رميت أنا حلمي في عيونك..قروش في البير

رميت أنا حلمي في عيونك..قروش في البير..
لقيت الحلم بيصرخ "مافيش تفسير" ..
قالولي ده حلم بيشتي في يوم صيفه..
ولكن برده موصوفله واسمه "مصير"..!
رميت بكياني في ايديكي كعود أخضر..
ضعيف وهزيل لكن برضه بيتمنظر..
يشب شوية وبيحبي علي الخاتم..
ويرجع تاني لوريدك "حنين أخضر" ..
رميت حلمي علي ايديكي بلا تفكير
وسرح الحلم في عيونك كعبد فقير..
يلف بحار عشان يشقي علي زاده..
وزاده عنيكي لو يعلم ليبقي أمير..
حضنت الشمس في بحارك وانا مجروح..
لقيت الشمس بتغني حلاوة روح..
قالتلي الشمس فين نلقي اميرتنا ؟
حزنت وطاروا دمعاتي حمام الدوح..
حفرت القبر في جبينك من المرمر..
وتبقي الموتة بتزغرط علي المنظر..
وقفت وسقطوا نبضاتي كما البللور..
علي جبينك ولا نبضة بتتكسر..
همست في ودن أحلامك بسر جميل..
لقيت الحلم توهني وماله دليل..
دي بنت ترقص الغنوة علي رموشها..
تخدر كونها وتلفه علي منديل ..
وكان الحب في عيوني حنين دبلان..
وعمر يتوه علي سنينه سراب دخان..
لكني لقيت علي عيونك امل تاني..
وضميتك علي صدري مكان وزمان..
شربت نداكي من زهرة وانا مكسوف..
وبتلفت وانا باشرب واموت م الخوف..
خايف لملاك يراقبني وانا بشرب..
ويرميني علي جبينك كلام وحروف..
علي ضيك لقيت شمسي بتتمدد..
قالتلي الحلم في عيونها بيتجدد..
جمعت ورودي من ذكري مقابلاني..
وجيت لعيونك الصافية لأستشهد..
علي خيرك ملاك حايم قتل شري..
ولكن سابني في الاخر وزاد قهري..
جعلني ملاك بلا فايدة وف الاخر..
يعود شعري كألف شيطان علي ضهري..
انا من غيرك ايه ابقي..يتيم لحروف..
كلام ولا نثر ولا انشا ولا مألوف..
لكن لغزه ومفتاحه علي ايديكي..
في خط الكف كان سري شريد بيطوف..
تعالي لقلبي في سمايا وعدي السور..
ده نبضي بنالك البسمة وتاج مسحور..
وشجرة عمري محفورة علي الذكري..
لكن الذكري محفورة ف وريد الحور..