نداء من جيل ثورة يناير الي جيل توفيق الحكيم وجيل اهالينا..انتم علي راسنا من فوق

سقراط قال :
Children today are tyrants. They contradict their parents, gobble their food, and tyrannize their teachers.

بيتكلم عن ظلم الجيل الاصغر لأهاليهم وكتير من الفلاسفة اتكلموا عن النقطة دي وكتير حتي من الحواديت اللي كانت بتتقال للأطفال وبعض الاساطير بتحكي عن عواقب اللي مبيسمعش كلام اهله وازاي رؤيتهم بتكون أعمق ونظرتهم أبعد وازاي هم فعلا خايفين عليك اكتر منك.

من فترة قصيرة شوفت واحد علي جروب في الفيس بوك كاتب كلام غريب جدا عن جيل أهالينا ..وبيقولهم انتوا جيل مشيتوا جنب الحيطة واحنا جيل الثورة !
وبدأ يعمم ويكتب كلام مقدرش اكتب بقيته لاني لقيت فيه درجة عالية من التبجح علي الاهالي والجيل الاكبر وكأنهم مش هم اللي بيربوا بل هم اللي بيدمروا أبنائهم مثلا ..وكأن المفروض عشان افتخر بالثورة أذل الجيل الاكبر واقوله انت معملتش حاجة طوال التلاتين سنة دي وانا كشاب عملت كل حاجة ورفضت الظلم ..وهنا هو غلط وعمم لان كتير منا لجيل الاكبر نزل الميدان وكان رافض الظلم طول السنين اللي فاتت وفيه شباب كتير ضد الثورة اصلا لحد دلوقتي يعني الحكاية مش بالجيل ولا بالسن .



من المغالطات المجتمعية الشائعة التعميم او تحديدا ما يسمي
hasty generalization

هو من صفات المتشائمين فقط وللأسف كتير بدأ يعمم علي كل الجيل الكبير زي ما الجيل الأكبر كان بيعمم علي الجيل الأصغر برضه وبيقول "دول مش فالحين في حاجة غير الكورة" .

والحقيقة ان ولا دول ولا دول صح..الاتنين غلطانين ..يعني الجيل الكبير مش سلبي وضعيف بل حاول كتير جدا في التغيير حتي لو عن طريق مقالات ومهاجمة النظام في البرامج او عن طريق العمل السياسي
وكل واحد فيان عارف راجل كبير ومعارض بقاله سنين طويلة وبيكره النظام ..
وفي نفس الوقت مينفعش نقول علي جيل الشباب انه مش همه حاجة في حياته لانه برضه جيل حس بالقهر والظلم وشايف كل البلاد اللي حواليه ليها تجارب وبتتقدم الا بلده وخصوصا انه كانت قدامه فرص التكنولوجيا اكبر كمان من الجيل القديم فبدأ يقارن بين التجارب وحس بان مصر تستحق مكانة اكبر .

يعني جيل 73 لم يكن متخاذلا واجيال عانت المعتقلات والتعذيب بالكرابيج وبأقسي الاساليب وجيل الابطال رأفت الهجان والشاذلي لم يكن من المتخاذلين..ومينفعش نقول زي البعض ان حتي ايام الرسول اللي صدقوه في الاول شباب وهاجموه الكبار لان ده تعميم خاطئ برضه وزي ما في شيوخ مكة اذلوه في شيوخ اعزوا العرب ورفعوا راسهم لفوق زي قيمة هانئ ابن عروة في قبيلته او غيره وشوفنا كتير من كبار السن كانوا بيحاربوا في جيش الاسلام ومقالوش احنا كبرنا والقصائد العربية هي أولي من كلامي انها تتكلم عن قيمة وحكمة شيوخ العرب وفي ايام محمد علي كمان وشوفوا قيمة شيوخ العرب علي مر التاريخ والعصور وازاي كان الاكبر سنا في القبيلة هو قاضي المنازعات

ولم يكن ينكر قيمة الشيوخ وحكمتهم قديما الا من يتحدثون عن كهولتهم ساخرين في القصائد مثل :

قالت جهيمي انني لا ابغيه
اراه شيخا عاريا تراقيه
محمرة من كبر مأقيه
ترعيه قد ذرأت مجاليه
يقلي الغواني والغواني تقليه

وزي ما الرسول هاجموه عواجير اظن احنا عافين هو قال ايه عن احترام الوالدين وكبار السن والا كان عمل احاديث لمهاجمتهم بقي افضل لانهم هاجموه "ليس منا من لم يرحم كبيرنا".

اهالينا دول اللي احنا اتاثرنا بزمانهم وبناخد حق سنين وكل اللي احنا بنقوم بيه دلوقتي هو استنساخ للي قام بيه جيل 19 وجيل 52 وغيره من اجيال الثورات مافيش جديد يعني بس هم مذلوش اهلهم بده ورحمه شيبتهم

اول مرة في حياتي اعرف ان الثورات هي حرب اجيال مش نوع لاخد الحق للاجيال دي !وممكن نقول علي العكس تماما هم جيل الصلاة والاحترام والاخلاق والقبقاب واحنا جيل اليوتيوب والافلام والراب
هم جيل توفيق الحكيم واحنا جيل توفيق عكاشة
هم جيل الست واحنا جيل الست لما !

