هـي مصر كانت فـين يا جدعـان ؟؟

هو احنا كنا ازاي قدام العالم ؟ او بنظهر باي منظر في عهد مبارك ؟ طيب هل الجرايد العالمية كانت بتتكلم عننا ؟؟ طبعااااا بتتكلم عننا بكل خييير..كانت بتقول كلام زي الفل ان شاء الله..شوية احصائيات علي

شوية اخبار يخلوا منظر مصر مسخرة بسبب مبارك واللي كان بيعمله في الناس شوف ازاي كنا بنظهر قدام العالم او كلمة مصر بتطلع ازاي لما بتطلع في خبر مهم قوي :



1- مصر من اوائل الدول في شرب الشاي :

احصائية مهمة فعلا ..وياريت الشاي ده بيقلب بتركيز يعني لا ده شاي من نشارة خشب تقريبا وبينيم الناس اكتر بسبب الروتين والملل في المصالح الحكومية ..بس طلعنا مترتبين في حاجة اهو وسبقنا دول كبيرة وسبقنا دول عالمية كتير قوي وربنا يخلي لنا شاي العروسة ويرفع مزاج الشعب



2- مصر الأولي عربيا في استخدام الفيس بوك :

اهو دي حاجة هايفة بس جت بنفع في الاخر ان الفيس بوك كان من احد محركات الثورة علي مبارك وامثاله اهو الاحصائية الهايفة دي جت بفايدة الحمد لله مع ان استخدام الفيس بوك عندنا مش اكتر من واحد بيرمي اللينك عشان يصطاد "لايك" ويمشي زي ما يكون بيرمي الصنارة وشوية شات وشوية جروبات زي "انتخبوا سعد الصغير رئيسا للجمهورية " وحاجات من دي في الغالب مش كله



3- الأوائل في مسابقة الروبوت :

مش عارف هو ليه دايما نكسب في المسابقة دي بالذات واحنا مش عارفين نصنع اي حاجة !..هو احنا عندنا الامكانيات بس مافيش حد بيساعد يعني حسني ورجالته ماشاء الله عليهم بيقمعوا ويقتلوا اي موهبة او اي مخترع في مهده حتي طالب صغير مخلص الجامعة الامريكية وهو طفل قالوا له روح خد الاعدادية !!! كنوع من الروتين الحكومي الحقير.
بس فعلا اشمعني مسابقة الروبوت ؟ للدرجة دي اول ما نشطح ننطح يعني اول حاجة هنخترعها بعد كده الروبوت مش الاستيكة اللي كنا فخورين بصناعة الاستيكة المصرية !




4- اعلان جبنة باندا :

اهو ده في جريدة "ذا صن" الانجليزية وكان من الاخبار اللي اتقرت كتير وحطوا لينكات الاعلانات كمان كلها وقالوا انه اعلان عبقري وظهرت فيه عبقرية دعائية مصرية جامدة جدا..يا سلااااام ..ده الواحد فخور بجبنة باندا اللي رفعت راس كل مصري قدام انجلترا والعالم اديني علبة يا ابني بدل ما الدبة تنط تضربنا ولا حاجة !
يعني يوم ما نظهر في جريدة عريقة زي دي نظهر عشان جبنة ؟؟ يلا خير المهم اننا ظهرنا احسن من ما فيش .




5- تزوير صورة الاهرام :

اهي دي كانت فضيحتنا اللي بجلاجل وشخاليل بجد فعلا يعني..حسني بيركب وشه وجمبه رؤساء وقادة وتيجي في صفحة رئيسية في الاهرام ..طب يا اخي داري خيبتك هو انت غاوي تركيب صور ؟؟ ده انت ريس يعني حتي اختار صورة مجهولة تركب عليها مش صورة كل العالم عارفينها !

كل الجرايد العالمية يومها اتكلمت وظهر اسم مصر خفاقا بسبب حسني بيه اصملي عليه اللي بيركب الصور علي وشوش الناس ..طب انا اركب صور ماشي اديني بحطها ع الفيس بوك ولا حاجة انما انت ريس عيب عليك في سنك ده ! خليت اسم مصر في كل الجرايد بسبب خبر تزوير جريدة مصرية عريقة لصورة ده مش بس كده ده اعتبروه من اكبر الفضايح ومصنف من اغبي الغلطات الصحفية في العالم.




