الإنسان ولعبة الحـظ

انت بتؤمن بالحظ ؟ هل فعلا قيراط حظ ولا فدان شطارة ولا ده مثل مش صحيح ؟ وهل الإنسان ممكن يتولد محظوظ او مش محظوظ ؟؟

حاجات كتير قوي بنشوفها في حياتنا وبننسبها للحظ وفعلا الحظ ليه دور كبير في حياتنا وساعات بيكون الحظ هو العوامل المحيطة نفسها يعني مثلا لو واحد عبقري اتولد في وسط اسرة فقيرة في العشوائيات
الظروف المحيطة دي حواليه مش هتديه الفرصة انه يدخل اكبر جامعة مثلا او يبقي عالم مشهور حتي لو كانت عنده العقلية دي لكن الامكانيات مش هتساعده ويطلع واحد اقل منه كفاءة بس معاه الامكانيات دي واتولد لقي كل شئ متاح هيعمل كل شئ ممكن بسهولة تامة لأن مافيش عائق معين حتي لو هيعيد التجربة مرة واتنين وتلاتة لكن في الاخر هينجح في اللي بيعمله..!

في مثل شهير بيقول :
“Good luck beats early rising”

وفي امثلة كتير قوي عن الحظ وتجارب وخبرات بعض الشخصيات بتتكلم عن الحظ زي مثلا رجل الاعمال الشهير "دونالد ترامب" بيقول عن الحظ جملة غريبة جدا لرجل اعمال ناجح زي ده ومن انجح رجال الاعمال حول العالم بيقول "الحظ هو كل شئ في الحياة" !!
يعني في ناس تقول ان اللي يقول جملة زي دي بيتحجج بانه موصلش لهدفه ولكن اكيد دونالد ترامب عدي اهداف وطموحات معظم الناس في العالم ولكن جملة غريبة جدا انها تطلع منه برغم نجاحه ده لكن مافيش علاقة عكسية بين النجاح والحظ بالعكس دي طردية في احوال كتير.

بيل جيتس نفسه قال الحظ لعب دور كبير جدا في حياته وقال في جامعة كولومبيا "انا كنت محظوظ كتير جدا في الحياة..محظوظ لان كان عندي والدين وفروا ليا البيئة المناسبة اللي خلتني اشتري كل الكتب اللي كنت بحتاجها ومحظوظ اني اتولدت وعندي شغف بعمل البرامج ومحظوظ حتي في توقيت اختراعي بدرجة كبيرة لانه كان طفرة في العالم..يعين الحظ هو عامل اساسي في حياتي مقدرش انكره" !

"نيوتن" مثلا كان هيعمل ايه لو مكانتش التفاحة وقعت علي راسه ؟؟ هل ده حظ ولا قدرة ؟؟ الاتنين مع بعض لانه كان هيفضل نايم تحت الشجرة عادي ويصحي يرجع بيته لو مكانتش التفاحة وقعت فوقه واكتشف قانون الجاذبية بسبب التفاحة دي !

كتير جدا من المطربين العرب او الاجانب بيتكلموا عن دور الحظ في حياتهم وازاي المطرب "ايمنيم" مطرب الراب الشهير بيتكلم عن الحظ وانه كان فقير جدا ومتغيرتش حياته الا لما قابل بالصدفة واحد اسمه "دري" كان نفسه يقابله من زمان وقاله انت لازم تغني وشجعه وامن بموهبته واتغيرت حياته تماما وبقي مليونير كبير واشهر مطربين الغرب !

وطبعا لعيبة الكورة كمان كتير منهم الحظ ليه دور في حياته ومثلا اللاعب "رضا عبد العال" كان ليه موقف شهير اما راح نادي وقالوا انه مينفعش فراح النادي التاني وتألق وبقي اشهر لاعبين مصر في فترة وده طبعا قلة خبرة او حظ سئ من النادي اللي اختبره الاول.

اغتيال السادات نفسه كان فيه حظ كتير بصرف النظر عن التخطيط اللي خططه اللي قتلوه لكن انه ميلبسش الملابس الواقية في اليوم ده بالذات رغم انه بيلبسها قبل كده وانه يقولهم مش مهم تأمين مكان كذا وكذا وانه متطمن رغم كل التحذيرات اللي جاتله دي فده فيه كتير من الحظ للي قتلوه لان لو مكانش ده حصل ولا كان هيموت ابدا يعني هو اكنه مات بايده هو ..قدر او حظ !


المعلقين المصريين كتير منهم اتكلم عن دور الحظ في حياته وقال انه كان مجرد تجربة اثناء انشغال معلق اخر وقاله مثلا "علق انت الماتش ده " كتجربة يعني وبيكون دخل التعليق بالصدفة وكتير قوي بنسمع كلمة "دخلت المجال بالصدفة" من نجوم باعداد كبيرة جدا سواء غناء او طرب او رياضة.

اما عن عالم الانترنت بقي والحظ فحدث ولا حرج يعني مثلا فيديو شهير قوي لطفل بيعض طفل تاني واسمه "شارلي" هو مجرد عضة وفيديو عادي جدا لكن الفيديو اصبح من اكثر المشاهدات في تاريخ اليوتيوب وكمان التقوا مع الطفل ده في مقابلات تليفزيونة في اشهر برامج امريكا ووقعوا معاه عقود لاعلانات !!! بسبب عضة علي الانترنت !!
وطفل تاني بيرقص بس علي اغنية لبون جوفي ابوه بيعزفها برضه كل البرامج الامريكية استضافت الاب والابن ده وطفل بيلعب كورة قدم في فيدو علي الانترنت وعمره سنة تقريبا وصل الامر ان نادي كبير وقع معاه عقد وكان ده اصغر عقد للاعب كورة في العالم !

