وحـدة مكافحـة التصـريحات

طول عمر تصريحات الفنانين بيشوبها الغموض والكلام الفارغ برضه..وكتير منهم بيحاولوا يرسموا مواقف لنفسهم علي قفا الجمهور وان شايف ان في الحكومة الجديدة المفروض يعملوا "وحدة مكافة التصريحات" تكون كل همها مكافحة الكلام الفارغ والهجص بتاع التصريحات خصوصا اما تكون بالبنط العريض يعني ..

واحدة زي فيفي عبده مرة قالت في برنامج مع وفاء الكيلاني "هي الرقاصة فاضية تعمل حاجة غلط اصلا؟ دي طول النهار في شغلها"
ده تصريح من اللي خلوني اقوم اعمل زي فيلم ذا ماسك وعيوني تخرج وتبظ لبرة وانا مذهول وكنت عايز اخبط راسي في الحيطة عشان اتاكد انا بحلم ولا لأ !
بتقولك هي الرقاصة فاضية ؟ ده كل وقتها لشغلها ؟ محسساني انها ماسكة دار ايتام مش بتهز وسطها ..

اما سعيد صالح اللي بيقول اي كلام قالك ايه بقي في التصريح بتاعه "ان كل واحدة تاخد منه بوسة هي محظوظة وان مافيش مانع من الجنس قبل الزواج "
يعني الراجل في سنة ده بدل ما يبدأ بقي يشوف ايه اللي ناقصه ويعمله لا ماشي علي مبدأ انه يفضل في الهجص ده للنهاية ويقول كلام يودي الناس في داهية
هو طبعا اصلا محدش هيخلي قدوته سعيد صالح يعني بس برضه الكلام ده ممكن يؤثر علي قلة من الناس وبعدين اللي بيدعو لحاجة اكيد جربها يا عم سعيد يا صالح ولا ايه ؟


ايناس الدغيدي بقي وما ادراكم ما الدغيدي ..الجريئة..وبعدين عملت برنامج "الجريئة والمشاغبون" ..وبعدين المرة الجاية "بنت الجريئة"..وبعدين الجزء الي بعده "بنت الش ...."
المهم حتي في عنوان برامجها تحس انه جنسي او فج برضه مش عنوان برنامج محترم زي افلامها كوكتيل افلام انما ايه تقولش قرص فياجرا !
بتقول ايه بقي ست ايناس في اخر تصريح بتقولك "لازم يبقي فيه تصريح لاوكار الدعارة"
كلام جميل كلام معقول مقدرش اقول حاجة عنه..تصريح ؟؟ يعني تروح السجل التجاري يسألوها عن النشاط تكتب دعارة..او يحطوا بند في الورقة كلمة "دعارة" جبن مثلا "غذاء" "ادوية" "عقارات" ..
يبقي في جنب النشاطات دي كلمة "دعارة" كنشاط محترم برضه ..خطوة مهمة قوي يا ست ايناس لا وايه هتنقل البلد نقلة جامدة جدا ..كل بيت دعارة نعمله ترخيص ونسميه كمان اسم تجاري يعني مثلا "بيت المزاج" "اللذة اللامنتهية" "شربات الاميرات" او كده يعني وياريت نعملها اكشاك بقي ونعمل خدمة الدليفري برضه "دعارة دليفري" حضرتك يعني.


اما هيفاء وهبي ومروي فبيقولوا انهم دايما بيدعوا ربنا انه يوفقهم قبل كل كليب !! لا وكمان هيفاء بتقول انهب بتقرا قرأن قبل اي عمل ليها عشان تتوفق فيه !!
طيب حضرتك يعني اذا كان اللي بيتكلم مجنون يبقي المستمع عاقل..بتقري قران بلبسك ده ؟؟ اللي بتلبسيه في الكليبات ؟ وفي حد يدعي بالبكيني مثلا ؟؟ جديدة دي يا حاجة هيفاء اللهم قوي ايمانك .

الست اليسا بقي بتقولك "انا لو واحد بيحبني ممكن اخلف منه بدون زواج "
الغريبة ان بعد كده الفنانة او الفنان يلوموا علي الشباب اللي بيكتبا تعليقات في المواقع تحت الخبر يعني ويقولوا كلام عليهم ويقولك دول قلة مش محترمة !
طيب يعني عايزياني اشوف تصريح زي ده واقول كلام محترم ؟؟ حتي لو انا محترم !
يعني تحت التصريح ده كان الشباب كاتب ايه ؟
واحد كاتب "اموت انا ..تعالي وانا ..."
واحد تاني كاتب " يا مين يحكمني عليكي ده انا..."

وكلام من النوعية دي ..يعني تفتكري الشباب هيدخل يكتب ايه علي تصريح زي ده يا طنط اليسا ؟

وفاء عامر بقي قالت "انا كنت في الثورة بس بالنقاب محدش شافني "..
اللهو الخفي يعني..طيب ليه الكذب ؟ ولا عايزة تكسبي بنط يعني علي حساب الفنانات التانيين اللي هم في القايمة السودا والهجص ده كله ؟ يعني خلاص هتدخلي بالنقاب ؟ وعايزة محدش يعرفك ؟ ده ايه الزهد والامانة دي؟ يعني مش طالبة شهرة ولا حاجة انك كنتي في الثورة وبتاع ؟ ده ايه الامانة والاخلاق العالية دي يا ست وفاء ؟ اللهم كتر من امثالك ..
وياتري لقيتي نقاب مقاسك ؟ وعرفتي تلبسيه اصلا ؟

دينا الرقاصة بقي مرة وقفوها ع الطريق والعربية فيها خمرة وحشيش قالت "متصدقوش..الحاجات دي مش بتاعتي"
اه يمكن واحدة صاحبتها سابتها معاها امانة ..تخيل امانة "حشيش ومخدرات" علي ما تيجي من الدرس الديني يمكن هي كمان بروح امها ..
يعني رقاصة وراجعة من كباريه ومعاها حشيش ومخدرات يبقي ليه الظابط يصدق انهم مش بتوعك ؟ امال بتوع مين طيب ؟ وفي حاجة اسمها امانة "حشيش" ؟
وبعدين نازلة م العربية بتتطوحي ليه طالما مش بتوعك ؟؟ من هور الموقف مثلا سكرتي ؟

اسوأ تصريحات بقي بتاعة فنانات الاغراء اللي بيطلعوا زي المطربة "قمر" تقولك الكليب الاخير لم يكن مبتذل..
متخلوناش نقول الفاظ قبيحة بقي ..لم يكن مبتذل ؟ ده انا لو عملت زووم في الريموت كنترول كنت هاشوف ال...و ال....
مبلاش نتكلم بقي ..امال ايه الكليب المبتذل ؟ كليبات "سامي يوسف" ؟؟؟
وواحدة تانية تطلع نايمة علي غلاف المجلة وتقولك "ارفض ادوار الاغراء " !!
طيب قومي الاول من ع الغلاف ده مش سرير ابوكي انتي في الشارع دلوقتي مش ع السرير
نايمة بقميص النوم تقريبا ع الغلاف والصور اللي جوة المجلة اسخن من كده وتقولك ارفض الاغراء ..يا حيلتها !

وياريت الاخوة في الحكومة الجديدة يعملوا بقي اي وحدة لمكافحة ام التصريحات دي عشان الناس اتخنقت من تصريحات الفنانين دي كفاية بقي يا عالم يا هووووه