نصايح اخر حاجة من زعيم مخلوع وشرب قهوة سادة

في كل ثورة في العالم العربي الموضوع ماشي بالترتيب والغريبة ان محدش بيتعظ..يعني تلاقي الخطوات واحدة زي قطع الانترنت وحرق السجون وضرب المتظاهرين والشعب كله يقعد في ميدان معين ويقول سلمية..نفس الخطوات بالظبط لكن الزعماء بعضهم مفهمش الدرس وبيكرر نفس الخطوات يعني ايه لزمة انك تقطع الانترنت رغم انك شوفت ان ده منفعش في مصر ومأثرش ع الثورة بالعكس ده زادها اكتر !

وليه تقتل في المتظاهرين وتخلي الموضوع فيه شهداء رغم ان ده هيزود الموضوع..هم الزعماء دول بيفكروا ازاي ؟؟
لكن اي زعيم عربي جاي هيسأل الاول اي زعيم مخلوع من دول اللي قامت عنده ثورة وهيقوله الحقني اعمل ايه بالظبط ؟؟ انصحني ارجوك

ونشوف وصايا الزعيم العربي المخلوع :



أولا : متقعدش تسخن الشعب عليك بجمل غبية تستفزهم زي مثلا يطلع رئيس وزرائك يقول "الشعب لم ينضج سياسيا" والكلام الفارغ ده..ده انت اللي منضجتش يا معلم والشعب مستوي وناضج ع الاخر وجاهز للثورة او تقعد تقوله "خليهم يتسلوا" بشكل استفزازي اهو التصريحات دي تخرج الشعب عليك يبهدلك .


ثانيا : لو لقيتهم طلعوا مظاهرة اجري من اول يوم علطول وزود المرتبات ومتبعتش اي افراد امن يضربوا في الشارع بل بالعكس ابعت افراد مدني يعملولهم خيم لذيذة جدا وبالوان كمان وقولهم "الريس بيمسي وباعتلكم الخيمة دي وصباح الديمقراطية يعني"


ثالثا : في اول يوم مظاهرة حاول تعمل مشهد تنحي وتظهر انك زعلان من شعبك وكده واجر ناس تخرج تقول "لا تتنحي لا تتنحي" وادفعلهم علي قد ماتقدر وارجع تاني وقول رجعت بناءا علي رغبة الشعب العظيم


رابعا : سلك امورك بدري بدري وخلي فلوسك متجمدة احسن في شكل الماظ لان الفلوس هيجيبوها هيجيبوها مهما حاولت تخبيها في اي بنك انما لو في شكل الماظ او احجار نادرة وخبيها في قصرك تحت الارض في مكان ميخطرش علي بال حد ابدا عشان تطلع انك شريف لو جم يحاكموك بعد كده


خامسا : حاول تلحق نفسك وتعمل ائتلاف بسرعة تكون افراده كلهم من حزبك اصلا ويعملوا معارضين بسرعة ويقعدوا يتفاوضوا معاك رغم انهم منك اساسا بس محدش يعرفهم او مش مشهورين خالص عشان تدخل ع الناس بذكاء


سادسا : بعد ما تظبط كل ده انزل بنفسك الميدان بالطيارة من اول ساعة تظاهر وكلمهم وجها لوجه من غير ما الامن يضرب ولا واحد ولا بعصايا حتي عشان يقولوا راجل محترم وابن اصول فعلا


سابعا : حاول تعمل زي القذافي وتقول انا مش رئيس اصلا عشان اتنحي ولو كنت رئيس كنت اتنحيت من زمان ورميت الاستقالة في وشكم يعني !


ثامنا : جهز الميدان المؤيد من بدري واملاه ناس زي ميدان مصطفي محمود كده ووزع عليهم اكل هناك وخليهم يباتوا ايام وليالي في حب الزعيم


تاسعا : ولا تهرب مساجين ولا حاجة بالعكس زود الامن تماما خارج الميدان المعارض وعلي كل البيوت وعلي كل السجون بحيث ان الناس اصلا اللي في البيوت متكونش مهتمة تماما يمشوا ولا ميمشوش
لان الوضع والامن مستتب فمش هيهتموا باللي في الميدان ولا يشوفوا اخبارهم لان كل حاجة زي ما هي


عاشرا : متعتقلش اي حد بالعكس خرج كل المعتقلين السياسيين ونزلهم بنفسك الميدان والمعارضين هيحسوا انك اشتغلتهم جامد بالحركة دي ولا بتستخدم قمع ولا سلاكة !


