جـوائز الثورة المصرية

مين اللي صنع الثورة ؟ الشعب المصري كله بجميع اطيافه
لكن في شخصيات ومواقف واعمال فنية كمان تستحق تاخد "جوائز الثورة" لو كان في حاجة اسمها جوائز الثورة فعلا
شخصيات في السنوات الاخيرة غيرت شكل المصريين وتفكيرهم ووعيهم الفني والثقافي ومواقف كمان ادت لحدوث الثورة او ضغطت ع الزناد بعد ما كانت الايادي مرتعشة
لكن لو وزعنا الجوائز دي فعلا بعد نجاح الثورة المصرية العظيمة يبقي مين يستحقها ؟ هنقول كل اسم وكل عمل اثر او ادي ولو بدور بسيط في حدوث الثورة المصرية :



مخرج الثورة: خالد يوسف

طبعا باعمال زي اللي عملها في الفترة الاخيرة "حين ميسرة" او "هي فوضي" نقدر نقول عليه مخرج الثورة او المخرج الاشد تاثيرا في الفترة الاخيرة لانه قدم اعمال رائعة جدا بتتكلم عن كل مشاكل داخل المجتمع المصري كانه رصد لكل شئ بيحصل جوة المجتمع او نظرة شاملة ليه بدون محاولة للعلاج .
بصرف النظر عن عشقي للمخرج خالد يوسف وعبقريته لكن ده مش تحيز لكن فعلا كل حاجة فنية تحس انها مهدت للثورة كانت علي ايده .




مطرب الثورة : احمد سعد

باغنية زي "مش باقي مني" يبقي اكيد هو مطرب الثورة والقصيدة اللي غناها دي كانت للشاعر العبقري جمال بخيت وهو بيقول :

"لو كنت يوم هلمحك وانتي بتوطي..
في معركة مافيهاش ولا طيارات ولا جيش
وانتي في طابور العيش..
بتبوسي ايد الزمن ينولك لقمة..
من حقك المشروع..
مش باقي مني غير شهقة في زمن مقطوع
وانا صوتي مش مسموع
يا حلمنا الموجوع
من المرور ممنوع"

والقصيدة كلها تحفة فنية وابداع بلا حدود لجمال بخيت.




فيلم الثورة : "دكان شحاتة"

هتلاحظ ان كل حاجة في الفترة الاخيرة مرتبطة بخالد يوسف بشكل او باخر ..الفيلم ده كان فيه اسقاطات بالجملة بل ان بطل الفيلم ادي دور "مصر" جسد شخصية مصر واخر مشهد وهو بيموت غدر كان مشهد اكثر من رائع والفيلم فعلا يبكيك علي حال مصر في عهد مبارك




ممثل الثورة: عمرو سعد :

اكيد بطل عمل فيم زي "حين ميسرة" و "دكان شحاتة" يبقي اكيد هو ممثل الثورة وربما اصرار خالد يوسف علي اختياره لروعة ادائه وافضل مشهد كان في دكان شحاتة وهو بيستحمي ويبكي علي فراق والده مشهد اسطوري وتمثيل عبقري
واسقاط تاني في الفيلم وابوه بيقوله "داري الشرخ في الحيطة يا واد" وهو بيشاور علي صورة عبد الناصر عشان يداري الشرخ ورد عليه عمرو سعد وقال "الشرخ كبير قوي يا ابا مش هتنفع الصورة تداريه" !
وكمان "خالد صالح" في فيلم هي فوضي ممكن يكون ممثل الثورة في دور" حاتم" امين الشرطة المرتشي الفاسد .




موقف الثورة : "خليهم يتسلوا" :

مواقف حسني كتير جدا وفساده ملوش عدد لكن ده كان موقف بدأ يخلق الثورة فعلا في داخل كل مصري ويمكن لو كان حسني اعترف بان الانتخابات دي كانت اكثر الانتخابات تزويرا علي مستوي العالم ولازم يعيدها مكانتش هتحصل الثورة وكان ممكن ينجي بجرائمه وخطاياه لكن المشكلة انه كان بجح جدا وقال بكل تحدي للبرلمان الموازي "خليهم يتسلوا" كانهم مجانين وهو العاقل مثلا




رمز الثورة: خالد سعيد :

الشهيد خالد سعيد بوفاته اشعل شرارة الثورة الاولي والخروج من القمقم اللي رسمه لينا الجبروت والطاغوت المباركي
الناس فاض بيها من معاملة الداخلية وتعذيبهم باوامر مبارك وكانت شعلة الثورة اللي بدأت ومش هتنطفي



مشهد الثورة : صلاة المسلمين يوم الجمعة ووراهم المسيحين بيحموهم :

اجمل مشهد وحدة وطنية حصل كان في الثورة ليثبت ان الفتنة كذبة كبيرة صنعها العادلي وجهازه الفاسد وان وقت الشدة كل المصريين واقفين اخوات




مسرحية الثورة : قهوة سادة

اجمل مسرحية اتكلمت عن الوضع المصري في السنوات اللي فاتوا في قالب من الكوميديا السوداء وكان الاداء فيها راقي جدا ومعبر عن الوضع الاقتصادي والثقافي وكل مناحي الحياة.




