عايز ديموقراطية ؟؟ كلنا محتاجين ديموقراطية..بس احنا اتربينا علي الديكتاتورية في كل شئ..من اول المدرسة لحد ما بعد الجامعة..محتاجين نغير كل ده فعلا ..عشان ندوق طعم الديموقراطية اللذيذ..
شوف ازاي بقي في مصر الطفل لازم يطلع ديكتاتور اما يكبر لانه مفروض عليه كل حاجة طول عمره واول ما ينفجر هيبقي ديكتاتور كبير :
من وانت صغير مبتختارش اي حاجة حتي انك تلعب هجوم في حصة الألعاب الا لما تكون صاحب الكورة غير كده هيرموك حارس مرمي ونفسك تلعب في مركز الهجوم بس هييجي الواد التخين صاحب الكورة يلعب هجوم ودفاع وكل حاجة في الملعب !
هتروح مع ابوك تجيب شنطة المدرسة عجبتك شنطة معينة لونها حلو ابوك هيقولك "لا دي خامتها متستحملش" انا هاجيبلك التانية دي امتن منها ! يا عم طيب ما تسيبني اختار انا تستحمل ايه هو انا طالع الجبل ؟
هتروح المدرسة هيختارولك "زي موحد" تلبسه وتفضل تلبسه كل يوم ده بعد مرحلة المريلة اللي كنت بتلبسها في حضانة وكأنهم بيقولوا الطفل ده اهبل يا جدعان لبسوه المريلة .
هتنط مرحلة لفوق بقي وتدخل اولي اعدادي بقي هتقول انا كبرت وعايز اختار ..مافيش فايدة كان غيرك اشطر ..المدرس هيقولك هات لون جلاد معين للكشكول وحجم الكشكول حتي مش في اختيارك ساعات بيحدوا انهم عايزين كشكول 60 ورقة ولو جيبت كراسة تنضرب ! تعليم سوبر لوكس ع المفتاح يعني في مصر .
مش هتاخد درجات اعمال السنة الا لما تعمل لوحة للفصل ..اعمل لوحة للفصل ؟؟ مش دي تبقي رشوة ؟؟ هيقولك لا اصل جدران الفصل مقيحة ومتهالكة طيب وانا ذنبي ايه هو انا مجلس المدينة يا عم انت ؟ ماتروحوا تعالجوا ام الفصل المعفن ده هو ده فصل ينفع معاه لوحة ده ايل للسقوط اصلا .
هتسأل الأبلة "أبلة انا ليه بحفظ الجهاز التنفسي للبطة ؟؟ هو انا هشتغل فرارجي ؟؟ ده حتي افرارجي المتخصص ميعرفش هو بيدبح وخلاص" هتقولك "احفظ من سكات عشان الامتحان "
دخلت الثانوي بقي وعايز تفكر بقي وبتاع بدل الحفظ ..هتروح تاخد درس عند مدرس انجليزي سألني سؤال في القصة قولتله رأي الشخصي قاللي "ايه ده ؟ ايه اللي انت بتقوله ده ؟ "
قولتله "ده راي في القصة ؟ " هيقول "رأيك ؟؟ أنت هتتفلسف ؟؟ سمع من سكات "..!!!
هتدخل الجامعة بقي وبتاع وعايز احس براي الشخصي عايز جو ديموقراطي بقي يا جدعان عارف هيحصل ايه ؟؟..هتلاقي الناس بتقولك انت مالك يا عم ومال الكلام ده ؟ العيال بتاعة اتحاد الطلبة دول بيتراقبوا خلينا في الطيب احسن وفي الجانب الامن بلاش وجع دماغ..!
مش هتختار اي حاجة في الجامعة الا بس تاكل هامبورجر معفن بالطين بتاعه تقريبا من الكافتيريا اللي ريحتها عرق السنين من العمال اللي فيها ..وجبة كاملة قوي ان الناس تفطر هامبورجر في الجامعة !
وعايزهم بعد كده يفهموا المحاضرة ؟؟ ده بيقولك اللي بيفطر فول ما بيعرفش يركز طيب دول بقي بيفطروا هامبورجر ..لحوووووم يا بشررررر ع الصبح ؟؟؟
طيب خلصت بقي مرحلة الجامعة عايز ديموقراطية بقي ومجتمع حر وتقول رايك بكل حرية ..مافيش فايدة هيقولولك الأحزاب دي سكتها مش تمام وبلاش منها احسن او لو عايز متتجوزش هتفضل الناس تسألك يا ابني هتتجوز امتي بقي ؟ اما بالنسبة للبنت يقولوا عليها لفظ "عانس" مع ان كتير منهم اختاروا عدم الجواز بس برضه الناس هتفرض رايها بديكتاتورية ويقولك دي عانس يا عم !
عايز ديموقراطية بقي يا حلو ولا خلاص استكفيت ؟؟ لو طلعت ع المعاش بقي ورايح تنضم للعمل السياسي هيقولوا ايه عليك "بعد ما شاب ودوه الكتاب " ..تاني الناس بتفرض رأيها بديكتاتورية عليك مافيش فايدة..مهما قولت ان دي كانت رغبتك من زمان بس كنت مستني تطلع ع المعاش وكده هيقولوا ياعم "ما هو بقي راجل فاضي فقال يشغل نفسه بشوية سياسة " !