6- مصر في موسوعية جينيس :

اه دخلنا موسوة جينيس كام مرة كده يعني واتكلموا علينا في العالم ..بس في حاجات غريبة شوية..يعني يقولك اكبر مساحة مجهزة لمطاعم !! وكمان 5000 طفل مصري وقفوا رفعوا علم مصر !
بس كده وقفوا رفعوا علم مصر ..واحد يقولي طب ما هو اي حد ممكن يكسر الرقم ده بانه يجيب 100 الف طفل يرفعوا علم فرنسا مثلا مش قصة يعني..اقوله يا عم هي كده موسوعة جينيس يعني مثلا دولة افريقية خدتها عشان عملوا تجمع لاكبر عدد اطفال يغسلوا ايدهم في مكان واحد !!! يبقي احنا نستاهل بقي ..
والجايزة بتاعة المطاعم دي فخر لكل مصري دليل اننا شعب اكيل يعني درجة اولي..ولازم العالم كله يعرف كده




7- الأواخر لي العالم في مستويات الشفافية ومن الأوائل في الفساد :


كل احصائية تطلع تلاقي فضيحة..لو في احصائية عن مستويات الشفافية تلاقينا في المراكز الاخيرة دايما محافظين علي مستوانا ..ولو في احصائية عن الفساد نبقي في اوائل الدول ومن الطلائع..!
حسني كان مظبطنا في كل الاحصائيات مع انه كان بيشبرق علي الناس حاجات عشان تلمعه زي الصحفيين وكده بتوع الجرايد القومية او الحزبية بتاعته انما كان المفروض يرش علي المعاهد اللي بتطلع الابحاث دي وتطلع مصر الاولي علي العالم في الشفافية..بس كان العالم كله مش هيصدق وهيقولوا طبعا رشوة وفساد.



8- الاواخر في تصنيف الجامعات :

من اول 500 جامعة في العالم ؟؟ طبعا لأ..لأن تعليم مبارك بيه كان تعليم سوبر لوكس تعليم من ابو رجلين ده اللي بينط ع الحيط..تعليم من بتاع التغذية الفاسدة والنط من ع السور والمطاوي والاتحرشات وكل اللي نفسك فيه..مبارك بيه كان راصد الظاهر ميزانية عشرة جنيه ونص للتعليم المصري او اتنين جنيه وربع للبحث العلمي بس مكانوش بيقضوا يا مبارك بيه عشان كده كنا بنطلع دايما في اواخر الجامعات في العالم مع ان دي جامعات عريقة بس منك لله ضيعت اسم وهيبة مصر




9- منتخب مصر والثلاث بطولات :

طبعا دي بقي اكبر حاجة كنا بنظهر فيها في جرايد العالم من كفر البطيخ لحد تشيلي..ايه البلاد العجيبة دي ؟ هو العالم فضي يعني ؟
انما كنا بنظهر في كل دول العالم وصحفها بموضوع التلات بطولات وتظهر كلمة "الفراعنة" خفاقة في حاجة اخيراااااا بعد عناء..كلمة الفراعنة مبتظهرش الا في الكورة وتقارير زاهي حواس !
حتي الاثار كانت ماما سوزي بتاخد منها حاجات لزوم شياكة البيت تقريبا لازم تحط قطعة اصلية اكيد دي سيدة مصر يعني مش اي كلام !
الفراعنة وابو تريكة اكتر كلمات مصرية ظهرت في العشر سنين الاخيرة في صحف العالم وشرفونا في حاجة ع الاقل بدل ما احنا مش عارفين نصنع توك توك .




10- برلسكوني المريض :

يعني برلسكوني يمسكوه في قضية مع واحدة فتاة ليل يقولوله مين دي يا واد يا برلسكوني ؟؟ يقولهم دي تبع مبارك يا عم الحاج..!!
هو كل حاجة تبع مبارك ؟؟ حتي انت يا برلسكوني هترمي بلاك علي الراجل ؟؟ يعني الراجل فاسد ماشي انما كمان هترمي عليه حريمك ؟؟ يا عم يعني حسني هيعزم عليك بحريم وانت في ايطاليا ؟؟ انت عبيط يااد؟؟ ده انتوا المزز كلها ..ده ايطاليا سوق الجمال علي راي الاغنية يعني جاي تقول ان حسني بيديك حريم ؟؟
وجه اسم مصر وحسني كالعادة في حاجة غريبة وغير مريحة علي الاطلاق وهي قضية المدعوة "روبي" من حريم برلسكوني الكتير قوي واكتر من حريم كريم كمان !!



11- مصري علي قمة ايفرست :

ماشي اهي الحاجة العدلة الوحيدة في كل الاخبار دي اللي اظهرت اسم مصر تاني في صحف عالمية في عهد مبارك الغير مبارك..
بس حتي دي كانت باجتهاد شخصي لحسن حد يفتكر ان مبارك دعمه مثلا ..ابدا مبارك ولا كان يعرف اساسا دي حاجة من شاب باجتهاد شخصي فقط عشان يرفع اسم مصر بدل ما هو نايم كده !




وبعد كده جه عصر ومرحلة ما بعد مبارك وبقينا لحد دلوقتي بنظهر في الجرايد بشكل نفخر بيه بدل احصائيات الشاي بتاعة عمو مبارك !