الفرح الملكي في بلطيم

كلنا شوفنا الزفاف الملكي وابهاره ووقاره وروعته واناقته ..لكن ايه الفرق بينه وبين الفرح المصري العادي الطبيعي في القاعة او في الشارع ؟
في فروقات كتير قوي بينهم مش عشان هو ملكي بس ولكن الموضوع ابعد من كده :





1- الفرح الملكي ممكن ياكلوا قطعة حلويات كمجاملة انما في الفرح المصري البوفيه عبارة عن مجزرة والاطباق بتسقط أكل من كتر ما اتملت تقريبا المجاملة اسلوبها مختلف عندنا بزيادة شوية

2- في الفرح الملكي الامير بيبوس الاميرة بصراحة وخلاص انما في الفرح المصري يقولك "ياريت العريس والعروسة ياكلوا قطعة الجاتوه دي" ويجيبلك حتة صغيرررررة قال يعني الناس مش فاهمة انهم بيبوسوا مش بياكلوا

3- في الفرح الملكي ليه صاحب بيقف "اشبين" ممكن يديله الخاتم انما في الفرح المصري هو مش اشبين هو تحس انه "اشبين الكوم" بيرقص رقصة المجنونة يا با يابا ع المجنونة ويهز في وسطه طول الفرح

4- الفرح الملكي في واحدة شايلة للعروسة الفستان ما في الفرح المصري الواحدة جاية عشان تلقط عريس

5- الفرح الملكي كل مجموعة قاعدة جنب بعض عارفة بعض لان الموضوع متخطط له..في الفرح المصري كل ستة علي طرابيزة تقريبا كل واحد من بلد اساسا كانهم في فيلم الطائرة المفقودة وكل واحد بقصة

6- الفرح الملكي الناس قاعدة هادية..في الفرح المصري الناس قاعدة بتفرك ع الطرابيزة وعايزة تطلع برة وتشرب سيجارة وكأن حد مكتفهم وخانقهم


7- الفرح الملكي مافيهوش فقرة الشربات البايخة اللي العريس فيها بيبقي خايف يوقع العصير علي مراته وكانه بيمشي ع الحبل ومرعوب ليوقع ويبوظ الليلة

8- الفرح الملكي الامير مش بيغني اغنية للعروسة والدي جي مبيسألش يلا فين اصحاب العريس والعروسة لان مافيش دي جي اصلا

9- الفرح الملكي الموسيقي فيه راقية جدا انما الفرح المصري للاسف بقي عبارة عن اسوأ الاغاني بتشتغل ورا بعض واكثر الكلمات اسفافا وكاننا كلنا بياعين في شادر سمك

10- الفرح الملكي مبياخدش وقت كبير لانه مش مصطنع انما الفرح المصري بيضربله خمس ست ساعات كل دقيقة فيه شبه التانية اساسا

11- الفرح الملكي بالدعوة انما الفرح المصري بالدعوة لكن ممكن تلاقي ناس كتير حواليك من الشارع وساعات تلاقي سياح اجانب تقريبا جايين يعملوا دراسة عن الافراح المصرية وكأنك فار تجارب مثلا

12- الفرح الملكي بيشاور الامير والاميرة للناس من الشرفة انما الفرح المصري بيقفوا في النهاية المعازيم يغنوا للعريس والعروسة قبل ما يدخلوا بيتهم اغاني "واطية" غالبا وكأنهم بيذلوهم انهم اتجوزوا

13- بعد الفرح الملكي اخو الامير مبيقولش للامير "المجانين زادوا واحد "

14- في الفرح الملكي المعازيم مبتديش الامير برشامة او عسل ابيض وتقوله اضرب دي يا برنس تبقي في السكلانس

15- في الفرح الملكي تلاقي الاميرة حطت مكياج خفيف جدا انما العروسة المصرية بتتنكر في وجه باليتشو الزمن ناتشو من كتر المكياج

16- في الفرح الملكي كل حاجة محسوبة بالثانية والساعة انما الفرح المصري ساعات النور بيقطع في القاعة

17- في الفرح الملكي مش هتلاقي مجموعة شاربة حشيش او بانجو وقاعدة علي طرابيزة وبتهيص طول الفرح حتي في فقرة البوفيه

18- في الفرح الملكي هم خلاص حافظين بعض اساسا انما في الفرح المصري العريس بعد يومين هيشوف الوش التاني للعروسة

19- في الفرح الملكي مبتسمعش كلمة "عقبالك" طول ما انت ماشي لانهم بيحترموا حرية الفرد والا كان زمان جورج كلوني بيتقالوا عقباك بقالوا سنين وسنين

20- في الفرح الملكي مش هتلاقي العريس كانه مزار سياحي كل الناس عايزة تتصور معاه وعينه تتعمي من فلاش الكاميرا

21- في الفرح الملكي العريس والعروسة بيفضلوا طول اليوم بنشاطهم انما في الفرح المصري العريس والعروسة بيروحوا مهددودين من كتر الرقص والاكل

22- في الفرح الملكي مبتلقيش الكم الخرافي لصاحبات العروسة لانها بتعزم المقربين بس انما في الفرح المصري تحس ان العروسة عارفة جمهورية مصر العربية كلها من كتر المدعوين وكانها بتقول دول ال خمسة وستين صديقة المقربين ..امال البعيدين كام ؟

23- في الفرح الملكي الامير علطول مبتسم للاميرة انما في الفرح المصري تلاقيه عرقان وبيقول دايما ربنا يستر

24- الفرح الملكي فيه هدوء وشياكة ورقة انما الفرح المصري عبارة عن كتلة من الضجيج وكان عربيات اسمنت جوة القاعة وبتفرغ حمولة جنب ودانك لمدة كذا ساعة

25- الفرح الملكي عبارة عن كتلة من الفانيليا الناعمة والفرح المصري طبقين محشي كرنب

26- الفرح الملكي العربيات بتوصله صاج سليم انما الفرح المصري بتوصله بعد ما عربيتك تتصفي من المطبات والبلاعات

27- الفرح الملكي بيتم بكلمتين تلاتة وبسهولة انما الفرح المصري لازم يتفتح معاك تحقيق قبله ويقولك هسأل عليك قال يعني مخبر

28- الفرح الملكي منظم ومتخطط له انما الفرح المصري بنظام "ع البركة وربنا يتمم بخير"

29- الفرح الملكي الديكورات فيه هادية وبسيطة لانهم بيشوفوا ان البساطة وعدم التكلف هي الاناقة انما الفرح المصري لازم تختار فيه حتي لون الترتر اللي في المفرش والورد اللي علي الطرابيزة وتلاقي الطرابيزة والقاعة زحمة بحاجات ملهاش اي تلاتين لازمة

30- الفرح الملكي ليلة العمر انما الفرح المصري ليلة زي كل ليلة

31- الفرح الملكي الاميرة هادية ومتزنة وابتسامتها علطول علي خدها انما في الفرح المصري هو فقرة لتحويل الانسانة الرقيقة لغازية مولد فجأة

32- الفرح الملكي هو فيلم "ذا نوت بوك" والفرح المصري هو فيلم "قصة الحي الشعبي"





مبحبش الافراح وبقولها لو اتسأل ان شالله اموت قتيل او اخش المعتقل وايييييه..