برامج توك شو ملاكي

البرامج التليفزيونية والتوك شوز اليومين دول عنيفة قوي في الفاظها او حتي اساميها ..يعني تلاقي برنامج مثلا اسمه "لطشات شلتوت" ..طب بالذمة ده ممكن اسم برنامج اتفرج عليه ..طيب بيقولوا الملافظ سعد يعني ..يعني اسم شلتوت تقيل شوية يبقي مش طالبة معاه كمان كلمة "لطشات" ولا انت جاي تخضنا يعني بالبرنامج ؟
ولا البرامج اللي هي من نوعية "حوار صريح" اللي دايما تبدأ معاك في اول اعلان البرنامج "نحن نكشف المستور" .."نتخطي الخطوط الحمراء".."بلا قيود" ..هو في ايه بالظبط ؟؟ هو فيه حد هيقلع ع الشاشة ؟؟ ايه يا حاجة كمية البجاحة اللي في الاعلان ده ؟ اذا كان ده اعلان البرنامج امال البرنامج نفسه عام ازاي بقي ؟؟

ولا اعلان تاني بتاع برنامج للثقافة الجنسية تقول ايه بقي في مقدمة الاعلان "حب ولا جنس؟" !!!..طيب يا ستي خلي الكلام ده جوة البرنامج انما مينفعش يكون اعلان للبرنامج قدام الناس كلها ويسأل طبعا طفل صغير قاعد يشوف القناة وشاف الاعلان ويقول لامه او ابوه "ماما ماما هو حب ولا جنس؟" وهو مش فاهم هو بيقول ايه وامه طبعا تقوله "اخرررررررس يا كلب " !! يبقي الحق علي مين بقي ؟


ولا الاعلان بتاع قناة التحرير..تيجي تفتح القناة من هنا تلاقي في وشك صوت تخين بيقول "هل انت فاسد؟" .."هل انت مرتشي؟" ..يبقي متشوفش قناة التحرير !!!
ايه العنف في الاعلان ده ؟ دي دخلة اصلا انك تسأل المشاهد اول ما يقعد يشوف القناة "هل انت فاسد" !! ما انت لو هتبعد الفاسدين علي القناة يبقي نسبة المشاهدة مش هتبقي قوية اوي يعني !!

ولا سلوك الضيف علي البرنامج نفسه او المتصل بعد الثورة اتغيرت قوي !! كان الاول بيقول "لو سمحت ليا مداخلة" دلوقتي بقي اتطور قوي المتصل وبقي ثوري حتي ع التليفون وبيقول "لو سمحت انا ليا اربع اسئلة وملحوظتين وعتاب ومش عايز حد يقاطعني " !!!
يعني ده انت كده يا عم المتصل هتاخد ولا نص البرنامج علي ما تخلص اسئلتك لوحدها والغريبة ان دايما المذيع يقعد يفاصله في الاسئلة ويقوله خليهم سؤالين بس عشان وقت البرنامج والتاني يقوله ماشي يا افندم بس محدش يقاطعني يقوله "اتفضل يا استاذ محمود"
يقوله"محدش يقاطعني والنبي"
يقوله" يا سيدي ماشي خش في الموضوع"
يقوله "بس ارجو ان محدش يقاطعني"
يقوله "يا عم ابوس ايدك خش في الموضوع"
لحد ما يفوت الوقت كله وهو عمال يؤكد ان ياريت محدش يقاطعه اصلا رغم ان هو اللي بيقاطع نفسه اساسا .

وكترت قوي البرامج الغريبة الاسامي برضه زي اسامي البرامج اللي تبدأ بكلمة "صالون" ! مثلا "صالون المستكاوي" او اي صالون تاني او الصالون الثقافي او غيره وكأننا قاعدين عند حلاق !!
صالون ايه بس يا عم الحاج متشوف اي اسم عدل للبرنامج وحياة ابوك مش كفاية كلمة "اليوم" اللي بقت في كل برامج مصر تقريبا ! كل البرامج بتقلد بعض في كلمة اليوم .."القاهرة اليوم" "الحياة اليوم" وغيره كتير جدا كل البرامج بقت "اليوم" عشان يحسسك ان البرنامج مش بايت يعني ولسه طازة مع انه بايت وقديم واخباره كلها بايتة وده في معظم التوك شوز اللي بقت اداة للنقل من علي الانترنت من مواقع الاخبار كأن واحد بس بيقرالي الاخبار اللي ع النت طيب ما انا بعرف ادخل يا سيدي واشوف انا الاخبار بنفسي طالما هتقرالي الاخبار يعني انا هقراها اسهل ..!

ونفس الفكرة والتقليد في فكرة المواعيد زي مثلا برنامج "العاشرة مساءا" ظهر بعدها "السادسة مساءا" وفي كمان "الحياة الان" ده بقي طبعا عشان يقول انه طازة اكتر من الحياة اليوم بقي .