حتي النادي بتاعك ديكتاتورية كاملة لو ابوك اهلاوي هتطلع اهلاوي عافية يعني ولو عيلتك زملكاوية غالبا هتبقي زملكاوي طبعا يعني مش هتختار اي حاجة يا عم الديموقراطي .
ولو قولت وانت صغير "بابا بابا ام كلثوم دي صوتها وحش قوي ايه القرف ده متجيب شيرين ولا حد بيفهم في الغنا " هتلاقي الاجابة لا تحمد عقباها وغالبا هيتهموك انك "خرونج" مبتفهمش في الطرب ..
طيب افرض يا اخي ده راي انا ..انا شايف ان صوتها وحش ايه مشكلتك يعني ! الناس حافظة ان صوتها حلو معدش ينفع المناقشة خلاص زي ما كانوا حافظين ان حسني يعني الريس مافيش مناقشة خلاص مشنفعش ريس تاني !
"مبحبش اروح افراح " هيقولوا انت مش مجامل وقاطع الرحم !!..يا سيدي انا مبحبش اروح افراح ايه مشكلتك انا شايفها مناسبة مزيفة لا تستحق كل هذه الفرحة المبالغ فيها اول مرة اشوف واحد بيرقصوله عشان هيتفشخ في حياته !!
كمان في مرحلة الجامعة تقدر تدخل المكتبة تزود معلوماتك في موضوع معين ؟؟ هيقولوا عليك بتشتت نفسك وبتخرج عن المقرر وغالبا هتشيل المادة ..لان لازم تحفظ الكتاب يعني حتي الكتب اللي بتيجي من امريكا عشان الفهم احنا بنحفظها واكبر دليل علي كده كلمة "ملغي"..الفصل ده ملغي يا ولاد هيييييه..يعني قصده متحفظهوش مع انه مرتبط جدا بباقي موضوع الكتاب بس هو حافظ مش فاهم برضه .
الحياة كلها ديكتاتورية من اولي حضانة لحد اخر عمرك ..الديموقراطية قليلة ونادرة قوي في حياتنا خصوصا واحنا صغيرين والتحكم الكامل فينا من الابوين والمدرسة والناظر اللي عايز ساندوتشات فول عشان يخليك تغيب براحتك "ايه سفن ايه" يا بشر واللهي ! تعليم من اللي بالك بالك من نوع "من ده بكرة بقرشين " .
حتي لو في عزومة تلاقي ناس تحلف عليك عشان العشم وكده يقولك "كل دي انا حلفت" "عليا الطلاق لانت واكل الفرخة دي" ..ارحموني يا عالم وانت بتحلف ليه يعني وتقولي انا حلفت ؟
وناس تقولك "يعني ينفع تسيب الطبق كده ؟ " ايه المشكلة ؟؟ الطبق هيحس بالوحدة ولا ايه مش فاهم ؟؟..ما هو انا معدتي هتنفجر هو لازم اكل اللي حطيتهولي بالعافية هو انا قطة وانتي رميتيلها
طبق لبن ؟؟
بتاع التاكسي يقولي "يا بيه معلش هنزلك هنا اصل ده معاد الغدا بقي وانت عارف وعموما المبني خطوتين اهو خلاص" يا عم غدا ايه دلوقتي الساعة 12 ؟ هو اي كلام ؟ لو قولتله لا هتلاقيه كأنه زعل مثلا وممكن يناقشك في الاجرة بقي بعد ما كان متسامح وبيبتسم !
"ماما انا هتغدي النهاردة تونة " هتقولي طليه يا ابني مافيه اكل في التلاجة "..طيب انا عايز اسأل سؤال..هي التونة دي شراب فوار مثلا ؟؟ ما هي اكل علي فكرة ..وبعدين هو انتوا ليه بتستحقروا التونة اوي كده وبتعتبروها انها بديل الاكل ؟؟ ليه ملهاش احترامها كوجبة يعني ؟؟ واللهي لاعمل جمعية الحفاظ علي التونة علي الفيس بوك عشان ترتاحوا ..هو انا لازم اكل الصنف الموجود بالعافية..؟ لااااا انا عايز تونة طلبت معايا تونة والتونة اكل ..وعباس الضو قال التونة دي اكل .
وعايزين تبقوا ديموقراطيين ؟؟ دي الحياة كلها ديكتاتورية يا جدعان..ده انا خايف حد يختارلي الملابس الداخلية..مع ان ممكن واحد يقولك "خد البوكسر ده يعجب المدام" او لو واحدة ست البياعة تقولها "خدي البتاع ده يعجب البيه" ..يا ستي المهم يعجبني انا ..بوكسر ايه اللي يعجب المدام ؟؟ هي المدام كمان هتتحكم في البوكسر ؟؟ وبعدين مافيش مدام اصلا الحمد لله يا اخي .
كلها فترة بقي ونعيش في مجتمع ديموقراطي ونشوف شعبولا يعمل حزب سياسي ولا حاجة بس شكلها كده هتفرط منا ديموقراطية زي ما فرطت مننا ديكتاتورية كاملة ..واديها كمان حرية يا عم الحاج .
Posts
1 comment:
هههههههههههههههه موضوع جااااااااااااااااااامد يا معلم واللهي
عشرة علي عشرة بجد
Post a Comment