 احنا فعلا معندناش حاجة نفخر بيها الا الثورة انما هم عندهم الوف الحاجات يفخروا بيها ويكفيهم عيشتهم في جيل توفيق الكيم وطه حسين اللي احنا دلوقتي اخرنا خالص علاء الاسواني
مسيرنا هنكبر وبعد 30 سنة هيجي ولادنا يعملوا ثورة كبيرة وهيجيلنا ديكتاتور جديد وولادنا يقولولنا كده  برضه وينسوا اننا كنا في ثورة يناير.

ياريتنا ايام النقد المحترم والاهرام بتاع زمان قوي ايام العمالقة اما كانت الكلمة تهز كيان مش مقالات تافهة وسطحية وحروب كلامية ع الفضائيات

ياريت قبل ما نلوم الجيل ده نتعلم منه كيفية النقد بأسلوب ومعلومات وليس فقط بالشتايم

عايزكوا تتخيلوا  بس توفيق الحكيم بيبص علي تويتر احد الشباب دلوقتي ولنفترض "نوارة نجم" مع احترامي لها ولكن اسلوبها في النقد لاذع ومخيف.. وبص قد ايه لغتنا العربية انهارت وبقت في الحضيض

عايزك تقارن كتاب عودة الوعي بمقالات واحد من الشباب دلوقتي وانت تعرف الفرق بين عصر جدي وعصرنا.

احنا جيل الثورة ولكن هم جيل النور والقدوة والفن اللي احنا لسه ياريت نصنعه السنين الجاية بدل سعد الصغير.
 حد يقولي انت بتدافع قوي ليه هو انت من جيلهم ؟
لا انا من جيل الشباب ولكن فرحان بالثورة وحزين علي لغة الشباب مش اكتر.

الرسول اما كان بيتكلم قدامه اتنين في المجلس كان بيبدأ بالكبير ويقول "كبر كبر".

ومشكلة المجتمع الامريكي اللي اتكلمت عنها كتير صحف عالمية هي
bully
او التهكم في المدارس الامريكية اللي بينتحر علي اثره المئات سنويا واللي منتشرة قوي في الجيل ده بشكل ملحوظ ودور التكنولوجيا في كده كبير جدا ان الجيل ده بيسخر ويتهكم علي اي شئ حتي لو اهله .

ومشكلة التربية اللي بيحاولوا يعالجوها وبيفردوا حصص كاملة ليوم الاب اللي بيجيبوا في اب كل واحد يستعرض وظيفته عشان الطالب يلاقيمنهم قدوة او مثال عايز يوصله.
وبدأوا يشرحوا دور واهمية الاسرة في اكثر من فيلم في هوليود ومن الافلام اللي بتغرس الانتماء وبتوضح دور الكبار وتاريخهم عند الغرب
the flags of our fathers

وبدل ما نلومهم بقسوة انهم خنعوا لنظام مبارك ياريت نقولهم :


يا اهالينا المحترمين :

احنا اسفين اننا مثورناش من زمان قوي عشان ناخد حقكم وندافع عن شيبتكم وقمعكم

احنا اسفين اننا سيبناكم في الهوان ده تلاتين سنة عشان نلبس البنطلون المسقط

احنا اسفين اننا افتكرنا السياسة وافتكرنا اننا عايشين في ذل بعد ما فات تلاتين سنة

احنا اسفين اننا بررنا خوفكم علينا بانه ضعف وهوان

احنا اسفين اننا اصبحنا لعبة في ايد صناع السينما انتوا عيشتوا في ايام يوسف شاهين والعمالقة واحنا جيل السبكي

انتوا جيل الاوبرا واحنا جيل بلاك تيما

بجد اعذرونا اننا اتأخرنا عليكوا كل السنين دول

ولكم كل الاحترام والتقدير

فان قمنا بثورة فانتم من كنتم سبب وجودنا لنقوم بهذه الثورة العظيمة ولا ينكر جميلكم الا جاحد.


ودايما الشخص اللي عايز يثبت انه افضل واقوي واطهر في اي حوار بيسموه بمصطلح :
The one-upper

والدراسات بتقول ان الشخصية دي اللي شايفة نفسها دايما اقوي واذكي هي بتحاول تقنع نفسها بكده قبل الاخرين لانه مهزوز !

وكل حاجة حوالينا اثرت علي شخصيتنا من اول التليفزيون وخناقات البرامج لحد خناقات الصحف والصحفيين ولغتهم الهمجية والصارخة بدون قيم ومعلومات غزيرة الا ما ندر زي الكاتب المحترم فهمي هويدي  وجلال امين وغيرهم من الجهابذة مش كتاب اليومين دول بتوع مقالات الحلق حوش .

