هو الجري نص الجدعنة ؟؟.."مخزون الطاقة النووية السلبية"

الشعب المصري كان سلبي قوي قبل الثورة مش كده ؟؟ وعايز تسأل عن السبب ؟ في اسباب كتير بس في كمان في حياتنا اليومية والجمل المتداولة اللي يخليك سلبي للصبح يعني ..
لو جيت في الشارع شفت خناقة مثلا وعايز تخش تحوش اول حاجة هتتقالك ايه ؟ "ابعد عن الشر وغنيله" ..يقولك "واحنا مالنا يا عم خليهم يتصافوا سوا ملناش دعوة"..!
وجملة "ملناش دعوة " دي في منها صيغ كتير قوي في جملنا المصرية زي مثلا "ما انا كافي خيري شري" "يا داخل بين البصلة وقشرتها" "الباب اللي يجيلك منه الريح سده واستريح" !
يعني تحس انه مش عايز يواجه اي مشاكل يعني يعيش حياة سالكة ومثالية وسهلة وبسيطة جدا انما لو في اي عائق يبقي استسلم واقول "ابعد عن الشر" .


حتي لو في حاجة ممكن تجيبله منفعة بس صعبة حبتين تلاقيه مش عايز يعمل المجهود ده حتي لو مضمون ويقولك الجملة الشهيرة "يا نحلة لا تقرصيني ولا عايز منك عسل" !
يعني مش عايز نسبة مخاطرة ولو حتي واحد في المية طب ازاي ؟؟
وعن العشوائية كمان في اتخاذ القرارات والسلبية المطلقة تلاقي مثل يقولك "مطرح ما ترسي دقلها" ..ودي عاملة زي الاغنية بتاعة "علي حسب الريح ما يودي الريح" ..
يعني مافيش حاجة معينة تعملها الا حسب المقادير ما توديك ومطرح ما ترسي !

ولو جه واحد سنه كبر مثلا وعايز يعمل حاجة بتاعة شباب المفروض الناس تشجعه عادي ولكن عندنا الجملة المثبطة للعزائم "بعد ما شاب ودوه الكتاب" مع ان برة يقولك الحياة تبدأ بعد الستين وناس تقول بعد الاربعين !! انما عندنا يقولك الحياة تنتهي بعد التلاتين !


حتي اما واحد ييجي يخلف تلاقي برضه طلعله مثل يعكنن عليه زي مثل "يا مخلف البنات يا شايل الهم حتي الممات" وحتي فرحة الجواز ممكن تكسرها بجملة "ادبحلها القطة" و مثل "يا مأمنة للرجال يا مأمنة للمية في الغربال" ! ليه كل مناسبة بنحاول نبوظها بمثل ؟
وليه الارادة والتحدي بنقمعها باسم القدر ! طيب ما هو طبعا القدر هو اللي هيحدد كل حاجة لكن المحاولة واجبة برضه انما يطلعلك مثل يقول "اجري يا بني ادم جري الوحوش غير رزقك لن تحوش" ما هو فعلا هو رزق لكن مافيش مانع انه يجري جري الوحوش ويحاول يعني يزود رزقه !!


وبالنسبة للحكومات بقي وكده يطلعلك مثل "عيش نملة تاكل سكر" وكمان "يا غولة عينك حمرا" بتتقال علي الحكومة برضه ..لكن اكتر جملة سلبية في العالم كله هي بتاعة عيش نملة تاكل سكر دي مش سلبية بس دي تضيع امم بحالها لو كان ده مبدأ !

الحكومة علمت الناس الخوف كمان في الجملة والمثل الشهير "من خاف سلم" ودي علي سبيل يعني ان المواطن يقول "يا حيطة داريني" طبعا اكيد الشعار ده الناس اتعلمته من دروس امن الدولة ويمكن هي اللي طلعت المثل ده !!

ولو في اي موقف محتاج شهامة او قوة او انك تكون ابن بلد لا متدخلش تحوش لانه هيقولك "الجري نص الجدعنة"..امال الجدعنة الكاملة ايه بقي ؟ اكيد انك تهرب تماما من الموضوع او الموقف اللي انت فيه ..يا عيني ع القوة والسيطرة .


ولتبرير كل حاجة انها بالحظ مش بالتخطيط ولا كده يعني يطلع المثل المثبط برضه اللي يقولك "قيراط حظ ولا فدان شطارة" ! يعني م الاخر متحاولش واقعد استني حظك وخلاص.والللللعب يا حظ واقرص ع الزهر ..رغم ان في عهد حسني كان "قيراط واسطة ولا فدان شطارة" مش حكاية حظ.

الغريبة انك تسمع جملة دارجة في الشارع برضه بتقول "عيش ندل تموت مستور" ! ايه القيم الجامدة دي كلها ؟ دي حكمة عظيمة واللي مطلعها اكيد سبارسجي او افيونجي !
طبعا دي اكيد كانت حكمة كل فرد مجلس شعب في دايرته وتلاقيها شعار حملته الانتخابية كمان لانه بيستندل مع كل ولاد الدايرة.

وعشان الواحد يعيش مستريح وميدخلش نفسه في اي مشكلة او يحاول حتي انه يكون ايجابي مرة تلاقي جمل بتترمي عليه زي "انت هتفتح علي نفسك فاتوحة؟؟" "انت هتفتح طاقة جهنم" "انت دخلت عش الدبابير" "انت رحت للنار برجليك" ! طبعا اللي يسمع الجمل دي اكيد يترعب وميحاولش يكمل اللي كان ناوي يعمله لان الجمل نفسها مرعبة وتحس ان توفيق الدقن بيهمسلك بيها في ودانك !


وعشان عدم الإلتزام بالمواعيد يكون مبرر وشكله حلو كده بنحاول نبتكر جمل رنانة عشان التأخير يبقي لذيذ ! زي مثلا "الغايب حجته معاه" او الجملة الشهيرة "كل تأخيرة وفيها خيرة" ومش عارف مين قال ان كل تأخيرة وفيها خيرة ؟ دي جملة خرف واي كلام ده التأخير عن المواعيد مش بس بينرفز ده ساعات بيتسبب في مشاكل لا حصر لها ..قال فيها خيرة قال ..نفسي اعرف مين اول واحد طلع الجمل دي لانه يستحق حكم عسكري !


يعني عندنا كمية جمل سلبية توقف المراكب السايرة زي ما بيقولوا ..يعني اكيد بكمية الجمل دي كان لازم مصر تتأخر في الثورة تلاتين سنة ..دي جمل وأمثلة تحس انها صناعة النظام فعلا !