كوباية شاي تعمل معاك الصح

اما تلاقي واحد مصري جاي يعزمك علي حاجة هتلاحظ روح المبالغة دايما وهو بيقدملك الحاجة دي
تحس انه جايبلك لبن العصفور او حاجة مدقتش زيها في حياتك حتي لو الحاجة دي مجرد كوباية شاي !
ومن اشهر الجمل بتاعة المبالغة في التقديم عند الشعب المصري :



1- جايبلك شاي من اللي وصي عليه لقمان :

مع ان محدش شاف الوصية دي ابدا ومعقول لقمان هيوصي علي كوباية شاي برضه في وسط وصاياه ؟
وبعدين كان علي ايامه شاي فتلة ؟؟ عجيبة شوية دي
واما حد قدمه للقمان قاله ده الشاي اللي وصي عليه مين بقي ؟؟



2- الشاي كما أنزل :

دي من اعجب الكلمات اللي ممكن تسمعها في مصر ..هو الشاي انزل ؟؟
يعني ظهرت شجرة شاي سحرية مثلا فجأة من تحت الارض ولا هو بيتزرع ؟
وحتي المكرونة الفرن بيقولوا عليها كده وانا مش عارف ازي المكرونة انزلت الحقيقة يعني



3- جايبلك شاي بقي متقوليش ومتعدليش :

خلاص ياعم اتكتمنا اهو..انت هتزلني بكوباية شاي ؟
وبعدين مقولكش ايه ما انا اكيد دقت احسن منه او زيه ع الاقل يعني ايه شاي مقولكش يعني ؟



4- كوباية شاي صنعة ايديا وحياة عنيا :

مش عارف ايه الصنعة في الشاي ؟ ده اسهل من فتح العلب في برنامج لعبة الحياة الساذج
هو الشاي كمان فيه فنون ووصفات ؟



5- جايبلك شاي بقي يعمل معاك الصح :

شاي يعمل معايا الصح ؟ ايه ياعم قاعدين في ورشة خراطة ؟
والله ده انا اللي هاقوم اعمل معاك الصح بأم الشاي بتاعك ده يا اخي


6- كوباية شاي بقي ولا الدموع ولا الأيام :

ماشي يا عم حمادة هلال.. ما تعيطلي احسن وانت بتديهوني
جتكوا نيلة مليتوا البلد ..ومعندكش كوباية تانية دايما دموع دموع ؟
ولا دي ماركة تانية ؟



7- حماتك بتحبك يا عم :

اهو ده المستحيل بعينه بقي لو حلفتلي ع المية تجمد زي ما بيقولوا مافيش حماة بتحب
ده كلمة وصي عليه لقمان واقعية اكتر من دي شوية كمان
ولو حماتي بتحبني ما كانت عزمتني هي مش هاكل عند واحد صاحبي يعني
ولو افترضنا انك بتتكلم عن الرضا طب قول امك بتحبك انا اول مرة اسمع عن رضا الحماة !



8- كوباية شاي بقي تجيب معاك م الاخر :

محسسني انك مديني قرص فياجرا مثلا ده شاي يا عم الخرنج
ايه الشاي اللي يجيب معاك م الاخر ؟ وبعدين مش عايز اجيب م الاخر يا عم انت بتطردني ولا بتعزمني ؟
اكنك بتقولي قصر يعني واتكل علي الله



9- كوباية شاي بقي دوق وادعيلي :

ايه جو الشحاتة ده ؟
روح يا ابني الهي ينجلحك المقاصد ويكتبلك في كل خطوة سلامة
كانوا بيشحتوا بمناديل في الاشارة دلوقتي بكوباية شاي



10- خد حلي بقك :

ماشي يا عم الشيخ.. تحس انه هيحطلم شوية مسك بعديها ويقولك حلي ايديك
بركاتك يا مولانا..طب ما طالما هاحلي بقي ما تشوفلنا حاجة حلوة مش كوباية شاي حاف !



11- كوباية شاي زي ما الكتاب بيقول :

مش عارف ايه موضوع الكتاب ده ؟ باينه في كل حاجة
المنهج كله بتاع الحياة في اكتاب ده كل شوية واحد يقول مزة زي ما الكتاب ما بيقول
شاي زي الكتاب ما بيقول
فرخة زي ما الكتاب بيقول
ما حد يشوفلنا الكتاب ده فين يا جدعان ده باينه مليان خيرات يعني




وياسلام علي مبالغات الشعب المصري وكل ده علي ايه ؟..كوباية شاي ..عجبي