدم

حوار بيني وبين ورقتي وبين دموعي
حوار الخرسان

أهم ثلاثة اسئلة في حياتي
أصبر وأنساها
ولا أنساها وأصبر
ولا
التالت صعب

كل ما أرش البرفان أفتكر إني رايحلها
يرد علي البرفان
غيرت النوع

السكة مش بعيدة
بيقولها القريبين بس

الجمال مش كل حاجة
بس كان كل حاجة في جمالها

خمسين مرة قالتلي
علي فكرة أنا مش ملاك
وعشان كده
هتفضل ملاك

يمكن يكون كلامي مش احاديث
بس حبي ليكي مش اسرائيليات

لعبت كل العاب الذكاء
معرفتش احل ولا لعبة
كل ده جوه عينيكي

الفرق بينك وبين اللغز
ان اللغز مهما كانت صعوبته ليه حل
محتاج وقت للتفكير
وانتي محتاجة وقت للبحث عن الفكرة

طفي النور ..غارة
طفي النور
عيوني اما تشوف عيونها

الحب بيشرب من دمي
وهي بتشرب من دم الحب
مش مهم
المهم وصلها دمي

قدروا يوصلوا لأدوية ضد الكون كله
ومافيش دوا واحد ضد الحب
كنت هاكون اول مشتري

عارفة ليه هأكمل حياتي
عشان انتي جزء منها


Posted by at
Labels:
Subscribe to: Post Comments (Atom)