حزب "الحياة بقي لونها بمبي" ضد حزب "قرن الخروب"

انت اي واحد في الصورة اللي فوق دي بالنسبة لمستقبل مصر ؟؟
"الحياة بقي لونها بمبي"؟؟ ولا من حزب "قرن الخروب" ؟؟
بعد الثورة هتلاقي نوعين منتشرين قوي في مصر المتفائل المهيس ع الاخر والمتشائم طحن من مستقبل مصر وكل واحد يغني علي ليلاه وكل واحد منهم في وادي
المتفائل بيبالغ زيادة عن اللزوم في مستقبل مصر اللي لسه ضبابي شوية والمتشائم في قمة المبالغة للي هيحصل برضه وكل واحد ليهم ليه استايل وكل واحد ليه مصطلحات بيستخدمها دايما في كلامه



المتفائل :

المتفائل كل يوم يقرا خبر زفت في الجرنان ويضحك ويقول زي العبيط " كل ده كلام فارغ بكرة تبقي لووووز وهنبقي ولا اوروبا"
تقوله "الاقتصاد المصري بينهار" يقولك" لاااااا بينهار ايه ده بيضحكوا علينا يا عم ده احنا اقتصادنا مافيش زيه هي مصر بتنهار يا ابني؟؟ مستحيل"
"الامن في مصر ضايع قوي اليومين دول" يقولك ..مصر في قمة الامان اليومين دول ولسه هتروق وتحلي يا عم الحاج"
"طيب الاضرارات دي بتعطل البلد شوية" يقولك "لا هو في اضراب بيعطل البلد ؟ دول بس بيخوفونا انما الناس بتاخد حقوقها والخير جاي بالملايين"
تقوله "البلد معادش فيها فلوس كفاية" يقولك "مصر مبيخلصش فيها الخير ابدااااا مصر ولااااااااااادة"
تقوله "طيب في ناس مضرورة قوي وبتفلس اليومين دول" يقولك "ياعم محدش بيموت م الجوع كلها شهرين كمان ونرززززق"


يعني ماشي بطريقة "الحياة بقي لونها بمبي" مع ان لسه مافيش اي مؤشرات علي مستقبل مصر المزهر ده !
هتلاقيه بيسمع الاخبار اللي هو عايزها ويرفض اي خبر فيه سوء او حادثة او ارهاب علي اساس انه مش موجود اصلا او محصلش عشان يكمل مبالغة في مستقبل مصر !



اما المتشائم فده بقي مسخرة وشوف بقي مصطلحاته اللي علطول بيستخدمها في اي حتة ويخض الناس :



1- جملة "هو انت فاكر انها كده خلصت" :

دي جملة دايما المتشائم بيستعملها طول اليوم في اي خبر بيقراه عن حادثة مثلا بتهدي تيجي تقوله "الحمد لله الموضوع خلص علي خير" تلاقيه بيقولك "لاااااا هو انت فاكر انها كده خلصت ؟؟ ده لسه هتكبر قوي ومحدش عارف رايحين علي فين "
تقوله "يا ساتر ليه كده بس ما الحادثة خلصت ومسكوا المجرمين" يقولك "دول مسكوا اللي علي مزاجهم انما لسه المجرمين برة"




2- جملة " دي لسه هتولع" :

دي بقي بيقولها وهو ماسك الجرنان تلاقيه لسه ماسك الجرنان في ايده وفجاة يزعق وينط من ع الكنبة ويقول "اااااه هتوووولع زي ما توقعت..البلد هتولع"
يخلي كل اللي حواليه يحسوا ان امريكا دخلت مصر خلاص الصبح مثلا وفي الاخر تلاقيه خبر عن مخزون استراتيجي لسلعة مثلا او تقرير كده



3- جملة "اللي كنت خايف منه" :

ودي دايما يبدأها بكلمة "اووووووبة" وبعدين يقول "اهو اللي خايف منه حصل يا عم" وبيستعمل المتشائم دايما الكلمة دي لاي حادثة مكتوبة في اي قطاع في مصر
وحتي لو قاعد في ميكروباص تلاقيه فجأة وسط الناس "اووووووبة" يخلي الناس عايزة تجري من الميكروباص



4- جملة "معادش ليها قومة يا معلم" :

دي بقي بيستخدمها في اي تقرير اقتصادي بيقول ان فيه عجز في مصر يروح علطول مطبق الجرنان وخد بالك لازم يروح مطبق الجرنان تحت باطه بسرعة ويقول الجملة دي وساعات يضرب كف علي كف علي حال البلد دلوقتي في وسط الجملة



5- جملة "البلد بترووووح" :

يقولك ياعم البلد بتروووح مننا خلاص ...مش عارف بتروح فين ما احنا قاعدين متيلين في ارابيزها اهو !
هي صابونة وبتبوش ؟؟ يا عم دي بلد كاملة تروح فين صلي ع النبي
وتحس انه بينيمك مغناطيسي وهو بيقولك "بترووووح" كانه بيقولك نااااااااام



6- جملة "جابت ضلفها خلاص يا برنس" :

يحسكك ان مصر دي كشك ام محمد اللي ع الناصية مش بلد مثلا وليها كيان
جابت ضلفها ؟؟ ناقص يقولك هنرش مية قدام مصر عشان نجيب تراوة !!



7- جملة "اشربوااااا بقي" :

قال يعني هو البيه مش مصري معانا وهيشرب !
هم مين اللي يشربوا ؟ ما هو كلنا في نفس البلد ولا احنا بس اللي هنشرب يا عم الحاج وانت قاعد باشا ؟ سيادتك من الكونغو ؟؟



8- الجملة الشهيرة "انتوا لسه شوفتوا حاجة ؟؟ " :

دي بقي اشهر جملة تسمعها اليومين دول خصوصا كل ما تقرب الانتخابات دايما الناس تطلع تقولك انتوا لسه شوفتوا حاجة ؟ده انتوا هتشوفوا ايام اسود من قرن الخروب.
ومعرفش ايه موضوع قرن الخروب ده اللي منتشر قوي ده عكس جملة "البفتة البيضا" !!
ودايما يقول "انتوا" كانه بره مش مننا او احنا شعب تاني في حتة تانية..! شكله تايه يا ولداه !




يعني الواحد يكون في النص ولا متفائل بعبط ولا متشائم بعبط يعني ممكن تفاؤل حذر او تكون "متشائل" زي ما بيقولوا حالة وسطية بين الاتنين.
ولا تكون من اتباع "الحياة بقي لونها بمبي" ولا من حزب "قرن الخروب"..!