وفي دراسة اجرتها اليونسكو قالوا فيها عن تاثير العنف في التليفزيون علي الاجيال  "أن مشاهدة الأطفال لبرامج التلفزيون لفترات غير محددة ودون رقابة وانتقائية «تفرز سلوكيات، أبرزها السلبية والأنانية وعدم التعاون مع الآخرين، وعدم الإحساس بمشاعرهم، بل والسخرية منهم، إلى جانب التقليد الأعمى للآخرين في الملبس والمأكل والمشرب والسلوك الاجتماعي وتطوير نمط حياة استهلاكي».


فعلا زي ما لاحظنا في كلمات الدراسة "سخرية منهم" ..ياريت فعلا ناخد بالنا من تربية الجيل الجديد اللي طالع لان لو رباه الجيل ده الحالي يبقي انا خايف جدا في المستقبل علي كل شئ..خايف علي القيم خايف علي المثل خايف علي التربية ..وكل اللي بيقوله الجيل الحالي علي اهاليه لسه هيشوف اضعافه من ابنائهم في المستقبل لان الايام دول .


مقالات صحف كلها الفاظ زي "حمار..منافق..أفاق..حقير..صرصار" منتظر تطلع جيل عامل ازاي؟ ما هو لازم يهاجم اهله وابوه وامه ..اما يكون كبار كتابنا او كتاب البراشوت الحاليين اللي نزلوا من السما فجأة اللي مالهومش تاريخ يبدأوا يشتموا الاجيال الاكبر ويهاجموهم بفجاجة والفاظ غبية وهمجية .

منتظر ايه من برامج تليفزيون كلها خناقات تلاقي واد في العشرينات في مناظرة مع واحد في الستينات وبيتطاول عليه دون احترام للقيمة والقامة !
الثورة كانت ثورة علي الظلم والفساد يا جماعة ولم تكن ثورة علي الأخلاق والاحترام ..
الثورة كانت ضد نظام فاسد مش لسيطرة الأصغر والأقل علما علي الاكبر بحجة انهم جيل قديم فلولي..
الثورة مجتش عشان نخلي بلال فضل مع احترامي فوق فهمي هويدي او فوق حسن نافعة لان فيه فارق ضخم ومهول بين الطرفين .
الثورة مجتش عشان تخلي نوارة نجم فوق محمد حسان لان فيه فرق كبير مع احترامي لنوارة نجم ولكن اسلوبها محتاج فعلا مراجعة لانه كره ناس كتير في الثورة باعتبارها احدي الرموز فياريت متخسرش الناس بهذا الأسلوب الفظ .

القيم ثابتة والفساد متغير..احنا عملنا ثورة عشان نغير ونزيل الفساد وندمره مش عشان نركب ع الجيل المثقف القديم بحجة انهم قدموا واحنا اللي بنفهم بس..
اخنا بس اللي فاهمين سياسة واحنا بس اللي فاهمين مصلحة البلد واحنا بس اللي شايفين بكرة هيكون ازاي انما هم جيل خلاص راحت عليه !!
ده كلام مش مظبوط لان الحكمة دايما في الجيل القديم وهيفضلوا دايما سند لينا ونور لطريقنا ومحدش هيضحك علينا وهيفضل فهمي هويدي وغيره من العظماء هم القيمة ويفضل الصحفيين الصغار تلامذة طول عمرهم حتي لو ادعوا البطولات عشان يحاولوا يقفزوا لمرحلة لسه فعلا موصلوش ليها لان ده تاريخ مش قفزة وهمية كدابة .

لازم نحترم الجيل الاكبر ونعرف انه جيل عاني كتير قوي وشاف الظلم كتير قوي فمتجيش انت دلوقتي تفهمه انك كافحت ..انت بس اتيحت ليك الوسائل اللي مكانتش عنده ..
الجيل ده كان عشان يجتمع بس في مكان ويوزع منشورات كانت قصة كبيرة واجتماعات سرية وموال كبير انما انت بتجتمع ع الفيس بوك..

فياريت لو هنقارن منقارنش بين الجيلين لانهم شافوا صعوبات اكبر بكتييير جدا مننا .
الجيل ده كان بيتشنق زمان عشان بيوزع ورقة واحدة ضد الاحتلال.
احنا خرجنا مبارك يعني ؟ هم خرجوا دول ودول وانتصروا علي دول وجيوشها..احنا كل انتصارنا علي مبارك الفاسد انما هم خرجوا انجليز وانتصروا علي اسرائيل وشافوا فترة كلها حروب ودمار وانت شوفت فترة كلها فيس بوك ودلع فمتقارنش عشان المقارنة مش في صالح جيل الشباب .

ملحوظة لكل شاب مصري وانا منهم : نقرا مع بعض كتاب لطه حسين او مقالة ليه ثم نسمع اغنية لفيروز وبعدين نشوف تاريخ عبد الناصر واحنا نعرف احنا بنتكلم عن جيل ايه بالظبط .جيل العمالقة.
فنرجو عدم التطاول بالكي بورد علي جيل الريشة والحبر والكلام والمقالات اللي كان اسلوبها بيهز الوف الناس .