صحفيين الثورة: ابراهيم عيسي و عبد الحليم قنديل :

طبعا كان في كتاب كتير معارضين للنظام من سنوات لكن دول ابرز كاتبين كانوا معارضين بشكل عدائي قاطع ورافضين تماما كلمة مبارك او نظامه وكانوا مع الحق دايما عمرهم ما كتبوا كلمة في مدح هذا النظام الفاسد واتعرضوا لاضرار كتير نتيجة مقالاتهم الثورية المدوية ضد النظام.




كتاب الثورة: "لماذا لا يثور المصريين" :

برضه كان في كتب كتير كانها كانت بتسأل امتي هتثوروا بقي او اتكلمت عن الوضع المصري بشكل فيه توقع وقراءة للي هيحصل وكان في كتاب "جمهورية ال مبارك" لمحمد طعيمة من الكتب الهامة اللي اتكلمت عن تفاصيل ملف التوريث .
ولكن كان كتاب علاء الاسواني هام جدا في تحديد ايه اسباب عدم الثورة عند المصريين وتحليل لشخصية المصري وقدرته علي التأقلم مع اي وضع صعب.



جريدة الثورة : الدستور :

اكيد بلا شك ان جريدة الدستور كانت اكبر جريدة معارضة للنظام من اول ابراهيم عيسي لحد اصغر سن صحفي فيها معارضة بشكل مستمر معارضة يومية قوية لا تقبل انحناء في الرأي ولا تبديل في المواقف
جريدة من اقوي الصحف اللي ظهرت علي الساحة لاظهار فساد النظام واظهار النوم في العسل اللي بتعيشه الجرائد القومية اللي كانت منافقة جدا ايام النظام السابق .




شخصيات ادت للثورة : احمد عز وصفوت الشريف :

دول فعلا اللي اسقطوا النظام مش بثورتهم لكن بفسادهم ..كل النظام متسيب فاسد لكن صفوت الشريف واحمد عز هم ملوك الفساد وطاغوت العصر
تزوير سرقة فضائح رشاوي كل الموبقات هتلاقيها في الشخصيتين دول وخصوصا صفوت الشريف من انظمة قبل مبارك كمان ليه جرايمه وملفه الخاص الملئ بالصفحات السوداء.




شخصيات شهيرة في الثورة : وائل غنيم والبرادعي :

طبعا الشعب المصري كله كان السبب في الثورة لكن كان في بعض الشخصيات كانت كل يوم اسمها بيتقال وكانت الابرز علي صفحات الجرايد كلها يوميا زي البرادعي اللي قال ان التغيير اصبح حتمي ووائل غنيم اللي كان صاحب صفحة كلنا خالد سعيد.




شرارة الثورة : المحلة والسويس :

اكيد المدينتين دول هم اول شرارة في الثورة وسقط فيهم ضحايا كتير جدا وخصوصا المحلة اللي بدأت الثورة من ايام ما حركة 6 ابريل قادت اول حركة ثورية في المحلة للاضطهاد اللي اتعرضوا ليه وكان فيه احتجاجات واسعة في المحلة منذ عدة سنوات وكان اول مرة نشوف الاحتجاجات القوية بالشكل ده ضد نظام مبارك.




ادوات الثورة : فيس بوك وتويتر :

طبعا دي اول الادوات اللي استخدمها الشباب كطريقة للتواصل وحشد الحشود للثورة علي الفساد ونجحوا في استخدامها بشكل فعال وادت للنتيجة المرجوة فعلا وخصوصا صفحة كلنا خالد سعيد اللي حشدت اعداد ضخمة جدا للنزول الي التحرير .




جائزة الثورة : الشعب المصري :

بطريقة سلمية ابهرت العالم كله ورغم كل القمع والرصاص والعنف من الامن الا ان الانتصار كان حليف الشعب المصري العظيم في ثورته علي الاستعباد والمهانة والخنوع ويستحق جائزة الثورة بل انه يستحق جائزة نوبل السلام.