وكل واحد بقي واخد برنامجه ملاكي يعني واخد اسمه لزقه ع البرنامج قال يعني هو كده زي توك شو برة زي مثلا "الكورة مع شوبير" او "ساعة مع شريف" وانتشرت قوي في الفترة الاخيرة البرامج بتاعة "فهمني" او "عايز افهم" اللي هي يجيبلك مصطلح ويقعد يشرحلك فيه دقيقتين كده ولاحظنا انتشارها قوي بعد الثورة النوعية دي برضه من البرامج لكنها مفيدة جدا.

وبستغرب جدا من تقسيم الرامج رجالي وحريمي زي مثلا "كلام ستات" او "الستات ميعرفوش يكدبوا" والبرامج دي ايه يعني؟؟طيب اذا كان المتصلين اكيد رجالة ومعظم اللي بيتفرجوا رجالة ..هو يعني في برامج رجالي بس؟؟ طيب ما كل برامج التوك شو بيتفرج عليها الاسرة كلها اشمعني فجاة كل البرامج عايزة تعيش جو الحريمي يعني ؟؟ طيب برامج الطبخ ماشي مع ان الطباخين معظمهم رجالة اساسا انما برامج سياسة للستات فقط او توك شو حريمي فقط ؟؟ هو في برامج زي "تيرا بانكس شو" او غيرها من البرامج برة اللي هي يغلب عليها الطابع الحريمي ولكن الاسرة كلها تشاهدها عادي مبتحطش علي نفسها صفة ان ده برنامج حريمي فقط لكن عندنا في مصر تحس ان البرنامج فعلا للستات فقط والمذيعة بتستغرب ان راجل بيتصل كمان !!

واساسا معادش في حاجة اسمها حريمي ورجالي.. هو في كل اعلانات الشامبو دايما يجيب واحدة بنت وشعرها ناعم لدرجةان اطفال بيسألوا "هو الشامبو ده للبنات بس؟" مع ان اساسا في رجالة اليومين دول بيحطوا "فير اند لفلي" !!! وتلاقيه ماشي في البيت بتاعه حاطط ماسك علي وشه وبيقول بحافظ علي بشرتي !!
ومرة الحلاق بيقول لواحد يوم فرحه "احطلك ماسك بقي واظبطلك بشرتك؟" رد عليه العريس وقاله "ليه شايفني سوسن؟" !!!

اما اسهل نوعية فعلا من البرامج دلوقتي هي برامج "اليوتيوب" و "الفيس بوك" !! ودي نوعية برامج انتشرت قوي الفترة الاخيرة الظاهر كده لضحايا شركات الانترنت اللي مبيعرفوش يفتحوا اليوتيوب من كتر بطئ الخدمة فييجي الشاب اللي عنده انترنت سريع جدا ويفتح اليوتيوب ويقول والله فكرة ما افتح برنامج كل فكرته اني احط فيديوهات للناس وخلاص !! وواحد تاني يقول اعمل برنامج كل فكرته اني اقرا شوية تعليقات ع الفيس بوك بس !! وبقت حاجة حلوة قوي طيب ما كل واحد يروح يشترك ويشتري لاب توب ويعمله برنامج من النوعية دي !!

والبرامج الاسهل منها بقي بتاعة الجرايد ! كل واحد يفتح برنامج اليومين دول يجيب شوية جرايد ويقرالنا العناوين وكل الموضوع انه لحق اشتري جرايد بكرة قبلنا يعني !!لا راجل جامد فعلا !

وطبعا نوعية "الدرابندوخ الدرابندوخ" من البرامج موجودة بعنف سواء في الرياضة او البورصة بالذات زي موضوع المحلل الفني في البورصة اللي بعض الناس بتتاجر بيه وتعمل زي احمد زكي في فيلم "البيضة والحجر" او التحليل الرياضي اللي كل الناس عملت استديو تحليلي وقاعدة تتكلم عن اللياقة الذهنية واللياقة البدنية واللياقة العاطفية ونظرية الجهد ونظرية التلاتين دقيقة الاخيرة وشوية نظريات بيقعدوا يحللوها لحد مطلع الفجر وفين يوجعك يا مشاهدنا الكريم !!

لا والبرامج بتكدب كمان يعني مرة بعت لبرنامج اسال الضيفة اللي معاه علي حاجة
المذيع يمسك الرسالة ويقول "معتز بيقول ايه الجمال ده والنهاردة تسريحتك هايلة بجد يا نجمة"
اييييه؟؟انا قولت كده ؟؟؟ ده انا بقول انها مبتظهرش كتير ع الشاشة وملهاش حظ !!! يا ابن الفشااارة.

وبعض البرامج في التقارير بتاعتها بتجيب ناس وتقولهم "بص احنا هنسالك علي كذا وانت هتجاوب وتقول كذا كذا" وده موجود خصوصا في البرامج الرياضية والبرامج السياسية ما قبل الثورة كانت كلها فبركة اما بييجوا ياخدوا رأي الشارع طبعا .

ياريت يخفوا ع الناس شوية من الاسامي العجيبة دي للبرامج والتقارير المتفبركة كمان لان برامج التوك شوز دي بقت مرطرطة قوي واكتر م الهم ع القلب وكل يومين تفتح قناة جديدة وتدينا واحد توك شو تحت العضل كده.