حادي عشر : طلق مراتك او السيدة الاولي وقول "تصدقوا فعلا طلعت ولية فاسدة وطفلة الحشرة !!" عشان يعرفوا ان هي كانت السبب وانك خلاص تبت فعلا وطلقتها وياريت تعمل حركة افلام وتضربها بالقلم زي الافلام العربي قدام التليفزيون ع الهوا وتقول "انتي طالق طالق طالق"


ثاني عشر : انزل كل فول وطعمية فجأة في اي محل وهات كام صحفي يصوروا الموضوع ده واكتب تحت الصورة "الزعيم حبيب الفقراء دائما"


ثالث عشر : انزل بسرعة اي قرية عندك واشرب كوباية شاي مع اي واحد واتصور معاه وحطها صفحة اولي فتخلي بعض الناس تعيط في البيوت وتتعاطف معاك ومتنساش تطلع في خطاب وتقولهم "ساموت في هذه الارض" عشان الناس تسح بالدموع يا عيني


رابع عشر : جهز القناة الفضائية بتاعتك وظبطها كده علي اساس انها تصور دايما ميدان المعارضة خالي وخلي الناس تتكلم تعيط من حبك ويقولوا "من حبك مبنامش الليل" ويقولوا فيك شعر ويغنوا ع الهوا


خامس عشر : غير الحكومة بسرعة وقول "تصدقوا فعلا بعد كل السنين دي اكتشفت انها حكومة فاسدة زي مراتي هي كمان!!" وطلع قرارات بمحاسبة اللي كانوا فيها بسرعة قدام الناس مع انك هتسفرهم برة اصلا


سادس عشر : لو الناس رضيت عنك وسابوك الكام شهر الفاضلين الحق بقي اعمل فيها عم الحكيم وطلع كتاب بسرعة عن قصة حياتك واخلاصك لوطنك وبعض افكار وسميه الكتاب الفوشيا او اي لون تاني غير القذافي


سابع عشر : استعين بفكرة "شفيق" ووزع بونبوني فعلا علي الناس في الميادين ورشهم بعربيات" ماونتن ديو " وفرقع العاب نارية كنوع من الهزار معاهم بدل الغاز والكلام الفارغ ده اللي هيقلب عليك الدنيا
ويقلب عليك منظمات حقوق الانسان


ثامن عشر : موت واحد من قرايبك في الفترة دي واعلن الحداد وقول انك حزين قوي علي حال البلد وان واحد من قرايبك مات نتيجة الاحداث دي عشان تصعب ع الناس اكتر ويعرفوا انها مش بايدك بل انك متبهدل بسببها زيهم


تاسع عشر : بدل ما تقطع الانترنت زود سرعته في الفترة دي وقولهم ليكوا شهرين مجانا لكل مشترك !! وليكوا الف رسالة مجانا يا محتجين يا كتاكيت !!


عشرون : اعمل استفتاء علي زيرو تسعماية وقول "هل انت محتج ولا حبوب؟" وحاول تخلي النتيجة في صالحك وان كلهم حبوبين ومعاك علطول


واحد وعشرون : متعملش موقعة جمل وكلام فارغ من ده بل بالعكس نزل كلاب لولو في الميدان مكتوب عليها اسمك بشياكة عشان الناس تعرف انك بتعرض وجهة نظرك باحترام ولبس المؤيدين طقم معين ثابت موحد عشان ميتلخبطوش مع المعارضين في النص


ثاني وعشرون : حاول تجهز كميات من الشاي بالياسمين لبعض الاقلام وناس من هيئات ومنظمات مدنية عشان يهتفوا باسمك ويقولوا انك راعي الامن والامان


ثالث وعشرون : متخوفش شعبك وتقولهم "لو مشيت البلد هتضيع" لان ده مبيجيبش نتيجة قولهم "انا ممكن امشي ومش هيحصل حاجة بس العشرة اللي بيننا دي تضيع كده ؟؟ يرضيكوا كده؟؟ مش هاوحشكم طيب؟؟؟"


رابع وعشرون : خرج معتقلين من المعتقلات اللي تحت الارض واديهم فلوس بالهبل وخليهم يقولوا تصريح اهبل ويقولوا "انا قضيت اجمل سنين عمري في المعتقل السري وكانوا بيأكوني ايس كريم بعد الغدا"


خامس وعشرون : بدل الناس اللي بتحدف ملتوف من فوق العمارات لانهم تبعك خليهم يحدفوا ورق بانجازاتك ومعاه شوية ورود علي الناس في الميدان عشان يبقي المنظر حضاري وراقي قدام العالم والسياحة متهربش


سادس وعشرون : اذكي وقت بقي للمرض في الوقت ده من بدري يعني اول ما يحتجوا اعمل نفسك اتصدمت وجالك القلب والناس كلها هتبقي معاك علطول وقول "انك اتصدمت من شعبك اللي عاش معاك سنين ازاي يعمل كده " عشان تجمع ناس كتير حواليك


سابع وعشرون : عشان الناس تصدق انك مش سبب البلطجية اللي في الشارع قول في تصريح "البلطجية سرقوا قصري الرئاسي وقشطوني" !!!




وياريت اي زعيم عربي عنده ثورة يسمع الكلام ده وهيفضل في الحكم بذكاء بدل ما يمشي علي نفس الخطوات الغبية ويقعد يضرب في الناس وخلاص

من زعيم عربي مخلوع..مع الشكر