والطفل اللي استعانت بيه "جنيفر انستون" في اعلان المياه بتاعها الاخير رغم ان كل اللي بيعمله انه بيغني ويرقص حواجبه ويلزق وشه في الكاميرا لدرجة ان الناس كانت بتشتمه وتقوله ايه اللي بتعمله ده لكن فيديوهاته انتشرت بسبب الحظ وشافوها النجوم فاستعانت بيه جنيفر انستون في اعلان وغني معاه مطربين كبار زي "فيفتي سنت" و "دفيد جويتا" واخرون !!

الاحداث الاخيرة في كندا والشغب الجماهيري والقبلة الشهيرة اللي كانت وسط الشغب ده لولد بيبوس بنت علي الارض في وسط الشغب وكانت الصورة اللي التقطت بالصدفة والفيديو ده حديث العالم كله لدرجة ان برضه وقعوا معاهم عقود توصل لعشرة مليون دولار !! ده يتقال انه ايه غير الحظ ؟؟



الحظ من قديم الزمن والناس بتؤمن بيه لدرجة ان كان عند الرومان الهة للحظ واسمها
goddess Fortuna
اما في اليابان فعندهم تمثال بتاع "الالهة السبعة المحظوظة" وكل واحد منهم ليه اسم هناك وتمثال شهير في اليابان.

والحظ طبعا ليه رموز كيتر وبعضها غريب جدا وبعضها عادي مثلا زي السمكة عند القدماء المصريين او رقم سبعة عند الصينين او الخنزير عند الصين والمانيا
والحظ مرتبط في الغرب ارتباط كبير بالمقامرة والمراهنة طبعا لانها منتشرة بشكل كبير في بعض النوادي المباح فيها الكلام ده بشكل علني طبعا لدرجة ان بيظهر مصطلح شهير اسمه
Monte Carlo fallacy
معني الجملة دي ايه ؟ ان المقامر ساعات بيعتقد ان ظهور مثلا "الكتابة" سبع مرات ورا بعض معناه ان "الملك" المرة الجاية قرب قوي ظهوره..وده طبعا مش شرط ولكن ده في اعتقاد المراهن او المقامر ودي من احدي نظريات الحظ والمقامرة في الخارج اللي ليهم عشرات النظريات في الحظ والمراهنة اللي بتعتمد عليها وبتؤمن بيها شركات المراهنات وبتستعين بخبراء نفسيين لمعرفة نفسية المراهن عشان يكسبوا من وراهم دهب.

ودايما بيكون الشك والارتياب هم اساس لعبة المراهنات دي من شركات المراهنات نفسهم ومن العملاء ايضا والشك والارتياب كان عنوان كتاب جميل جدا للفيلسوف نيتشة وكان بيتكلم فيه عن مصطلح اسمه "الروح الحر" ومش عارف ليه حاسس ان فيه علاقة من قريب او بعيد دايما بنفسية المراهن والمقامر وليه علاقة باليقين في داخلهم بالمصطلح ده.

وفي كمان قصة شهيرة لمارك توين عن الحظ واسمها "الحظ" عن واحد حقق كل انجازات حياته عن طريق الحظ فقط وذاعت شهرته جدا رغم ان كل ما يملكه هو الحظ !
وفي كتاب الاكثر مبيعا منذ عدة سنوات
the secret
في جملة شهيرة قوي في الكتاب بتقول ان لو انت امنت بان حظك وحش وان حظك دايما هيكون وحش في المستقبل يبقي انت مش هتاخد فعلا ولن تنال الا الحظ الوحش ده اللي انت كنت بتحلم بيه !!

في كتاب بيتكلم عن الحظ بالتحديد اسمه
The Luck Factor
للكاتب "ريتشارد وايسمان"

والكتاب ده بيتكلم عن ليه بعض الناس محظوظين والناس التانية مش محظوظة وهل الانسان فعلا بيتولد محظوظ ؟؟
وعمل تجربة وجاب ناس مين اللي مشهور عنهم انهم محظوظين وناس تانية بتقول انها مش محظوظة وعملهم قرعة كده واثبت ان مافيش حاجة اسمها واحد محظوظ دايما او مولود محظوظ لان التجربة اثبتت ان مكانش في قاعدة معينة في الفوز لكن دول فازوا شوية ودول فازوا شوية بدون قاعدة او افضلية معينة ولكنه الحظ فقط.
وقال ان كل واحد منا ممكن يكون اكثر حظا لو بص للجانب المشرق او توقع دايما انه يكون محظوظ وحسن من فرصه وتفائل.


في اديان كتير او عقائد او مذاهب في اختلاف حول موضوع الحظ زي مثلا البوذية رفضت تماما الحظ وقالت مافيش حاجة اسمها حظ في الدنيا اصلا والاسلام ايضا يتحدث عن التفاؤل والمقدرة انما لا يزرع في الناس موضوع الحظ حتي لا يعتمدوا عليه فلا يفعلوا شئ..وقال النبي محمد "تفائلوا بالخير تجدوه" اي انه يدعو للتفائل والنظر الي الجانب المشرق ولكن ليس الاعتماد فقط علي الحظ.

يعني الحظ موجود منذ عصور وعصور وناس بتؤمن بيه وناس لا تعتقد فيه ولكن هيفضل دايما في ناس محظوظة وناس مش محظوظة وكل واحد منهم ليه قدر وليه رزق معين هياخده في الدنيا.
ولكن الحظ المفروض ميكونش شئ للاعتماد عليه وفقط ولكن الارادة برضه جانب مهم جدا ويساعدها او يدفعها الحظ .