جايز بتفرق بسمتك

جايز بتفرق بسمتك
جايز بتفرق دمعتك
لما حنينك يبتسم
يفرد جناحه ويتقسم
وسط الحكاوي وخطوتك..
لما تشوف نورالوجود..
تنهيدة للشمس وأمل..
يرحل من الكتف الجبل..
ويدوب في الوان دمعتك..
من وسط شباكي القديم..
جايز بيتسرسب حنين..
ويقولي غني لقسمتك..
جايز تكون السندباد..
نبضك بساطك ع البعاد..
حاضن رحيلها وضلها..
شامم وجودها وزهرها..
حاسس باعصار نسمتك..
تجري الملايكة مزقططة..
في جدار قلوبكوا مخبطة..
وتنام علي شهد الانين..
تصنع سريرها من السنين..
والعشق يصبح دنيتك..
جايز في غربة تشوف دموع..
حواليك ضلام محتاج شموع..
حواليك بشر مسك الختام..
لكن وطن من غير حنان..
وغريق في احضان وحدتك..
جايز تكون وسط الالوف..
ما تحس بيهم او تشوف..
وساعات تكون قاعد وحيد..
وتحس حبك من بعيد..
والوحدة تصبح قوتك..
جايز تقوم تحضن قلم..
تملاه بكلامك والألم..
لما ورقتك تشتكي..
وتقول كفاية يا دمعتي..
تجلدها اكتر كلمتك..
جايز تدمع ع البلد..
علي كل بنت مع الولد..
مع انها رايحة لوجود..
بشبابها رايحة للخلود..
حتي ولو استشهدت..
عمر البلد ما استسلمت..
لكن حنينك قيدك..
جايز ايديك تلمس جناح..
عصفور وطاير في البراح..
يجمعكم الاحساس سوا..
انت تخاف لحسن يطير..
هو يخاف يصبح اسير..
وتدوب ساعتها في رقته..
مع انه خايف قسوتك..
ضحكتها تركيبة وجع..
جايز تطبطب ع الوجع..
الخوف سكون من ضلعها..
لو حتي غابت شمسها..
سابت طريقها ودنيتك..
جايز بتتبسم طريق..
ساير عليه اخر صديق..
عايز تدوق طعم الوفا..
مع ان وحدتك الدفا..
والناس شجونها في غنوتك..
جايز يكون قطر الحياة..
قضبانه بلغت منتهاه..
لما ارتويت بالعشق موت..
وسمعت صوتها في كل صوت..
وملكت دنيا في قبضتك..
جايز تكون في الغمازات..
أحلام ولاد ويا البنات..
بسمات حكيمة قصيرة..
ضحكات طويلة مسكرة..
ألحان علي عود قسمتك..
اياك تكون قصة في ورق..
ومصيرها ترتاح في الغرق..
خليك أمل زهرة صباح..
لو فتحت تنده رياح..
واسكن علي اوراق زهرتك..