Tuesday, March 18, 2008

شمس وقمر 8

كانت بتبكي
قالي صاحبي
شوف بتبكي ليه
قولتله
سيب الأرض تتطهر بدموعها

كل حياتي قاعد علي كرسي إعتراف
انتي الوحيدة
اللي شيلتي الفيشة
وقولتيلي مصدقاك

أنا مش هأضيع
لأنك أكيد
هتلاقيني

إنتي مش فتاة احلامي
إنتي حلم بنت جوايا
بتحلم بلون عنيكي ورموشك وكل حاجة فيكي

انا حبيتك من أول نظرة
دلوقتي عرفت ليه كنتي باصة بعيد

الورقة بتعيط
بتقولي
كل الناس شايفة اللي بتكتبه
الحبر السري مات
الحبر السري مات

كنت مخلوق وبقيت بشري وبعدين انسان وبعدين كامل وبعدين ملاك
وبعدين حبيتك

لو شفتي نفسك بعيوني
هتبقي اكبر مغرورة علي الأرض

ساعات بقول انا في كابوس
بفتكرك
بقول انا في حلم
بفتكر فراقنا
بقول انا
في الدنيا

رقيقة اوي الاغنية دي
قالتلي وهي بصالي
قولتلها فعلا ولونها يجنن
بتكلم علي عنيها

الإعتراف ليس سيد الأدلة
لأن مافيش دليل علي الإعتراف




Posted by at
Labels:
Subscribe to: Post Comments (Atom)